Ezekiel 45

Kamba (Mbivilia) 1956

← Chapter 44 Jump to: Chapter 46 →

1Na ĩngĩ, yĩla mũkaaan’ya kwondũ wa kũlimana nthĩ yĩthĩwe ũtiĩwa, mũkamũthembea Yeova nthembo, kĩlungu kĩtheu kya nthĩ; ũasa ũkethĩwa ũasa wa mĩangi ngili mĩongo ĩlĩ na ĩtano, na ũthanthau ũkethĩwa ngili ĩkũmi: kĩkethĩwa kĩtheu mũvakanĩ w’onthe wakyo ngalĩ syonthe.

2Nthĩnĩ wakyo kwondũ wa vala vandũ vatheu kũkethĩwa ũasa wa maana atano na ũthanthau wa maana atano, yĩanene ngalĩ syonthe; na mĩkono mĩongo ĩtano kwondũ wa syengo syakyo ngalĩ syonthe.

3Na kĩthimonĩ kyu ũkathima ũasa wa ngili mĩongo ĩlĩ na ĩtano, na ũthanthau wa ngili ĩkũmi: na nthĩnĩ wa vo kũkeethĩwa vala vandũ vatheu, vala vatheu mbee.

4Nĩ kĩlungu kĩheu kya ĩ nthĩ; kĩkethĩwa kya athembi, athũkũmi ma vala vandũ vatheu, ala mathengeeaa mamũthũkũmae Yeova; na kĩkethĩwa vandũ va nyũmba syoo, na vandũ vatheu va vala vandũ vatheu.

5Na ũasa wa ngili mĩongo ĩlĩ na itano, na ũthanthau wa ngili ĩkũmi, kĩkethĩwa kya Alivai, athũkũmi ma ĩ nyũmba, kĩkethĩwa ng’ũndũ kwoo, kwondũ wa tũsũmba mĩongo ĩlĩ.

6Na mũkatila kĩlungu kya ndũa ũthanthau ngili itano, na ũasa ngili mĩongo ĩlĩ na itano, kĩvakanĩte na nthembo ya kĩla kĩlungu kĩtheu: kĩkethĩwa kya nyũmba yonthe ya Isilaeli.

7Na kĩlungu o na kĩva kwondũ wa mũnene wĩ mbee ũsumbĩnĩ kĩkethĩwa ngalĩ ĩmwe na ngalĩ ĩla ĩngĩ ya ĩla nthembo ntheu na ya kĩla kĩlungu kya ndũa, mbee wa ĩla nthembo ntheu na mbee wa kĩla kĩlungu kya ndũa, ngalĩ ya ũthũĩlonĩ wa syũa, na ngalĩ ya wumĩlonĩ wa syũa; na ũasa wakyo wĩanene na kĩlungu kĩmwe, kuma mũvaka wa ngalĩ ya ũthũĩlonĩ wa syũa kũvika mũvaka wa ngalĩ ya wumĩlonĩ wa syũa.

8Ĩ nthĩ ĩkethĩwa kwake ũtiĩwa nthĩnĩ wa Isilaeli: na anene makwa me mbee ũsumbĩnĩ matikathĩn’ya andũ makwa ĩngĩ; makanenga nyũmba ya Isilaeli ĩ nthĩ kwĩanana na mbaĩ syayo.

9Ũũ nĩw’o Mwĩaĩi Yeova ũnũkwasya: Ĩanĩwai nũu, inyw’ĩ anene me mbee ũsumbĩnĩ ma Isilaeli: vetai ũng’endu na kũtava mũtavo, noisila sila wa katĩ na mũlũngalu; vetai kwa andũ makwa kumĩthya kwenyu kwa vinya, easya ũu Mwĩaĩi Yeova.

10Ĩthĩwai na ithimi sya w’o, na eva ya w’o, na vathi ya w’o.

11Eva na vathi ikeethĩwa ũndũ ũmwe, nĩ kana vathi ĩthĩwe ya kĩlungu kya ĩkũmi kya omeli, na eva kĩlungu kya ĩkũmi kya omeli: omeli ĩkeethĩwa ya kwĩananĩthya ithimo.

12Na sekeli ĩkeethĩwa ngela mĩongo ĩlĩ; sekeli mĩongo ĩlĩ, sekeli mĩongo ĩlĩ na itano, sekeli ĩkũmi na itano, ikeethĩwa kĩthimi kyenyu kĩtawa mane.

