Ezekiel 47

Kamba (Mbivilia) 1956

← Chapter 46 Jump to: Chapter 48 →

1Na andũngĩla mũomonĩ wa nyũmba; na, sisya, manzĩ mauma ungu wa mwalyo wa nyũmba melekele ngalĩ ya wumĩlonĩ wa syũa (nũndũ ngalĩ ya mbee ya nyũmba yelekele wumĩlonĩ wa syũa); na manzĩ matheeie kuma ungu, kuma ngalĩ ya kw’oko kwa aũme kwa nyũmba, ngalĩ ya ĩtheo ya kĩthembeo.

2Na ĩndĩ anumaalilye na nzĩa ya mbingĩlo yelekele ngalĩ ya ĩũlũ, na andongoesya nzĩanĩ yĩ ũtee kũvika mbingĩlo ya nza, na nzĩa ya mbingĩlo ĩla yelekele wumĩlonĩ wa syũa; na, sisya, manzĩ maumĩte ngalĩ ya kw’oko kwa aũme.

3Yĩla ũ mũndũ waumaalile elekele wumĩlonĩ wa syũa e na ũlii kw’okonĩ kwake, athima mĩkono ngili, na ambĩtĩlya manzĩnĩ, manzĩ ala mavikĩte ngũlimũ.

4Ĩngĩ athima ngili, an ambĩtĩlya manzĩnĩ, manzĩ mavikĩte mau. Ĩngĩ athima ngili, na ambĩtĩlya manzĩnĩ, manzĩ mavikĩte kĩnyunyu.

5Ĩtina athima ngili; na kwaĩ ũsĩ ũla ndaatonya kũkĩlĩkya; nũndũ manzĩ nĩmookĩlanasya, manzĩ ma kũthambĩĩla nthĩnĩ wamo, ũsĩ ũtatonya kũkĩlĩka.

6Na ambĩa, Mwana wa mũndũ, nĩwonete ũu? Nĩvo ĩndĩ wandwaie, na andũnga ngũkanĩ ya ũsĩ.

7Na yĩla navikĩte, sisya, ngũkanĩ ya ũsĩ kwaĩ mĩtĩ mingĩ mũno ngalĩ ĩmwe na ngalĩ ĩla ĩngĩ.

8Nĩvo ĩndĩ wambĩie, Manzĩ aa maumĩte maendete nthĩ ya ngalĩ ya wumĩlonĩ wa syũa, na makatheea maende mwandanĩ wa Alava; na makaenda melekele ũkanga; manzĩ ala maumĩlĩtw’e makathi ũkanganĩ; na manzĩ makavow’a.

9Na kũkeethĩwa, kana kĩla kyũmbe kĩ thayũ kĩla kingĩvĩte, kĩla vandũ vala mbũsĩ syũkaa, kĩkekala thayũ; na kũkeethĩwa wingĩ mũno wa makũyũ; nũndũ manzĩ asu mavikĩte, vo na manzĩ ma ũkanga makavow’a, na kĩla kĩndũ kĩkekala thayũ o vala ũsĩ wĩvika.

10Na kũkeethĩwa, atei ma makũyũ makaũngama ũtee waw’o: kuma Eni‐ngeti o kũvika Eni‐ekilaimu kũkeethĩwa vandũ va kwalan’ya itei; makũyũ moo o mĩthemba yamo, ta makũyũ ma ũkanga mũnene, maingĩ mũno.

11Ĩndĩ kũndũ kwaw’o kwĩ ndaka, na isoo syaw’o, kũtikavow’a; kũkeethĩwa kwa mũnyũ.

12Na ũtee wa ũsĩ ngũkanĩ yaw’o, ngalĩ ĩno na ngalĩ ĩya, kũkamea kĩla mũtĩ kwondũ wa lĩu, ĩtu yaw’o yĩtikavova, o na ũsyao waw’o ndũkanyiva: ũkasyaa ũsyao mweũ kĩla mwei, nũndũ manzĩ maw’o maumaa vala vandũ vatheu; na ũsyao waw’o ũkeethĩwa wa kũĩwa, na ĩtu yaw’o ya kũvosya.

13Ũũ nĩw’o Mwĩaĩi Yeova ũnũkwasya: Ũũ ũkeethĩwa mũvaka, ũla mũkaan’ya nthĩ naw’o kwondũ wa ũtiĩwa kwĩanana na mbaĩ ĩkũmi na ilĩ sya Isilaeli: Yosevu akeethĩwa na ianda ilĩ.

14Na mũkamĩtiĩwa, ũmwe ta ũla ũngĩ; nũndũ nĩnameavĩe aaĩthe menyu nĩmanenge: na nthĩ ĩno ĩkatw’ĩka yenyu yĩthĩwe ũtiĩwa.

15Na ũũ ũkeethĩwa mũvaka wa ĩ nthĩ: Ngalĩ ya ĩũlũ, kuma ũkanga mũnene, kwa nzĩa ya kũthi Ethiloni, kũvika ũlikĩlonĩ wa Nzetati;

16Amathi, Mbelotha, Sivilaimu, ĩla yĩ katĩ wa mũvaka wa Ndamasiku na mũvaka wa Amathi; Aseli‐atikoni, ĩla yĩ vakuvĩ na mũvaka wa Aulani.

17Na mũvaka kuma ũkanganĩ, ũkeethĩwa Asali‐enani mũvakanĩ wa Ndamasiku; na ngalĩ ya ĩũlũ kwelekela ĩũlũ kwĩ mũvaka wa Amathi. Ĩsu nĩyo ngalĩ ya ĩũlũ.

18Na ngalĩ ya wumĩlonĩ wa syũa, katĩ wa Aulani na Ndamasiku na Ngileati na nthĩ ya Isilaeli, kũkeethĩwa ũsĩ wa Yolotani; kuma mũvaka wa ngalĩ ya ĩũlũ, kũvika ũkanga wa ngalĩ ya wumĩlonĩ wa syũa mũkathima. Ĩsu nĩyo ngalĩ ya wumĩlonĩ wa syũa.

19Na ngalĩ ya ĩtheo kwelekela ĩtheo ũkeethĩwa kuma Tamali kũvika manzĩ ma Meliva‐katesi, kũvĩka kalũsĩ ka Misili, o kũvika ũkanga mũnene. Ĩsu nĩyo ngalĩ ya ĩtheo kwelekela ĩtheo.

20Na ngalĩ ya ũthũĩlonĩ wa syũa ũkeethĩwa ũkanganĩ mũnene, kuma mũvaka wa ngalĩ ya ĩtheo kũvika ũlikĩlonĩ wa Amathi. Ĩsu nĩyo ngalĩ ya ũthũĩlonĩ wa syũa.

21Ũu nĩw’o mũkeaan’ya nthĩ ĩno kwĩanana na mbaĩ sya Isilaeli.

22Na kũkeethĩwa, mũkamĩaan’ya na nzĩa ya kũlimana yĩthĩwe ũtiĩwa kwenyu na kwa aeni ala mekalaa ũeni kwenyu, ala makasyaa syana me katĩ wenyu; na makeethĩwa kwenyu ta ala masyaĩwe kwenyu katĩ wa ana ma Isilaeli; makeethĩwa na ũtiĩwa vamwe nenyu katĩ wa mbaĩ sya Isilaeli.

23Na kũkeethĩwa, o mbaĩnĩ vala mũeni wĩkalaa ũeni, vo mũkamũnenga ũtiĩwa wake, easya ũu Mwĩaĩi Yeova.

← Chapter 46 Jump to: Chapter 48 →