Ezekiel 3

Kamba (Mbivilia) 1956

← Chapter 2 Jump to: Chapter 4 →

1Na ambĩa, Mwana wa mũndũ, ya kĩla wĩona; ya ĩvuku yĩĩ ĩkũnze, noithi, ũneene na nyũmba ya Isilaeli.

2Kwondũ wa ũu naathamya kanyw’a wakwa, na atuma nĩyĩya yĩla ĩvuku ĩkũnze.

3Na ambĩa, Mwana wa mũndũ, ĩthya ĩvu yaku, na vũnĩthya nda yaku na ĩvuku yĩĩ ĩkũnze yĩla ngũũnenga. Nĩvo ĩndĩ nayĩĩe; na kanyw’anĩ wakwa yaĩ mũyo ta ũkĩ wa nzũkĩ.

4Na ambĩa, Mwana wa mũndũ, enda, ũthi kwa nyũmba ya Isilaeli, noineena nao na ndeto syakwa.

5Nũndũ ndũtũmĩtwe kwa andũ ma kĩneeno kĩeni na kĩthyomo kĩ vinya, ĩndĩ kwa nyũmba ya Isilaeli;

6ti kwa ngo mbingĩ sya andũ ila syĩ na kĩneeno kĩeni no kĩthyomo kĩ vinya, ila ũtatonya kũmanya ndeto syasyo. Vate ndĩi, kethĩwa nĩnakũtũmie kwoo, no kũkwĩthukĩĩsya.

7Ĩndĩ nyũmba ya Isilaeli ndĩkakwĩthukĩĩsya; nũndũ matimbĩthukĩĩasya nyie: nũndũ nyũmba yonthe ya Isilaeli me na kĩtulya kyetu na ngoo nyũmũ.

8Sisya, nĩnetetye ũthyũ waku welekele mothyũ moo, na nĩnetetye kĩtulya kyaku kyelekele itulya syoo.

9Nĩnĩtw’ĩkĩthĩtye kĩtulya kyaku kyũmũ mũno kwĩ ĩvia yũmũ ya ũana: ndũkamakĩe, o na ndũkateve ũndũ wa mothyũ moo, o na kau nĩ nyũmba ng’endu.

10Na ĩngĩ ambĩa, Mwana wa mũndũ, ndeto syakwa syonthe ila nganeena naku syosae ngoonĩ yaku, na syĩw’ae na matũ maku.

11Na enda, ũthi vala ve ala matavĩtwe, vala ve ana ma andũ maku, ũneene nao, noimatavya, Ũũ nĩw’o Mwĩaĩi Yeova ũnũkwasya; ethĩwa makeew’a, kana matikew’a.

12Nĩvo ĩndĩ Veva wambũkĩlilye, na neew’a ĩtina wakwa wasya wa kĩuumo kĩnene, ũkyasya, Ũtaĩwe ũtheu mũtisu wa Yeova, e o vala ũĩ.

13Na neew’a kĩuumo kya nthwau sya syũmbe syĩ thayũ yĩla syakiitanganaa, na kĩuumo kya ndĩa ũtee wasyo, o kĩlonzo kya kĩuumo kĩnene.

14Na ĩndĩ Veva ambũkĩlya, na andwaa vangĩ: na nathi nĩ na ũũ, ũthatunĩ wa veva wakwa; na kw’oko kwa Yeova kwaĩ na vinya ĩũlũ wakwa.

15Na ĩndĩ nooka vala ve ala matavĩtwe ku Teli‐avivu, ala mekalĩte vakuvĩ na ũsĩ wa Kevali, vala matwĩe; na nekalile kw’o katĩ woo mĩthenya mũonza nĩsaanĩw’e.

16Na kweethĩwa mĩthenya mũonza yathela, ndeto ya Yeova yambũkĩa, ĩkĩmbĩa.

17Mwana wa mũndũ, nĩngũtw’ĩte mũsyaĩĩsya wa nyũmba ya Isilaeli: kwondũ wa ũu ĩw’a ndeto ya kanyw’a wakwa, noimataa na ũtao wakwa.

18Yĩla ngwĩa ũla mũthũku, Ndwĩ ndĩi ya kũkw’a, naku ndũũmũtaa, kana kũneena ũimwon’ya ũla mũthũku aume mũendelenĩ wake mũthũku kana atangĩĩe thayũ wake; mũndũ ũsu mũthũku akakw’a e ũthũkunĩ wake; ĩndĩ nthakame yake ngamĩandũa kw’okonĩ kwaku.

19Ĩndĩ ethĩwa ũkamwon’ya ũla mũthũku, na ndeĩthyũũa na kũtia ũthũku wake, kana mũendele wake mũthũku, akakw’a e ũthũkunĩ wake; ĩndĩ nũvonoketye thayũ waku.

20Na ĩngĩ, yĩla mũndũ mũlũngalu ũkeethyũũa na kũtia ũlũngalu wake, na kwĩka ũthũku, na ngĩmwiĩa ũlulutĩkyo, akakw’a: nĩkwĩthĩwa ndwaamũtaa, akakw’a e naĩnĩ yake, na meko make malũngalu ala wekĩte matikalilikanwa; ĩndĩ nthakame yake ngamĩandũa kw’okonĩ kwaku.

21Ĩndĩ ethĩwa ũkamwon’ya mũndũ mũlũngalu, nĩ kana ũsu mũlũngalu ndakavĩtye, nake akalea kũvĩtya, vate ndĩi akekala thayũ, nũndũ nĩwosie ũtao; naku nũvonoketye thayũ waku.

22Na kw’oko kwa Yeova kwaĩ ĩũlũ wakwa nĩ kw’o; na ambĩa, Ũkĩla, ũende ũiĩnĩ, na nganeenea naku kw’o.

23Na ĩndĩ nookĩla, na nathi ũiĩnĩ: na, sisya, ũtheu mũtisu wa Yeova waũngama vo, ta ũtheu mũtisu ũla noonie vakuvĩ na ũsĩ wa Kevali: na navalũka na ũthyũ wakwa.

24Nĩvo ĩndĩ Veva walikile nthĩnĩ wakwa, na anũngamya na maũũ makwa; na aneena nakwa, na ambĩa, Enda, wĩvingĩe nyũmbanĩ yaku.

25Ĩndĩ we, mwana wa mũndũ, sisya, makakwĩkĩa syĩndũ sya ũkwova, na makakwova nasyo, na ndũkaumaala vala maĩ;

26na ngalũman’ya ũĩmĩ waku na kaakaa wa kanyw’a waku, nĩ kana wĩthĩwe ũtatonya kũneena, na ndũkethĩwa mũkan’ya woo; nũndũ mo nĩ nyũmba ng’endu.

27Ĩndĩ yĩla nĩneenaa naku, ngaathamasya kanyw’a waku, na ũkamatavya, Ũũ nĩw’o Mwĩaĩi Yeova ũnũkwasya: Ũla wĩw’aa nĩew’e; na ũla ũtew’aa, ndakew’e: nũndũ mo nĩ nyũmba ng’endu.

← Chapter 2 Jump to: Chapter 4 →