Numbers 8

Lao Bible 2012 (ພຣະຄຳພີສັກສິ)

← Chapter 7 Jump to: Chapter 9 →

1ພຣະເຈົ້າຢາເວໄດ້ສັ່ງໂມເຊໄວ້ວ່າ,

2“ຈົ່ງບອກອາໂຣນໃຫ້ຕັ້ງຕະກຽງເຈັດໜ່ວຍຢູ່ເທິງຫລັກຕະກຽງ ໂດຍໃຫ້ແສງໄຟເຍືອງໄປຂ້າງໜ້າ.”

3ອາໂຣນກໍໄດ້ເຊື່ອຟັງ ແລະຕັ້ງຕະກຽງເຍືອງໄປຂ້າງໜ້າຂອງຫລັກຕະກຽງ, ດັ່ງທີ່ພຣະເຈົ້າຢາເວໄດ້ສັ່ງໂມເຊໄວ້.

4ແລະຫລັກຕະກຽງນັ້ນ ແຕ່ລຸ່ມຂຶ້ນເທິງແມ່ນເຮັດດ້ວຍຄຳທີ່ຕີເປັນລວດລາຍ ຕາມແບບທີ່ພຣະເຈົ້າຢາເວໄດ້ສຳແດງໃຫ້ແກ່ໂມເຊ.

5ພຣະເຈົ້າຢາເວໄດ້ບອກໂມເຊວ່າ,

6“ຈົ່ງແຍກພວກເລວີອອກຈາກພວກອິດສະຣາເອນຄົນອື່ນໆ ແລະຊຳລະພວກເຂົາ

7ຕາມພິທີການດັ່ງນີ້: ໃຫ້ໃຊ້ນໍ້າຊຳລະຊິດໃສ່ພວກເຂົາ, ໃຫ້ພວກເຂົາແຖຂົນຕາມຕົນຕົວ ແລະຊັກເຄື່ອງນຸ່ງຫົ່ມຂອງພວກເຂົາ. ແລ້ວກໍຈະຖືວ່າພວກເຂົາບໍ່ເປັນມົນທິນ.

8ຕໍ່ມາໃຫ້ພວກເຂົານຳງົວເຖິກໜຸ່ມໂຕໜຶ່ງ ແລະພືດຜົນເປັນເມັດມາຖວາຍຄູ່ກັນຄື: ແປ້ງເຂົ້າປະສົມກັບນໍ້າມັນໝາກກອກເທດ ແລະໃຫ້ນຳງົວເຖິກໜຸ່ມໂຕໜຶ່ງມາອີກເປັນການຖວາຍລຶບລ້າງບາບ.

9ແລ້ວຈົ່ງເອີ້ນຊຸມຊົນອິດສະຣາເອນທັງໝົດມາເຕົ້າໂຮມກັນ ໂດຍໃຫ້ພວກເລວີຢືນຢູ່ແຖວໜ້າຂອງຫໍເຕັນບ່ອນຊຸມນຸມ.

10ຈົ່ງໃຫ້ພວກເລວີຢູ່ຕໍ່ໜ້າພຣະເຈົ້າຢາເວ ແລະຊົນຊາດອິດສະຣາເອນເອົາມືວາງທີ່ເທິງຫົວຂອງພວກເລວີ,

11ແລ້ວອາໂຣນກໍຈະຖວາຍພວກເຂົາຕໍ່ໜ້າພຣະເຈົ້າຢາເວ ເປັນເຄື່ອງບູຊາແກວ່ງໄປແກວ່ງມາຈາກຊາວອິດສະຣາເອນ ເພື່ອວ່າພວກເລວີຈະເຮັດໜ້າທີ່ຮັບໃຊ້ພຣະເຈົ້າຢາເວ.

12ແລ້ວໃຫ້ພວກເລວີວາງມືລົງເທິງຫົວງົວເຖິກໜຸ່ມສອງໂຕນັ້ນ; ໂຕໜຶ່ງໃຫ້ຖວາຍເພື່ອລຶບລ້າງບາບ ແລະອີກໂຕໜຶ່ງນັ້ນໃຫ້ເຜົາຖວາຍບູຊາດ້ວຍໄຟແກ່ພຣະເຈົ້າຢາເວ ເພື່ອເປັນພິທີຊຳລະພວກເລວີ.

13ຈົ່ງອຸທິດຖວາຍພວກເລວີໃຫ້ເປັນຂອງຖວາຍແກວ່ງໄປແກວ່ງມາ ແກ່ພຣະເຈົ້າຢາເວ ແລະໃຫ້ອາໂຣນກັບພວກລູກຊາຍຂອງລາວເປັນຜູ້ດູແລພວກເຂົາ.

14ໃນທຳນອງນີ້ ໃຫ້ເຈົ້າແຍກພວກເລວີອອກຈາກພວກອິດສະຣາເອນຄົນອື່ນໆ ເພື່ອວ່າພວກເຂົາຈະເປັນຂອງເຮົາ.

