Ezekiel 9

Kamba (Mbivilia) 1956

← Chapter 8 Jump to: Chapter 10 →

1Nĩvo ĩndĩ waneenie na wasya mũnene matũnĩ makwa, akĩmbĩa, Thengeesya ala me na wĩai ndũanĩ, kĩla mũndũ e na mũio wake wa kaũ wa kwananga kw’okonĩ kwake.

2Na sisya, aũme thanthatũ mooka na nzĩa ya mbingĩlo ya ĩũlũ, ĩla yelekele ngalĩ ya ĩũlũ, kĩla mũndũ e na mũio wake wa kaũ wa kũaa kw’okonĩ kwake; na mũndũ ũmwe katĩ woo eevw’ĩkĩte ngũa ya katane, e na ũvya wa ingi wa mũandĩki kĩnyunyunĩ kyake. Na malika, na maũngama ũtee wa kĩthembeo kya ũthuku.

3Na ũtheu mũtisu wa Ngai wa Isilaeli waĩ ũnambata kuma ĩũlũ wa mũkeluvi, vala wekalaa, kũvika mwalyonĩ wa mũomo wa nyũmba: na amwĩta mũndũ ũla wevw’ĩkĩte ngũa ya katane, ũla waĩ na ũvya wa ingi wa mũandĩki kĩnyunyunĩ kyake.

4Na Yeova amwĩa, Vĩtĩla katĩ wa ndũa, katĩ wa Yelusaleme, noiĩkĩa ũvano itulyanĩ sya andũ ala mavevũũkaa na ala maĩaa nũndũ wa mothatyo onthe ala mekawa katĩ wayo.

5Na amea ala angĩ ngĩw’a na matũ makwa, Vĩtĩlai ndũanĩ ĩtina wake, na mũikũna: itho yenyu yĩtĩkaekee, o na mũtikew’ĩe tei;

6ũaai vyũ mũtumĩa, mwanake na mwĩĩtu mũtheu, na syana nini na aka; ĩndĩ mũtikathengeee mũndũ o na wĩva ũla wĩ na ũla ũvano: na ambĩlĩlyai vala vandũ vakwa vatheu. Na ĩndĩ mambĩlĩlya na atumĩa ala maĩ mbee wa ĩ nyũmba.

7Na amea, Vukyai ĩ nyũmba, na mũyusũsya nza ala mooawa: umaalai. Na maumaala, na makũna ndũa.

8Na kweethĩwa yĩla maĩ makĩkũna, nakwa nĩtiĩtwe, navalũka na ũthyũ wakwa, na naĩa, na nasya, A! Mwĩaĩi Yeova! Ũkaananga ũtĩalo w’onthe wa Isilaeli kwonosyanĩ kwaku kwa ũthilĩku waku ĩũlũ wa Yelusaleme?

9Nĩvo ĩndĩ wambĩie, Ũthũku wa nyũmba ya Isilaeli na Yuta nĩ mũnene mũno, na nthĩ nĩyusũĩte nthakame, na ndũa ũng’endu: nũndũ measya, Yeova nũtiĩte ĩ nthĩ, na Yeova ndonaa.

10Na ngalĩ ĩ yakwa, itho yakwa yĩtikaekea, o na ndikew’ĩa tei, ĩndĩ ngaete mĩendele yoo mĩtwenĩ yoo.

11Na, sisya, ũla mũndũ wevw’ĩkĩte ngũa ya katane, ũla waĩ na ũvya wa ingĩ kĩnyunyunĩ kyake, atũnga ũvoo, akyasya, Nĩnĩkĩte o ũndũ wambĩaĩe.

← Chapter 8 Jump to: Chapter 10 →