Ezekiel 33

Kamba (Mbivilia) 1956

← Chapter 32 Jump to: Chapter 34 →

1Na ndeto ya Yeova yambũkĩa, ĩkĩmbĩa,

2Mwana wa mũndũ, neena na ana ma andũ maku, noimatavya, Yĩla nĩete ũvyũ ĩũlũ wa nthĩ, na andũ ma nthĩ ĩsu meumya mũndũ katĩ woo, na makĩmwĩa ethĩwa mũsyaĩĩsya woo;

3ethĩwa, yĩla wĩona ũvyũ wũkĩte ĩ nthĩ, akavuva soo, na kũmon’ya andũ;

4nĩvo ĩndĩ ũla ũkew’a wasya wa soo, na ailea wonan’yo ũsu; ethĩwa ũvyũ ũkooka, na kũmũveta, nthakame yake ĩkeethĩwa ĩũlũ wa mũtwe wake mwene.

5Nĩwewie wasya wa soo, na akyũlea; nthakame yake ĩkeethĩwa ĩũlũ wake; ĩndĩ kethĩwa nĩwawĩtĩkĩlĩle, ethĩwa atangĩĩe thayũ wake.

6Ĩndĩ ethĩwa mũsyaĩĩsya nũnũkwona ũvyũ wũkĩte, na ailea kũvuva soo, na andũ matĩkũmanyĩthw’a mũisyo, na ũvyũ ũkyũka, na kumya mũndũ o na wĩva katĩ woo; nũvetetwe e ũthũkũnĩ wake, ĩndĩ nthakame yake ngamĩandũa kw’okonĩ kwa mũsyaĩĩsya.

7Naku, mwana wa mũndũ, nĩngwĩĩte wĩthĩwe mũsyaĩĩsya wa nyũmba ya Isilaeli; kwondũ wa ũu ĩw’a ndeto ya kanyw’a wakwa, noimataa na ũtao wakwa.

8Yĩla ngwĩa ũla mũthũku, We mũndũ mũthũku, ndwĩ ndĩi ya ũlea ũkw’a, naku ndũũneena ũimwon’ya ũla mũthũku aume mũendelenĩ wake; mũndũ ũsu mũthũku akakw’a e ũthũkunĩ wake, ĩndĩ nthakame yake ngamĩandũa kw’okonĩ kwaku.

9Ĩndĩ ethĩwa ũkamwon’ya ũla mũthũku ũndũ wa mũendele wake ethyũũe aũtie, na ndeĩthyũũa na kũtia mũendele wake; akakw’a e ũthũkunĩ wake, ĩndĩ we nũvonoketye thayũ waku.

10Naku, mwana wa mũndũ, tavya nyũmba ya Isilaeli: Inyw’ĩ mũneenaa ũũ, mũkyasya, Mavĩtyo maitũ na naĩ sitũ syĩ ĩũlũ waitũ, na nĩtũũsonzomea nthĩnĩ wasyo; tũtonya ata ĩndĩ kwĩkala thayũ?

11Matavye O, tondũ nĩ thayũ, easya ũu Mwĩaĩi Yeova, nditanĩthaw’a nĩ kĩkw’ũ kya mũthũku; ĩndĩ nĩ kana ũla mũthũku ethyũũe atie mũendele wake na kwĩkala thayũ: ĩthyũũei, ĩthyũũei mume mĩendelenĩ yenyu mĩthũku; nĩkĩ mũũkw’a, inyw’ĩ nyũmba ya Isilaeli?

12Naku, mwana wa mũndũ, tavya ana ma andũ maku, Ũlũngalu wa ũla mũlũngalu ndũkamũvonokya mũthenya wa kũvĩtya kwake; na ũndũ wa ũthũku wa ũla mũthũku, ndakavalũka ũndũ waw’o mũthenya ũla ũkethyũũa atie ũthũku wake; o na ũla mũlũngalu ndakatonya kwĩkala thayũ kwondũ waw’o mũthenya ũla ũkeka naĩ.

13Yĩla ngũmwĩa ũla mũlũngalu, ndatĩa kwĩkala thayũ; ethĩwa akaĩkĩĩa ũlũngalu wake, na kwĩka ũthũku, vai ũmwe wa meko make malũngalu ũkalilikanwa; ĩndĩ ũthũkunĩ wake ũla wekie, nĩvo wĩkw’ĩa.

14Ĩngĩ, yĩla ngũmwĩa ũla mũthũku, Ndwĩ ndĩi ya ũlea ũkw’a; ethĩwa akeethyũũa na kũtia naĩ yake, na kwĩka ũla wosanaa na mĩao na ũla w’o;

15ethĩwa ũla mũthũku akatũnga ngwatĩlĩlyo, na kũtũnga kĩla wosete na mbuta, na kũendaa myamũlonĩ ya thayũ, na kũlea kwĩka ũthũku; ndatĩa kwĩkala thayũ, ndakakw’a.

16Naĩ syake ila wekie itikalilikanwa ĩũlũ wake o na ĩmwe yasyo: nĩwĩkĩte ũla wosanaa na mĩao na ũla wa w’o; ndatĩa kwĩkala thayũ.

