Ezekiel 16 — Kamba (Mbivilia) 1956

1Na ĩngĩ ndeto ya Yeova yambũkĩa, ĩkĩmbĩa.

2Mwana wa mũndũ, manyĩthya Yelusaleme mothatyo mayo;

3nokyasya, Ũũ nĩw’o Mwĩaĩi Yeova ũnũũtavya Yelusaleme: Wambĩlĩlyo waku na kũsyaĩwa kwaku nĩ nthĩ ya Mũkanaani; Mũamoli aĩ ĩthe waku, na inyia waku aĩ Mũĩtiti.

4Na ũndũ wa kũsyawa kwaku, mũthenya ũla wasyaiwe mũkautĩ waku ndwaatilwa, o na ndwaathambw’a na manzĩ ũthee; ndwaavakwa mũnyũ, kana kũvw’ĩkwa ngũa ya ũkenge.

5Vatyaĩ itho yakwĩw’ĩe tei yĩkwĩke ũndũ o na wĩva wa asu, ya ũkwĩw’ĩa tei; ĩndĩ wekiw’e weũnĩ, nũndũ thayũ waku nĩwameniwe, mũthenya ũla wasyaiwe.

6Na yĩla navĩtĩle vala ũĩ, na nakwona wĩthokoanĩtye na nthakame yaku, nakwĩa, O na wĩ na nthakame yaku, ĩthĩwa thayũ; ĩĩ, nakwĩa, O na wĩ na nthakame yaku, ĩthĩwa thayũ.

7Nĩnakwingĩvisye ta kĩla kĩmeaa mũũndanĩ, naku waingĩva na waendeea kũneneva, na wavikĩa kwanakava mũno; nondo syaku syaneneva, na nzw’ĩĩ syaku syeana; o na ũu w’onthe waĩ mũthei, ũte ngũa.

8Na yĩla navĩtĩle vala ũĩ, na nakũsisya, sisya, ĩvinda yaku yaĩ ĩvinda ya kwendwa; na nakũvw’ĩka na mũthya wa ngũa yakwa, na nakũvw’ĩka wĩ mũthei: ĩĩ, nakwĩavĩa, na natianĩa ũtianĩo naku, na watw’ĩka wakwa, easya, ũu Mwĩaĩi Yeova.

9Nĩvo ĩndĩ nakũthambisye na manzĩ; ĩĩ, nakũthambya nesa nthakame yaku yakuma, na nakũvaka mauta.

10O na nakũvw’ĩka na ngũa itumĩĩwe wanake, na nakwĩkĩa iatũ sya mbũa sya vomboo, na nakũvotoa na katane nzeo, na nakũvw’ĩka na alili.

11Na nakwanakavya na mawanake, na neekĩa itang’a mokonĩ maku, na mũnyoo ngingonĩ yaku.

12Na neekĩa ngome ĩnyiũũnĩ yaku, na ngome sya matũ matũnĩ maku, na ngovia nzeo mũno ya ũsumbĩ mũtwenĩ waku.

13Wanakavĩtw’e ta ũu na thaavu na vetha; na ngũa yaku yaĩ ya katane nzeo, na ya alili, na ĩtumĩĩwe wanake; waĩsaa mũtu mũvinyu, na ũkĩ wa nzũkĩ, na mauta, na waĩ mwanake mũno, na waathimĩka wavikĩa kĩanda kya kĩũsumbĩ.

14Na nguma yaku yanyaĩĩka katĩ wa i mbaĩ nũndũ wa wanake waku; nũndũ waĩ mwĩanĩu, kwondũ wa ũnene wakwa ũla nakwĩkĩie, easya ũu Mwĩaĩi Yeova.

15Ĩndĩ nĩwekwatisye wanake waku, na weeka ũmalwaya nũndũ wa nguma yaku, na woonosya ũmalwaya waku ĩũlũ wa kĩla ũmwe ũla wavĩtaa; waĩ wake.

