1 Chronicles 27

Kirundi (Bibliya Yera 1951, 1967 (Burundi))

← Chapter 26 Jump to: Chapter 28 →

1Ingabo z’Abisirayeli, ukw igitigiri cazo cari kiri, zāgabga n’abakuru bo mu mazu ya ba sekuruza, n’abagaba ibihumbi n’abagaba amajana; zāri zifise n’abakarani babgiririza umwami mu biherereye ku vy’imbu zabo, uko zāgenda zikūrakūranwa uk’ ukwezi gutashe, kumara amezi yose yo mu mwaka; ku rubu rumwe‐rumwe rwarikw ingabo ibihumbi mirongwibiri na bine.

2Yashobeyamu mwene Zabudiyeli ni we yagaba ku rubu rwa mbere rwo mu kwezi kwa mbere; ingabo zo ku rubu rwiwe zār’ ibihumbi mirongwibiri na bine.

3Yar’ uwo mu ba Peresi, kandi ni we yari mukuru w’abagabisha bose b’ingabo bo mur’ ukwo kwezi kwa mbere.

4Dodayi w’Umwahohi ni we yagaba ku rubu rwo mu kwezi kwa kabiri, kandi Mikuloti yar’ umwe wo mu bagabisha bo kur’ urwo rubu; ingabo zo ku rubu rwiwe zār’ ibihumbi mirongwibiri na bine.

5Benaya mwene Yehoyada umuherezi mukuru ni we yar’ umugabisha w’ingabo agira gatatu wo mu kwezi kwa gatatu; ingabo zo ku rubu rwiwe zār’ ibihumbi mirongwibiri na bine.

6Benaya uwo yar’ umwe muri ba bahizi mirongwitatu, kandi yar’ umukuru wabo; kandi Amizabadu umuhungu wiwe, kur’ urwo rubu rwiwe na we yarimwo.

7Asaheli murumuna wa Yowabu ni we yar’ umugabisha agira kane wo mu kwezi kwa kane; Zebadiya umuhungu wiwe ni we yamusubiriye mu gishingo; ingabo zu ku rubu rwiwe zār’ ibihumbi mirongwibiri na bine.

8Shamuhutu Umwisurahi ni we yar’ umugabisha agira gatanu wo mu kwezi kwa gatanu; ingabo zo ku rubu rwiwe zār’ ibihumbi mirongwibiri na bine.

9Ira mwene Ikeshi Umunyatekowa ni we yar’ umugabisha agira gatandatu wo mu kwezi kwa gatandatu; ingabo zo ku rubu rwiwe zār’ ibihumbi mirongwibiri na bine.

10Helesi Umunyapeloni, wo mu Befurayimu, ni we yar’ umugabisha agira indwi wo mu kwezi kw’indwi; ingabo zo ku rubu rwiwe zār’ ibihumbi mirongwibiri na bine.

11Sibekayi Umuhushati wo mu ba Zerahi, ni we yar’ umugabisha agira umunani wo mu kwezi kw’umunani; ingabo zo ku rubu rwiwe zār’ ibihumbi mirongwibiri na bine.

12Abiyezeri w’i Anatoti wo mu Babenyamini ni we yar’ umugabisha agira icenda wo mu kwezi kw’icenda; ingabo zo ku rubu rwiwe zār’ ibihumbi mirongwibiri na bine.

13Maharayi w’i Netofati wo mu ba Zerahi ni we yar’ umugabisha agira icumi wo mu kwezi kw’icumi; ingabo zo ku rubu rwiwe zār’ ibihumbi mirongwibiri na bine.

14Benaya w’i Piratoni wo mu Befurayimu ni we yar’ umugabisha agira icumi na rimwe wo mu kwezi kw’icumi na rimwe; ingabo zo ku rubu rwiwe zār’ ibihumbi mirongwibiri na bine.

