Ezekiel 46

Kamba (Mbivilia) 1956

← Chapter 45 Jump to: Chapter 47 →

1Ũũ nĩw’o Mwĩaĩi Yeova ũnũkwasya: Mbingĩlo ya nza ya nthĩnĩ ĩla yelekele wumĩlonĩ wa syũa ĩkavingwa mĩthenya thanthatũ ya kũtethya wĩa; ĩndĩ mũthenya wa savato ĩkavingũwa, na mũthenya wa mũtiso wa mwei ĩkavingũwa.

2Na mũnene wĩ mbee ũsumbĩnĩ akalika na nzĩa ya valasya wa mbingĩlo yĩ ũtee, na akaũngama vakuvĩ na mũtĩ wĩ ũtee wa mbingĩlo; na athembi makaseũvya nthembo yake ya kũvĩvw’a na nthembo syake sya mũuo, na akathaithĩa mwalyonĩ wa mbingĩlo: na ĩndĩ akaumaala; ĩndĩ mbingĩlo ndĩkavingwa mũvaka wĩoo.

3Na andũ ma ĩ nthĩ makathaithĩa mũomonĩ wa mbingĩlo ĩsu mbee wa Yeova mĩthenya ya masavato na ya mĩtĩso ya myei.

4Na nthembo ya kũvĩv’wa ĩla mũnene wĩ mbee ũsumbĩnĩ ũkamũthembea Yeova ĩkeethĩwa tũtena thanthatũ twa malondu tũte kĩema na ndũũme ĩte kĩema mũthenya wa savato;

5na nthembo ya mũtu ĩkeethĩwa eva kwondũ wa ĩla ndũũme, na nthembo ya mũtu kwondũ wa tũla tũtena twa ĩlondu o ũndũ ũtonya kũnengane, na ini ya mauta kwondũ wa kĩla eva.

6Na mũthenya wa mũtiso wa mwei ĩkeethĩwa kasalũ kate kĩema, na tũtena thanthatũ twa malondu, na ndũũme; ikeethĩwa ite na kĩema:

7na akaseũvya nthembo ya mũtu, eva kwondũ wa kala kasalũ, na eva kwondũ wa ĩla ndũũme, na kwondũ wa tũla tũtena twa malondu kwĩanana na ũndũ ũtonya, na ini ya mauta kwondũ wa kĩla eva.

8Na yĩla mũnene wĩ mbee ũsumbĩnĩ ũkalika, akalika na nzĩa ya valasya wa mbingĩlo, na akaumaala na nzĩa yaw’o.

9Ĩndĩ yĩla andũ ma ĩ nthĩ makoka mbee wa Yeova mbokanĩ itw’ĩtwe, ũla ũlikaa na nzĩa ya mbingĩlo ya ngalĩ ya ĩũlũ athaithe akaumaalĩla nzĩanĩ ya mbingĩlo yĩ ngalĩ ya ĩtheo; na ũla ũlikaa na nzĩa ya mbingĩlo yĩ ngalĩ ya ĩtheo akaumaalĩla nzĩanĩ ya mbingĩlo ya ngalĩ ya ĩũlũ; ndakasyokela nzĩanĩ ya mbingĩlo ĩla walikĩle, ĩndĩ akaumaala alũngalĩte.

10Na mũnene wĩ mbee ũsumbĩnĩ, yĩla malikaa, akalikaa e katĩ woo; na yĩla maumaalaa, makaumaala vamwe.

11Na mbokanĩ, na mbokanĩ ila itw’ĩtwe, nthembo ya mũtu ĩkeethĩwa eva kwondũ wa kasalũ ka mũew’a, na eva kwondũ wa ndũũme, na kwondũ wa tũla tũtena twa malondu o ũndũ ũtonya kũnengane, na ini ya mauta kwondũ wa kĩla eva.

