1 Chronicles 16

Kirundi (Bibliya Yera 1951, 1967 (Burundi))

← Chapter 15 Jump to: Chapter 17 →

1Nuko binjiza iyo sandugu y’Imana, bayishira hagati mw ihema Dawidi yari yarayishingiye. Baraheza batangira imbere y’Imana ibimazi vyoswa n’ivy’ ishimwe.

2Nuko Dawidi amaze kwosa ikimazi, no gutanga ibimazi vy’ishimwe, ahezagira abantu mw izina ry’Uhoraho.

3Maz’ agaburira abantu bose b’ Abisirayeli, abagabo n’abagore, umwe‐umwe amuha umutsima n’ inkekera y’inyama n’akarobe kabumbabumbge mu nzabibu zumye.

4Kand’ ashiraho bamwe mu Balewi ngo bashitse igikorwa cabo imbere y’isandugu y’Uhoraho, bibutse abantu ivy’ Uhoraho Imana y’Abisirayeli, bamukengurukire, bamutazire.

5Abo yashizeho n’ aba: Asafu ni we yari mukuru, agakurikirwa na Zekariya na Yaziyeli na Shemiramoti na Yehiyeli na Matitiya na Eliyabu na Benaya na Obed‐edomu na Yeyeli, bafise amakembe n’inanga; kandi Asafu yar’ afise ivyo avuza vyitwa matowazi,

6na Benaya na Yahaziyeli abaherezi bari bafise inzumbete, bakāma babivuza imbere y’iyo sandugu y’isezerano ry’Imana.

7Kur’ uwo musi Dawidi ni ho yatanguriye gushinga ko Asafu na bagenzi be ari bo baririmba batazira Uhoraho.

8Ni mushime Uhoraho, mwambaze izina ryiwe; Mumenyekanishe ibikorwa vyiwe mu mahanga.

9Mumuririmbire, mumuririmbire ishimwe; Muvuge ibikorwa vyiwe vyose bitangaje.

10Mwirate izina ryiwe ryera, Imitima y’abarondera Uhoraho inezerwe.

11Murondere Uhoraho n’inkomezi ziwe; Murondere mu nyonga hiwe ibihe bidashira.

12Mwibuke ibikorwa vyiwe bitangaje yakoze; Ibitangaza vyiwe n’amateka yo mu kanwa kiwe;

13Yemwe ruvyaro rwa Isirayeli umushumba wiwe, Yemwe bana ba Yakobo, abo yatoranije.

14Uhoraho ni we Mana yacu; Amatēka yiwe ari mw isi yose.

15Mwibuke isezerano ryiwe imisi yose, Ijambo yashinze muryibuke uk’ urunganwe rwanyu rugenda rukurikirana gushitsa ibihe igihumbi,

16Ni ryo sezerano yasezeranye na Aburahamu, Indahiro yarahiye Isaka,

17Akayongera kuri Yakobo ayitsindagira, ngw ibe icagezwe, Kuri Isirayeli ngw ibe isezerano ry’intahava;

18Akavuga, ati Ni wewe nzoha igihugu c’i Kanani, Ngo kibe ishamvu mukubitiwe amabango.

19Bāri bakir’ abantu b’imparūrwa, Mbere bāri bake cane, kand’ ar’ inyambukīra muri co,

20Bāyerēra, bava mw ihanga baja mu rindi, Bava ku mwami umwe baja mu bundi bgoko.

21Ntiyakundira umuntu n’umwe kw abazingirikira, Mbere yahannye abami ababahōra,

22Ati Ntimukore ku bo narobanuje amavuta, Ntimugire ico mugira abavugishwa nanje.

23Yemwe abari mw isi mwese, muririmbire Uhoraho, Mumenyekanishe agakiza kiwe uko bukeye.

24Mwamamaze mu mahanga ubgiza bgiwe, N’ibikorwa bitangaje yakoze muvyamamaze mu moko yose.

25Kuk’ Uhoraho ahambaye, abereye gushimwa cane: N’uw’ igitinyiro kuruta ibigirwamana vyose.

26Kukw ibigirwamana vy’amahanga vyose ar’ ubusa, Arik’ Uhoraho ni we yaremye amajuru.

27Icubahiro n’ububasha bir’ imbere yiwe, Ubushobozi n’akanyamuneza bir’ ah’ aba.

28Yemwe miryango y’amahanga, mwaturire Uhoraho, Mwaturire Uhoraho ingen’ afise icubahiro n’inkomezi.

29Mwaturire Uhoraho ingen’ izina ryiwe ribereye icubahiro; Muze imbere yiwe muzanye ishikanwa. Musenge Uhoraho mwubashe, mushazishije ukwera.

30Yemwe abari mw isi mwese, muhindire agashitsi imbere yiwe: Isi na yo irashimangiye, ntishobora kunyiganyiga.

31Ijuru ni rinezerwe, isi n’ihimbarwe, Ni bavuge mu mahanga, bat’ Uhoraho arahangamye.

32Ikiyaga ni kibomborane bo n’ ibicuzuye, Indimiro n’ibizezemwo ni bivuze impundu;

33Ni ho ibiti vyose vyo mw ishamba bizoririmbishwa n’ akanyamuneza imbere y’ Uhoraho, Kukw agira aze gucira abari mw isi imanza.

34Ni mushimire Uhoraho yukw ari mwiza: Kukw imbabazi ziwe zamah’ ibihe bidashira.

35Muvuge, mut’ Udukize, ewe Mana y’agakiza kacu, Udukoranirize hamwe, udukize amahanga, Kugira ngo dushime izina ryawe ryera, Twirate ishimwe ryawe.

36Uhoraho, Imana y’Abisirayeli, n’ashemagizwe Nk’uko vyamye uhereye kera hose, ugashitsa ibihe bidashira. Nukw abantu bose baritabiriza, bati Amen; batazira Uhoraho.

37Maze kur’ iyo sandugu y’isezerano ry’Uhoraho ahisiga Asafu na bagenzi be, kugira ngo baze bame bashitsa igikorwa cabo imbere yayo na ntaryo, nk’ukw igikorwa gikwiye gukorwa uko bukeye;

38ahasiga na Obed‐edomu na bagenzi be mirongwitandatu n’ umunani; ahasiga na Obed‐edomu mwene Yedutuni na Hosa ngo bayishibamire.

39Maze Sadoki umuherezi, n’abaherezi bagenzi be, abashira kw ihema ry’Uhoraho riri ku mpinga y’umusozi Gibeyoni,

40kugira ngo baze bame bosereza Uhoraho ibimazi ku gicaniro co kuvyoserezako, mu gitondo no ku mugoroba ubudasiba, nk’uko vyari vyaranditswe vyose mu vyagezwe Uhoraho yageze Abisirayeli;

41kandi hamwe na bo ashiraho Hemani na Yedutuni n’abandi bātowe, bavuzwe amazina, kugira ngo bashimire Uhoraho yukw imbabazi ziwe zamah’ ibihe bidashira.

42Kandi Hemani na Yedutuni abo bāri n’ inzumbete n’ivyitwa matowazi vyo kuvuza, n’ibindi vyo kuvuza bijana n’indirimbo z’Imana. Kand’ ashiraho bene Yedutuni ngo barinde irembo.

43Maz’ abantu bose barataha, umuntu wese asubira i we; Dawidi na we asubira i we ngw ahezagire abo mu nzu yiwe.

← Chapter 15 Jump to: Chapter 17 →