Ezekiel 32

Kamba (Mbivilia) 1956

← Chapter 31 Jump to: Chapter 33 →

1Na kweethĩwa mwaka wa ĩkũmi na ĩlĩ, mwei wa ĩkũmi na ĩlĩ, mũthenya wa mbee wa mwei, ndeto ya Yeova yambũkĩa, ĩkĩmbĩa,

2Mwana wa mũndũ, ambĩlĩlya kĩĩo ĩũlũ wa Valao mũsumbĩ wa Misili, noimwĩa, Waelekanilw’e na mũnyambũ wa mũika wa i mbaĩ: ĩndĩ ũilyĩ mũkũnga mũnene maũkanganĩ; na waumĩla na vinya mbũsĩnĩ syaku, na wathokoan’ya manzĩ na maũũ maku, na wavukya mbũsĩ syoo.

3Ũũ nĩw’o Mwĩaĩi Yeova ũnũkwasya: Ngalan’ya kĩtei kyakwa ĩũlũ waku kya ngo mbingĩ sya andũ; nao makakũkwatya na kĩtei kyakwa.

4Na ngakũtia wĩ ĩũlũ wa nthĩ, ngakwĩkya weũnĩ, ngatuma nyũnyi syonthe sya yayaya ikũvũĩla, na ngavũnĩthya nyamũ sya nthĩ yonthe na nyama sya mwĩĩ waku.

5Na ngaia nyama sya mwĩĩ waku ĩĩmanĩ, na kusũsya myanda ũtũlu waku.

6O na nganyithya na nthakame yaku nthĩ ya kũthambĩa kwaku, o kũvika iĩmanĩ; na mbũsĩ ikausũwa nue.

7Na yĩla ngakũvosya, ngavw’ĩka matu, na kwĩkĩa ndata kĩvindu; ngavw’ĩka syũa na ĩthweo, na mwei ndũkaumya kyeni kyaw’o.

8Syeni syonthe sya ĩtunĩ ila itisaa ngaitw’ĩkĩthya kĩvindu ĩũlũ waku, na ngaia kĩvindu ĩũlũ wa nthĩ yaku, easya ũu Mwĩaĩi Yeova.

9O na ngathĩn’ya ngoo sya ngo mbingĩ sya andũ, yĩla nĩete wanangĩko waku katĩ wa i mbaĩ, ũlike nthĩ ila ũtaaimanya.

10Ĩĩ, ngatuma ngo mbingĩ sya andũ iseng’w’a nue, na asumbĩ moo makakĩa na w’ĩa mwai kwondũ waku, yĩla ngavyũlĩlya ũvyũ wakwa mbee woo; na makatetema kĩla kaven’ya, kĩla mũndũ kwondũ wa thayũ wake mwene, mũthenya wa kũvalũka kwaku.

11Nũndũ ũũ nĩw’o Mwĩaĩi Yeova ũnũkwasya: Ũvyũ wa mũsumbĩ wa Mbaviloni ũkooka ĩũlũ waku.

12Ngavalũkya aingĩ maku na mbyũ sya ala me na ũtonyi; asu onthe nĩo ala ma ũtĩsya ma i mbaĩ: na makatw’ĩkĩthya ngathĩĩo ya Misili ya mana, na wingĩ w’onthe wa andũ ma vo makaanangwa.

13O na ngaananga nyamũ syonthe sya vo ila syĩ ũtee wa manzĩ maingĩ; o na kũũ kwa mũndũ kũikamauluan’ya ĩngĩ, kana mavũngũ ma nyamũ maikamauluan’ya.

14Nĩvo ĩndĩ nĩkelemya manzĩ moo, na ngatwaĩthya mbũsĩ syoo iende ta mauta, easya ũu Mwĩaĩi Yeova.

15Yĩla ngatw’ĩkĩthya nthĩ ya Misili nthei na ĩeketwe, nthĩ ĩthelelwe nĩ kusũa kwayo, yĩla ngakũna onthe ala mamĩtwĩe, nĩvo ĩndĩ makamanya ninyie Yeova.

16Kĩĩ nĩkyo kĩĩo kĩla makaĩa nakyo; eĩtu ma i mbaĩ makaĩa nakyo; makamĩmetea Misili na wingĩ w’onthe wa andũ mayo nakyo, easya ũu Mwĩaĩi Yeova.

17Na kweethĩwa mwaka wa ĩkũmi na ĩlĩ, mũthenya wa ĩkũmi na ĩtano wa mwei, ndeto ya Yeova yambũkĩa, ĩkĩmbĩa,

18Mwana wa mũndũ, ĩa kwondũ wa wingĩ wa andũ ma Misili, noimekya nthĩ, o we, na eĩtu ma mbaĩ syĩ nguma, kũvika kũndũ kwĩ nthĩnĩ wa nthĩ, vamwe na ala matheeaa yĩla ĩimanĩ.

19Ũvĩtũkĩte ũũ kwanakavanĩ? Theea, noyiwa vamwe na ala mate aĩke.

20Makavalũka katĩ wa ala mooaiwe na ũvyũ: we nũnenganĩtwe ũvyũnĩ; mũkusye ũmũtwae vamwe na wingĩ wa andũ make.

21Ala me vinya katĩ wa ala me na ũtonyi makaneena nake me Seoli vamwe na ala mamũtethasya: nĩmatheeete, nĩmakomaa ki, o ala mate aĩke, mooaiwe na ũvyũ.

22Asuli e vo na nguthu yake yonthe; mbũa syake nimũthyũlũlũkĩte; onthe moaĩtwe, mavalũkĩtw’e na ũvyũ;

23mbũa syoo siĩtwe kĩtulunĩ kya yĩla ĩima, na nguthu yake nĩthyũlũlũkĩte mbũa yake; onthe moaĩtwe, mavalũkĩtw’e na ũvyũ, ala matĩsasya me nthĩ ya ala me thayũ.

24Elamu e vo, na wingĩ wa andũ make mathyũlũlũkĩte mbũa yake; onthe moaĩtwe, mavalũkĩtw’e na ũvyũ, ala matheeie mate aĩke kũndũ kwĩ nthĩnĩ wa nthĩ, ala matĩsasya me nthĩ ya ala me thayũ, na nĩmakuĩte nthoni syoo vamwe na ala matheeaa yĩla ĩimanĩ.

25Nĩmamwiĩe ũkomo katĩ wa ala mooaiwe vamwe na wingĩ w’onthe wa andũ make; mbũa syake nimũthyũlũlũkĩte; onthe mate aĩke, moaĩtwe na ũvyũ; nũndũ ũtĩsyo woo watĩsasya me nthĩ ya ala me thayũ, na nĩmakuĩte nthoni syoo vamwe na ala matheeaa yĩla ĩimanĩ: nĩwiĩtwe katĩ wa ala moaiwe.

26Meseki, Tuvali, na wingĩ w’onthe wa andũ moo me vo; mbũa syoo nimathyũlũlũkĩte; onthe mate aĩke, moaĩtwe na ũvyũ; nũndũ matĩsasya me nthĩ ya ala me thayũ.

27Na matikakoma vamwe na ala me na ũtonyi ala mavalũkile ma ala mate aĩke, ala matheeie Seoli me na mĩio yoo ya kaũ, na maiĩte mbyũ syoo ungu wa mĩtwe yoo, na mothũku moo me ĩũlũ wa mavĩndĩ moo; nũndũ maĩ ũtĩsyo wa ala me na ũtonyi nthĩ ya ala me thayũ.

28Ĩndĩ we ũkatũlĩlwa katĩ wa ala mate aĩke, na ũkakoma na ala mooaiwe na ũvyũ.

29Etomu e vo, asumbĩ make na anene make onthe me mbee ũsumbĩnĩ, ala me na vinya woo makomiw’e vamwe na ala mooaiwe na ũvyũ: makakoma na ala mate aĩke, na vamwe na ala matheeaa yĩla ĩimanĩ.

30Me vo anene me mbee ũsumbĩnĩ ma ngalĩ ya ĩũlũ, onthe, na Asitoni onthe, ala matheeie vamwe na ala oawa; nĩmeũsonokw’a ũtĩsyonĩ ũla meekie kwondũ wa vinya woo; na nĩmakomaa mate aĩke vamwe na ala mooaiwe na ũvyũ na nĩmakuaa nthoni syoo vamwe na ala matheeaa yĩla ĩimanĩ.

31Valao akamona, na akakiakiw’a kwondũ wa wingĩ wa andũ make, o Valao na ita syake syonthe, moaĩtwe na ũvyũ, easya ũu Mwĩaĩi Yeova.

32Nũndũ nĩnĩkĩĩte ũtĩsyo wake nthĩ ya andũ me thayũ; na akaiwa katĩ wa ala mate aĩke, vamwe na ala mooaiwe na ũvyũ, o Valao, na wingĩ w’onthe wa andũ make, easya ũu Mwĩaĩi Yeova.

← Chapter 31 Jump to: Chapter 33 →