15Heludayi w’i Netofati wo mu ba Otiniyeli ni we yar’ umugabisha agira icumi na kabiri wo mu kwezi kw’icumi na kabiri; ingabo zo ku rubu rwiwe zār’ ibihumbi mirongwibiri na bine nyene.

16Kand’ abakuru b’imiryango y’Abisirayeli n’aba: mu ba Reyubeni yari Eliyezeri mwene Zikuri; mu ba Simeyoni yari Shefatiya mwene Mayaka;

17mu ba Lewi yari Hashabiya mwene Kemuweli; mu ba Aroni yari Sadoki;

18mu ba Yuda yari Elihu, umwe wo mu bavukana na Dawidi; mu ba Isakari yari Omuri mwene Mikayeli;

19mu ba Zebuloni yari Ishimaya mwene Obadiya; mu ba Nafutali yari Yeremoti mwene Azuriyeli;

20mu ba Efurayimu yari Hosheya mwene Azaziya; mu gihimba c’umuryango wa Manase yari Yoweli mwene Pedaya;

21mu gihimba kindi c’umuryango wa Manase nyene, kiba i Gileyadi, yari Ido mwene Zekariya; mu ba Benyamini yari Yasiyeli mwene Abuneri;

22mu ba Dani yari Azareli mwene Yerohamu. Abo ni bo bār’ abakuru b’imiryango y’Abisirayeli.

23Ariko Dawidi ntiyaharūra abatarashikana imyaka mirongwibiri, kuk’ Uhoraho yavuze yukw azogwiza Abisirayeli, bakangana n’inyenyeri zo kw ijuru.

24Yowabu umwana wa Seruwiya atangura guharūra ariko ntiyarangiza; ukwo guharūrwa kwatumye Abisirayeli barakirwa, ni co catumye igitigiri cabo kitandikwa mu gitabo c’ivyo ku ngoma y’umwami Dawidi.

25Azimaveti mwene Adiyeli ni we yar’ umukuru yajejwe ububīko bg’i bgami; Yonatani mwene Uziya ni we yar’ umukuru yajejwe ibigega biri mu misozi no mu bisagara no mu mihana no mu maboma;

26Eziri mwene Kelubu ni we yaganza abarimyi bākora mu ndimiro;

27Shimeyi w’i Rama ni we yar’ umukuru yajejwe imirima y’imizabibu; Zabudi w’i Shifimu ni we yar’ umukuru yajejwe ivy’ inzabibu zamuwe zo gukānyamwo vino;

28Bayali‐hanani w’i Gederi ni we yar’ umukuru yajejwe ivy’ imyelayo n’imisukomora yo mu biyaya; Yowasi ni we yar’ umukuru yajejwe ububīko bg’amavuta ya elayo;

29Shiturayi w’i Sharoni ni we yar’ umutongore w’amasho yar’ i Sharoni nyene; kandi Shafati mwene Adulayi ni we yar’ umutongore w’ amasho yari mu biyaya;

30Obili w’Umwishimayeli ni we yar’ umubgiriza w’ingamiya; Yedeya w’i Meronoti ni we yar’ umubgiriza w’indogoba;

31Yazizi Umuhaguri ni we yar’ umubgiriza w’imikuku. Abo bose ni bo bāri bajejwe ivy’ itunga ry’umwami Dawidi.

32Yonatani se wabo wa Dawidi ni we yar’ umujanama, kandi yar’ umuntu w’umunyabgenge, yari n’umukarani; Yehiyeli mwene Hakimoni ni we yarera abana b’ umwami;

33Ahitofeli ni we yar’ umujanama w’umwami; Hushayi Umwaruki yar’ umukunzi w’ umwami;

34Yehoyada mwene Benaya na Abiyatari ni bo bāsubiye mu gishingo ca Ahitofeli; kandi Yowabu ni we yar’ umugabisha w’ingabo z’umwami.

← Chapter 26 Jump to: Chapter 28 →