Ezekiel 8

Kamba (Mbivilia) 1956

← Chapter 7 Jump to: Chapter 9 →

1Na kweethĩwa mwaka wa thanthatũ, mwei wa thanthatũ, mũthenya wa katano wa mwei, yĩla nekalĩte nyũmbanĩ yakwa, na atumĩa ma Yuta mekalĩte mbee wakwa, kw’oko kwa Mwĩaĩi Yeova kwambalũkĩla nĩ kw’o.

2Na ĩndĩ noona, na, sisya, mũvw’ano kwoneka kwaw’o wailyĩ mwaki; kuma mũvw’anĩlenĩ wa kĩnyunyu kyake na kũtheea, kwailyĩ mwaki; na kũma kĩnyunyu kyake na kwambata, kũsiw’anĩ kwailyĩ ũtisu, o ta ũthuku wakakaa.

3Na atambũũkya kĩndũ kĩilyĩ kw’oko, na angwata kĩthũkũ kĩmwe kya mũtwe wakwa; na Veva ambũkĩlya katĩ wa nthĩ na ĩtu, na andwaa mawoninĩ ma Ngai ku Yelusaleme, mũomonĩ wa mbingĩlo ya nza ya nthĩnĩ ila yelekele ngalĩ ya ĩũlũ; vala vaĩ wĩkalo wa mũvw’anano wa kĩwĩu, ũla wĩkĩaa kĩwĩu.

4Na, sisya, ũtheu mũtisu wa Ngai wa Isilaeli waĩ vo, kwĩanana na woni ũla noonee ũiĩnĩ.

5Nĩvo ĩndĩ wambĩie, Mwana wa mũndũ, yu ũngalalya metho maku ũsisye nzĩa ĩla yelekele ngalĩ ya ĩũlũ. Kwondũ wa ũu naũngalalya metho makwa nasisya nzĩa ĩla yelekele ngalĩ ya ĩũlũ, na sisya, ngalĩ ya ĩũlũ ya mbingĩlo ya kĩthembeo mũvw’anano ũsu wa kĩwĩu waĩ ũlikĩlonĩ.

6Na ambĩa, Mwana wa mũndũ, nũkwona ũndũ mekwĩka? O mothatyo manene ala andũ ma nyũmba ya Isilaeli mekĩaa vaa, nĩ kana nĩende kũasa na vandũ vakwa vatheu? Ĩndĩ ũkoona ĩngĩ mothatyo angĩ manene.

7Na andete mũomonĩ wa nza; na yĩla nasiisye, sisya, ĩima ũvainĩ.

8Nĩvo ĩndĩ wambĩie, Mwana wa mũndũ yu vũthũa ũvai: na yĩla navũthũie ũvai, sisya, mũomo.

9Na ambĩa, Lika, wone mothatyo mathũku ala mekĩaa vaa.

10Kwondũ wa ũu nalika na noona; na sisya, kĩla mũvw’ano wa tũsamũ tũla tũtambũkaa, na nyamũ imene, na mĩvw’anano yonthe ya nyũmba ya Isilaeli, syavanĩtwe ũvainĩ, ngalĩ syonthe.

11Na kwaũngama mbee wasyo aũme mĩongo mũonza ma atumĩa ma nyũmba ya Isilaeli; na Yaasania mwana wa Savani aũngama katĩ woo, kĩla mũndũ e na kĩtoeesya kyake kw’okonĩ kwake; na mũuke wa mũumbĩ wa ũvani wambata.

12Nĩvo ĩndĩ wangũlilye, Mwana wa mũndũ, nĩwonete ũndũ atumĩa ma nyũmba ya Isilaeli mekĩaa kĩvindunĩ, kĩla mũndũ tũsũmbanĩ twake twa mĩvw’anano? Nũndũ measya, Yeova ndatwonaa; Yeova nũtiĩte ĩ nthĩ.

13Na ĩngĩ ambĩa, Ũkoona ĩngĩ mothatyo angĩ manene ala mekaa.

14Na ĩndĩ andete mũomonĩ wa mbingĩlo ya nyũmba ya Yeova ĩla yelekele ngalĩ ya ĩũlũ; na sisya, aka mekalĩte vo makĩĩĩa Tamusi.

15Nĩvo ĩndĩ wangũlilye, Nĩwonete ũu, we mwana wa mũndũ? Ũkoona ĩngĩ mothatyo angĩ manene kũvĩtũka aa.

16Na andete nza ya nthĩnĩ ya nyũmba ya Yeova; na sisya, nũomonĩ wa ĩkalũ ya Yeova, katĩ wa valasya na kĩthembeo, kwaĩ aũme ta mĩongo ĩlĩ na atano, mĩongo yoo yelekele ĩkalũ ya Yeova, na mothyũ moo melekele wumĩlonĩ wa syũa; na maĩ vo makĩthaitha syũa melekele wumĩlonĩ wa syũa.

17Na ĩndĩ angũlya, Nĩwonete ũu, we mwana wa mũndũ? Nĩ ũndũ ũnini kwa nyũmba ya Yuta mekae mothatyo ala mekĩaa vaa? Nũndũ nĩmausũĩtye nthĩ ũng’endu, na nĩmethyũũĩte ĩngĩ manthatye: na, sisya, mathengeesyaa kaũvonge, manyiũũnĩ.

18Kwondũ wa ũu nakwa ngeeka na ũthatu; itho yakwa yĩtikaekea, o na ndikew’ĩa tei; o na ethĩwa makaĩĩa matũnĩ makwa na wasya mũnene, ndikamew’a.

← Chapter 7 Jump to: Chapter 9 →