1 Chronicles 10

Kirundi (Bibliya Yera 1951, 1967 (Burundi))

← Chapter 9 Jump to: Chapter 11 →

1Nukw Abafilisitiya batera Abisirayeli, Abisirayeli barabahunga, bahindikirana ku musozi Gilibowa.

2Abafilisitiya bakinagiza Sauli n’abahungu biwe, bica Yonatani na Abinadabu na Milikishuwa abahungu biwe.

3Urugamba rusugereza Sauli, abanyamiheto bamushingiriza imyampi, bamurandura umutima.

4Maze Sauli abarira ūmutwaje ibirwanishwa, ati Sokōra inkota, uyinsogote, zirya ntakebga zoye kunshikīra, ngo zinshinyagurire. Arik’ ūmutwaje ibirwanishwa aranka, kuko yari yagize ubgoba bginshi. Sauli ni kwo gufata iyiwe nkota, ayīsukako.

5Uno yamutwaza ibirwanishwa abonye ko Sauli apfuye, na we yīsuka kuri rwiwe, arapfa.

6Uko ni ko Sauli yapfuye, n’abahungu biwe batatu, n’ab’ inzu yiwe bose, bagwa hamwe.

7Maz’ ingabo zose z’Abisirayeli zari mu mwonga zibonye ko bahunze, kandi ko Sauli n’abahungu biwe bapfuye, bata ibisagara vyabo, barahunga; Abafilisitiya baraza, baravyinjira.

8Bukeye bgaho, Abafilisitiya baje gukoba imivyimba, basanga Sauli n’abahungu biwe barambaraye ku musozi Gilibowa bapfuye.

9Baramukoba, bajana umutwe wiwe n’ibirwanishwa vyiwe, batuma intumwa mu gihugu c’Abafilisitiya iyo kiva kikagera, ngo bakwize inkuru mu bigirwamana vyabo no mu bantu.

10Ibirwanishwa vyiwe babishira mu rusengero rw’ibigirwamana vyabo, umutwe wiwe bawumanika mu ngoro ya Dagoni.

11Maz’ ab’i Yabeshi‐gileyadi bose bumvise ivyo Abafilisitiya bagiriye Sauli vyose,

12abahizi bose barahaguruka, bakūrah’ umuvyimba wa Sauli bo n’iy’ abahungu biwe, bayijana i Yabeshi, bahamba amagufa yabo musi y’igiti c’ umweloni i Yabeshi nyene, baca barisonzesha kumara imisi ndwi.

13Uko ni ko Sauli yatanze, azize ibicumuro vyiwe yacumuye k’ Uhoraho, kukw atitondeye ijambo ryiwe, kandi kuko yaraguje umuntu azi guhamagara imizimu, ngw amusigurize,

14ntāsiguze Uhoraho; ni co catumye amwica, ingoma yiwe akayiha Dawidi mwene Isayi.

← Chapter 9 Jump to: Chapter 11 →