Numbers 19

Lao Bible 2012 (ພຣະຄຳພີສັກສິ)

← Chapter 18 Jump to: Chapter 20 →

1ພຣະເຈົ້າຢາເວໄດ້ກ່າວຕໍ່ໂມເຊແລະອາໂຣນວ່າ,

2“ຕໍ່ໄປນີ້ແມ່ນກົດບັນຍັດຂອງພຣະເຈົ້າຢາເວໄດ້ສັ່ງດັ່ງນີ້: ຈົ່ງບອກຊາວອິດສະຣາເອນໃຫ້ນຳງົວແມ່ສີແດງໂຕທີ່ມີສຸຂະພາບດີ ແລະບໍ່ມີຕຳໜິທັງບໍ່ເຄີຍໃຊ້ວຽກຈັກເທື່ອ

3ມາໃຫ້ປະໂຣຫິດເອເລອາຊາ. ຈົ່ງເອົາງົວໂຕນີ້ໄປຂ້າປາດຄໍຢູ່ນອກຄ້າຍຊ້ອງໜ້າເພິ່ນ.

4ໃຫ້ປະໂຣຫິດເອົາເລືອດບາງສ່ວນມາ ໃຊ້ນິ້ວມືຈຸ່ມລົງໃນນັ້ນ ແລະຊິດໄປທາງໜ້າຫໍເຕັນບ່ອນຊຸມນຸມເຈັດເທື່ອ.

5ຈົ່ງເຜົາສັດທັງໂຕເຊັ່ນ: ໜັງ, ຊີ້ນ ແລະເຄື່ອງໃນໄສ້ພຸງຊ້ອງໜ້າປະໂຣຫິດ.

6ແລ້ວໃຫ້ເພິ່ນເອົາໄມ້ສົນສີດາຈຳນວນໜຶ່ງ, ໃບຕົ້ນຫູສົບມັດໜຶ່ງ ແລະດ້າຍສີແດງເສັ້ນໜຶ່ງຖິ້ມໃສ່ໄຟ.

7ຫລັງຈາກນັ້ນແລ້ວ ໃຫ້ເພິ່ນຊັກເຄື່ອງນຸ່ງຫົ່ມ ແລະອາບນໍ້າຊຳລະຮ່າງກາຍແລ້ວ ຈຶ່ງເຂົ້າໄປຢູ່ໃນຄ້າຍພັກໄດ້, ແຕ່ເພິ່ນຍັງເປັນມົນທິນຢູ່ຈົນຮອດຄໍ່າ.

8ຊາຍຜູ້ທີ່ເຜົາງົວນັ້ນຕ້ອງຊັກເຄື່ອງນຸ່ງ ແລະອາບນໍ້າຊຳລະຮ່າງກາຍເໝືອນກັນ ແຕ່ລາວຍັງຈະເປັນມົນທິນຢູ່ຈົນຮອດຄໍ່າ.

9ແລ້ວໃຫ້ຊາຍຜູ້ໜຶ່ງທີ່ບໍ່ເປັນມົນທິນຕາມກົດບັນຍັດໄປເກັບເອົາຂີ້ເຖົ່າຂອງງົວແມ່ ແລ້ວເອົາໄປວາງຮັກສາໄວ້ໃນບ່ອນທີ່ສະອາດນອກຄ້າຍຕາມກົດບັນຍັດ ເພື່ອຊຸມຊົນອິດສະຣາເອນຈະໄດ້ເອົາມາໃຊ້ເປັນນໍ້າຊຳລະມົນທິນເພື່ອລົບລ້າງບາບ.

10ຊາຍທີ່ຊ້ວນຂີ້ເຖົ່ານັ້ນຕ້ອງຊັກເຄື່ອງນຸ່ງຫົ່ມຂອງຕົນ ແຕ່ລາວຍັງຈະເປັນມົນທິນຈົນຮອດຄໍ່າ. ໃຫ້ຊາວອິດສະຣາເອນຫລືຊາວຕ່າງດ້າວທີ່ອາໄສຢູ່ນຳນັ້ນ ປະຕິບັດຕາມລະບຽບການນີ້ທຸກຍຸກທຸກສະໄໝສືບໄປ.”

11“ຜູ້ໃດກໍຕາມທີ່ຈັບບາຍຊາກສົບຈະເປັນມົນທິນຢູ່ເຈັດວັນ.

12ໃນວັນທີສາມ ແລະວັນທີເຈັດລາວຕ້ອງຊຳລະຕົນເອງດ້ວຍນໍ້າ ແລ້ວລາວກໍຈະບໍ່ເປັນມົນທິນ, ແຕ່ຖ້າລາວຫາກບໍ່ຊຳລະຕົນເອງໃນວັນທີສາມ ແລະວັນທີເຈັດ ລາວກໍຍັງເປັນມົນທິນຢູ່.

