Ezekiel 10

Kamba (Mbivilia) 1956

← Chapter 9 Jump to: Chapter 11 →

1Na ĩndĩ noona, na, sisya, yayayanĩ yĩla yaĩ ĩũlũ wa mĩtwe ya akeluvi kwoonekie ĩũlũ woo kĩndũ kĩilyĩ kavila ka savili, ta mwonekele wa mũvw’ano wa kĩvĩla kya ũsumbĩ.

2Na aneena na ũla mũndũ wevw’ĩkĩte ngũa ya katane, na amwĩa, Lika katĩ wa ndĩa ila ithyũlũlũkaa, o ungu wa mũkeluvi noyusũsya moko maku elĩ makaa ma mwaki kuma katĩ wa akeluvi, noimanyaĩĩkya ndũanĩ. Na alika nĩmwene.

3Na akeluvi maũngama ngalĩ ya kw’oko kwa aũme kwa nyũmba, yĩla ũla mũndũ walikile; na ũla mũumbĩ wausũa nza ya nthĩnĩ.

4Na ũtheu mũtisu wa Yeova wambata kuma mũkeluvinĩ, na waũngama mwalyonĩ wa mũomo wa nyũmba; na nyũmba yausũwa nĩ mũumbĩ, na nza yausũĩtwe nĩ ũtisũku wa ũtheu mũtisu wa Yeova.

5Na kĩuumo kya nthwau sya akeluvi nĩkyeew’ĩkie kũvika nza yĩ ũtee, ta wasya wa Ngai Mwene Vinya W’onthe yĩla ũnũũneena.

6Na kweethĩwa, yĩla weaĩe mũndũ ũla wevw’ĩkĩte ngũa ya katane, akĩmwĩa, Osa mwaki kuma katĩ wa ndĩa ila ithyũlũlũkaa, kuma katĩ wa akeluvi, alika, na aũngama ũtee wa ndĩa ĩmwe.

7Na mũkeluvi atambũũkya kw’oko kwake kuma katĩ wa akeluvĩ kũvika mwakinĩ ũla waĩ katĩ wa akeluvi, na awosa, ne eekĩa mokonĩ ma ũla wevw’ĩkĩte ngũa ya katane, nake awosa na aumaala.

8Na kwaumĩla akeluvinĩ mũvw’ano wa kw’oko kwa mũndũ ungu wa nthwau syoo.

9Na noona, na sisya, ndĩa inya ũtee wa akeluvi, ndĩa ĩmwe ũtee wa mũkeluvi ũmwe, na ndĩa ĩngĩ ũtee wa mũkeluvi ũngĩ; na mũvw’anĩle wa ndĩa wailyĩ kavila ka nzumalati.

10Na ũndũ wa mwonekele woo, asu ana maĩ na mũvw’ano ũmwe, ta ndĩa yaĩ nthĩnĩ wa ndĩa.

11Yĩla maendaa, maendaa ngalĩ syoo inya: matyeethyũũaa makĩthi, ĩndĩ o vala mũtwe wasyaĩtye mayũvikĩla; matyeethyũũaa makĩthi.

12Na mĩĩ yoo yonthe, na mĩongo yoo, na moko moo, na nthwau syoo, na ila ndĩa kwausũĩte metho ngalĩ syonthe, o ndĩa ila asu ana maĩ nasyo.

13Ũndũ wa ndĩa isu, nĩsyeetiwe ngĩw’a na matũ makwa ndĩa ithyũlũlũkaa.

14Na kĩla ũmwe aĩ na mothyũ ana: ũthyũ wa mbee waĩ ũthyũ wa mũkeluvi, na ũthyũ wa kelĩ waĩ ũthyũ wa mũndũ, na wa katatũ ũthyũ wa mũnyambũ, na wa kana ũthyũ wa ndiũ.

15Na akeluvi mambata: kyu nĩkyo kyũmbe kĩ thayũ kĩla noonie vakuvĩ na ũsĩ wa Kevali.

16Na yĩla akeluvi maendaa, ndĩa nĩsyaendaa ũtee woo; na yĩla akeluvi mookĩlilye nthwau syoo mambate kuma nthĩ, ndĩa nasyo ityaathyũũũka kũtaanĩsya namo.

17Yĩla maũngamaa, isu nĩsyaũngamaa; na yĩla mambataa, isu nĩsyambataa vamwe namo: nũndũ veva wa kyũmbe kĩ thayũ waĩ nthĩnĩ wasyo.

18Na ũtheu mũtisu wa Yeova waumaala kuma ĩũlũ wa mwalyo wa mũomo wa nyũmba, na waũngama ĩũlũ wa akeluvi.

19Na akeluvi mookĩlya nthwau syoo, na mambata kuma nthĩ yĩla maumaalile nene na metho makwa, na ndĩa ũtee woo: na maũngama mũomonĩ wa mbingĩlo ya ngalĩ ya wumĩlonĩ wa syũa ya nyũmba ya Yeova; na ũtheu mũtisu wa Ngai wa Isilaeli waĩ ĩũlũ woo.

20Kyu nĩkyo kyũmbe kĩ thayũ kĩla noonie ĩtheo wa Ngai wa Isilaeli vakuvĩ na ũsĩ wa Kevali; na namanya nĩ akeluvi.

21Kĩla ũmwe aĩ na mothyũ ana, na kĩla ũmwe nthwau inya; na mũvw’ano wa moko ma mũndũ waĩ ungu wa nthwau syoo.

22Na ũndũ wa mũvw’ano wa mothyũ moo, maĩ mothyũ ala noonie vakuvĩ na ũsĩ wa Kevali, mwonekelenĩ woo o namo; nĩmaendaa mbee ũmwe na ũmwe malũngalĩte.

← Chapter 9 Jump to: Chapter 11 →