Ezekiel 40 — Kamba (Mbivilia) 1956

1Mwaka wa mĩongo ĩlĩ na ĩtano wa kũtavwa kwitũ, wambĩlĩlyonĩ wa mwaka, mũthenya wa ĩkũmi wa mwei, mwaka wa ĩkũmi na ĩna ĩtina wa kũkũnwa kwa ndũa, mũthenya o ũsu, kw’oko kwa Yeova kwaĩ ĩũlũ wakwa, na andete kw’o.

2Mawonĩnĩ ma Ngai andete nthĩ ya Isilaeli, na ambia nthĩ kĩĩmanĩ kĩtũlu mũno, na ĩũlũ wakyo kwaĩ mwakĩle wa ndũa ngalĩ ya ĩtheo.

3Na andete kw’o, na, sisya, kwaĩ mũndũ, mũvw’anĩle wake waĩ ta mũvw’anĩle wa ũthuku, e na ũlii wa katane kw’okonĩ kwake, na mũangi wa kũthima naw’o; na aũngama mbingĩlonĩ.

4Na ũ mũndũ ambĩa, Mwana wa mũndũ, sisya na metho maku, na ĩw’a na matũ maku, na enda mũno ngoonĩ yaku w’onthe ũla ngakwon’ya; nũndũ nũetetwe vaa, nĩ kana nĩkwon’ye; tavya nyũmba ya Isilaeli w’onthe ũla wĩona.

5Na, sisya, ũvai ũtee wa nyũmba ũmĩthyũlũlũkĩte, na kw’okonĩ kwa ũ mũndũ mũangi wa ũthima ũasa waw’o mĩkono thanthatũ, ũasa wa kĩla ũmwe nĩ mũkono na ũthanthau wa kĩtaa kya kw’oko: ta ũu athima ũthanthau wa mwako, mũangi ũmwe; na ũtũlu, mũangi ũmwe.

6Na ĩndĩ avika mbingĩlonĩ ĩla yelekele wumĩlonĩ wa syũa, na ambata mbasyanĩ syayo: na athima mwalyo wa mbingĩlo, ũthanthau waw’o mũangi ũmwe; na mwalyo ũla ũngĩ, ũthanthau waw’o mũangi ũmwe.

7Na kĩla kasũmba ka mũsũvĩi ũasa wako waĩ mũangi ũmwe, na ũthanthau wako mũangi ũmwe; na ũthei katĩ wa tũsũmba waĩ mĩkono ĩtano; na mwalyo wa mbingĩlo vakuvĩ na valasya wa mbingĩlo kwelekela nyũmba waĩ mũangi ũmwe.

8O na athima valasya wa mbingĩlonĩ ũla welekele nyũmba, mũangi ũmwe.

9Na ĩndĩ athima valasya wa mbingĩlonĩ, mĩkono nyanya; na ituĩ syaw’o, mĩkono ĩlĩ; na valasya wa mbingĩlonĩ welekele nyũmba.

10Na tũsũmba twa asũvĩi twa mbingĩlonĩ ngalĩ ya wumĩlonĩ wa syũa twaĩ tũtatũ ngalĩ ĩno, na tũtatũ ngalĩ ĩya; tũu tũtatũ twaĩ twa kĩthimo kĩmwe: na ituĩ syaĩ sya kĩthimo kĩmwe ngalĩ ĩno na ngalĩ ĩya.

11Na athima ũthanthau wa vandũ va ũvotela mbingĩlonĩ, mĩkono ĩkũmi; na ũasa wa mbingĩlo, mĩkono ĩkũmi na ĩtatũ;

12na mbee wa tũla tũsũmba vaĩ vandũ vaumĩlĩte nza, mũkono ũmwe ngalĩ ĩno, na vandũ vaumĩlĩte, mũkono ũmwe ngalĩ ĩya; na tũla tũsũmba, mĩkono thanthatũ ngalĩ ĩno, na mĩkono thanthatũ ngalĩ ĩya.

13Na athima mbingĩlo kuma kĩalanĩ kya kasũmba kamwe kũvika kĩala kya kala kangĩ, ũthanthau wa mĩkono mĩongo ĩlĩ na ĩtano; mũomo welekele mũomo.

14O na aseũvya ituĩ, mĩkono mĩongo thanthatũ; na nza yavikĩte ituĩnĩ, kũthyũlũlũka mbingĩlo.

15Na kuma ngalĩ ya mbee ya mbingĩlo vala ve ũlikĩlo kũvika ngalĩ ya mbee ya valasya wa nthĩnĩ wa mbingĩlo nĩ mĩkono mĩongo ĩtano.

16Na kwaĩ mbũthi ntheke sya tũsũmba, na sya ituĩ syatw’o nthĩnĩ wa mbingĩlo ithyũlũlũkĩte, na ĩngĩ sya ngulumbe; na mbũthi nĩsyathyũlũlũkĩte ngalĩ ya nthĩnĩ; na ĩũlũ wa kĩla kĩtuĩ kwaĩ mĩtĩ ya mĩtende.