16Na woosa ngũa syaku, na weeseũvĩsya kũndũ kũtũlu kwanakavĩtw’e na langi wa mĩthemba mingĩ, na weekĩa ũmalwaya kw’o; maũndũ ta asu matikoka, o na kũikethĩwa ũu.

17O na nĩwoosie mĩio yaku mĩseo ya wanake ya thaavu wakwa na vetha wakwa, ĩla nakũnengie, na weeseũvĩsya mĩvw’anano ya andũ aũme, na weeka ũmalwaya nayo;

18na woosa ngũa syaku ila itumĩĩwe wanake, na wamĩvw’ĩka, na waia mauta makwa na ũvani wakwa mbee wayo.

19O na kĩmũtũ kyakwa kĩla nakũnengie, kya mũtu mũvinyu, na mauta, na ũkĩ wa nzũkĩ, kĩla nakũathĩsye, o nakyo waia mbee wayo kĩthĩwe kĩndũ kĩla kĩnyungaa nesa; na kwailyĩ ũu, easya ũu Mwĩaĩi Yeova.

20Na ĩngĩ nĩwosete ana maku na eĩtu maku, ala wanzyaĩe, na asu wamĩthembea maminwe. Ũmalwaya waku waĩ ũndũ ũnini,

21kana ũae syana syakwa, na kwinengane, ũkivĩtĩlya mwakinĩ ũndũ wayo?

22Na mothatyonĩ maku onthe na ũmalwayanĩ waku ndwaalilikana mĩthenya ya wana waku, yĩla waĩ mũthei ũte ngũa, na wathokoanĩte na nthakame yaku.

23Na kwesa kwĩthĩwa ĩtina wa ũthũku waku w’onthe (woo, woo nĩ waku! Easya ũu Mwĩaĩi Yeova),

24atĩ nĩwĩyakĩe vandũ va nguluĩ, na nĩweeseũvĩsye kũndũ kũtũlu nzĩanĩ nene syonthe.

25Nĩwakĩte vandũ vaku vatũlu wambĩlĩlyonĩ wa kĩla nzĩa, na nũtw’ĩkĩthĩtye wanake waku ũthatyo, na nũtaanĩĩsye maũũ maku kĩla mũndũ ũla ũvĩtaa, na waingĩvya ũmalwaya waku.

26O na nĩwĩkĩte ũmalwaya na Amisili, atũi maku, anene ma mwĩĩ; na nĩwingĩvĩtye ũmalwaya waku, ũnthatye.

27Sisya kwondũ wa ũu, nĩnakũtambũũkĩsye kw’oko kwakwa, na nĩnĩolete lĩu waku wa mavinda onthe, na nĩnĩkũnenganĩte kwendanĩ kwa ala makũmenaa, eĩtu ma Avilisiti, ala meũsonoka ũndũ wa mũendele waku mwathe.

28O na nĩwĩkĩte ũmalwaya na Aasulĩ, nũndũ ndwaakola; ĩĩ, nĩwĩkĩte ũmalwaya nao, ĩndĩ ndwaaĩanĩw’a.

29O na ĩngĩ nĩwingĩvĩtye ũmalwaya waku nthĩ ya Kanaani, o na kũvika Kalitei; ĩndĩ ndwaaĩanĩw’a nĩw’o.

30Ngoo yaku ko nĩ mbonzu, easya Mwĩaĩi Yeova, nũndũ nĩwĩkaa maũndũ asu onthe, wĩa wa ĩlwaya yĩte nthoni;

31nũndũ nĩwakaa vandũ vaku va nguluĩ wambĩlĩlyonĩ wa kĩla nzĩa, na kũseũvya vandũ vaku vatũlu kĩla nzĩanĩ nene, na ndwailyĩ ta ĩlwaya, ũndũnĩ ũũ wa atĩ wavũthya kũtuvwa.

32Kĩveti kĩla kĩlaalaa! Kĩla kyosaa aeni vandũ va mũũme wakyo!

33Nĩmanengae malwaya onthe mĩthĩnzĩo; ĩndĩ we nũnengae endwa maku onthe mĩthĩnzĩo yaku, na kũmatuva, nĩ kana makũkĩe kĩla ngalĩko ũndũ wa ũmalwaya waku.

