1 Chronicles 17

Kirundi (Bibliya Yera 1951, 1967 (Burundi))

← Chapter 16 Jump to: Chapter 18 →

1Nuko Dawidi amaze kwinjira ingoro yiwe, abarira ūvugishwa n’Imana Natani, at’ Ehe jewe mba mu nzu yubakishijwe amasederi, na yo isandugu y’isezerano ry’Uhoraho iba mw ihema gusa.

2Natani yishura Dawidi, ati Kora nk’uko wumva ugomba kwose, kukw Imana iri kumwe nawe.

3Arikw iryo joro nyene ijambo ry’Imana riza kuri Natani,

4riti Genda ubgire umusavyi wanje Dawidi, ut’ Uku ni k’Uhoraho agize, uti Nta nzu uzomwubakira yo kubamwo.

5Ut’ Erega ntiyigeze kuba mu nzu uhereye igihe yadūganiye Abisirayeli gushitsa n’ubu, uti Yaba mw ihema akimukira mu rindi, yimuka mu rusago akaja mu rundi.

6Uti Mbeg’ ahantu hose yagiye agendana n’Abisirayeli bose, uti Har’ aho yigeze kubarira umucamanza w’Abisirayeli uw’ ari we wese, uwo yashizeho kuragira abantu biwe, akamubaza, ati N’iki cababujije kumwubakira inzu y’amasederi?

7Nuko rero, ukw abe ari k’ubarira umusavyi wanje Dawidi, ut’ Uhoraho Nyen’ ingabo, uku ni kw agize, uti Yagukūye mu bgungere, inyuma y’intama, ng’ube segaba w’abantu biwe b’Abisirayeli;

8uti Kandi yagendana nawe aho waja hose, ut’ Arandura abansi bawe bose imbere yawe; uti Kand’ azoguha izina, nk’ukw abandi bahambaye bo mw isi bayafise.

9Uti Kand’ abantu biwe b’Abisirayeli azobagenera ahantu, ahababadike, bahībēre ar’ ahabo bgite, batazohimuka ukundi; uti Kand’ abantu b’ibirara ntibazosubira kubakubagura nk’ubga mbere,

10nko mu bihe yaha abacamanza kuganza abantu biwe b’ Abisirayeli; uti Kand’ azomara igabo abansi bawe bose. Uti Mber’ Uhoraho arakubariye yukw azokugira igisata.

11Uti Hanyuma imisi yawe ni yashika, ukaja kwisangira ba sogokuruza, ut’ Azokwimika umwe mu bana bawe, agusubirire mu gishingo, uti Kand’ azokomeza ingoma yiwe.

12Ut’ Uwo ni we azomwubakira ingoro, uti Kand’ azokomeza intebe yiwe y’ubgami gushitsa ibihe vyose.

13Ut’ Azomubera se, na we amubere umwana; ut’ Ariko ntazomukūrakw imbabazi ziwe nk’uko yazikūye ku wagutanguriye;

14uti Kand’ azomuha kwama ashikamye mu ngoro yiwe no mu bgami bgiwe ibihe vyose; uti Kand’ ingoma yiwe izohora ihangamye ibihe vyose.

15Maz’ ayo majambo yose n’ ukwo kwerekwa kwose, Natani abidondera Dawidi.

16Maz’ umwami Dawidi arinjira, yicara imbere y’Uhoraho, aravuga, at’ Uhoraho Mana, mbega jewe n’inda n’indēsho, n’inzu yanje, nar’ iki, kubona wagiye unzigama gushitsa n’ubu?

17Kand’ ivyo kuri wewe vyari vyoroshe, Mana; ariko non’ uvuga n’ ivy’ inzu yanje jewe umusavyi wawe, vy’igihe kirekire kir’ imbere, ukandāba nk’aho nd’umuntu w’icubahiro cinshi, Uhoraho Mana.

18Non’ ikindi jewe Dawidi nokubgira n’iki, ku vy’icubahiro ngiriwe? Kuk’ uranzi, jewe umusavyi wawe.

19Ewe Uhoraho, ivyo vyose bikomeye wabikoze kubganje jewe umusavyi wawe, nk’uko wavyigombeye mu mutima wawe, kugira ng’ umenyekanishe ivyo bikomeye vyose.

20Ewe Uhoraho, nta wuhwanye nawe, kandi nta yindi Mana iriho twigeze kwumva atari wewe.

21Har’ irindi hanga na rimwe mw isi rihwanye n’abantu bawe b’Abisirayeli, abo wewe, Mana, wisidukiye ugacungura, ukabagira abawe, kugira ngo wironkere izina rya rurangiranwa, ugakora ibikomeye n’ibiteye ubgoba, ukirukana amahanga imbere y’abantu bawe, abo wacunguye ukabakūra muri Egiputa?

22Kukw abantu bawe b’Abisirayeli wabagize abantu bawe wiharije ibihe vyose; kandi nawe, Uhoraho, wababereye Imana.

23Nuko none, Uhoraho, ijambo uvuze kuri jewe umusavyi wawe no ku nzu yanje ni rikomezwe ibihe vyose, kand’ ushitse ivyo uvuze.

24Maz’ izina ryawe ni rikomezwe, rishemagizwe gushitsa ibihe bidashira, baze bavuge, bat’ Uhoraho Nyen’ ingabo ni yo Mana y’Abisirayeli, eka mbere ni yo Mana y’Abisirayeli; kandi n’inzu yanje, jewe umusavyi wawe Dawidi, izokwama itsindaje imbere yawe;

25kuk’ umpishuriye, jewe umusavyi wawe, k’uzonyubakira inzu, ewe Mana yanje; ni co gitumye umusavyi wawe ntinyuka gusenga ntya imbere yawe.

26Kandi none, Uhoraho, ni wewe Mana, kand’ unsezeraniye iryo jambo ryiza, jewe umusavyi wawe.

27None rero, emera guha umugisha inzu y’umusavyi wawe, kugira ngw ihore ihamye imbere yawe ibihe vyose; kukw ari wewe, Uhoraho, uyihaye umugisha; nukw izokwamana umugisha ibihe vyose.

← Chapter 16 Jump to: Chapter 18 →