Ezekiel 12

Kamba (Mbivilia) 1956

← Chapter 11 Jump to: Chapter 13 →

1Na ĩngĩ ndeto ya Yeova yambũkĩa, ĩkĩmbĩa,

2Mwana wa mũndũ, nĩwĩkalaa katĩ wa nyũmba ng’endu, ala me na metho ma kwona, na matyonaa, ala me na matũ ma kwĩw’a na matyĩw’aa; nũndũ nĩ nyũmba ng’endu.

3Kwondũ wa ũu, we mwana wa mũndũ, ũmban’ya mĩio ũndũ wa kũthama, noithama mũthenya mene; na ũkathame kuma vandũ vaku kũthi vandũ vangĩ mene: nokwĩthĩwa makasũanĩa, o na kau nĩ nyũmba ng’endu.

4Na ũkaumaalye mĩio yaku mũthenya mene, ya mĩio ya mũthamo; na ũkaumaale we mwene wĩoo mene, o tondũ andũ maumaalaa mathamĩthĩtw’e.

5Vũthũa ĩima ũvainĩ mene, noikuĩla mĩio vo.

6Mene na metho moo ũkamĩkue na kĩtuo kyaku, na kũmĩkũĩla kĩvindunĩ; ũkavw’ĩke ũthyũ waku, nĩ kana ndũkone ĩ nthĩ: nũndũ nĩnĩkwiĩte wĩthĩwe wonan’yo kwa nyũmba ya Isilaeli.

7Na neeka o tondũ neeaĩwe: naumaalya mĩio yakwa mũthenya, o ta mĩio ya mũthamo, na wĩoo navũthũa ũvainĩ na kw’oko kwakwa: namyumaalya kĩvindunĩ, na namĩkua na kĩtuo kyakwa mene.

8Na kĩoko ndeto ya Yeova yambũkĩa, ĩkĩmbĩa.

9Mwana wa mũndũ, nyũmba ya Isilaeli, nyũmba ng’endu, ndĩnekũkũlya, Wĩĩka ata?

10Ũmatavye, Ũũ nĩw’o Mwĩaĩi Yeova ũnũkwasya: Ndeto ĩno ngito nĩ ũvoo wa mũnene wĩ mbee ũsumbĩnĩ wa Yelusaleme, na nyũmba yonthe ya Isilaeli ala me vo katĩ woo.

11Neena, Nyie nĩ wonan’yo wenyu: o tondũ neeka, now’o makekwa; makathamĩthw’a, maende me atave.

12Na mũnene ũsu ũla wĩ katĩ woo akakũĩla kĩvindunĩ na kĩtuo kyake, na akaumaala: makavũthũa ũvai makuĩle vo: akavw’ĩka ũthyũ wake, nũndũ ndakona ĩ nthĩ na metho make.

13Ngalan’ya kĩtei kyakwa ĩũlũ wake, na akakwatw’a nĩ kĩtei kyakwa; na ngamũtwaa Mbaviloni nthĩ ya Akalitei; ĩndĩ ndakamyona, o na kau akakw’ĩa kw’o.

14Na ngamanyaĩĩkya melekele kĩla kĩseve onthe ala mamũthyũlũlũkĩte mamũtethye, na nguthu syake syonthe; na ngamaatĩĩa nĩkũĩte ũvyũ.

15Na makamanya ninyie Yeova, yĩla ngamanyaĩĩkya mbaĩnĩ, na kũmekangya kũũ na kũũ nthĩnĩ wa i nthĩ.

16Ĩndĩ ngatialya andũ avũthũ moo mavonoke ũvyũ, na yũa, na mũimũ; nĩ kana matavanasye mothatyo moo onthe katĩ wa i mbaĩ kũla methi; na makamanya ninyie Yeova.

17Na ĩngĩ ndeto ya Yeova yambũkĩa, ĩkĩmbĩa,

18Mwana wa mũndũ, ya kĩmũtũ kyaku ũitelemanga, noinyw’a manzĩ maku na kũtelemanga na kũkĩa;

19na matavye andũ ma ĩ nthĩ, Uũ nĩw’o Mwĩaĩĩ Yeova ũnũkwasya ũndũ wa ala matwĩe Yelusaleme, na nthĩ ya Isilaeli: Makaya kĩmũtũ kyoo na w’ĩa, na kũnyw’a manzĩ moo makĩteva, nũndũ nthĩ yake ĩkeethĩwa nthei, nĩ kũtavĩwa kyonthe kĩla kĩ nthĩnĩ wayo, nũndũ wa ũng’endu wa onthe ala mamĩtwĩe.

20Na ndũa ila syĩ na andũ ikatw’ĩka maanzo, na nthĩ ĩkeethĩwa nthei; na mũkamanya ninyie Yeova.

21Na ndeto ya Yeova yambũkĩa, ĩkĩmbĩa,

22Mwana wa mũndũ, nthimo ĩno ĩla mwĩ nayo nthĩ ya Isilaeli nĩ myaũ, ĩkwasya, Mĩthenya nĩyongelekete, na kĩla woni ndũkwĩanĩw’a?

23Kwondũ wa ũu matavye, Ũũ nĩw’o mwĩaĩi Yeova ũnũkwasya: Ngamina nthimo ĩsu, na matĩkamĩneena ĩngĩ ta nthimo nthĩnĩ wa Isilaeli; ĩndĩ matavye, Mĩthenya nĩ mĩthengeeu, na wĩanĩsyo wa kĩla woni.

24Nũndũ kũtikethĩwa ĩngĩ woni wa ũvũngũ kana kũaũsya kwa ngathĩĩo nthĩnĩ wa nyũmba ya Isilaeli.

25Nũndũ ninyie Yeova; nganeena, na ndeto ila nganeena ĩkeanĩw’a; ndĩkaselewa ĩngĩ: nũndũ mĩthenyanĩ yenyu, we nyũmba ng’endu, nganeena ĩla ndeto, na ngamĩanĩsya, easya ũu Mwĩaĩi Yeova.

26Na ĩngĩ ndeto ya Yeova yambũkĩa, ĩkĩmbĩa,

27Mwana wa mũndũ, sisya, ala ma nyũmba ya Isilaeli measya, Woni ũla ũnũkwona nĩ wa mĩthenya mingĩ yũkĩte, na nũnũkwathana ũvoo wa mavinda me kũasa.

28Kwondũ wa ũu matavye, Ũũ nĩw’o Mwĩaĩi Yeova ũnũkwasya: Kũikaselewa ĩngĩ o na ĩmwe ya ndeto syakwa, ĩndĩ ndeto ĩla nganeena ĩkeanĩw’a, easya ũu Mwĩaĩi Yeova.

← Chapter 11 Jump to: Chapter 13 →