Ezekiel 38

Kamba (Mbivilia) 1956

← Chapter 37 Jump to: Chapter 39 →

1Na ndeto ya Yeova yambũkĩa, ĩkĩmbĩa,

2Mwana wa mũndũ, elekelye ũthyũ waku Ngoki, wa nthĩ ya Makoki, mũnene wĩ mbee ũsumbĩnĩ wa Losi, Meseki, na Tuvali, noimwathanĩa,

3na asya, Ũũ nĩw’o Mwĩaĩi Yeova ũnũkwasya: Sisya, nĩ na ũndũ naku, we Ngoki, mũnene wĩ mbee ũsumbĩnĩ wa Losi, Meseki, na Tuvali:

4na ngakũthyũũa, na kwĩkĩa mboloi ngambuunĩ syaku, na ngakumaalya, na ita syaku syonthe, mbalasi na ala matũlĩte mbalasi, onthe mekĩĩte mĩio yonthe ya kaũ, nguthu nene yĩ na kakalo na ngao, onthe makwete mbyũ:

5Velisia, Kusi, na Vutu vamwe nao, onthe me na ngao na ngovia;

6Ngomeli, na nguthu syake syonthe; nyũmba ya Tokalima itulunĩ sya ngalĩ ya ĩũlũ, na nguthu syake syonthe; o ngo mbingĩ sya andũ vamwe naku.

7Ĩkala wĩyũmbanĩtye, ĩĩ, ĩyũmban’ye, we, na nguthu syaku syonthe ila ĩkũmbanĩe, na ĩthĩwa mũsũvĩi kwamo.

8Ĩtina wa mĩthenya mingĩ ũkookĩwa: myaka ya mũminũkĩlyo ũkalika nthĩ ĩla ĩtũngĩtwe kuma ũvyũnĩ, ĩla yũmbanĩtw’e kuma ngonĩ mbingĩ sya andũ, iĩmanĩ sya Isilaeli, ila syekalaa mbanangĩku mavinda onthe; ĩndĩ nĩyumĩtwe nthĩnĩ wa ngo sya andũ, na makekala meyelele, onthe moo.

9Na ũkambata, ũkooka ta kĩuutani, ũkeethĩwa ta ĩthweo ya kũvw’ĩka nthĩ, we, na nguthu syaku syonthe na ngo mbingĩ sya andũ vamwe naku.

10Ũũ nĩw’o Mwĩaĩi Yeova ũnũkwasya: Kũkeethĩwa mũthenya ũsu, maũndũ makalika kĩlilikanonĩ kyaku, na ũkasũanĩa ũsũanĩo mũthũku:

11na ũkasya, Ngambata nthĩ yĩ tũmĩsyĩ tũte twiie; ngathi kwa ala mathũmũĩte, ala mekalaa meyelele, onthe mekalĩte mate na maũvai, na mate na ivingi kana mbingĩlo;

12nose mũtavo o na syĩndũ sya mbuta; nĩthyũũe kw’oko kwaku ĩũlũ wa kũndũ kũla kwaeketwe kũla yu kũtwĩwe nĩ andũ, na ĩũlũ wa andũ mombanĩtw’e kuma i mbaĩnĩ, ala me na indo na syĩndũ, ala matũaa nthĩ katĩ.

13Sieva, na Ndetani, na athoosya ma Talisisi, vamwe na mĩnyambũ yonthe ya mũika ya vo, makakũkũlya, Nĩwooka kwosa mũtavo? Nĩwũmbanĩtye nguthu yaku wose syĩndũ sya mbuta? Ũkue vetha na thaavu, ũtwae indo na syĩndũ, ũtwae mũtavo mũnene?

14Kwondũ wa ũu, mwana wa mũndũ, athana, ũtavye Ngoki, Ũũ nĩw’o Mwĩaĩi Yeova ũnũkwasya: Mũthenya ũsu yĩla andũ makwa Isilaeli makatũa meyelele, ndũkamanya ũu?

15Na ũkauma vandũ vaku kuma itulunĩ sya ngalĩ ya ĩũlũ, we, na ngo mbingĩ sya andũ vamwe naku, onthe makuĩtwe nĩ mbalasi nguthu nene na ita syĩ ũtonyi;

16na ũkamokĩa andũ makwa Isilaeli, ta ĩthweo ũvw’ĩke nthĩ: kũkeethĩwa mĩthenya ya mũminũkĩlyo, ngakũete ũkite na nthĩ yakwa, nĩ kana i mbaĩ imanye nyie, yĩla ngeyonan’ya kwaku, we Ngoki, atĩ nĩ mũtheu, mbee wa metho moo.

17Ũũ nĩw’o Mwĩaĩi Yeova ũnũkwasya: Nue ũla naneenie ũndũ wake ĩvinda ya tene na makanyw’a ma athũkũmi makwa athani ma Isilaeli, ala mathanaa mĩthenya ĩsu vandũ va myaka mingĩ atĩ ngakũete ũkie nao?

18Na kũkethĩwa mũthenya ũsu, yĩla Ngoki ĩkamyũkĩa nthĩ ya Isilaeli, easya ũu Mwĩaĩi Yeova, ũthilĩku wakwa ũkambata manyiũũnĩ makwa.

19Nũndũ kĩwĩunĩ kyakwa na mwakinĩ wa ũthilĩku wakwa nĩnĩneenete, Vate ndĩi mũthenya ũsu kũkethĩwa kĩthingithyo kĩnene nthĩ ya Isilaeli;

20o kũvika makũyũ ma ũkanganĩ, na nyũnyi sya yayaya, na nyamũ sya kĩthekanĩ, na tũsamũ tw’onthe tũla tũtambũkaa ĩũlũ wa nthĩ, na andũ onthe ala me ĩũlũ wa nthĩ, makatetemea mbee wakwa, na iĩma ikang’uthũlangwa nthĩ, na kũndũ kwĩ ilĩso kũkavalũka, na kĩla ũvai ũkavalũka nthĩ.

21Na ngeetĩsya iĩma syakwa syonthe ũvyũ wa kũmũkita, easya ũu Mwĩaĩi Yeova: ũvyũ wa kĩla mũndũ ũkeethĩwa ĩũlũ wa mwana‐a‐inyia.

22Na ngalika silanĩ nake na nzĩa ya mũimũ na nthakame; na ngausya ĩũlũ wake, na nguthu syake, na ngo mbingĩ sya andũ ala me vamwe nake, mbua ya mũono ĩtulĩtye, na mbua ya mavia manene, na mwaki, na mũvĩlĩtĩ.

23Na ngeenenevya, na kwĩyonan’ya atĩ nĩ mũtheu, na ngeemanyĩthan’ya methonĩ ma mbaĩ mbingĩ; na ikamanya ninyie Yeova.

← Chapter 37 Jump to: Chapter 39 →