34Na wĩ kĩvathũkan’yo na aka ala angĩ ũmalwayanĩ waku, nũndũ vai ũmwe ũla ũkũatĩĩaa eke ũmalwaya; na nũndũ nũtuvanaa, naku ndũtuvawa, kwondũ wa ũu wĩ kĩvathũkan’yo.

35Kwondũ wa ũu, we ĩlwaya, ĩthukĩĩsye ndeto ya Yeova:

36Ũũ nĩw’o Mwĩaĩi Yeova ũnũkwasya, Nĩkwĩthĩwa ũvuku waku nĩwonoetw’e, na nũvuĩtwe woneke wĩ mũthei nũndũ wa ũmalwaya waku na endwa maku; na nũndũ wa mĩvw’anano yonthe ya mothatyo maku, na kwondũ wa nthakame ya syana syaku, ila wamĩnengie;

37kwondũ wa ũu sisya, ngoomban’ya endwa maku onthe, ala wamatanĩe, na onthe ala wamendie, vamwe na onthe ala wamenie; o na ngamomban’ya ĩũlũ waku ngalĩ syonthe, na ngakũvua woneke wĩ mũthei, nĩ kana mone wĩ mũthei vyũ.

38Na ngakũsilĩla, o tondũ aka masilĩlawa ala manangaa ũtwaano na kwĩtĩkya nthakame; ngaete ĩũlũ waku nthakame ya ũthilĩku na kĩwĩu.

39O na ngakũnengane kw’okonĩ kwoo, na makaomboa vandũ vaku va nguluĩ, na kũomboa kũndũ kwaku kũtũlu; na makakumya ngũa syaku, na kwosa mĩio yaku mĩseo ya wanake; na makakũtia wĩ mũthei ũte ngũa.

40O na makaete nguthu yũkite naku, na makakũkimanga na mavia, na makakũtonyanga na mbyũ syoo.

41Na makavĩvya nyũmba syaku na mwaki, na ũkũsilĩla aka aingĩ mene; na ngatuma ũeka kwĩka ũmalwaya, na ndũkatuvana ĩngĩ.

42Now’o ngathũmũsya ũthilĩku wakwa kwaku, na kĩwĩu kyakwa kĩkauma vala ũĩ, na ngekala nĩuĩtye, na ndĩkathata ĩngĩ.

43Nĩkwĩthĩwa ndwaalilikana mĩthenya ya wana waku, ĩndĩ nĩwanthilĩkile maũndũnĩ asu onthe; kwondũ wa ũu, sisya, ngaete mũendele waku mũtwenĩ waku, easya ũu Mwĩaĩi Yeova: na ndũkeka wathe ũsu vamwe na mothatyo maku onthe.

44Sisya, kĩla ũmwe ũla ũneenaa nthimo akakũneenea nthimo ĩno, akyasya, O ũndũ inyia ũilyĩ, now’o mwĩĩtu wake ũilyĩ.

45We wĩ mwĩĩtu wa mwenyu, ũla ũmenaa mũũme wake na syana syake; na wĩ mwĩĩtu‐a‐inyia wa eĩtu‐a‐inyia maku, ala mamenie aũme moo na syana syoo: inyia waku nĩ Mũititi, na au nĩ Mũamoli.

46Na mwĩĩtu‐a‐nyukwe mũkũũ nĩwe Samalia, ũla ũtũaa ngalĩ ya kw’oko kwaku kwa aka, we na eĩtu make; na mwĩĩtu‐a‐nyukwe mũinau, ũla ũtũaa ngalĩ ya kw’oko kwaku kwa aũme, nĩwe Sotomo na eĩtu make.

47Ĩndĩ ndwaaendela mĩendelenĩ yoo, kana kwĩka mothatyo moo; ĩndĩ, ta ethĩwa ũu waĩ ũndũ ũnini, waĩ mũthũku kwĩ mo mĩendelenĩ yaku yonthe.