17Na ĩndĩ andwaa nza yĩ ũtee; na, sisya, kwaĩ tũsũmba na nthĩ nzeũvye na mavia malan’ye, vaseũvĩtwe kwondũ wa nza kũthyũlũlũka ngalĩ syonthe: tũsũmba mĩongo ĩtatũ twaĩ ĩũlũ wa nthĩ ĩsu nzeũvye.

18Na nthĩ ĩsu yaĩ vakuvĩ na mbingĩlo, kũelekana na ũasa wa mbingĩlo, o nthĩ ĩsu nzeũvye ĩtheo.

19Nĩvo ĩndĩ wathimie ũthanthau kuma ngalĩ ya mbee ya mbingĩlo ya ĩtheo kũvika ngalĩ ya mbee ya nza ya nthĩnĩ ngalĩ ya ũtee, mĩkono ĩana, ngalĩ ya wumĩlonĩ wa syũa, o na ngalĩ ya ĩũlũ.

20Na mbingĩlo ya nza yĩ ũtee ĩla yelekele ngalĩ ya ĩũlũ, athima ũasa wayo na ũthanthau wayo.

21Na tũsũmba twa asũviĩ twayo twaĩ tũtatũ ngalĩ ĩno na tũtatũ ngalĩ ĩya; na ituĩ syayo na ngulumbe syayo nĩsyeanene na kĩthimo kya mbingĩlo ya mbee: ũasa wayo waĩ mĩkono mĩongo ĩtano, na ũthanthau mĩkono mĩongo ĩlĩ na ĩtano.

22Na mbũthi syayo, na ngulumbe syayo, na mĩtende yayo, nĩsyeanene na kĩthimo kya mbingĩlo ĩla yelekele wumĩlonĩ wa syũa; na mambata vo na matambya mũonza; na ngulumbe syayo syaĩ mbee wasyo.

23Na kwaĩ mbingĩlo ya nza ya nthĩnĩ yelekele mbingĩlo ĩla ĩngĩ, ngalĩ ya ĩũlũ na ngalĩ ya wumĩlonĩ wa syũa; na athima kuma mbingĩlo kũvika mbingĩlo mĩkono ĩana.

24Na andongoesya kwelekela ngalĩ ya ĩtheo; na, sisya, mbingĩlo yelekele ngalĩ ya ĩtheo: na athima ituĩ syayo na ngulumbe syayo kwĩanana na ithimo isu.

25Na kwaĩ mbũthi nthĩnĩ wayo na nthĩnĩ wa ngulumbe syayo ngalĩ syonthe, syailyĩ mbũthi isu: ũasa waĩ mĩkono mĩongo ĩtano, na ũthanthau mĩkono mĩongo ĩlĩ na ĩtano.

26Na kwaĩ matambya mũonza ma kwambata kwayo, na ngulumbe syayo syaĩ mbee wasyo; na yaĩ na mĩtĩ ya mĩtende, ũmwe ngalĩ ĩno, na ũngĩ ngalĩ ĩya, ĩũlũ wa ituĩ syayo.

27Na kwaĩ mbingĩlo ya nza ya nthĩnĩ ngalĩ ya ĩtheo: na athima kuma mbingĩlo kũvika mbingĩlo kwelekela ngalĩ ya ĩtheo mĩkono ĩana.

28Na ĩndĩ andwaa nza ya nthĩnĩ na mbingĩlo ya ngalĩ ya ĩtheo: na athima mbingĩlo ya ngalĩ ya ĩtheo kwĩanana na ithimo isu;

29na tũsũmba twa asũvĩi twayo, na ituĩ syayo, na ngulumbe syayo, kwĩanana na ithimo isu: na kwaĩ mbũthi nthĩnĩ wayo na nthĩnĩ wa ngulumbe syayo ngalĩ syonthe; ũasa wayo waĩ mĩkono mĩongo ĩtano, na ũthanthau mĩkono mĩongo ĩlĩ na ĩtano.

30Na kwaĩ ngulumbe ithyũlũlũkĩte ngalĩ syonthe, ũasa wa mĩkono mĩongo ĩlĩ na ĩtano, na ũthanthau mĩkono ĩtano.

31Na ngulumbe syayo syelekele nza yĩ ũtee; na mĩtĩ ya mĩtende yaĩ ituĩnĩ syayo: na wambatĩlo wayo waĩ wa matambya nyanya.

32Na andete nza ya nthĩnĩ kwelekela wumĩlonĩ wa syũa: na athima mbingĩlo kwĩanana na ithimo isu;

33na tũsũmba twa asũvĩi twayo, na ituĩ syayo, na ngulumbe syayo, kwĩanana na ithimo isu: na kwaĩ mbũthi nthĩnĩ wayo na nthĩnĩ wa ngulumbe syayo ngalĩ syonthe; ũasa wayo waĩ mĩkono mĩongo ĩtano, na ũthanthau mĩkono mĩongo ĩlĩ na ĩtano.