15ຫລັງຈາກເຈົ້າໄດ້ຊຳລະແລະອຸທິດຖວາຍພວກເລວີແກ່ເຮົາແລ້ວ ພວກເຂົາຈຶ່ງຈະມີຄຸນສົມບັດເຮັດວຽກງານທີ່ຫໍເຕັນບ່ອນຊຸມນຸມໄດ້.

16ເຮົາໄດ້ໃຫ້ເຈົ້າແຍກເອົາພວກເລວີ ແທນລູກກົກຂອງຊາວອິດສະຣາເອນທຸກຄົນ ແລະພວກເຂົາຈະເປັນຂອງເຮົາແຕ່ຜູ້ດຽວເທົ່ານັ້ນ.

17ເມື່ອເຮົາໄດ້ຂ້າລູກກົກທັງໝົດໃນປະເທດເອຢິບນັ້ນ ເຮົາໄດ້ອຸທິດຖວາຍລູກກົກຂອງຊາວອິດສະຣາເອນແຕ່ລະຄອບຄົວໃຫ້ເປັນຂອງເຮົາ ຕະຫລອດທັງລູກຫົວປີຂອງສັດທຸກໆໂຕດ້ວຍ.

18ບັດນີ້ ເຮົາກຳລັງຮັບເອົາພວກເລວີໄວ້ແທນລູກກົກຂອງຊາວອິດສະຣາເອນ;

19ເຮົາໄດ້ມອບພວກເລວີໃຫ້ອາໂຣນແລະພວກລູກຊາຍຂອງລາວ ເປັນຂອງຖວາຍຈາກຊາວອິດສະຣາເອນ; ເພື່ອໃຫ້ພວກເລວີບົວລະບັດຫໍເຕັນບ່ອນຊຸມນຸມແທນປະຊາຊົນອິດສະຣາເອນທັງໝົດ ແລະເພື່ອປ້ອງກັນພວກເລວີຈາກໄພພິບັດທີ່ຈະມາຖືກພວກເຂົາ ເມື່ອໃດທີ່ພວກເຂົາເຂົ້າມາໃກ້ສະຖານທີ່ສັກສິດເກີນໄປ.”

20ສະນັ້ນ ໂມເຊແລະອາໂຣນພ້ອມກັບປະຊາຊົນອິດສະຣາເອນ ຈຶ່ງໄດ້ອຸທິດຖວາຍພວກເລວີໃຫ້ແກ່ພຣະເຈົ້າຢາເວ ຕາມຄຳສັ່ງຂອງພຣະອົງ.

21ພວກເລວີໄດ້ຊຳລະຕົນເອງແລະຊັກເຄື່ອງນຸ່ງຫົ່ມ ແລ້ວອາໂຣນກໍອຸທິດຖວາຍພວກເຂົາເປັນຂອງຖວາຍແກວ່ງໄປແກວ່ງມາໃຫ້ແກ່ພຣະເຈົ້າຢາເວ. ເພິ່ນໄດ້ປະກອບພິທີຊຳລະໃຫ້ພວກເຂົາຄືກັນ.

22ປະຊາຊົນໄດ້ເຮັດທຸກໆສິ່ງຕໍ່ພວກເລວີ ຕາມທີ່ພຣະເຈົ້າຢາເວໄດ້ສັ່ງໂມເຊໄວ້. ສະນັ້ນ ພວກເຂົາຈຶ່ງມີຄຸນສົມບັດເຮັດວຽກງານໃນຫໍເຕັນບ່ອນຊຸມນຸມ ໂດຍພາຍໃຕ້ການດູແລຂອງອາໂຣນແລະພວກລູກຊາຍຂອງເພິ່ນ.

23ພຣະເຈົ້າຢາເວໄດ້ບອກໂມເຊອີກວ່າ,

24“ຊາວເລວີແຕ່ລະຄົນທີ່ມີອາຍຸ 25ປີ ຂຶ້ນໄປ ຈະຕ້ອງປະຕິບັດໜ້າທີ່ໃນຫໍເຕັນບ່ອນຊຸມນຸມ;

25ເມື່ອອາຍຸຮອດ 50ປີ ແລ້ວຈຶ່ງໃຫ້ພວກເຂົາເຊົາ.

26ຫລັງຈາກນັ້ນແລ້ວ ພວກເຂົາອາດຊ່ວຍພີ່ນ້ອງເລວີຄົນອື່ນໆເຮັດໜ້າທີ່ຮັກສາໃນຫໍເຕັນບ່ອນຊຸມນຸມກໍໄດ້; ແຕ່ຢ່າໃຫ້ພວກເຂົາປະຕິບັດໜ້າທີ່ໂດຍຕົນເອງ. ອັນນີ້ ແມ່ນຂໍ້ບັງຄັບໃນການກຳນົດໜ້າທີ່ໃຫ້ພວກເລວີເຮັດ.”

← Chapter 7 Jump to: Chapter 9 →