Ezekiel 48

Kamba (Mbivilia) 1956

← Chapter 47 Jump to:

1Aa nĩmo masyĩtwa ma i mbaĩ: Kuma mũthya wa ngalĩ ya ĩũlũ, ũtee wa nzĩa ya Ethiloni kũvika ũlikĩlonĩ wa Amathi, Asali‐enani mũvakanĩ wa Ndamasiku, kwelekela ngalĩ ya ĩũlũ vakuvĩ na Amathi (na makeethĩwa na ndee syoo ngalĩ ya wumĩlonĩ wa syũa na ngalĩ ya ũthũĩlonĩ wa syũa), Ndani, kĩanda kĩmwe.

2Na ĩngĩ mũvakanĩ wa Ndani, kuma ngalĩ ya wumĩlonĩ wa syũa kũvika ngalĩ ya ũthũĩlonĩ wa syũa, Aseli, kĩanda kĩmwe.

3Na mũvakanĩ wa Aseli, kuma ngalĩ ya wumĩlonĩ wa syũa o kũvika ngalĩ ya ũthũĩlonĩ wa syũa, Navitali, kĩanda kĩmwe.

4Na mũvakanĩ wa Navitali, kuma ngalĩ ya wumĩlonĩ wa syũa kũvika ngalĩ ya ũthũĩlonĩ wa syũa, Manase, kĩanda kĩmwe.

5Na mũvakanĩ wa Manase, kuma ngalĩ ya wumĩlonĩ wa syũa kũvika ngalĩ ya ũthũĩlonĩ wa syũa, Evalaimu, kĩanda kĩmwe.

6Na mũvakanĩ wa Evalaimu, kuma ngalĩ ya wumĩlonĩ wa syũa kũvika ngalĩ ya ũthũĩlonĩ wa syũa, Leuveni, kĩanda kĩmwe.

7Na ĩngĩ mũvakanĩ wa Leuveni, kuma ngalĩ ya wumĩlonĩ wa syũa kũvika ngalĩ ya ũthũĩlonĩ wa syũa, Yuta, kĩanda kĩmwe.

8Na mũvakanĩ wa Yuta, kuma ngalĩ ya wumĩlonĩ wa syũa kũvika ngalĩ ya ũthũĩlonĩ wa syũa, kũkeethĩwa ĩla nthembo ya nthĩ ĩla mũkathemba, ũthanthau wa mĩangi ngili mĩongo ĩlĩ na itano, na ũasa ta kĩanda kĩmwe, kuma ngalĩ ya wumĩlonĩ wa syũa kũvika ngalĩ ya ũthũĩlonĩ wa syũa: na vala vandũ vatheu vakeethĩwa katĩ wakyo.

9Nthembo ĩsu ĩla mũkamũthembea Yeova ĩkeethĩwa ũasa wa mĩangi ngili mĩongo ĩlĩ na itano, na ũthanthau wa ngili ĩkũmi.

10Nthembo ĩsu ntheu ĩkeethĩwa kwondũ wa aa, o kwondũ wa athembi; kwelekela ngalĩ ya ĩũlũ ũasa wa ngili mĩongo ĩlĩ na itano, na kwelekela ngalĩ ya ũthũĩlonĩ wa syũa ũthanthau wa ngili ĩkũmi, na kwelekela ngalĩ ya wumĩlonĩ wa syũa ũthanthau wa ngili ĩkũmi, na kwelekela ngalĩ ya ĩtheo ũasa wa ngili mĩongo ĩli na itano: na vala vandũ vatheu va Yeova vakeethĩwa katĩ wakyo.

11Kĩkeethĩwa kya athembi ala mavathĩtwe methĩwe atheu ma ana ma Nzatoki, ala masũvĩaa wĩaĩo wakwa, ala mataandia yĩla ana ma Isilaeli mandiĩte, o tondũ Alivai mandiie.

