1 Chronicles 15

Kirundi (Bibliya Yera 1951, 1967 (Burundi))

← Chapter 14 Jump to: Chapter 16 →

1Bukeye Dawidi yiyubakira amazu ku murwa wiwe, atunganya n’ah’ isandugu y’Imana izoba, ayishingira ihema.

2Aravuga, ati Ntihaze hagire umuntu wundi arerura isandugu y’Imana atar’ Abalewi, kukw ari bo Uhoraho yatoranije kwama bayirerura, no kumukorera imisi yose.

3Nuko Dawidi akoraniriza Abisirayeli bose i Yerusalemu, kugira ngo baje kudūgana iyo sandugu y’ Uhoraho, bayishire ahantu hayo yayitunganirije.

4Dawidi akoranya aba Aroni n’abandi Balewi.

5Mu ba Kohati, Uriyeli ni we yar’ umukuru, bagenzi be bār’ ijana na mirongwibiri;

6mu ba Merari, Asaya ni we yar’ umukuru, bagenzi be bār’ amajana abiri na mirongwibiri;

7mu ba Gerushoni, Yoweli ni we yar’ umukuru, bagenzi be bār’ ijana na mirongwitatu;

8mu ba Elisafani, Shemaya ni we yar’ umukuru, bagenzi be bār’ amajana abiri;

9mu ba Heburoni, Eliyeli ni we yar’ umukuru, bagenzi be bāri mirongumunani;

10mu ba Uziyeli, Aminadabu ni we yar’ umukuru, bagenzi be bār’ ijana n’icumi na babiri.

11Maze Dawidi ahamagaza Sadoki na Abiyatari abaherezi, ahamagaza n’abo mu Balewi, Uriyeli na Asaya na Yoweli na Shemaya na Eliyeli na Aminadabu;

12arababarira, ati Ni mwebge bakuru mu mazu ya ba sogokuruza b’Abalewi; nuko ni mwiyeze, mwe na bagenzi banyu, kugira ngo mubone kuja kudūgana isandugu y’Uhoraho Imana y’Abisirayeli, muyishire aho nayitunganirije;

13kuko bga bundi mutāyireruye, ni co catumye Uhoraho Imana yacu aduhwikira, kuko tutayigenjeje nk’uko vyashinzwe.

14Nukw abo baherezi n’Abalewi bariyeza, kugira ngo babone kudūgana iyo sandugu y’Uhoraho Imana y’Abisirayeli.

15Bashitseyo, Abalewi barerura iyo sandugu y’ Imana, bashira iminiho yayo ku bitugu, nk’uko Mose yageze, bivuye kw ijambo ry’Uhoraho.

16Maze Dawidi abarira abakuru bo mu Balewi gutora abaririmvyi mu b’i wabo, ngo bazane ivyo kuvuza, amakembe n’inanga n’ivyitwa matowazi, babivuze baririmbana umunezero.

17Nukw Abalewi batora Hemani mwene Yoweli; no muri bagenzi be batora Asafu mwene Berekiya; no muri bagenzi babo b’aba Merari batora Etani mwene Kushaya;

18hamwe na bo batora ivyungirizi vya kabiri, Zekariya na Yaziyeli na Shemiramoti na Yehiyeli na Uni na Eliyabu na Benaya na Mayaseya na Matitiya na Elifelehu na Mikuneya, bo n’abo gushibama, Obed‐edomu na Yeyeli.

19Nukw abo baririmvyi, Hemani na Asafu na Etani, bavuza ivyitwa matowazi vy’imiringa;

20Zekariya na Yaziyeli na Shemiramoti na Yehiyeli na Uni na Eliyabu na Mayaseya na Benaya bavugira amakembe mu kajwi karangurutse;

21Matitiya na Elifelehu na Mikuneya na Obed‐edomu na Yeyeli na Azaziya bavugira inanga z’ijwi ritūza, bakaba ari bo batera indirimbo.

22Kenaniya, umukuru w’Abalewi, ni we yaganza ivyo kuririmba; ni we yaririmbisha kuko yar’ umuhinga.

23Berekiya na Elukana ni bo bār’ abashibamyi b’iyo sandugu.

24Shebaniya na Yoshafati na Netaneli na Amasayi na Zekariya na Benaya na Eliyezeri abaherezi ni bo bāgenda bavuza inzumbete imbere y’iyo sandugu y’Imana; Obed‐edomu na Yehiya na bo bār’ abashibamyi b’iyo sandugu nyene.

25Nuko Dawidi n’abakuru b’ Abisirayeli n’abagabisha bagaba ibihumbi baja kudūgana iyo sandugu y’isezerano ry’Uhoraho, bayikūra kwa Obed‐edomu banezerewe.

26Maze babonye kw Imana ifashije Abalewi bareruye iyo sandugu y’isezerano ryayo, ari we Uhoraho, batanga amamasa ndwi n’amasuguru y’intama ndwi kw ibimazi.

27Dawidi yari yambaye umwambaro wera derere; kand’ Abalewi bose bāri bareruye iyo sandugu, n’abaririmvyi, na Kenaniya yaganza ivyo kuririmba, na bo bari bambaye bartyo. Kandi Dawidi yari yambaye efodi yera derere.

28Uko ni kw Abisirayeli bose bādūganye isandugu y’isezerano ry’Uhoraho basēsereza impundu, bavuza inzamba n’inzumbete n’ivyitwa matowazi, bavuza cane n’amakembe n’inanga.

29Maz’ iyo sandugu y’isezerano ry’Uhoraho igitamaje ku murwa wa Dawidi, Mikali umukobga wa Sauli arungurukira mw idirisha, abona umwami Dawidi yiyereka yiginagura; amugayira mu mutima.

← Chapter 14 Jump to: Chapter 16 →