12Na yĩla mũnene wĩ mbee ũsumbĩnĩ ũkaseũvya nthembo ya kũthemba na ngoo ya kwenda, nthembo ya kũvĩvw’a kana nthembo sya mũuo syĩthĩwe nthembo ya kũmũthembea Yeova na ngoo ya kwenda, mũndũ ũmwe ũkamũvingũĩa mbingĩlo ĩla yelekele wumĩlonĩ wa syũa; na akaseũvya nthembo yake ya kũvĩvw’a na nthembo syake sya mũuo, o tondũ wĩkaa mũthenya wa savato: na ĩndĩ akaumaala; na ĩtina wa kumaala kwake ũmwe akavinga mbingĩlo.

13Na ũkaseũvasya katena ka ĩlondu ka mwaka ũmwe kate kĩema kethĩwe nthembo ya kũvĩvw’a ya kũthembea Yeova kĩla mũthenya: kĩoko na kĩoko ũkamĩseũvasya.

14Na ũkaseũvasya nthembo ya mũtu vamwe nayo kĩoko na kĩoko, kĩlungu kya thanthatũ kya eva, na kĩlungu kya katatũ kya ini ya mauta, ma kũvulan’ya na mũtu mũvinyu; nthembo ya mũtu ĩtatw’ĩkanaa ya kũmũthembea Yeova kwondũ wa ũtw’ĩo wa tene na tene.

15Ũu nĩw’o makaseũvasya katena ka ĩlondu, na nthembo ya mũtu, na mauta, kĩoko na kĩoko, syĩthĩwe nthembo ya kũvĩvw’a ĩtatw’ĩkanaa.

16Ũũ nĩw’o Mwĩaĩi Yeova ũnũkwasya: Ethĩwa mũnene wĩ mbee ũsumbĩnĩ akanenga ũmwe o na wĩva wa ana make mũthĩnzĩo, nĩ ũtiĩwa wake, ũkeethĩwa wa ana make; nĩ ũtiĩwa woo wa kũtiĩwa.

17Ĩndĩ ethĩwa akanenga ũmwe wa athũkũmi make mũthĩnzĩo kuma ũtiĩwanĩ wake, ũkeethĩwa wake kũvika mwaka wa ũthasyo; nĩvo ĩndĩ ũkamũsyokea ũla mũnene; ĩndĩ ũvoo wa ũtiĩwa wake, naw’o ũkeethĩwa wa ana make.

18Na ĩngĩ mũnene wĩ mbee ũsumbĩnĩ ndakosa ũtiĩwa wa andũ, amaumya ũtiĩwanĩ woo; akanenga ana make ũtiĩwa kuma ũtiĩwanĩ wake mwene, nĩ kana andũ makwa matikanyaĩĩkw’e kĩla mũndũ kuma ũtiĩwanĩ wake.

19Na ĩndĩ andikĩlya ũlikĩlonĩ, ũla waĩ ũtee wa mbingĩlo, andikya tũsũmbanĩ tũla tũtheu twa athembi, tũla twelekele ngalĩ ya ĩũlũ: na, sisya, kwaĩ vandũ kĩlungunĩ kĩ ĩtina ngalĩ ya ũthũĩlonĩ wa syũa.

20Na ambĩa, Vaa nĩ vandũ vala athembi makauĩaa nthembo ya mavĩtyo na nthembo ya naĩ, na vala makakaangĩa nthembo ya mũtu; nĩ kana matikasyumaalye nza yĩ ũtee, mavathan’ye andũ methĩwe atheu.

21Nĩvo ĩndĩ wanumaalilye nza yĩ ũtee, na ambĩtĩlya ikotonĩ inya sya nza; na, sisya, kĩla kĩkotonĩ kya nza kwaĩ nza.

22Ikotonĩ inya sya nza kwaĩ nza mbiie, ũasa wa mĩkono mĩongo ĩna na ũthanthau mĩongo ĩtatũ: isu inya syĩ ikotonĩ syaĩ sya kĩthimi kĩmwe.

23Na kwaĩ ũvai ũthyũlũlũkĩte nthĩnĩ wasyo, kũthyũlũlũka isu inya, na kũndũ kwa kũuĩa kwaseũvĩtw’e ungu wa maũvai ngalĩ syonthe.

24Nĩvo ĩndĩ wambĩie, Ii nĩsyo nyũmba sya kũuĩa, vala athũkũmi ma ĩ nyũmba makauĩaa nthembo ya andũ.

← Chapter 45 Jump to: Chapter 47 →