1 Chronicles 23

Kirundi (Bibliya Yera 1951, 1967 (Burundi))

← Chapter 22 Jump to: Chapter 24 →

1Dawidi amaze gusāza, ageze mu zabukuru, yimika umuhungu wiwe Salomo, ngw abe umwami w’Abisirayeli.

2Maze Dawidi akoranya abaganwa bose b’Abisirayeli, n’abaherezi n’Abalewi.

3Maze baharūra Abalewi uhereye ku bamaze imyaka mirongwitatu no kuja hejuru, igitigiri cabo uko baharūwe umwe‐umwe bār’ ibihumbi mirongwitatu n’umunani.

4Aravuga, ati Kur’ abo, ibihumbi mirongwibiri na bine baze bashikirizwe igikorwa co ku ngoro y’ Uhoraho; abandi ibihumbi bitandatu baze babe abashingantahe n’ abacamanza;

5abandi ibihumbi bine baze babe abashibamyi; n’ abandi ibihumbi bine nyene baze babe abo gutazira Uhoraho, bavuza ibintu nakoresheje vyo kuvuzwa ngo babimutazirishe.

6Maze Dawidi abacamw’ ibice, akurikiye ukw abahungu ba Lewi bāri bari: aba Gerushoni n’aba Kohati n’aba Merari.

7Bene Gerushoni bāri Ladani na Shimeyi.

8Bene Ladani, umukuru yari Yehiyeli, agakurikirwa na Zetamu na Yoweli; n’abo ukw ari batatu.

9Bene Shimeyi bāri Shelomoti na Haziyeli na Harani, ukw ari batatu. Abo ni bo bār’ abakuru bo mu mazu ya Ladani.

10Bene Shimeyi bāri Yahati na Ziza na Yushi na Beriya; abo ukw ari bane bāri bene Shimeyi.

11Yahati ni we yar’ umukuru, uwa kabiri yari Ziza; ariko Yushi na Beriya ntibāgira abana benshi, ni co catumye babasokanya, bakabagira inzu imwe.

12Bene Kohati bāri Amuramu na Isihari na Heburoni na Uziyeli, ukw ari bane.

13Bene Amuramu bāri Aroni na Mose; kandi Aroni yari yarobanuwe kugira ngo yezwe, abe uwera cane, bo n’abahungu biwe, gushitsa ibihe vyose, ngo bame bosereza imibavu imbere y’Uhoraho, bamusukūrire, basabire abantu umugisha mw izina ryiwe ibihe vyose.

14Ariko Mose umuntu w’Imana, abahungu biwe bo bāharūrwa mu muryango wa Lewi.

15Bene Mose bāri Gerushomu na Eliyezeri.

16Mu ba Gerushomu, Shebuweli ni we yari mukuru;

17muri bene Eliyezeri, Rehabiya ni we yari mukuru; mbere Eliyezeri nta bandi bahungu yagira, ariko Rehabiya yar’ afise benshi cane.

18Muri bene Isihari, Shelomiti ni we yari mukuru.

19Muri bene Heburoni, Yeriya ni we yari mukuru, uwa kabiri ni Amariya, uwa gatatu ni Yahaziyeli, uwa kane ni Yekameyamu.

20Muri bene Uziyeli, Mika ni we yari mukuru, uwa kabiri ni Ishiya.

21Bene Merari bāri Mahili na Mushi. Bene Mahili bāri Eleyazari na Kishi.

22Eleyazari apfa adasize agahungu, atar’ abakobga gusa; basāzābo bene Kishi barabarongora.

23Bene Mushi bāri Mahili na Ederi na Yeremoti ukw ari batatu.

24Abo ni bo bākomōtse kuri Lewi, nk’ukw amazu ya ba sekuruza ari; bābaharūye mu mazina umwe‐umwe bakurikiye ukw ayo mazu ya ba sekuruza ari. Ni bo bāgerewe kuzokora igikorwa co ku ngoro y’Uhoraho, uhereye ku bamaze imyaka mirongwibiri no kuja hejuru.

25Kuko Dawidi yari yavuze, at’ Uhoraho Imana y’Abisirayeli yahaye abantu biwe impore, kandi kukw azohora aba i Yerusalemu ibihe vyose,

26Abalewi ntibazosubira kurinda kwikorera ihema n’ibintu vyose vy’ ibikoreshwa vyaryo.

27Kubg’ ijambo ry’imperuka Dawidi yasize avuze, ni co catumye Abalewi baharūrwa uhereye ku bamaze imyaka mirongwibiri no kuja hejuru.

28Igikorwa cabo kwar’ ugufasha aba Aroni mu vyo gukora mu ngoro y’Uhoraho, no mu nyubakwa no mu vyumba, no kwoza ibintu vyose vy’ivyera, n’ ikindi gikorwa ic’ ari co cose co mu ngoro y’Imana;

29no gukora ivy’ imitsima y’ibiterekērwa, n’ivy’ amafu agogōretse yo gushikana kw ishikanwa ry’amafu, ar’ ishikanwa ry’udutsima tutambiwe, ar’ iry’ udukaranzwe, ar’ iry’ ifu ivangishijwe amavuta ya elayo, no kugeresha ingero, no kugeresha metero;

30no kwama bahagarara mu gatondo bakengurukira Uhoraho bamutazira, no ku mugoroba n’uko,

31no mu gihe co gutanga ibimazi vyose vyoserezwa Uhoraho, ari ku masabato, ari mu mboneko z’ ukwezi, ari ku misi mikuru yashinzwe, nk’ukw igitigiri c’ivyo bimazi cāshinzwe, bar’ imbere y’ Uhoraho na ntaryo;

32no gukora ivyo bājejwe vy’ihema ry’ibonaniro, n’ivy’ Ahēra, n’ivya bene wabo aba Aroni, ngo bashitse igikorwa co mu ngoro y’Uhoraho.

← Chapter 22 Jump to: Chapter 24 →