1 Chronicles 29

Kirundi (Bibliya Yera 1951, 1967 (Burundi))

← Chapter 28 Jump to:

1Maz’ umwami Dawidi abarira ikoraniro ryose, at’ Umuhungu wanje Salomo, ari we nyene Imana yatoranije, aracari muto, ntarakura, na co igikorwa ari kinini; kukw iyo ngoro itazoba iy’ abantu, arikw izoba iy’ Uhoraho Imana.

2Jewe niteguye ivy’ iyo ngoro y’Imana yanje uko nshoboye kwose; narondeye amazahabu yo gukoramw’ ibintu vy’amazahabu nyene, n’amafeza y’ivy’ amafeza nyene, n’imiringa y’ivy’ imiringa, n’ivyuma vy’ibintu vy’ivyuma, n’ibiti vyo gukūramw’ ibintu vy’ibibāzano; niteguye n’utubuyenge twitwa shohamu, n’utundi tubuyenge two kuzorumikwa mw izahabu, n’utundi twitwa puku, n’utundi tujererenze amabara, mbere utubuyenge tw’uburyo bgose tw’igiciro kinini; niteguye n’amabuye yitwa marimari atagira akagero.

3Kandi rero, kubg’ urukundo nkunze iyo ngoro y’Imana yanje, har’ itunga ryanje nari mfise ry’amazahabu n’amafeza, na vyo ndabihaye iyo ngoro y’Imana yanje, bigereke ku vyo niteguriye iyo ngoro yera vyose;

4ntanze amazahabu yavuye i Ofiru italanto ibihumbi bitatu, n’amafeza aramuye italanto ibihumbi ndwi, vyo kwomeka kur’ iyo ngoro imbere;

5ayo mazahabu ndayatanze kuzokoramw’ ibintu vy’amazahabu nyene, n’ayo mafeza kuzokoramw’ ivy’ amafeza nyene, kugira ngw abacuzi b’abahinga babikūremw’ ibintu vy’uburyo bgose. None rero ni nde yemeye gutanga ivyiwe agashikanira Uhoraho uyu musi?

6Maz’ abakuru b’amazu ya ba sekuruza, n’abaganwa b’imiryango y’Abisirayeli, n’abagabisha bāgaba ibihumbi n’abāgaba amajana, n’ababgiriza bājejwe ivy’ ibikorwa vy’umwami, bashikana n’umutima ukunze;

7batanga amazahabu italanto ibihumbi bitanu, n’ayandi y’intete zitwa dariki ibihumbi cumi, n’amafeza italanto ibihumbi cumi nyene, n’imiringa italanto ibihumbi cumi n’ umunani, n’ivyuma italanto ibihumbi ijana, kugira ngo bikoreshwe igikorwa c’iyo ngoro y’Imana.

8Kand’ abāri bafise utubuyenge tw’igiciro kinini baradutanga, badushira mu bubīko bg’ivy’ iyo ngoro y’Uhoraho, bgāri bujejwe Yehiyeli Umugerushoni.

9Maz’ abantu bagira akanyamuneza ko gutanga bivuye mu mitima, kuko bashikaniye Uhoraho n’ imitima ishize icīra, babikunze rwose; kand’ umwami Dawidi na we anezerwa akanyamuneza kenshi.

10Ni co catumye Dawidi ashimira Uhoraho imbere y’ikoraniro ryose, akavuga, at’ Ewe Uhoraho, Mana ya sogokuruza wacu Isirayeli, ur’ uwo guhimbazwa ibihe bitazoshira.

11Uhoraho, ubukuru n’ubushobozi n’icubahiro n’ inganji n’igitinyiro n’ivyawe; kukw ibiri mw ijuru n’ibiri mw isi vyose ar’ ivyawe; ubgami n’ubgawe, ewe Uhoraho, kandi ni wewe ushizwe hejuru ng’ube ūsumba vyose.

12Ubutunzi n’icubahiro ni wewe vyandurukako, kandi ni wewe uganza vyose; mu kuboko kwawe harimw’ ububasha n’inkomezi; kandi ni wewe ushobora guha bose icubahiro n’inkomezi.

13None rero, Mana yacu, turagukengurukiye, duhimbaje izina ryawe ry’icubahiro.