48O tondũ nĩ thayũ, easya Mwĩaĩi Yeova, Sotomo mwĩĩtu‐a‐inyia waku ndaaĩka, we kana eĩtu make, tondũ we weekie, we na eĩtu maku.

49Sisya, ũũ waĩ ũthũku wa mwĩĩtu‐a‐nyukwe Sotomo: ngathĩĩo, kũvũnw’a na lĩu, ũthũmũo wa kũunĩka maĩ nthĩnĩ wake na eĩtu make; o na ndaaĩkĩa kw’oko kwa ngya na athĩni vinya.

50Nao maĩ na wĩng’athĩlĩlyo, na meeka ũthatyo mbee wakwa: kwondũ wa ũu namaveta o tondũ noonie wĩ ũseo.

51O na Samalia ndaaĩka nyunzu ya naĩ syaku; ĩndĩ nĩwingĩvĩtye mothatyo maku kwĩ mo, na nũtumĩte eĩtu‐a‐mwenyu matalwa alũngalu kwondũ wa mothatyo maku onthe ala wĩkĩte.

52Naku we, ĩkuĩe nthoni syaku, ila ũsilĩlĩte eĩtu‐a‐mwenyu; kwondũ wa naĩ syaku ila weekie ila ithatasya kwĩ ĩ syoo, nao nĩ alũngalu kwĩ we: ĩĩ, naku soomanĩwa, na kua nthoni syaku, nũndũ nũtumĩte eĩtu‐a‐mwenyu matalwa alũngalu.

53Na ngamatũnga maume kũtavwanĩ kwoo, kũtavwa kwa Sotomo na eĩtu make, na kũtavwa kwa Samalia na eĩtu make, na kũtavwa kwa atave maku ala me katĩ woo;

54nĩ kana wĩkuĩe nthoni syaku, na kũsonoka nũndũ wa w’onthe ũla wĩkĩte, nũndũ wĩ ũkiakisyo kwoo.

55Na eĩtu‐a‐mwenyu, Sotomo na eĩtu make, makasyokea mwĩkalĩle woo wa mbee; na Samalia na eĩtu make makasyokea mwĩkalĩle woo wa mbee; naku na eĩtu maku mũkasyokea mwĩkalĩle wenyu wa mbee.

56Nũndũ mwĩĩtu‐a‐nyukwe Sotomo ndaawetwa nĩ kanyw’a waku mũthenyanĩ wa ngathĩĩo yaku,

57ũthũku waku ũtanamba kũvuũwa, ta ĩvinda ya kũvũthya kwa eĩtu ma Silia, na onthe ala mamũthyũlũlũkĩte, eĩtu ma Avilisiti, ala makũvũthasya ngalĩ syonthe.

58Nũkuĩte wathe waku na mothatyo maku, easya ũu Yeova.

59Nũndũ ũũ nĩw’o Mwĩaĩi Yeova ũnũkwasya: Nakwa ngakwĩka o tondũ weekie, we ũla wavũthisye wĩvĩto ũkyananga ũtianĩo.

60Ĩndĩ o na ũu w’onthe ngalilikana ũtianĩo wakwa ũla natianĩe naku mĩthenya ya wana waku, na ngakũlũlũmĩlĩlya ũtianĩo wa tene na tene.

61Nĩvo ĩndĩ ũkalilikana mĩendele yaku, na kũsonoka, yĩla ũkosa eĩtu‐a‐mwenyu, eĩtu‐a‐mwenyu ala akũũ, na ainau; na ngakũnenga mo methĩwe eĩtu maku, ĩndĩ ti kwondũ wa ũtianĩo waku.

62Na ngalũlũmĩlya ũtianĩo wakwa naku; ũkamanya ninyie Yeova;

63nĩ kana ũtonye kũlilikana, na kũsoomanĩwa, ũte kwathamya kanyw’a waku o na ĩndĩĩ, nũndũ wa nthoni syaku, yĩla ngakũekea maũndũ asu onthe ala weekie, easya ũu Mwĩanĩi Yeova.