1 Chronicles 18

Kirundi (Bibliya Yera 1951, 1967 (Burundi))

← Chapter 17 Jump to: Chapter 19 →

1Hanyuma y’ivyo Dawidi anesha Abafilisitiya, abamara igabo, atsinda i Gati n’ibisagara bihakūkira, arabibanyaga.

2Maz’ anesha i Mowabu, Abanyamowabu baca baba abatwarwa ba Dawidi, bakāma bamuzanira amarari.

3Bukeye Dawidi anesha n’ umwami w’i Zoba, Hadadezeri, hafi y’i Hamati, igihe Hadadezeri yaja kugandura igihugu yaganza co ku ruzi Efurate.

4Dawidi amunyaga imikogote y’intambara igihumbi, n’ingabo zigendera ku mafarasi ibihumbi ndwi, n’izigendesha amaguru ibihumbi mirongwibiri; maz’ amafarasi akwega imikogote ayacagagura ibitsi, arikw asigaza ayakwiranye n’imikogote ijana.

5Maz’ Abasiriya b’i Damasiko baje gutabara Hadadezeri umwami w’i Zoba, Dawidi abīcamw’ ingabo ibihumbi mirongwibiri na bibiri.

6Araheza akwiragiza amaboma mu gihugu c’i Siriya gikūkira i Damasiko; nukw Abasiriya baba abatwarwa ba Dawidi, bakāma bamuzanira amarari. Nuk’ Uhoraho yahora aha Dawidi intsinzi aho yaja hose.

7Kandi Dawidi yari yaranyaze abantu ba Hadadezeri inkinzo z’izahabu bari bafise, azijana i Yerusalemu.

8Kandi Dawidi yari yarasahuye imiringa myinshi cane mu bisagara vya Hadadezeri, ic’ i Tibuhati n’ic’ i Kuni; iyo miringa ni yo Salomo yakoresheje ca gikarabiro citwa ikiyaga, na za nkingi, n’ibindi bintu vy’imbombovu vyakozwe mu miringa nyene.

9Bukeye Toyu umwami w’i Hamati yumvise ko Dawidi yanesheje ingabo zose za Hadadezeri umwami w’i Zoba,

10atuma umuhungu wiwe Yoramu ku mwami Dawidi kumuramutsa no kumushima, ko yarwanye na Hadadezeri akamunesha; kuko Hadadezeri yahora arwanya Toyu. Kandi Yoramu yar’ azanye ibintu vy’ amazahabu n’ivy’ amafeza n’ivy’ imiringa vy’uburyo bgose.

11Na vyo nyene umwami Dawidi avyegurira Uhoraho, hamwe n’amafeza n’amazahabu, ayo yagiye asahura mu mahanga yose, mu Banyedomu no mu Banyamowabu no mu Bamoni no mu Bafilisitiya no mu Bamaleki.

12Kandi Abishayi umwana wa Seruwiya atsinda Abanyedomu ibihumbi cumi n’umunani mu Kiyaya c’Umunyu.

13Nukw akwiragiza amaboma muri Edomu, Abanyedomu bose baca baba abatwarwa ba Dawidi. Nuk’ Uhoraho yahora aha Dawidi intsinzi aho yaja hose.

14Nuko Dawidi yaganza Abisirayeli bose, agacira abantu biwe bose imanza ziroranye.

15Kandi Yowabu umwana wa Seruwiya ni we yar’ umugabisha w’ ingabo, Yehoshafati mwene Ahiludi ni we yar’ umwanditsi w’ ivyaja biraba;

16Sadoki mwene Ahitubu na Ahimeleki mwene Abiyatari ni bo bār’ abaherezi; Shavusha ni we yar’ umukarani;

17Benaya mwene Yehoyada ni we yagabisha Abakereti n’Abapeleti; kandi bene Dawidi bār’ abajenama bakuru b’umwami.

← Chapter 17 Jump to: Chapter 19 →