14Ariko jewe n’inda n’indēsho, nar’ iki, twe n’abantu banje, vyotumye dushobora gushikana n’imitima ikunze durtyo? Kuko vyose biva kuri wewe, kand’ ivyawe akaba ari vyo tuguhayeko.

15Kukw imbere yawe tur’ akavantara n’abātsi b’indaro, nk’uko ba sogokuruza bose bāri bameze; imisi yacu tumara kw isi ihwanye n’igitūtu, kandi nta vyizigiro dufise.

16Ewe Uhoraho Mana yacu, ibi bintu vyose twiteguye kukwubakishiriza ingoro y’izina ryawe ryera, biva mu kuboko kwawe, kandi vyose n’ivyawe.

17Kandi Mana yanje, nzi yuk’ usuzuma umutima, kandi k’uhimbarwa n’ubugororotsi. Nanje nshikanye ibi bintu vyose bivuye mu mutima ugororotse. Kand’ ubu ngize akanyamuneza kubona abantu bawe bari hano bagushikanira n’imitima ikunze.

18Ewe Uhoraho, Mana ya ba sogokuruza bacu Aburahamu na Isaka na Isirayeli, uze wame ukomeza mu mitima y’abantu bawe iyo migabo n’ivyo vyiyumviro, kandi wame werekeje imitima yabo kuri wewe.

19Kand’ umuhungu wanje Salomo umuhe kwitondera ivyagezwe vyawe n’ amabgirizwa yawe n’ivyo washinze, kugira ngw avyitondere n’ umutima wose, kand’ akore n’ivyo vyose, yubake n’iyo ngoro niteguye ivyayo.

20Dawidi araheza abarira iryo koraniro ryose, at’ Enda ni muhimbaze Uhoraho Imana yanyu. Nukw ikoraniro ryose bahimbaza Uhoraho Imana ya ba sekuruza, bunamika amaso, bakubita inkoro hasi imbere y’Uhoraho n’imbere y’umwami.

21Bukeye bgaho bazanira Uhoraho ibimazi, batanga n’ivyo kumwosereza, amapfizi igihumbi, n’amapfizi y’intama igihumbi nyene, n’imyagazi y’intama igihumbi, babitangana n’amashikanwa y’ibiturire ukw agendana na vyo; batanga n’ibindi bimazi vyinshi cane kubg’ Abisirayeli bose.

22Uwo musi bararya baranywa bar’ imbere y’Uhoraho, bafise akanyamuneza kenshi. Maze bongera kwimika Salomo umuhungu wa Dawidi ubugira kabiri, ngw abe umwami, bamurobanuza amavuta imbere y’Uhoraho ngw abe segaba, na Sadoki ngw abe umuherezi.

23Nuko Salomo avyagira ku ntebe y’ubgami ishinzwe n’Uhoraho, ar’ umwami mu gishingo ca se Dawidi; agira ikiganza ciza, kand’ Abisirayeli bose baramwumvira.

24Abaganwa bose n’abantu b’abahizi, bo n’abana bose b’umwami Dawidi, bakomera amashi umwami Salomo.

25Uhoraho akuza Salomo cane imbere y’Abisirayeli bose, amuha icubahiro c’ubgami kitīgeze kuba ku mwami n’umwe mu bamwītangiye imbere mu Bisirayeli.

26Dawidi mwene Isayi yaganje Abisirayeli bose.

27Igihe yamaze ku ngoma aganza Abisirayeli yar’ imyaka mirongwine, kuko yamaze imyaka ndwi aganziriza i Heburoni, akamara n’iyindi mirongwitatu n’itatu i Yerusalemu.

28Atanga yīsāziye neza, ageze mu zabukuru, ar’ umutunzi n’umunyacubahiro; maz’ umuhungu wiwe Salomo asubira ku ngoma yiwe.

29Ivyādonzwe ku mwami Dawidi, uhereye ku ca mbere ugashitsa ku c’imperēra, biranditswe mu vyādonzwe na Samweli kamenyi, no mu vyādonzwe na Natani yavugishwa n’Imana, no mu vyādonzwe na Gadi kamenyi,

30hamwe n’ivyabaye ku ngoma yiwe vyose, n’ivy’ ubuhizi yakoze, n’ ivyabaye kuri we no ku Bisirayeli, no ku bami bose bo mur’ ivyo bihugu.

← Chapter 28 Jump to: