1 Chronicles 11

Kirundi (Bibliya Yera 1951, 1967 (Burundi))

← Chapter 10 Jump to: Chapter 12 →

1Bukeye Abisirayeli bose bakoranira hamwe i Heburoni, baja kwa Dawidi, baramubarira, bat’ Ehe rāba, tur’ akara kamwe n’ amaraso amwe.

2Kandi mu bihe vya kera, hamwe Sauli yar’ umwami, ni wewe wajana Abisirayeli gutabara, mugatabarukana. Kand’ Uhoraho Imana yawe yarakubgiye kw ari wewe uzoragira abantu biwe b’Abisirayeli, kandi k’uzoba segaba wabo.

3Uko ni kw abashingantahe bose b’Abisirayeli bāshengereye umwami i Heburoni; nuko Dawidi asezeranira na bo isezerano imbere y’ Uhoraho i Heburoni nyene; bamwimikisha amavuta ngw abe umwami w’Abisirayeli, nk’ukw ijambo ry’Uhoraho riri, iryo yavugiye muri Samweli.

4Maze Dawidi n’Abisirayeli bose baja gutera i Yerusalemu, ari ho i Yebusi, kand’ Abayebusi, ari bo nyene b’inyamo z’ico gihugu, ni ho bāba.

5Maz’ ab’i Yebusi babarira Dawidi, bati Ntuzopfa ushitse ngaha. Ariko Dawidi atsinda iboma ry’i Siyoni, ari ho hāciye hahinduka umurwa wiwe.

6Maze Dawidi aravuga, at’ Ūzotanga abandi kunesha Abayebusi ni we azoba umukuru n’umugabisha. Maze Yowabu umwana wa Seruwiya aradūga, atanga abandi kubashikīra, aca amugira mukuru.

7Nuko Dawidi aba mur’ iryo boma, ni co catumye bahīta Umurwa wa Dawidi.

8Yubaka ico gisagara hirya no hino yawo, uhereye ku ruzitiro rw’i Milo n’impande zose; Yowabu na we asana ibice vyaco vyari bisigaye.

9Nuko Dawidi arushiriza kuba agahambaye, kuk’ Uhoraho Nyen’ ingabo yari kumwe na we.

10Aba ni bo bāsumba abandi mu bahizi ba Dawidi, bakerekana ubuhizi bgabo kuri we, bagashigikira ingoma yiwe, bagafatanya n’Abisirayeli bose kumwimika, nk’ukw ijambo ry’Uhoraho riri, iryo yavuze ku Bisirayeli.

11Ngaba abahizi Dawidi yar’ afise, nk’ukw igitigiri cabo kiri. Yashobeyamu Umunyahakimoni, ni we yar’ umukuru wa bamwe batatu; ni we yarāgūriye icumu abantu amajana atatu, abahindikiranya umusi umwe.

12Uwa kabiri kuri we muri ba bahizi batatu ni Eleyazari mwene Dodo Umwahohi.

13Yari kumwe na Dawidi i Pasi‐damimu, igihe Abafilisitiya bakoraniyeyo babateye, barumanira ku murima wa sayiri; nukw ingabo zihunga Abafilisitiya.

14Ariko bo bīhagararira muri wa murima, barawurwanira, bica Abafilisitiya; nuk’ Uhoraho atanga intsinzi ikomeye, arabakiza.

15Umusi ur’ izina batatu bo muri bamwe mirongwitatu b’abahizi baramanuka, baja kuri ca gitandara iyo Dawidi ari, muri rya senga ry’i Adulamu; kand’ ingabo z’Abafilisitiya zari zishagaje ku mwonga Refayimu.

16Ico gihe Dawidi yari mw isenga, kandi hār’ insago z’Abafilisitiya i Betelehemu.

17Dawidi yumva akumbuye amazi yaho; aravuga, at’ Icompa nkabona uwompa ku mazi y’iriba ryo kw irembo ry’i Betelehemu, nkayanywa!

18Maze bamwe batatu baca mu ngabo z’ Abafilisitiya, bavoma amazi mur’ iryo riba ryo kw irembo ry’i Betelehemu, barayazana, bayaha Dawidi; ariko yanka kuyanywa, ayavyagiza imbere y’Uhoraho.

