Ezekiel 1

Kamba (Mbivilia) 1956

Jump to: Chapter 2 →

1Na kweethĩwa mwaka wa mĩongo ĩtatũ, mwei wa kana, mũthenya wa katano wa mwei, yĩla naĩ vamwe na ala atave vakuvĩ na ũsĩ wa Kevali, matu mavingũka, na noona mawoni ma Ngai.

2Mũthenya wa katano wa mwei, naw’o waĩ mwaka wa katano wa kũtavwa kwa mũsumbĩ Yeoiakini,

3mũthembĩ Esekieli, mwana wa Vusi, ookiwe nĩ ndeto ya Yeova ki, e nthĩ ya Akalitei vakuvĩ na ũsĩ wa Kevali; na kw’oko kwa Yeova kwaĩ ĩũlũ wake kw’o.

4Na nonie, na, sisya, kĩseve kĩnene kyauma ngalĩ ya ĩũlũ, ĩthweo ĩnene, yĩ na mwaki wĩyakanĩtye, na ũtisu ũyĩthyũlũlũkĩte, na kuma katĩ waw’o kwaĩ kĩndũ kyailyĩ ũthuku wakakaa, kuma katĩ wa mwaki.

5Na kuma katĩ waw’o kwookie mũvw’ano wa syũmbe inya syĩ thayũ. Na mũvw’anĩle wasyo nĩ ũũ: Syaĩ na mũvw’ano wa mũndũ;

6na kĩla kĩmwe kyaĩ na mothyũ ana, na kĩla kĩmwe kyasyo kyaĩ na nthwau inya.

7Na maũũ masyo maĩ malũngalu; na nyaĩĩ sya maũũ masyo syailyĩ ta ũnyaĩĩ wa kũũ kwa kasaũ; na syatisatisaa ta ũthuku mũkute.

8Na syaĩ na moko ta ma mũndũ ungu wa nthwau syasyo mavavanĩ masyo ana; na isu inya syaĩ na mothyũ masyo na nthwau syasyo ta ũũ;

9nthwau syasyo syakwatene ũmwe na ũla ũngĩ; ityeethyũũaa yĩla syaendaa; syaendaa kimwe na kĩmwe ilũngalĩte.

10Ũndũ wa mũvw’ano wa mothyũ masyo, syaĩ na ũthyũ wa mũndũ; na isu inya syaĩ na ũthyũ wa mũnyambũ ngalĩ ya kw’oko kwa aũme; na isu inya syaĩ na ũthyũ wa ng’ombe ngalĩ ya kw’oko kwa aka; na isu inya nasyo syaĩ na ũthyũ wa ndiũ.

11Na mothyũ masyo na nthwau syasyo nĩsyataanĩsye ngalĩ ya ĩũlũ; nthwau ilĩ sya kĩla kĩmwe nĩsyakwatene ũmwe na ũla ũngĩ, na ilĩ syavw’ĩkĩte mĩĩ yasyo.

12Na syaendaa mbee kĩmwe na kĩmwe ilũngalĩte: o kũla veva wendaa ũthĩ, nasyo ikĩthi; ityeethyũũaa yĩla syaendaa.

13Ũvoo wa mũvw’ano wa syũmbe isu inya syĩ thayũ, mũvw’anĩle wasyo wailyĩ ta makaa makanu ma mwaki, ta mũvw’anĩle wa maũmũĩ; mwaki waendaa kũũ na kũũ katĩ wa syũmbe isu syĩ thayũ; na mwaki waĩ na kyeni mũno, na mwakinĩ kwaumie ũtisi.

14Na syũmbe isu syĩ thayũ syasembaa na kũsyoka ta kwoneka kwa ũtisi.

15Na yĩla nasiasya syũmbe isu syĩ thayũ, sisya, ndĩa ĩmwe ĩkinyĩte nthĩ ũtee wa syũmbe isu syĩ thayũ, kwondũ wa kĩla ũthyũ wa mothyũ ana makyo.