13ຜູ້ໃດກໍຕາມທີ່ຈັບບາຍຊາກສົບ ແລະບໍ່ໄດ້ຊຳລະຕົນເອງຍັງຈະເປັນມົນທິນຢູ່ ຍ້ອນລາວບໍ່ໄດ້ຊຳລະລາວເອງ. ລາວໝິ່ນປະໝາດຫໍເຕັນສັກສິດຂອງພຣະເຈົ້າຢາເວ ແລະຢ່າຖືລາວວ່າເປັນປະຊາຊົນຂອງພຣະເຈົ້າອີກຕໍ່ໄປ.

14ຖ້າຫາກມີຄົນໜຶ່ງຕາຍໃນຫໍເຕັນແຫ່ງໜຶ່ງ ທຸກຄົນທີ່ຢູ່ໃນຫໍເຕັນ ຫລືເຂົ້າໄປໃນທີ່ນັ້ນ ຈະເປັນມົນທິນຢູ່ເຈັດວັນຕາມກົດບັນຍັດ.

15ໄຫກັບໝໍ້ທຸກໜ່ວຍທີ່ບໍ່ມີຝາອັດ ໃນຫໍເຕັນນັ້ນ ຈະເປັນມົນທິນເຊັ່ນດຽວກັນ.

16ຖ້າຫາກມີຄົນໜຶ່ງຄົນໃດຈັບບາຍຄົນທີ່ຖືກຂ້າຕາຍ ຫລືຕາຍຕາມທຳມະດານອກຫໍເຕັນ ຫລືຖ້າຫາກມີຄົນໜຶ່ງຄົນໃດຈັບບາຍກະດູກຫລືຂຸມຝັງສົບ ຜູ້ນັ້ນຈະເປັນມົນທິນຢູ່ເຈັດວັນ.

17ເພື່ອຊຳລະມົນທິນໃຫ້ເອົາຂີ້ເຖົ່າຂອງງົວແມ່ສີແດງທີ່ເຜົາແລ້ວນັ້ນມາໃສ່ໃນຖ້ວຍ ແລະປົນກັບນໍ້າທີ່ສະອາດ.

18ໃນກໍລະນີທຳອິດ ໃຫ້ຜູ້ໜຶ່ງທີ່ບໍ່ເປັນມົນທິນນັ້ນ ເອົາໃບຕົ້ນຫູສົບມັດໜຶ່ງ ຈຸ່ມລົງໃນນໍ້າແລະຊິດໃສ່ຜ້າເຕັນ, ໃສ່ທຸກໆສິ່ງ ແລະໃສ່ຄົນທີ່ຢູ່ໃນຫໍເຕັນ. ໃນກໍລະນີທີສອງ ໃຫ້ຜູ້ໜຶ່ງທີ່ບໍ່ເປັນມົນທິນຕາມກົດບັນຍັດ ເອົານໍ້າຊິດໃສ່ຜູ້ທີ່ໄດ້ຈັບບາຍກະດູກຄົນ ຫລືຊາກສົບຄົນຕາຍ ຫລືຂຸມຝັງສົບ.

19ໃນວັນທີສາມ ແລະວັນທີເຈັດໃຫ້ບຸກຄົນຜູ້ທີ່ບໍ່ເປັນມົນທິນຊິດນໍ້າໃສ່ຜູ້ເປັນມົນທິນ. ໃນວັນທີເຈັດໃຫ້ລາວຊຳລະບຸກຄົນນັ້ນ ຄືຜູ້ທີ່ຫລັງຈາກຊັກເຄື່ອງນຸ່ງ ແລະອາບນໍ້າແລ້ວ ບໍ່ເປັນມົນທິນຕາມກົດບັນຍັດເມື່ອຕາເວັນຕົກດິນ.

20ຄົນໃດທີ່ເປັນມົນທິນ ແລະບໍ່ໄດ້ຊຳລະຕົນເອງກໍຍັງເປັນມົນທິນຢູ່ ເພາະລາວບໍ່ໄດ້ໃຊ້ນໍ້າຊຳລະຕົນເອງ. ລາວໄດ້ເຮັດໃຫ້ຫໍເຕັນສັກສິດຂອງພຣະເຈົ້າຢາເວເປັນມົນທິນ ແລະຈະບໍ່ໄດ້ເປັນປະຊາຊົນຂອງພຣະເຈົ້າອີກຕໍ່ໄປ.

21ພວກເຈົ້າຕ້ອງປະຕິບັດຕາມລະບຽບການນີ້ທຸກຍຸກທຸກສະໄໝສືບໄປ. ຄົນຜູ້ທີ່ຊິດນໍ້ານັ້ນຕ້ອງຊັກເຄື່ອງນຸ່ງຫົ່ມຂອງຕົນເໝືອນກັນ; ຜູ້ໃດທີ່ແຕະຕ້ອງນໍ້ານັ້ນ ຍັງເປັນມົນທິນຢູ່ຈົນຮອດຄໍ່າຕາມກົດບັນຍັດ.

22ສິ່ງໃດທີ່ຄົນເປັນມົນທິນຈັບບາຍກໍເປັນມົນທິນ ແລະຜູ້ໃດທີ່ຈັບບາຍ ຜູ້ນັ້ນກໍຍັງເປັນມົນທິນຢູ່ຈົນຮອດຄໍ່າ.”

← Chapter 18 Jump to: Chapter 20 →