Ezekiel 17

Kamba (Mbivilia) 1956

← Chapter 16 Jump to: Chapter 18 →

1Na ndeto ya Yeova yambũkĩa, ĩkĩmbĩa,

2Mwana wa mũndũ, kwatan’ya ndaĩ, na tavya nyũmba ya Isilaeli ngelekan’yo;

3nokyasya, Ũũ nĩw’o Mwĩaĩi Yeova ũnũkwasya: Ndiũ nene yĩ nthwau nene na nzĩa ndasa, i nthwau syusũĩte maw’ĩa, ala maĩ na langi wa mĩthemba mingĩ, yooka Levanoni, na yoosa mũthya wa ĩũlũ wa mũkũũ:

4yatila kala kakolwa ka ĩũlũ mbee, na yakatwaa nthĩ ya kũtandĩthya; yavanda ndũanĩ ya atandĩthya.

5O na yoosa mbeũ ya ĩ nthĩ, na yamĩvanda mũthanganĩ ũla ũsyaaa mũno; yamia ũtee wa manzĩ maingĩ; yamĩvanda ta mũtĩ ũla ũmeaa ũsĩnĩ.

6Na yamea, na yatw’ĩka mũsavivũ mũtambu mũno wĩ mũkuvĩ, ũla ndĩso syaw’o nĩsyoosyookee, na mĩi yaw’o yaĩ ĩtheo yaw’o; ta ũu yatw’ĩka mũsavivũ, na watambya ndĩso, na kũete tũkolwa.

7O na kwaĩ ndiũ ĩngĩ yaĩ na nthwau nene na maw’ĩa maingĩ: na, sisya, mũsavivũ, ũsu wathyũũa mĩi yaw’o wamyelekelya, na ndĩso syaw’o syathongooa imyelekele, kuma mĩtaũnĩ vala ũvandĩtwe, nĩ kana yũnyithye.

8Wavandwa mũthanganĩ mũseo vakuvĩ na manzĩ maingĩ, nĩ kana ũthongoosye mbonge, na nĩ kana ũsyae ũsyao, nĩ kana wĩthĩwe mũsavivũ mũseo.

9Neena atĩĩ, Ũũ nĩw’o Mwĩaĩi Yeova ũnũkwasya: Ũkaaĩla? Ndakakũa mĩi yaw’o, na kũtila usyao waw’o, nĩ kana ũvove; nĩ kana matũ maw’o onthe ala ũthongooetye ma wenze mavove? Na ti kwondũ wa kw’oko kwĩ vinya kana andũ aingĩ ũtonya kũkũanĩw’a na mĩi yaw’o.

10Ĩĩ, sisya, wavandwa, ũkaaĩla? Ndũkavova vyũ, yĩla kĩseve kyumĩte wumĩlonĩ wa syũa kĩkaũuutanĩa? Ũkavovea mĩtaũnĩ vala wavandiwe.

11O na ĩngĩ ndeto ya Yeova yambukĩa, ĩkĩmbĩa,

12Mĩtavye ĩla nyũmba ng’endu, Mũtyĩsĩ ũalyũlo wa maũndũ aa? Matavye, Sisya, mũsumbĩ wa Mbaviloni nĩwokie Yelusaleme, na akwata mũsumbĩ wa kw’o, na anene me mbee ũsumbĩnĩ ma kw’o, na amatwaa kwake Mbaviloni.

13Na oosa wa ũsyao wa kĩũsumbĩ, na atianĩa ũtianĩo nake; o na amũingĩĩsya evĩte, na atwaa ala me na ũtonyi ma ĩ nthi;

14nĩ kana ũsumbĩ ũnyivw’e, ndũkeyũkĩlye, ĩndĩ ũndũ wa ũlũmya ũtianĩo wake nũtonya kũũngama.

15Ĩndĩ nĩwamũng’endeie nũndũ wa ũtũma atũmwa make Misili, nĩ kana mamũnenge mbalasi na andũ aingĩ. Nake akaunĩka? Akavonoka ũla wĩkaa maũndu ta asu? Akaananga ũtianĩo, na ĩndĩ aivonoka?

16O tondũ nĩ thayu, easya Mwĩaĩi Yeova, vate ndĩi vandũ vala mũsumbĩ wĩkalaa ũla wamũtw’ĩkĩthisye mũsumbĩ, ũla wavũthisye wĩvĩto wake, na ũla wanangie ũtianĩo wake, e nake ku Mbaviloni katĩ akakw’a.

17O na Valao ndakamũtethya kaũnĩ na ĩta syake syĩ vinya na nguthu yake nene, yĩla makomba mbumbu na kwaka ngome, mavete andũ aingĩ.

18Nũndũ nũvũthĩtye wĩvĩto kwondũ wa kwananga ũtianĩo; na sisya, nĩwanenganie kw’oko kwake, o na eekie maũndũ asu onthe; ndakavonoka.

19Kwondũ wa ũu Mwĩaĩi Yeova easya atĩĩ: O tondũ nĩ thayũ, vate ndĩi wĩvĩto wakwa ũla wavũthisye, na ũtianĩo wakwa ũla wanangie, ngaete ĩũlũ wa mũtwe wake mwene.

20Na ngalan’ya kĩtei kyakwa ĩũlũ wake, na akakwatw’a nĩ mũkwa wakwa, na ngamũete Mbaviloni, na ngamũsĩlĩĩla kw’o nũndũ wa ĩvĩtyo yake yĩla wambĩtanisye.

21N akĩi make onthe nguthunĩ syake syonthe makavalũkw’a na ũvyũ, na ala metiwa makanyaĩĩkw’a melekele kĩla kĩseve: na mũkamanya kana nyie, Yeova, nĩnĩneenete ũu.

22Ũũ nĩw’o Mwĩaĩi Yeova ũnũkwasya: O nakwa ngoosa mũthya wĩ ĩũlũ wa mũkũũ, na ngoovanda; ngatema katĩ wa tũkolwa twa ĩũlũ mũno kamwe kololo, na ngakavanda kĩĩmanĩ kĩtũlu na kĩnene:

23kĩĩmanĩ kĩtũlu kya Isilaeli ngakavanda; na kakathongoosya mbonge, na kũsyaa ũsyao, na kwĩthĩwa mũkũũ mũseo: na nyũnyi syonthe sya kĩla mũthemba wa nthwau ikekala ĩtina waw’o; ikekala muunyĩnĩ wa mbonge syaw’o.

24Na mĩtĩ yonthe ya kĩthekanĩ ĩkamanya kana nyie, Yeova, nĩnĩtheeetye mũtĩ mũasa, nĩnĩnenevetye mũtĩ mũkuvĩ, nĩnũmĩthĩtye mũtĩ mwĩũ, na nĩnĩthongooetye mũtĩ mũmũ: nyie, Yeova, nĩnĩneenete na nĩnĩkĩte ũu.

← Chapter 16 Jump to: Chapter 18 →