19Aravuga, ati Mana yanje, ntibikabeho ko nokora ntyo! Ndābe nnywe amaraso y’aba bantu bahevye amagara yabo? Kuko mu kuyazana bahevye amagara yabo. Ni co catumye yanka kuyanywa. Ivyo ni vyo vyakozwe na ba bandi batatu b’abahizi.

20Kandi Abishayi murumuna wa Yowabu ni we yar’ umukuru wa bamwe mirongwitatu. Yarāgūriye icumu abantu amajana atatu, arabahindikiranya, aronka izina rya rurangiranwa mur’ abo mirongwitatu.

21Yaravugangwa mur’ abo mirongwitatu nyene, bituma agirwa umukuru wabo. Ariko rero ntiyashikīra ba bandi batatu ba mbere.

22Kandi na Benaya mwene Yehoyada, umuntu w’umuhizi w’i Kabuseli, na we yari yarakoze ivy’ ubutōre; ni we yishe bene Ariyeli w’i Mowabu; kandi yaramanutse yicira intambge mw isenga, ku musi shelegi yar’ iguye.

23Yishe n’Umunyegiputa, kandi yar’ umugabo muremure cane, uburebure bgiwe bgar’ amatambge atanu y’ukuboko uciriye mu nkokora; uwo Munyegiputa yar’ afise icumu mu minwe, uruti rwaryo rwāngana n’umwaro ujishirwakw impuzu; ariko we amanuka iy’ ari atwaye ubuhiri gusa; amushikura iryo cumu, ararimwicisha.

24Ivyo ni vyo Benaya mwene Yehoyada yakoze, aronka izina rya rurangiranwa muri ba bahizi mirongwitatu.

25Yaravugangwa mur’ abo mirongwitatu nyene, ariko ntiyashikīra ba bandi batatu ba mbere. Maze Dawidi amugira umukuru w’abashibamyi biwe.

26Kand’ abahizi bo mu ngabo ziwe bar’ aba: Asaheli murumuna wa Yowabu, na Eluhanani mwene Dodo w’i Betelehemu;

27na Shamoti w’i Harori, na Helezi w’i Peloni;

28na Ira mwene Ikeshi w’i Tekowa, na Abiyezeri w’i Anatoti;

29na Sibekayi w’i Hushati, na Ilayi w’i Ahohi;

30na Maharayi w’i Netofati, na Heleda mwene Bayana w’i Netofati nyene;

31na Itayi mwene Ribayi w’i Gibeya h’Ababenyamini, na Benaya w’i Piratoni;

32na Urayi wo ku migezi y’i Gashi, na Abiyeli w’i Arubati;

33na Azimaveti w’i Bahurimu, na Eliyaba w’i Shaliboni;

34na bene Hashemu w’i Gizoni, na Yonatani mwene Shage w’i Harari;

35na Ahiyamu mwene Sakari w’i Harari nyene, na Elifali mwene Uri;

36na Heferi w’i Mekerati, na Ahiya w’i Peloni;

37na Hesiro w’i Karumeli, na Narayi mwene Ezubayi;

38na Yoweli murumuna wa Natani, na Mibuhari mwene Hagiri;

39na Seleki Umwamoni, na Naharayi w’i Beroti, ari we yatwaza Yowabu umwana wa Seruwiya ibirwanishwa;

40na Ira w’i Ituri, na Garebu w’i Ituri nyene;

41na Uriya Umuheti, na Zabadi mwene Ahulayi,

42na Adina mwene Shiza Umureyubeni, yar’ umukuru mu Bareyubeni, kandi yari n’abantu mirongwitatu bari kuri we;

43na Hanani mwene Mayaka, na Yoshafati w’i Mituni;

44na Uziya w’i Ashiterati, na Shama na Yeyeli bene Hotamu w’i Aroweri;

45na Yediyayeli mwene Shimuri, na murumuna we Yoha w’i Tisi;

46na Eliyeli w’i Mahavi na Yeribayi na Yoshaviya bene Elunamu, na Ituma w’Umunyamowabu;

47na Eliyeli na Obedi, na Yasiyeli w’i Mezoba.

← Chapter 10 Jump to: Chapter 12 →