Ezekiel 42

Kamba (Mbivilia) 1956

← Chapter 41 Jump to: Chapter 43 →

1Na ĩndĩ anumaalya nza yĩ ũtee, nzĩa ya kũthi ngalĩ ya ĩũlũ: na andete kasũmbanĩ kala kelekele vala vandũ vavathan’ye, na kelekele mwako ngalĩ ya ĩũlũ.

2Mbee wa ũla ũasa wa mĩkono ĩana kwaĩ mũomo wa ngalĩ ya ĩũlũ, na ũthanthau waĩ mĩkono mĩongo ĩtano.

3Kwelekela mĩkono mĩongo ĩlĩ ĩla ya nza ya nthĩnĩ, na kwelekela nthĩ nzeũvye na mavia ĩla ya nza yĩ ũtee, kwaĩ valasya wa ĩũlũ nthĩnĩ welekele valasya wa ĩũlũ nthĩnĩ kasũmbanĩ ka katatũ ka tũla twilĩanĩlw’e.

4Na mbee wa tũsũmba kwaĩ nzĩa ya ũthanthau wa mĩkono ĩkũmi ya kũlika nthĩnĩ, nzĩa ya mũkono ũmwe; na mĩomo yatw’o yelekele ngalĩ ya ĩũlũ.

5Tũsũmba twa ĩũlũ twaĩ tũkuvangĩ; nũndũ mavalasya ma ĩũlũ nĩmaolete tũsũmba tũu, kũvĩtũka ũndũ tũla twa ĩtheo na tũla twa katĩ twaoletwe, mwakonĩ ũsu.

6Nũndũ twaĩ tũsũmba tũtatũ twilĩanĩlw’e, na tũtyaĩ na ituĩ, ta ituĩ sya nza: kwondũ wa ũu kala kaĩ ĩũlũ kaĩ katheke kwĩ kala ke ĩtheo na kala ke katĩ kuma nthĩ.

7Na wako ũla waĩ ngalĩ ya nza ũtee wa tũsũmba, kwelekela nza yĩ ũtee ngalĩ ya mbee ya tũsũmba, ũasa waw’o waĩ mĩkono mĩongo ĩtano.

8Nũndũ ũasa wa tũsũmba tũla twaĩ nza yĩ ũtee waĩ mĩkono mĩongo ĩtano: na, sisya, ngalĩ ya mbee ya ĩkalũ kwaĩ mĩkono ĩana.

9Na kuma ĩtheo wa tũsũmba tũu kwaĩ ũlikĩlo ngalĩ ya wumĩlonĩ wa syũa, vala mũndũ ũvotelaa nthĩnĩ watw’o kuma nza yĩ ũtee.

10Kĩemonĩ kya ũvai wa nza kwelekela wumĩlonĩ wa syũa, mbee wa vala vandũ vavathan’ye, na mbee wa mwako, kwaĩ tũsũmba.

11Na nzĩa yĩ mbee watw’o yaĩ na mũvw’anĩle wa nzĩa ya tũsũmba tũla twelekele ngalĩ ya ĩũlũ; kwĩanana na ũasa watw’o now’o ũthanthau watw’o wailyĩ: na mawumaalĩlo onthe matw’o maĩ kwĩanana na moseũvĩlw’e matw’o, na kwĩanana na mĩomo yatw’o.

12Na kwĩanana na mĩomo ya tũsũmba tũla twelekele ngalĩ ya ĩtheo kwaĩ mũomo wambĩlĩlyonĩ wa nzĩa, o nzĩa ĩla yaendele mbee wa ũvai yelekele ngalĩ ya wumĩlonĩ wa syũa, o vala mũndũ wavotelaa nthĩnĩ watw’o.

13Nĩvo ĩndĩ wambĩĩe, Tũsũmba twa ngalĩ ya ĩũlũ na tũsũmba twa ngalĩ ya ĩtheo, tũla twĩ mbee wa vala vandũ vavathan’ye, tũu nĩtw’o tũsũmba tũtheu, vala athembi ala me vakuvĩ na Yeova makaĩsaa syĩndũ ila ntheu mũno: vau makaia syĩndũ ntheu mbee, na nthembo ya mũtu, na nthembo ya naĩ, na nthembo ya mavĩtyo; nũndũ vandũ vau nĩ vatheu.

14Yĩla athembi malika, matikaumaalae kuma vala vandũ vatheu kũthi nza yĩ ũtee, ĩndĩ meiaa ngũa syoo vo ila methũkũmaa nasyo; nũndũ nĩ ntheu: na meĩkĩaa ngũa ingĩ, na makĩthengeea vala ve andũ.

15Na yĩla waminie kũthima nyũmba ya nthĩnĩ, anumaalya na nzĩa ya mbingĩlo ĩla yelekele ngalĩ ya wumĩlonĩ wa syũa, na amĩthima ngalĩ syonthe.

16Athima ngalĩ ya wumĩlonĩ wa syũa na mũangi wa kũthima mĩangi maana atano, na mũangi wa kũthima ngalĩ syonthe.

17Athima ngalĩ ya ĩũlũ mĩangi maana atano na mũangi wa kũthima ngalĩ syonthe.

18Athima ngalĩ ya ĩtheo mĩangi maana atano, na mũangi wa kũthima.

19Eethyũũa ngalĩ ya ũthũĩlonĩ wa syũa, na athima mĩangi maana atano na mũangi wa kũthima.

20Amĩthima ngalĩ inya: yaĩ na ũvai ũthyũlũlũkĩte, ũasa maana atano, na ũthanthau maana atano, wa kũvathan’ya vala vatheu na vala vate vatheu.

← Chapter 41 Jump to: Chapter 43 →