13Ĩno nĩyo nthembo ĩla mũkathemba: kĩlungu kya thanthatũ kya eva kumya kĩthiminĩ kya omeli ya nganũ; na mũkanengane kĩlungu kya thanthatũ kya eva ya omeli ya mbaale;

14na kĩlungu kitw’e kya mauta, kya vathi ya mauta, kĩlungu kya ĩkũmi kya vathi kumya kĩthiminĩ kya kolo, nayo nĩ vathi ĩkũmi, o omeli (nũndũ vathi ĩkũmi nĩ omeli);

15na katena kamwe ka ĩlondu ka ndĩthya, kumya vala ve maana elĩ, kuma isesinĩ sya Isilaeli syĩ manzĩ maingĩ; — kwondũ wa nthembo ya mũtu, na nthembo ya kũvĩvw’a, na nthembo sya mũuo, kwondũ wa kwĩw’anĩthw’a kwoo, easya ũu Mwĩaĩi Yeova.

16Andũ onthe ma ĩ nthĩ makanengane kwondũ w nthembo ĩsu kwondũ wa mũnene wĩ mbee ũsumbĩnĩ wa Isilaeli.

17Na kĩkeethĩwa kĩanda kya mũnene ũsu kũnengane nthembo sya kũvĩvw’a, na nthembo sya mũtu, na nthembo sya kũnyuwa, mbokanĩ, na syathĩnĩ sya mĩtisonĩ ya myei, na masavatonĩ, mbokanĩ syonthe itw’ĩtwe sya nyũmba ya Isilaeli: akaseũvya nthembo ya naĩ, na nthembo ya mũtu, na nthembo ya kũvĩvw’a, na nthembo sya mũuo, syĩthĩwe nthembo ya wĩw’anĩthyo kwondũ wa nyũmba ya Isilaeli.

18Ũũ nĩw’o Mwĩaĩi Yeova ũnũkwasya: Mwei wa mbee, mũthenya wa mbee wa mwei, ũkoosa kasalũ kate kĩema; na ũkathesya vala vandũ vatheu.

19Na mũthembi akoosa nthakame ĩmwe ya nthembo ya naĩ, noivaka mĩtĩnĩ ĩla yĩ ndee sya mũomo, na ikotonĩ inya sya ũnyitĩku wa kĩthembeo, na mĩtĩnĩ yĩ ndee sya mbingĩlo ya nza ya nthĩnĩ.

20Na now’o ũkeka mũthenya wa mũonza wa mwei kwondũ wa kĩla ũmwe ũla ũvĩtasya, na kwondũ wa ũla ũte na ũmanyi: ũu now’o mũkathemba nthembo ya wĩw’anĩthyo kwondũ wa ĩ nyũmba.

21Mwei wa mbee, mũthenya wa ĩkũmi na ĩna wa mwei, mũkeethĩwa na vasaka, mboka ya mĩthenya mũonza; kĩmũtũ kĩte ĩlawa kĩkaĩwa.

22Na mũthenya ũsu mũnene wĩ mbee ũsumbĩnĩ akaseũvya kwondũ wake mwene na kwondũ wa andũ onthe ma ĩ nthĩ kasalũ ka mũew’a kethĩwe nthembo ya naĩ.

23Na mĩthenya ĩsu mũonza ya mboka akamũseũvĩsya Yeova nthembo ya kũvĩvw’a, tũsalũ mũonza twa mũew’a na ndũũme mũonza ite kĩema kĩla mũthenya mĩthenya ĩsu mũonza; na nthenge kĩla mũthenya yĩthĩwe nthembo ya naĩ.

24Na akaseũvya nthembo ya mũtu, eva kwondũ wa kĩla kasalũ ka mũew’a, na eva kwondũ wa kĩla ndũũme, na ini ya mauta ũndũ wa kĩla eva.

25Mwei wa mũonza, mũthenya wa ĩkũmi na ĩtano wa mwei, akeeka ũu mbokanĩ mĩthenya mũonza; kwĩanana na nthembo ya naĩ, kwĩanana na nthembo ya kũvĩvw’a, na kwĩanana na nthembo ya mũtu, na kwĩanana na mauta.

← Chapter 44 Jump to: Chapter 46 →