Ezekiel 29

Kamba (Mbivilia) 1956

← Chapter 28 Jump to: Chapter 30 →

1Mwaka wa ĩkũmi, mwei wa ĩkũmi, mũthenya wa ĩkũmi na ĩlĩ wa mwei, ndeto ya Yeova yambũkĩa, ĩkĩmbĩa,

2Mwana wa mũndũ, elekelya Valao mũsumbĩ wa Misili ũthyũ waku, noimwathanĩa, o na Misili yonthe;

3neena, noimwĩa, Ũũ nĩw’o Mwĩaĩi Yeova ũnũkwasya: Sisya, nĩ na ũndũ naku, we Valao mũsumbĩ wa Misili, mũkũnga mũnene ũla wĩkalaa mbũsĩnĩ syake, ũla waĩtye, Usĩ wakwa nĩ wakwa mwene, na nĩnzeũvĩtye kwondũ wakwa mwene.

4Na ngeekĩa mboloi nene ngambuunĩ syaku, na ngatuma makũyũ ma mbũsĩ syaku malũman’ya na makwaũ maku; na ngakumya nthĩnĩ wa mbũsĩ syaku, vamwe na makũyũ onthe ma mbũsĩ syaku ala malũmanasya na makwaũ maku.

5Na ngakwĩkya weũnĩ, we na makũyũ onthe ma mbũsĩ syaku: ũkavalũka weũnĩ; ndũkombanw’a vamwe, o na ndũkatũngĩanĩwa; nĩnĩkũnenganĩte wĩthĩwe lĩu wa nyamũ sya kũũ nthĩ na nyũnyi sya yayaya.

6Na onthe ala matwĩe Misili makamanya ninyie Yeova, nĩkwĩthĩwa maĩ ndata ya mũangi kwa nyũmba ya Isilaeli.

7Yĩla makũkwatie kw’oko kwaku, watũlĩka, na watembũa ituo syoo syonthe; na yĩla makwaĩĩe, watũlĩka, na watuma inyunyu syoo syonthe itetema.

8Kwondũ wa ũu Mwĩaĩi Yeova nũnũkwasya: Sisya, ngaete ũvyũ ĩũlũ waku, na ngaveta kwaku mũndũ na nyamũ.

9Na nthĩ ya Misili ĩkeethĩwa nthei na mbanangĩku; na makamanya ninyie Yeova. Nĩkwĩthĩwa nĩwaĩtye, Ũsĩ nĩ wakwa, ninyie nawũmbie;

10kwondũ wa ũu, sisya, nĩ na ũndũ naku, na mbũsĩ syaku, na ngaananga vyũ nthĩ ya Misili na ĩkeethĩwa nthei, kuma mwako mũtũlu wa mũnyoolo wa Sevene o kũvika mũvaka wa Ethiovia.

11Vati kũũ kwa mũndũ kũkamĩvĩtĩla, o na kũũ kwa nyamũ kũikamĩvĩtĩla, o na ndĩkatũwa myaka mĩongo ĩna.

12Na ngatw’ĩkĩthya nthi ya Misili nthei katĩ wa nthĩ ila nthei; na ndũa syayo katĩ wa ndũa ila itw’ĩkĩthĩtw’e maanzo ikeethĩwa nthei myaka mĩongo ĩna; na nganyaĩĩkĩsya Amislili katĩ wa i mbaĩ, na kũmanyaĩĩkĩsya katĩ wa i nthĩ.

13Nũndũ ũũ nĩw’o Mwĩaĩi Yeova ũnũkwasya: Myaka mĩongo ĩna yathela ngoomban’ya Amisili kuma ngonĩ sya andũ kũla manyaĩĩkĩw’e;

14na ngatũnga Misili maume kũtavwanĩ, na ngatuma masyoka nthĩ ya Vathilosi, nthĩ ya kũsyaĩwa kwoo; na makeethĩwa kw’o ũsumbĩ ĩtheo vyũ.

15Katĩ wa mosumbĩ ũkeethĩwa ĩtheo vyũ; o na ndũketũlya ĩngĩ ĩũlũ wa i mbai: na ngamanyivya, nĩ kana matikasumbĩke i mbaĩ ĩngĩ.

16Na ndũkethĩwa wĩkwatyo wa nyũmba ya Isilaeli ĩngĩ, ũkĩete ũkilikan’yo wa ũthũku, yĩla makethyũũa kũmasisya: na makamanya ninyie Mwĩaĩi Yeova.

17Na kweethĩwa mwaka wa mĩongo ĩlĩ na mũonza, mwei wa mbee, mũthenya wa mbee wa mwei, ndeto ya Yeova yambũkĩa, ĩkĩmbĩa,

18Mwana wa mũndũ, Nevukatilesa mũsumbĩ wa Mbaviloni athũkũmĩthisye ita syake ũthũkũmi mũnene ĩũlũ wa Tile: kĩla mũtwe waya ũvaa, na kĩla kĩtuo kyasyũlĩka; ĩndĩ ndaĩ na ĩtuvi, o na ita syake, kuma Tile, nũndũ wa ũthũkũmi ũla wathũkũmie ĩũlũ wayo.

19Kwondũ wa ũu Mwĩaĩi Yeova nũnũkwasya: Sisya, ngamũnenga Nevukatilesa mũsumbĩ wa Mbaviloni nthĩ ya Misili; na akatwaa wingĩ wa andũ mayo, na kwosa mũtavo wayo, na kwosa mbuta yayo; na ĩkeethĩwa ĩtuvi ya ita syake.

20Nĩnĩmũnengete nthĩ ya Misili yĩthĩwe ĩtuvi yake yĩla wathũkũmĩe, nĩkwĩthĩwa nĩmanthũkũmie, easya ũu Mwĩaĩi Yeova.

21Mũthenya ũsu ngathongoosya ũvya nyũmbanĩ ya Isilaeli, na ngakũnenga kwathamya kanyw’a waku katĩ woo; na makamanya ninyie Yeova.

← Chapter 28 Jump to: Chapter 30 →