Ezekiel 14

Kamba (Mbivilia) 1956

← Chapter 13 Jump to: Chapter 15 →

1Nĩvo ĩndĩ nookĩwe nĩ amwe ma atumĩa ma Isilaeli, na mekala nthĩ mbee wakwa.

2Na ndeto ya Yeova yambũkĩa, ĩkĩmbĩa,

3Mwana wa mũndũ, andũ aa nĩmekĩĩte mĩvw’anano yoo ngoonĩ syoo, na maiĩte ũlulutĩkyo wa ũthũku woo mbee wa ũthyũ woo: nĩnaĩle kũkũlw’a nĩo ũndũ o na wĩva?

4Kwondũ wa ũu neena nao, noimatavya, Ũũ nĩw’o Mwĩaĩi Yeova ũnũkwasya: Kĩla mũndũ wa nyũmba ya Isilaeli ũla wĩkĩĩte mĩvw’anano yake ngoonĩ yake, na kwia ũlulutĩkyo wa ũthũku wake mbee wa ũthyũ wake, na akyũka kwa mwathani; nyie Yeova ngamũsũngĩa ũndũnĩ ũsu kwĩanana na wingĩ wa mĩvw’anano yake;

5nĩ kana nĩkwate nyũmba ya Isilaeli na ngoo syoo ene, nũndũ mo onthe nĩmataanĩsye nakwa kwondũ wa mĩvw’anano yoo.

6Kwondũ wa ũu tavya nyũmba ya Isilaeli, Ũũ nĩw’o Mwĩaĩi Yeova ũnũkwasya: Syokai, na ĩthyũũei mũtie mĩvw’anano yenyu; na thyũũai mothyũ menyu matikasisye mothatyo menyu onthe.

7Nũndũ kĩla ũmwe wa nyũmba ya Isilaeli, kana wa aeni ala mekalaa ũeni nthĩnĩ wa Isilaeli, ũla wĩtaanĩsya nakwa, na kwĩkĩa mĩvw’anano yake ngoonĩ yake, na kwia ũlulutĩkyo wa ũthũku wake mbee wa ũthyũ wake, na akyũka kwa mwathani ekũlĩlye kwakwa; nyie Yeova ngeesũngĩĩa:

8na ngamũlutĩla mũndũ ũsu ũthyũ wakwa, na ngamũtw’ĩkĩthya ũseng’yo, ethĩwe wonan’yo na nthimo, na ngamũveta katĩ wa andũ makwa; na mũkamanya ninyie Yeova.

9Na ethĩwa mwathani nũkengetwe na akaneena ndeto, nyie, Yeova, nĩnĩkengete mwathani ũsu, na ngamũtambũũkĩsya kw’oko kwakwa, na ngamwananga aume andũnĩ makwa Isilaeli.

10Na makakua ũthũku woo: ũthũku wa mwathanĩ ũkethĩwa ta ũthũku wa ũla ũmũkũlasya;

11nĩ kana nyũmba ya Isilaeli ndĩkaende ĩkyanganga ĩngĩ kũasa nakwa, kana kwĩthũkya ĩngĩ na movĩtyo moo onthe; ĩndĩ nĩ kana methĩwe andũ makwa, nakwa nĩthĩwe Ngai woo, easya ũu Mwĩaĩi Yeova.

12Na ndeto ya Yeova yambũkĩa, ĩkĩmbĩa,

13Mwana wa mũndũ, yĩla nthĩ ĩkambĩtanĩsya kwondũ wa kwĩka naĩ, nakwa ngamĩtambũũkĩsya kw’oko kwakwa, na kũtũla ndata ya kĩmũtũ kyayo, na kũmĩetee yũa, na kũveta kwayo mũndũ na nyamũ;

14o na ethĩwa andũ aa atatũ, Noa, na Ndanieli, na Yovu, me kw’o, makavonokya no mathayũ moo ene kwondũ wa ũlũngalu woo, easya ũu Mwĩaĩi Yeova.

15Ethĩwa ngavĩtĩlya nyamũ mbai ĩ nthĩ, na ĩkĩmyananga, na ĩkĩtw’ĩka nthei, ũkethĩa mũndũ o na wĩva ndatonya kũmĩvĩtĩla nũndũ wa nyamũ;

16o na ethĩwa andũ asu atatũ me kw’o, o tondũ nĩ thayũ, easya Mwĩaĩi Yeova, matikavonokya ana kana eĩtu; o mo ene makavonoka, ĩndĩ ĩ nthĩ ĩkeethĩwa nthei.

17Kana ethĩwa ngamĩetee nthĩ ĩsu ũvyũ, na ngasya, Ũvyũ, enda wangange ĩ nthĩ; nĩ kana nĩvete nthĩnĩ wayo mũndũ na nyamũ;

18o na ethĩwa andũ asu atatũ me kw’o, o tondũ nĩ thayũ, matikavonokya ana kana eĩtu, ĩndĩ no mo ene makavonoka, easya ũu Mwĩaĩi Yeova.

19Kana ethĩwa ngatũma mũimũ nthĩ ĩsu, na kũmyonoesya ũthilĩku wakwa wa kwĩtĩkya nthakame, nĩvete nthĩnĩ wayo mũndũ na nyamũ;

20o na ethĩwa Noa, na Ndanieli, na Yovu, me kw’o, o tondũ nĩ thayũ, easya Mwĩaĩi Yeova, matikavonokya mwana kana mwĩĩtu; makavonokya no mathayũ moo ene kwondũ wa ũlũngalu woo.

21Nũndũ ũũ nĩw’o Mwĩaĩi Yeova ũnũkwasya: Nĩ mbee veana ata yĩla ngaetee Yelusaleme mosilĩlo makwa ana mathũku, ũvyũ, na yũa, na nyamũ nthũku, na mũimũ, nĩvete nthĩnĩ wayo mũndũ na nyamũ!

22Ĩndĩ, sisya, kũkatiala ũtialo nthĩnĩ wayo ũla ũkaumaalw’a, ana na eĩtu; sisya, makamumĩlĩla, na mũkoona mĩendele yoo na meko moo; na mũkakiakiw’a ũndũ wa ũthũku ũla nĩetete Yelusaleme, o w’onthe ũla nĩetete ĩũlũ wayo.

23Na makamũkiakisya, yĩla mũkona mĩendele yoo na meko moo; na mũkamanya ndyaaĩka vate kĩtumi w’onthe ũla neekie nthĩnĩ wayo, easya ũu Mwĩaĩi Yeova.

← Chapter 13 Jump to: Chapter 15 →