1 Chronicles 21

Kirundi (Bibliya Yera 1951, 1967 (Burundi))

← Chapter 20 Jump to: Chapter 22 →

1Bukeye Satani ahagurukira Abisirayeli, asunika Dawidi ngw abaharūre.

2Maze Dawidi abarira Yowabu n’abagabisha b’ ingabo, ati Ni mugende muharūre Abisirayeli muhereye i Beri‐sheba mugashitsa i Dani, muheze mubingarukanire, kugira ngo mmenye igitigiri cabo.

3Yowabu aramwishura, at’ Uhoraho n’agwiririkanye abantu biwe, barute uko bari basanzwe bangana ibihetangabo ijana; ariko ga mwami wanje nyen’ ingoma, abo bose ntibār’ abantu bawe? None n’iki kiguteye kugomba ikintu nk’ico ga mwami wanje? N’iki gitumye ukwegera Abisirayeli?

4Arikw ijambo ry’umwami rinesha irya Yowabu. Nuko Yowabu aragenda, anyuragira mu Bgisirayeli hose, araheza agaruka i Yerusalemu.

5Bukeye Yowabu ashikiriza Dawidi igitigiri c’abantu bāharūye: Abisirayeli bose bazi kurwanisha inkota bār’ ibihumbi igihumbi n’ibindi bihumbi ijana; Abayuda na bo bār’ ibihumbi amajana ane na mirongwirindwi, abazi kurwanisha inkota nyene.

6Arikw Abalewi n’Ababenyamini ntiyabaharūyemwo, kukw ijambo ry’umwami ryari ryamutuntuje.

7Maz’ ico kintu gitera Imana umwikomo, ni co catumye ihana Abisirayeli.

8Nuko Dawidi abarira Imana, ati Nācumuye cane ku vyo nakoze ivyo; ariko none, ndakwinginze, kūrah’ ibigabitanyo vyanje, jewe umusavyi wawe, kuko nakoze ivy’ ubujuju rwose.

9Uhoraho abarira Gadi, kamenyi wa Dawidi,

10ati Genda ubarire Dawidi, ut’ Uku ni k’Uhoraho agize, ut’ Agushize imbere ibihano bitatu; uti Hitamwo kimwe muri vyo; ut’ Abe ari co aguhanisha.

11Nuko Gadi aja kwa Dawidi, aramubarira, at’ Uku ni k’Uhoraho agize, ngo Hitamw’ ico ugomba;

12ar’ imyaka itatu y’ inzara, cank’ amezi atatu yo kugesezwa n’abansi banyu, inkota yabo ikabashikako, cank’ imisi itatu mutewe n’inkota y’Uhoraho, ari yo kīza kizoba giteye mu gihugu, umumarayika w’Uhoraho akagenda ageseza hose mu gihugu c’i Bgisirayeli. None rero vuga ico nja kwishura Iyantumye.

13Dawidi yishura Gadi, ati Ndagowe rwose: ni mpfume nkorokera mu maboko y’Uhoraho, kukw imbabazi ziwe ari nyinshi cane; ariko noye gukorokera mu maboko y’ abantu.

14Nuk’ Uhoraho atērēra Abisirayeli ikīza, hapfa abagabo mu Bisirayeli ibihumbi mirongwirindwi.

15Imana ituma umumarayika i Yerusalemu ngw ahageseze; maz’ akigira ngw ahageseze, Uhoraho aravyitegereza, arīgarura, abuza ivyo vyago, abarira uwo mumarayika yageseza, ati Birahaye: garukana ukuboko kwawe. Kand’ uwo mumarayika w’ Uhoraho yar’ ahagaze i ruhande y’imbuga ya Orunani Umuyebusi.

16Dawidi yunamuye amaso, abona uwo mumarayika w’Uhoraho ahagaze mu kirēre, hagati y’isi n’ijuru, asokōye inkota ayibanguriye Yerusalemu. Maze Dawidi n’abakuru, bambaye amagunira, baca barapfukama, barūnama.

17Dawidi abarira Imana, ati None si jewe nageze kw abantu baharūrwa? Erega ni jewe nacumuye, ni jewe nakoze nabi; arikw izi ntama zo zakoze iki? Ndakwinginze, Uhoraho Mana yanje, ukuboko kwawe abe ari jewe kurwanya, bo n’inzu ya data; ariko kwoye kurwanya abantu bawe, ngw ikīza abe ari bo gitera.

18Maz’ uwo mumarayika w’ Uhoraho abarira Gadi ngw abgire Dawidi, adūge yubakire Uhoraho igicaniro ku mbuga ya Orunani Umuyebusi.

19Nuko Dawidi yumvise ijambo rya Gadi, iryo yamubariye mw izina ry’Uhoraho, aradūga.

20Orunani akebutse, abona uwo mumarayika; abahungu biwe ukw ari bane baca barinyegeza. Kandi Orunani yarikw arahūra ingano.

21Nuko Dawidi aja kwa Orunani; Orunani agize ngw ararāba, abona Dawidi; ava ku mbuga, arenga irembo, akubita inkoro hasi imbere yiwe, aramwunamira.

22Maze Dawidi abarira Orunani, ati Mpa aha hantu har’ ikibuga, ndahubakire Uhoraho igicaniro; tuhagure igiciro kihamaze, kugira ngw ikīza kive mu bantu.

23Orunani yishura Dawidi, ati N’uhatware mwami wanje nyen’ ingoma, uhagire uk’ ugomba; rāba nguhaye n’ inka kw ibimazi vyo kwosa, n’ibisekuzo zikoresha mubigire inkwi, n’ingano kw ishikanwa ry’amafu; vyose ndabitanze.

24Umwami Dawidi yishura Orunani, ati Na mba: turabigura, nguhe igiciro bimaze cose; singomba gutwara ivyawe ngw abe ari vyo nshikanira Uhoraho, canke ngo ndamwosereze ibimazi ata co binkeheje.

25Nuko Dawidi agura ico kibanza na Orunani, amugerera izahabu ku munzane irivye shekeli amajana atandatu.

26Maze Dawidi ahubakira Uhoraho igicaniro, ahosereza ibimazi, atanga n’ ibimazi vy’ishimwe, yambaza Uhoraho; Uhoraho amwishurisha kurekura umuriro, utibukira kur’ ico gicaniro yosherejekw ibimazi.

27Maz’ Uhoraho abarira uwo mumarayika, asubiza inkota yiwe mu rwubati.

28Kuva ico gihe Dawidi ashikanira ibimazi kur’ iyo mbuga ya Orunani Umuyebusi, kuko yabonye k’Uhoraho ari ho yamwishuriye.

29Kukw ihema ry’Uhoraho Mose yakoreye mu bugaragwa, n’igicaniro co kwoserezakw ibimazi, vyari ku mpinga y’umusozi Gibeyoni.

30Ariko Dawidi ntiyubahuka kuja imbere y’ico gicaniro ngw asiguze Imana, kuko yatinya inkota y’umumarayika w’ Uhoraho.

← Chapter 20 Jump to: Chapter 22 →