1 Chronicles 28

Kirundi (Bibliya Yera 1951, 1967 (Burundi))

← Chapter 27 Jump to: Chapter 29 →

1Dawidi akoranya abaganwa bose b’Abisirayeli, abaganwa b’imiryango, n’abagabisha b’ingabo zigenda zikūranwa gusasa i bgami, n’abagaba ibihumbi n’abagaba amajana, n’abakuru bāri bajejwe itunga n’amasho vyiwe n’abana biwe, n’abantu b’inkone, n’abahizi, mbere n’abantu bose b’intōre; abakoraniriza i Yerusalemu.

2Maz’ umwami Dawidi arahaguruka, aravuga, ati Ni muntege amatwi, bagenzi banje kandi bantu banje; nari mbisanganywe mu mutima kuzokwubakira isandugu y’isezerano ry’Uhoraho ingoro y’uburuhukiro, ngw iz’ ibēre Imana yacu indava y’ah’ ishira ibirenge; kandi nari niteguye kwubaka.

3Arikw Imana irambarira, iti Si wewe uzokwubakira izina ryanje ingoro, iti Kuk’ ur’ umunyentambara, wagiye uvisha amaraso.

4Ariko rer’ Uhoraho Imana y’Abisirayeli ni jewe yarobanuye mu bo mu nzu ya data bose, ngo mbe umwami w’ Abisirayeli ibihe vyose; kuko yatoranije Yuda, ikamugira umukuru; kandi mu muryango wa Yuda igatoranyamwo inzu ya data; kandi mu bahungu biwe ikaba ari jewe yashimye kugira umwami w’Abisirayeli mwese.

5None mu bahungu banje bose (kandi muzi yuk’ Uhoraho yampaye benshi), yatoranijemw’ umuhungu wanje Salomo kuba ari we azovyagira ku ntebe y’ubgami bg’ Uhoraho, akaganza Abisirayeli.

6Yarambariye, ati Salomo umuhungu wawe ni we azonyubakira ingoro n’urugo rwanje, ati Kuko namutoranije ngw abe umwana wanje, nanje mbe Se.

7Ati Kandi nzokomeza ingoma yiwe gushitsa ibihe vyose, ni yagira umwete wo kwitondera ivyagezwe vyanje n’amatēka nashinze, nk’ukw ameze ubu.

8None rero, mbabaririye imbere y’Abisirayeli bose, ari ryo koraniro ry’Uhoraho, n’ Imana yacu iravyumva: mukwiye kwitondera ivyagezwe vyose vy’ Uhoraho Imana yanyu, mubishirekw imitima, kugira ngo mubone kwamana iki gihugu ciza, muze mukirage n’abana banyu bazovuka hanyuma, ngo kibabere ishamvu ibihe vyose.

9Kandi nawe, mwana wanje Salomo, ukwiye kumenya Imana ya so, uyisabane umutima utunganye kand’ ukunze; kuk’ Uhoraho asuzuma imitima yose, akamenya imigabo yose n’ivyiyumviro vyose. Ni wamurondera uzomubona, ariko ni wamuvako, azoguheba gushitsa ibihe vyose.

10Nuko rero wirinde; kukw ari wewe Uhoraho yatoye kwubaka ingoro ngw imubere ahēra; nuko kovya, ukore.

11Maze Dawidi aha umuhungu wiwe Salomo icitegererezo c’urubaraza rw’urusengero, n’ic’ inyubako yarwo, n’ic’ ububīko bgarwo, n’ic’ ivyumba vyarwo vyo hejuru, n’ivyo muri rwo imbere, n’ic’ ikibanza ca wa mutemere wo guhongerako;

12n’icitegererezo c’ivyo yiyumviriye vyose ku vy’urugo rw’intangāro n’inyubakwa vyo ku ngoro y’Uhoraho, no ku vy’utwumba twose tuyikīkūje, no ku vy’ ububīko vyo kur’ iyo ngoro y’Imana, n’ububīko bg’ibintu vyeguriwe Uhoraho;

13no ku vy’imbu z’abaherezi n’iz’ Abalewi, n’ibikorwa vyose uko bizokorerwa mu ngoro y’Uhoraho, no ku vy’ibintu vyose vy’imbombovu bizokoreshwa muri yo;

14ivy’ amazahabu, amugereraniriza ukw amazahabu yo kubicurishamwo akwiye kungana, n’uko bikwiye kuzokoreshwa kwose; ivy’ amafeza na vyo, amugereraniriza ukw amafeza yo kubicurishamwo akwiye kungana, n’uko bikwiye kuzokoreshwa kwose;

15kand’ amugereraniriza amazahabu yo kuzocurishamw’ ibiterekwakw amatara, bo n’amatara yavyo; igitereko cose n’amatara yaco, amugereraniriza urugero rw’ amazahabu azokoresha; no ku vy’ibitereko vy’ifeza, amugereraniriza amafeza yo kuzocurishamw’ igitereko cose n’amatara yaco, nk’ukw igikorwa c’igitereko cose kiri.

16Kand’ amugereraniriza urugero rw’ amazahabu yo kuzocurishamw’ ameza y’imitsima y’ibiterekerwa, ukw ameza amwe‐amwe ameze; n’ amafeza yo kuzocurishamw’ ameza y’amafeza nyene;

17amuha n’ icitegererezo c’ibintu vyo kwōkōza inyama, n’imibehe n’ibikombe, uko bizocurwa mw izahabu iramuye, amugereraniriza n’urugero rw’ amazahabu yo kuzocurishamw’ inzavya zose, n’urw’ amafeza yo kuzocurishamw’ inzavya z’amafeza nyene;

18n’urugero rw’izahabu iramuye yo kuzokoramw’ igicaniro co kwoserezakw imibavu; amuha n’icitegererezo c’ umukogote w’izahabu, ari wo bishushanyo vy’abakerubi bashanje amababa bagatera igitūtu isandugu y’isezerano ry’Uhoraho.

19Dawidi aravuga, at’ Ivyo vyose nabimenyeshejwe n’ivyanditswe nahawe, bivuye mu kuboko kw’ Uhoraho, ivyo ni vyo bikwiye gukorwa nk’ukw iki citegererezo cavyo kimeze.

20Maze Dawidi abarira Salomo umuhungu wiwe, ati Shikama, ushire amanga, ubikore. Ntutinye, nturanduke umutima, kuk’ Uhoraho Imana, ari yo Mana yanje, azoba ari kumwe nawe; ntazoguhemukira, ntazoguta, gushitsa ah’ ibikorwa vyose bizokorwa kur’ iyo ngoro y’Uhoraho bizorangirira.

21Kand’ ehe rāba, hashinzwe n’imbu z’abaherezi n’ Abalewi z’ibikorwa vyose vy’ingoro y’Imana; kand’ umuntu wese abikunze, kandi w’umuhinga wo gukora igikorwa ic’ ari co cose, azofatanya nawe mur’ ico gikorwa cose; kand’ abashingantahe n’ abantu bose bazohora biteguye kukwumvira rwose.

← Chapter 27 Jump to: Chapter 29 →