16Mũvw’anĩle wa ndĩa na mũseũvĩlw’e wasyo wailyĩ nzumalati ntheu: na isu inya syaĩ na mũvw’ano ũmwe; na mũvw’anĩle wasyo na mũseũvĩlw’e wasyo waĩ ta ndĩa nthĩni wa ndĩa.

17Yĩla syaendaa, syaendaa ngalĩ syasyo inya: ityeethyũũaa yĩla syaendaa.

18Undũ wa ndĩa syasyo, syaĩ ndũlu ũndũ itĩsya, na ila ndĩa inya syausũĩte metho ndĩanĩ syasyo ngalĩ syonthe.

19Na yĩla syũmbe isu syĩ thayũ syaendaa, ndĩa nasyo nĩsyaendaa ũtee wasyo; na yĩla syũmbe isu syĩ thayũ syookĩlaw’a kuma nthĩ, ndĩa nasyo nĩsyookĩlaw’a.

20O kũla veva wendaa kũthi, nĩkw’o syaendaa; kũla veva wendaa kũthi: na ndĩa syookĩlaw’a ũtee wasyo: nũndũ veva wa kyũmbe kĩ thayũ waĩ ndĩanĩ.

21Yĩla isu syaendaa, o na ii nasyo ikĩenda; na yĩla isu syaũngamaa, ii nasyo ikĩũngama; na yĩla isu syookĩlaw’a kuma nthĩ, ndĩa nasyo ikyũkĩlw’a ũtee wasyo; nũndũ veva wa kyũmbe kĩ thavũ waĩ ndĩanĩ.

22Na ĩũlũ wa mũtwe wa kyũmbe kĩ thayũ kwaĩ mũvw’ano wa yayaya, kwa kũsiwa, yailyĩ ta kĩsisyo kĩtisu kya ũtĩsya, yĩtambũũkĩtw’e ĩũlũ wa mĩtwe yasyo.

23Na ungu wa ĩ yayaya nthwau syasyo nĩsyatambũũkĩtw’e, ũmwe welekele ũla ũngĩ: kĩla kĩmwe kyaĩ na ilĩ ila syavw’ĩkĩte mĩĩ yasyo ngalĩ ĩno, na kĩla kĩmwe kyaĩ na ilĩ ila syavw’ĩkĩte ngalĩ ĩla ĩngĩ.

24Na yĩla syaendaa, newie kĩuumo kya nthwau syasyo ta kĩlitũko kya manzĩ maingĩ, ta wasya wa Mwene Vinya W’onthe, kĩlonzo kya kĩtuu ta kĩlonzo kya nguthu: yĩla syaũngamaa, syatheeasya nthwau syasyo.

25Na kwaĩ wasya ĩũlũ wa yayaya yĩla yaĩ ĩũlũ wa mĩtwe yasyo: yĩla syaũngamaa, syatheeasya nthwau syasyo.

26Na ĩũlũ wa yayaya yĩla yaĩ ĩũlũ wa mĩtwe yasyo kwaĩ mũvw’ano wa kĩvĩla kya ũsumbĩ, ta kwoneka kwa kavila ka savili; na ĩũlũ wa mũvw’ano wa kĩvĩla kyu kwaĩ mũvw’ano kwoneka kwaw’o wailyĩ ta mũndũ ĩũlũ wakyo.

27Na noona kĩndũ kĩilyĩ ũthuku wakakaa, ta mũvw’anĩle wa mwaki nthĩnĩ waw’o ũthyũlũlũkĩte, kuma mũvw’anĩlenĩ wa kĩnyunyu kyake na kwambata; na kuma mũvw’anĩlenĩ wa kĩnyunyu kyake na kũtheea noona mũvw’anĩle wa mwaki, na kwaĩ ũtisu wamũthyũlũlũkĩte.

28Ta mũvw’anĩle wa ũtaathi ĩthweonĩ mũthenya wa mbua, now’o wailyĩ mũvw’anĩle wa ũtisu ngalĩ syonthe. Ũũ nĩw’o wailyĩ mũvw’ano wa ũtheu mũtisu wa Yeova. Na yĩla namonie, navalũka na ũthyũ wakwa, na neew’a wasya wa ũmwe ũla waneenie.

Jump to: Chapter 2 →