17Ĩndĩ ana ma andũ maku measya, Nzĩa ya Mwĩaĩi ndĩanene: ĩndĩ ũndũ woo, nzĩa yoo ndĩanene.

18Yĩla mũlũngalu ũkethyũũa na kũtia ũlũngalu wake, na kwĩkaa ũthũku, akakw’ĩa nthĩnĩ waw’o.

19Na yĩla ũla mũthũku ũkethyũũa na kũtia ũthũku wake, na kwĩkaa ũla wosanaa na mĩao na ũla wa w’o, akekala thayũ kwondũ waw’o.

20Ĩndĩ inyw’ĩ mwĩasya, Nzĩa ya Mwĩaĩi ndĩanene. Inyw’ĩ nyũmba ya Isilaeli, ngamũsilĩla kĩla ũmwe kwĩanana na mĩendele yake.

21Na kweethĩwa mwaka wa ĩkũmi na ĩlĩ wa kũtavwa kwitũ, mwei wa ĩkũmi, mũthenya wa katano wa mwei, ũmwe ũla wavonokie kuma Yelusaleme ambũkĩa, akĩmbĩa, Ndũa nĩ ngũne.

22Na kw’oko kwa Yeova kũnaĩ ĩũlũ wakwa wĩoo, ũla ũvonokete atanoka; na eĩ anaathamya kanyw’a wakwa, kũvika yĩla wambũkĩe kĩoko; na kanyw’a wakwa waathamw’a, na ndyaaĩthĩwa ndatonya kũneena ĩngĩ.

23Na ndeto ya Yeova yambũkĩa, ĩkĩmbĩa,

24Mwana wa mũndũ, andũ ala matwĩe kũndũ kũu kwanangĩku nthĩ ya Isilaeli nĩmeũneena, makyasya, Avalaamu aĩ ũmwe, nake atĩĩwa nthĩ: ĩndĩ ithyĩ twĩ aingĩ; nĩtũnengetwe nthĩ yĩthĩwe ũtiĩwa.

25Kwondũ wa ũu matavye, Ũũ nĩw’o Mwĩaĩi Yeova ũnũkwasya: Nĩmũĩsanĩasya na nthakame, na kũmyũkĩlĩlya mĩvw’anano yenyu metho menyu, na kwĩtĩkya nthakame: na mũkamĩmesya ĩ nthĩ?

26Nĩmũũngamaa kwondũ wa ũvyũ wenyu, nĩmwĩkaa ũthatyo, na nĩmũvukasya kĩla ũmwe kĩveti kya mũtũi wake: na inyw’ĩ mũkamesya ĩ nthĩ?

27Ũũ nĩw’o ũkamatavya, Mwĩaĩi Yeova easya atĩĩ: O tondũ nĩ thayũ, vate ndĩi ala me kũndũ kwanangĩku makavalũkw’a na ũvyũ; na ũla wĩ weũnĩ ngamũnengane alĩke nĩ nyamũ; na ala me ngomenĩ syĩ vinya na ngunganĩ makooawa nĩ mũimũ.

28Na ngamĩtw’ĩkĩthya nthĩ nthei na ũseng’yo; na ngathĩĩo ũndũ wa vinya wayo ĩkathela; na iĩma sya Isilaeli ikeethĩwa nthei, ũkethĩa mũndũ ndakũvĩtĩla.

29Nĩvo ĩndĩ makamanya ninyie Yeova, yĩla ngethĩwa nĩtw’ĩkĩthĩtye nthĩ nthei na ũseng’yo, nũndũ wa mothatyo moo onthe ala mekĩte.

30Na ũndũ waku, mwana wa mũndũ, ana ma andũ maku nĩmeũneena ũndũ waku vakuvĩ na maũvai na mĩomonĩ ya nyũmba, na nĩmeũneenan’ya ene kwa ene, kĩla ũmwe na mwana‐a‐ĩthe, makyasya, Ũkai, nĩngũmwĩsũva, mwĩw’e ndeto ĩla yumaa kwa Yeova.

31Na nĩmokaa kwaku o ũndũ andũ mokaa, na nĩmekalaa nthĩ mbee waku ta andũ makwa, na nĩmeĩthukĩĩasya ndeto syaku, ĩndĩ matisyĩkaa; nũndũ nĩmonanasya wendo mwingĩ na makanyw’a moo, ĩndĩ ngoo syoo nĩatĩĩaa ũtandĩthyo woo.

32Na, sisya, ũilyĩ kwoo ta wathi mũseo mũno wa ũmwe ũla wĩ na wasya wendeeasya, na ũtonya kũinga nesa kĩndũ kya kĩnga; nũndũ nĩmew’aa ndeto syaku, ĩndĩ matisyĩkaa.

33Na yĩla ũkekĩka (sisya, nĩwũkĩte), nĩvo ĩndĩ makamanya kana kwaĩ mwathanĩ katĩ woo.

← Chapter 32 Jump to: Chapter 34 →