34Na ngulumbe syayo syelekele nza yĩ ũtee; na mĩtĩ ya mĩtende yaĩ ituĩnĩ syayo, ngalĩ ĩno, na ngalĩ ĩya: na wambatĩlo wayo waĩ wa matambya nyanya.

35Na andete mbingĩlonĩ ya ngalĩ ya ĩũlũ: na amĩthima kwĩanana na ithimo isu;

36tũsũmba twa asũvĩi twayo, ituĩ syayo, na ngulumbe syayo: na kwaĩ mbũthi nthĩnĩ wayo ngalĩ syonthe; ũasa waĩ mĩkono mĩongo ĩtano, na ũthanthau mĩkono mĩongo ĩlĩ na ĩtano.

37Na ituĩ syayo syelekele nza yĩ ũtee; na mĩtĩ ya mĩtende yaĩ ĩũlũ wa ituĩ syayo, ngalĩ ĩno, na ngalĩ ĩya: na wambatĩlo wayo waĩ wa matambya nyanya.

38Na kasũmba vamwe na mũomo wako kaĩ vakuvĩ na ituĩ mbingĩlonĩ; vau nĩmathambĩasya nthembo ya kũvĩvw’a.

39Na valasyanĩ wa mbingĩlo kwaĩ mesa ilĩ ngalĩ ĩno, na mesa ilĩ ngalĩ ĩya, na ĩũlũ wasyo masyũaĩaa nthembo ya kũvĩvw’a na nthembo ya naĩ na nthembo ya mavĩtyo.

40Na ngalĩ ĩmwe ũtee, vandũ va kwambatĩla ũlikĩlonĩ wa mbingĩlo kwelekela ngalĩ ya ĩũlũ, kwaĩ mesa ilĩ: na ngalĩ ĩla ĩngĩ, ĩla yaĩ ya valasya wa mbingĩlo, kwaĩ mesa ilĩ.

41Mesa inya syaĩ ngalĩ ĩno, na mesa inya ngalĩ ĩya, vakuvĩ na mbingĩlo; mesa nyanya, ila mooaĩaa nthembo ĩũlũ wasyo.

42Na kwaĩ mesa inya sya nthembo sya kũvĩvw’a, sya mavia masũvye, ũasa wa mũkono na nyunzu, na ũthanthau wa mũkono na nyunzu, na ũtũlu wa mũkono; ila mailĩĩlaa mĩio ĩla mooaaa nthembo ya kũvĩvw’a na nthembo ya kũtonywa nayo.

43Na mboloi, ũasa wasyo waĩ kĩtaa kya kw’oko, syaathĩĩwe nthĩnĩ ngalĩ syonthe: na ĩũlũ wa mesa isu kwaĩ nyama sya nthembo.

44Na ũtee wa mbingĩlo ya nthĩnĩ kwaĩ tũsũmba kwondũ wa aini nza ya nthĩnĩ, ĩla yaĩ vakuvĩ na mbingĩlo ya ngalĩ ya ĩũlũ; na twelekele ngalĩ ya ĩtheo; kamwe vakuvĩ mbingĩlo ya wumĩlonĩ wa syũa kelekele ngalĩ ya ĩũlũ.

45Na ambĩa, Kasũmba kaa, kala kelekele ngalĩ ya ĩtheo, nĩ ka athembi, asũvĩi ma wĩaĩo wa nyũmba;

46na kasũmba kala kelekele ngalĩ ya ĩũlũ nĩ ka athembi, asũvĩi ma wĩaĩo wa kĩthembeo: asu nĩ ana ma Nzatoki, ala kuma ananĩ ma Livai mathengeeaa Yeova mamũthũkũmae.

47Na athima nza, ũasa wayo mĩkono ĩana, na ũthanthau wayo mĩkono ĩana, ngalĩ inya syĩanene; na kĩthembeo kyaĩ mbee wa nyũmba.

48Na ĩndĩ andete valasyanĩ wa nyũmba, na athima kĩla kĩtuĩ kya valasya, mĩkono ĩtano ngalĩ ĩno, na mĩkono ĩtano ngalĩ ĩya: na ũthanthau wa mbingĩlo waĩ mĩkono ĩtatũ ngalĩ ĩno, na mĩkono ĩtatũ ngalĩ ĩya.

49Ũasa wa valasya waĩ mĩkono mĩongo ĩlĩ, na ũthanthau mĩkono ĩkũmi na ũmwe; na mambataa vo na matambya asu: na kwaĩ ituĩ vakuvĩ na mĩtĩ yĩ ndee sya mũomo, kĩmwe ngalĩ ĩno, na kĩngĩ ngalĩ ĩya.