1 Chronicles 22

Kirundi (Bibliya Yera 1951, 1967 (Burundi))

← Chapter 21 Jump to: Chapter 23 →

1Maze Dawidi aravuga, at’ Aha ni ho nzu y’Uhoraho Imana, kand’ iki ni co gicaniro co kwoserezakw ibimazi vy’Abisirayeli.

2Nuko Dawidi avuga ko bakoranya abāvuye mu mahanga bari mu gihugu c’Abisirayeli, abagira ababāji bo kubāza amabuye yo kwubaka inzu y’Imana.

3Kandi Dawidi yitegura ivyuma vyinshi vyo gucuramw’ imisumari y’inzugi zo ku marembo, n’ivyo gucuramw’ ivyuma vyo kurumanya ibintu, n’imiringa y’isinzi itogerwa;

4n’ibiti vy’amasederi bitoharūrika, kukw Abasidoni n’Abanyetiro bāzana amasederi menshi kwa Dawidi.

5Dawidi aravuga, at’ Umwana wanje Salomo aracari muto, ntarakura, kand’ ingoro igiye kwubakirwa Uhoraho ikwiye kuba nziza y’agahore, ikavugangwa ikaba rurangiranwa mu bihugu vyose: ni co gituma nkwiye kwitegura ivyayo. Nuko Dawidi yitegura vyinshi cane ataratanga.

6Maz’ ahamagara umuhungu wiwe Salomo, amubarira kuzokwubakira ingoro Uhoraho Imana y’ Abisirayeli.

7Aramubarira, ati Mwana wanje, nari mbisanganywe mu mutima kuzokwubakira ingoro izina ry’Uhoraho Imana yanje.

8Arikw ijambo ry’Uhoraho rinzako, riti Wavishije amaraso menshi, kandi warwanye intambara zihambaye: riti None ntuzokwubakira ingoro izina ryanje, kuko wavishije amaraso menshi kw isi imbere yanje.

9Riti Rāba uzovyara umwana w’umuhungu, azoba umunyamahoro, riti Kandi nzomuha kuba impore hagati y’abansi biwe bose bamukikije; kukw izina ryiwe azokwitwa Salomo; riti Kandi nzoha Ubgisirayeli amahoro n’umutēkāno ku ngoma yiwe.

10Riti Ni we azokwubakira izina ryanje ingoro; riti Kand’ azoba umwana wanje, nanje nzoba se; riti Kandi nzohamangira intebe yiwe mu Bgisirayeli ibihe vyose.

11None rero mwana wanje, Uhoraho abane nawe; aguhe kugira ikiganza ciza, wubake ingoro y’ Uhoraho Imana yawe, nk’uko yabikuvuzeko.

12Uhoraho aguhe ubgenge n’ugutahura, kugira ngo ni yagushikiriza Abisirayeli uz’ ubone kwitondera ivyagezwe vyiwe, Uhoraho Imana yawe.

13Uko ni k’uzogira ubuhirwe, ni wagira umwete ukitondera amabgirizwa n’amatēka Uhoraho yashingiye Abisirayeli, akabishikiriza Mose. Nuko shikama, ushire amanga, ntutinye kandi nturanduke umutima.

14Rāba mu bucumukure bganje niteguriye ingoro y’Uhoraho italanto z’izahabu ibihumbi ijana, n’iz’ ifeza ibihumbi igihumbi, niteguye n’imiringa n’ ivyuma bitogerwa, kukw ar’ isinzi; kandi niteguye n’ibiti n’amabuye; nawe uze wiyongererekw ibindi.

15Kand’ uri n’abakozi benshi cane, ababāji b’amabuye, n’abubatsi, n’ababāji b’ibiti, n’ abahinga b’uburyo bgose bazi gukora igikorwa ic’ ari co cose.

16Rāba amazahabu n’amafeza n’imiringa n’ivyuma ntibigira uko vyoharūrika. None rero shirako, ukore, kand’ Uhoraho abane nawe.

17Dawidi abarira n’abaganwa bose b’Abisirayeli ngo baze bafashe umuhungu wiwe Salomo,

18ati Mbeg’ Uhoraho Imana yanyu ntiri kumwe namwe? Kandi ntabahaye impore impande zose? Kuko yagabuye ab’ inyamo z’iki gihugu mu maboko yanje, kand’ igihugu kimazwe igabo imbere y’Uhoraho n’imbere y’ abantu biwe.

19None rero ni mugire umwete wo kurondeza Uhoraho Imana yanyu imitima yanyu yose n’ubugingo bganyu bgose. Muve hasi rero, mushireko mwubake urusengero rw’ Uhoraho Imana, kugira ngw isandugu y’isezerano ry’Uhoraho, n’ ibintu vyejejwe vy’Imana, muze mubizane, muvyinjize mur’ iyo ngoro izoba yubakiwe izina ry’ Uhoraho.

← Chapter 21 Jump to: Chapter 23 →