12Na kĩkeethĩwa kwoo nthembo kuma nthembonĩ ya nthĩ, kĩndũ kĩtheu ki, mũvakanĩ wa Alivai.

13Na kwĩanana na mũvaka wa athembi, Alivai makeethĩwa na kĩanda ũasa wa ngili mĩongo ĩlĩ na itano, na ũthanthau wa ngili ĩkũmi: ũasa w’onthe ũkeethĩwa ngili mĩongo ĩlĩ na itano, na ũthanthau ngili ĩkũmi.

14Na matikathoosya kĩlungu kyakyo, kana kũkũan’ya, o na mosyao ma mbee ma nthĩ matikekwa ũndũ ũngĩ; nũndũ nĩ ntheu kwa Yeova.

15Na ngili itano ila itialĩte sya ũthanthau, mbee wa ila ngili mĩongo ĩlĩ na itano, ikeethĩwa sya kũtethya onthe, kwondũ wa ndũa, kwondũ wa kũtũaa na kwondũ wa isesi; na ndũa ĩkeethĩwa vu katĩ.

16Na ii ikeethĩwa ithimo sya vo: ngalĩ ya ĩũlũ ngili inya na maana atano, na ngalĩ ya ĩtheo ngili inya na maana atano, na ngalĩ ya wumĩlonĩ wa syũa ngili inya na maana atano, na ngalĩ ya ũthũĩlonĩ wa syũa ngili inya na maana atano.

17Na ndũa ĩkeethĩwa na syengo: kwelekela ngalĩ ya ĩũlũ maana elĩ na mĩongo ĩtano, na kwelekela ngalĩ ya ĩtheo maana elĩ na mĩongo ĩtano, na kwelekela ngalĩ ya wumĩlonĩ wa syũa maana elĩ na mĩongo ĩtano, na kwelekela ngalĩ ya ũthũĩlonĩ wa syũa maana elĩ na mĩongo ĩtano.

18Ũtialo wa ũasa, kwĩanana na ĩla nthembo ntheu, ũkeethĩwa ngili ĩkũmi kwelekela ngalĩ ya wumĩlonĩ wa syũa, na ngili ĩkũmi kwelekela ngalĩ ya ũthũĩlonĩ wa syũa; kwĩanana na ĩla nthembo ntheu; na wingĩvonĩ wa ũsyao waw’o kũkeethĩwa lĩu wa ala matethasya wĩa ndũanĩ.

19Na ala matethasya wĩa ndũanĩ, kuma mbaĩnĩ syonthe sya Isilaeli, makamĩĩmaa.

20Nthembo ĩsu yonthe ya nthĩ ĩkeethĩwa ngili mĩongo ĩlĩ na itano kwa ngili mĩongo ĩlĩ na itano: mũkathemba nthembo ntheu yĩanene ngalĩ inya, vamwe na kĩlungu kya ndũa.

21Na ĩla ĩkatiala ĩkeethĩwa ya ũla mũnene wĩ mbee ũsumbĩnĩ, ngalĩ ĩmwe na ngalĩ ĩla ĩngĩ ya ĩla nthembo ntheu na kĩlungu kya ndũa; ngalĩ ya mbee ya ila ngili mĩongo ĩlĩ na itano ya ĩla nthembo kwelekela mũvaka wa ngalĩ ya wumĩlonĩ wa syũa, na kwelekela ngalĩ ya ũthũĩlonĩ wa syũa ngalĩ ya mbee ya ila ngili mĩongo ĩlĩ na itano kwelekela mũvaka wa ngalĩ ya ũthũĩlonĩ wa syũa, kwĩanana na ila ianda, vakeethĩwa va mũnene wĩ mbee ũsumbĩnĩ: na nthembo ntheu na vandũ vatheu va nyũmba vakeethĩwa vu katĩ.

