Ezekiel 31

Kamba (Mbivilia) 1956

← Chapter 30 Jump to: Chapter 32 →

1Na kweethĩwa mwaka wa ĩkũmi na ũmwe, mwei wa katatũ, mũthenya wa mbee wa mwei, ndeto ya Yeova yambũkĩa, ĩkĩmbĩa,

2Mwana wa mũndũ, mũkũlye Valao mũsumbĩ wa Misili, na nguthu yake: Ũilyĩ taũ ũnenenĩ waku?

3Sisya, Mũasuli aĩ mũtĩ wa mũkũũ wĩ mbonge nzeo nthĩnĩ wa Levanoni, na wĩ muunyĩ wailyĩ wa mũtitũ, na wa kĩũngamo kĩasa; na mũthya waw’o waĩ katĩ wa mbonge nthungu.

4Manzĩ moonyithya, manzĩ ma syũngũ moomesya: mbũsĩ syasyo syathyũlũlũka vala wavandiwe; na ikatwaĩa tũlũsĩ twasyo mĩtĩnĩ yonthe ya mũũnda.

5Kwondũ wa ũu ũtũlu waw’o wambatw’a kwĩ mĩtĩ yonthe ya mũũnda; na mbonge syaw’o syongeleka, na mbonge syaw’o syaasava nũndũ wa manzĩ maingĩ, yĩla wathongooisye.

6Nyũnyi syonthe sya yayaya syaakaa ndala syasyo mbongenĩ syaw’o; na nyamũ syonthe sya kĩthekanĩ syasyaĩaa maswii masyo ungu wa mbonge syaw’o; na mbaĩ syonthe nene syekalaa muunyĩnĩ waw’o.

7Waseũvĩte o ta ũu ũnenenĩ waw’o, ũasanĩ wa mbonge syaw’o; nũndũ mũi waw’o waĩ vakuvĩ na manzĩ maingĩ.

8Mĩkũũ mũũndanĩ wa Ngai ĩtyaatonya kũũvitha; mĩtĩ ya mĩsonovali ndĩailyĩ mbonge syaw’o, na mĩtĩ ya mĩalamoni ndĩailyĩ mbonge syaw’o; o na vatyaĩ mũtĩ o na wiva mũũndanĩ wa Ngai wailyĩ taw’o kwanakavanĩ kwaw’o.

9Nĩnooseũvisye wĩthĩwe mũseo kwondũ wa wingĩ wa mbonge syaw’o, mũvaka mĩtĩ yonthe ya Eteni, ĩla yaĩ mũũndanĩ wa Ngai, yawĩw’ĩa kĩwĩu.

10Kwondũ wa ũu Mwĩaĩi Yeova nũnũkwasya: Nĩkwĩthĩwa nũtũlĩtw’e ũasanĩ, na kwia mũthya wake katĩ wa mbonge nthungu, na ngoo yake nĩtũlĩtw’e ũasanĩ wake;

11ngamũnengane kw’okonĩ kwa ũla wĩ ũtonyi wa i mbaĩ; vate ndĩĩ akatwaatwaana nake; nĩnĩmũlũngĩtye ũndũ wa ũthũku wake.

12Na aeni, ala ma ũtĩsya ma i mbaĩ, nĩmamũvetete, na nĩmamũtiĩte: mbonge syake nivalũkĩte iĩmanĩ ĩũlũ na myandanĩ yonthe, na mbonge syake nitũlĩkĩte vakuvĩ na mbũsĩ syonthe sya ĩ nthĩ; na ngo syonthe sya andũ sya nthĩ nĩsyatheeie kuma muunyĩnĩ wake, na nĩsyamũtiie.

13Nyũnyi syonthe sya yayaya ikekala wanangĩkonĩ wake, na nyamũ syonthe sya kĩthekanĩ ikeethĩwa mbongenĩ syake;

14nĩ kana mĩtĩ yonthe yĩ vakuvĩ na manzĩ ndĩkenenevye ũasanĩ wayo, kana kwia mĩthya yayo katĩ wa mbonge nthungu, kana ĩla yĩ vinya katĩ wayo ĩũngame ũasanĩ wayo, o yonthe ĩla ĩnyusaa manzĩ: nũndũ onthe nĩmanenganĩte makw’e, kũvika kũndũ kwĩ nthĩnĩ wa nthĩ, katĩ wa ana ma andũ, vamwe na ala matheeaa yĩla ĩimanĩ.

15Ũũ nĩw’o Mwĩaĩi Yeova ũnũkwasya: Mũthenya ũla watheeie Seoli nĩnatwie kũmetwe: navw’ĩka syũngũ nene kwondũ wake, na nasiĩĩa mbũsĩ sya vo; na ala manzĩ maingĩ masiĩĩwa; na natuma Levanoni ĩmũmetea, na mĩtĩ yonthe ya kĩthekanĩ yathelekela kwondũ wake.

16Nathingithangya i mbaĩ ũndũ wa kĩuumo kya kũvalũka kwake, yĩla namwĩkisye Seoli vamwe na ala matheeaa yĩla ĩimanĩ; na mĩtĩ yonthe ya Eteni, ĩla mĩnyuve na mĩseo mbee ya Levanoni, yonthe ĩla ĩnyusaa kĩw’ũ, yakiakiĩw’a kũndũ kwĩ nthĩnĩ wa nthĩ.

17Nao matheea Seoli vamwe nake vala vaĩ ala mooaiwe na ũvyũ; ĩĩ, ala maĩ kw’oko kwake, ala mekalile muunyĩnĩ wake katĩ wa i mbaĩ.

18Ũilyĩ taũ ndaĩanĩ na ũnenenĩ katĩ wa mĩtĩ ya Eteni? Ĩndĩ ũkatheew’a vamwe na mĩtĩ ya Eteni kũvika kũndũ kwĩ nthĩnĩ wa nthĩ: ũkakoma katĩ wa ala mate aĩke, vamwe na ala mooaiwe na ũvyũ. Ũsu nĩ Valao na nguthu yake yonthe, easya ũu Mwĩaĩi Yeova.

← Chapter 30 Jump to: Chapter 32 →