1 Chronicles 20

Kirundi (Bibliya Yera 1951, 1967 (Burundi))

← Chapter 19 Jump to: Chapter 21 →

1Nuk’ umwaka utashe, ku gacikamvura, mu gihe abami bākunda kuja mu ntambara, Yowabu ajana ingabo, aragenda atera igihugu c’Abamoni, ashika n’i Raba, arahaziguza. Ariko Dawidi ubgiwe yisigarira i Yerusalemu. Nuko Yowabu atsinda i Raba, arahasangangura.

2Maze Dawidi akūra Milikomu igitsibo mu mutwe, asanga kirivye italanto y’izahabu; kandi cāri gihūnzwek’ utubuyenge tw’ igiciro kinini; nuko bacambika Dawidi mu mutwe. Maze mur’ ico gisagara akūramw’ amasahu menshi cane.

3Asokorora abantu bāri muri co, abashikiriza imisumeno n’ivyuma vy’ibisaganga n’amacabiti. Uko ni ko yagirira ibisagara vyose vy’Abamoni. Nuko Dawidi n’ingabo ziwe zose basubira i Yerusalemu.

4Hanyuma y’ivyo haba intambara yo kurwana n’Abafilisitiya i Gezeri. Sibekayi Umuhushati yica Sipayi, umwe wo mu Barefa: baca barajongoroka.

5Maze hasubira kuba iyindi ntambara yo kurwana n’Abafilisitiya nyene; Eluhanani mwene Yayiri yica Lahumi murumuna wa Goliyati Umunyegati, uruti rw’icumu ryiwe rwangana n’umwaro ujishirwakw impuzu.

6Bukeye hongera kuba intambara i Gati, kandi hariy’ umuntu muremure w’ikigambati, intoke ziwe n’amano vyose na vyose vyari mirongwibiri na bine, kuko yar’ afise indegeya ku ntoke no ku mano; kandi na we yar’ umwe wo mu Barefa.

7Maz’ acokoye Abisirayeli, Yonatani mwene Shimeya, umuhungwabo wa Dawidi, aramwica.

8Abo bar’ abo mu Barefa b’i Gati; bicwa na Dawidi n’abantu biwe.

← Chapter 19 Jump to: Chapter 21 →