22Na ĩngĩ kuma ng’ũndũnĩ ya Alivai, na kuma kĩlungunĩ kya ndũa, nũndũ kĩ katĩ wa kĩla kya ũla mũnene wĩ mbee ũsumbĩnĩ, katĩ wa mũvaka wa Yuta na mũvaka wa Mbenyamini, kũkeethĩwa kya ũla mũnene.

23Na ũndũ wa mbaĩ ila ingĩ: kuma ngalĩ ya wumĩlonĩ wa syũa kũvika ngalĩ ya ũthũĩlonĩ wa syũa, Mbenyamini, kĩanda kĩmwe.

24Na ĩngĩ mũvakanĩ wa Mbenyamini, kuma ngalĩ ya wumĩlonĩ wa syũa kũvika ngalĩ ya ũthũĩlonĩ wa syũa, Simeoni, kĩanda kĩmwe.

25Na ĩngĩ mũvakanĩ wa Simeoni, kuma ngalĩ ya wumĩlonĩ wa syũa kũvika ngalĩ ya ũthũĩlonĩ wa syũa, Isakali, kĩanda kĩmwe.

26Na ĩngĩ mũvakanĩ wa Isakali, kuma ngalĩ ya wumĩlonĩ wa syũa kũvika ngalĩ ya ũthũĩlonĩ wa syũa, Nzevuluni, kĩanda kĩmwe.

27Na ĩngĩ mũvakanĩ wa Nzevuluni, kuma ngalĩ ya wumĩlonĩ wa syũa kũvika ngalĩ ya ũthũĩlonĩ wa syũa, Ngati, kĩanda kĩmwe.

28Na ĩngĩ mũvakanĩ wa Ngati, ngalĩ ya ĩtheo kwelekela ĩtheo, mũvaka ũkeethĩwa kuma Tamali kũvika manzĩ ma Meliva‐katesi, kũvika kalũsĩ ka Misili, kũvika ũkanga mũnene.

29Ĩsu nĩyo nthĩ ĩla mwĩaan’ya mbaĩnĩ sya Isilaeli na nzĩa ya kũlimana yĩthĩwe ũtiĩwa, na isu nĩsyo ianda syasyo, easya ũu Mwĩaĩi Yeova.

30Na aa nĩmo mawumaalĩlo ma ndũa: Ngalĩ ya ĩũlũ mĩangi ngili inya na maana atano kwa kũthima;

31na mbingĩlo sya ndũa ikeetanĩaw’a na masyĩtwa ma mbaĩ sya Isilaeli, mbingĩlo itatũ ngalĩ ya ĩũlũ: mbingĩlo ya Leuveni, ĩmwe; mbingĩlo ya Yuta, ĩmwe; mbingĩlo ya Livai, ĩmwe.

32Na ngalĩ ya wumĩlonĩ wa syũa mĩangi ngili inya na maana atano, na mbingĩlo itatũ: o mbingĩlo ya Yosevu, ĩmwe; mbingĩlo ya Mbenyamini, ĩmwe; mbingĩlo ya Ndani, ĩmwe.

33Na ngalĩ ya ĩtheo mĩangi ngili inya na maana atano kwa kũthima, na mbingĩlo itatũ: mbingĩlo ya Simeoni, ĩmwe; mbingĩlo ya Isakali, ĩmwe; mbingĩlo ya Nzevuluni, ĩmwe.

34Ngalĩ ya ũthũĩlonĩ wa syũa, mĩangi ngili inya na maana atano, vamwe na mbingĩlo itatũ syoo: mbingĩlo ya Ngati, ĩmwe; mbingĩlo ya Aseli, ĩmwe: mbingĩlo ya Navitali, ĩmwe.

35Ĩkeethĩwa mĩangi ngili ĩkũmi na nyanya kũthyũlũlũka ngalĩ syonthe: na syĩtwa ya ndũa kuma mũthenya ũsu yĩkeethĩwa, Yeova e vo.

← Chapter 47 Jump to: