Ezekiel 43

Kamba (Mbivilia) 1956

← Chapter 42 Jump to: Chapter 44 →

1Ĩtina wa ũu andete mbingĩlonĩ, o mbingĩlonĩ ĩla yelekele ngalĩ ya wumĩlonĩ wa syũa.

2Na, sisya, ũtheu mũtisu wa Ngai wa Isilaeli wooka wumĩte ngalĩ ya wumĩlonĩ wa syũa: na wasya wake wailyĩ kĩuumo kya manzĩ maingĩ; na nthĩ yatisw’a nĩ ũtheu mũtisu wake.

3Na mũvw’anĩle waw’o wailyĩ mũvw’anĩle wa woni ũla noonie, o kwĩanana na woni ũla noonie yĩla nookie kwananga ĩ ndũa; na mawoni mailyĩ woni ũla noonie vakuvĩ na ũsĩ wa Kevali; na navalũka na ũthyũ wakwa.

4Na ũtheu mũtisu wa Yeova walika nyũmbanĩ na nzĩa ya mbingĩlo ĩla yelekele ngalĩ ya wumĩlonĩ wa syũa.

5Na Veva ambũkĩlya, na andete nza ya nthĩnĩ; na, sisya, ũtheu mũtisu wa Yeova wausũa nyũmba.

6Na neew’a ũmwe aineena nakwa e nyũmbanĩ; na mũndũ aũngama vakuvĩ nakwa.

7Na ambĩa, Mwana wa mũndũ, vaa nĩ vandũ va kĩvĩla kyakwa kya ũsumbĩ, na vandũ va nyaĩĩ syakwa, vala ngatũaa katĩ wa ana ma Isilaeli tene na tene. Na nyũmba ya Isilaeli ndĩkavukya syĩtwa yakwa ĩtheu ĩngĩ, mo, kana asumbĩ moo, kwondũ wa ũmalwaya woo, na kwondũ wa simba sya asumbĩ moo syĩ kũndũ kwoo kũtũlu;

8makia mwalyo woo wa mũomo vakuvĩ na mwalyo wakwa wa mũomo, na mũtĩ woo wĩ ũtee wa mũomo vakuvĩ na mũtĩ wakwa wĩ ũtee wa mũomo, na kwaĩ no ũvai katĩ wakwa nao; na nĩmavũkĩtye syĩtwa yakwa ĩtheu kwondũ wa mothatyo moo ala mekĩte: kwondũ wa ũu nĩnĩmaminĩte ũthatunĩ wakwa.

9Yu nĩmavete kũasa nakwa ũmalwaya woo, na simba sya asumbĩ moo; na ngatũaa katĩ woo tene na tene.

10Naku, mwana wa mũndũ, on’ya nyũmba ya Isilaeli ĩ nyũmba, nĩ kana masonoke nũndũ wa mothũku moo; na nĩmathime ngelekan’yo yayo.

11Na ethĩwa makasonoka nũndũ wa maũndũ onthe ala meekie, mamanyĩthye mũvw’ano wa nyũmba, na mwakĩle wayo, na mawumaalĩlo mayo, na molilĩlo mayo, na mĩvw’ano yonthe yayo, na motw’ĩo onthe mayo, na mĩvw’ano yonthe yayo, na mĩao yonthe yayo; noiandĩka mene; nĩ kana masũvĩe mũvw’ano w’onthe wayo, na motw’ĩo onthe mayo, na kũmeka.

12Mwĩao wa nyũmba nĩ ũũ: kĩĩmanĩ ĩũlũ mũvakanĩ w’onthe wakyo ngalĩ syonthe kĩkeethĩwa kĩtheu mũno. Sisya, ũũ nĩw’o mwĩao wa nyũmba.

13Na ii nĩsyo ithimo sya kĩthembeo ikĩthimwa na mĩkono (mũkono nĩ mũkono na ũthanthau wa kĩtaa kya kw’oko): ĩtina yakyo yĩkeethĩwa mũkono, na ũthanthau mũkono, na ũengo wakyo vakuvĩ na ũtee wakyo kũthyũlũlũka nĩ ĩkwata yĩmwe ya kĩtaa; na yĩu yĩkeethĩwa ĩtina ya kĩthembeo.

14Na kuma ĩtina yĩ nthĩ kũvika ũnyitĩku wa ĩtheo kũkeethĩwa mĩkono ĩlĩ, na ũthanthau mũkono ũmwe; na kuma ũnyitĩku mũnini kũvika ũnyitĩku mũnene kũkeethĩwa mĩkono ĩna, na ũthanthau mũkono ũmwe.

15Na kĩthembeo kya ĩũlũ kĩkeethĩwa mĩkono ĩna; na kuma kaikonĩ ka kĩthembeo na kũthi ĩũlũ kũkeethĩwa mbya inya.

16Na kaiko ka kĩthembeo kakeethĩwa mĩkono ĩkũmi na ĩlĩ ũasa wako, na ĩkũmi na ĩlĩ ũthanthau, ngalĩ inya syako syĩanene.

17Na ũnyitĩku ũkeethĩwa mĩkono ĩkũmi na ĩna ũasa waw’o na ĩkũmi na ĩna ũthanthau waw’o ngalĩ inya syaw’o; na ũengo ũtee wakyo ũkeethĩwa nyunzu ya mũkono; na ĩtina yakyo yĩkeethĩwa mũkono ngalĩ syonthe; na kyambatĩlo kyakyo kĩkeelekela ngalĩ ya wumĩlonĩ wa syũa.

18Na ambĩa, Mwana wa mũndũ, ũũ nĩw’o Mwĩaĩi Yeova ũnũkwasya: Aa nĩ motw’ĩo ma kĩthembeo mũthenya ũla makakĩseũvya, mathembe nthembo ya kũvĩvw’a ĩũlũ wakyo, na kũminzangĩsya nthakame ĩũlũ wakyo.

19Athembi Alivai ala ma ũsyao wa Nzatoki, ala me vakuvĩ nakwa, manthũkũme, ũkamanenga kasalũ kamwe kethĩwe nthembo ya naĩ, easya ũu Mwĩaĩi Yeova.

20Na ũkoosa nthakame yako, na kũmĩkĩa mbyanĩ inya syakyo, na ikotonĩ inya sya ũnyitĩku, na ũengonĩ ũthyũlũlũkĩte: ta ũu ũkakĩthesya na kumya nthembo ya wĩw’anĩthyo kwondũ wakyo.

21O na ũkoosa kala kasalũ ka nthembo ya naĩ, na kakavĩvw’a vandũ vatw’e va ĩ nyũmba, ũtee wa vala vandũ vatheu.

22Na mũthenya wa kelĩ ũkathemba nthenge ĩte kĩema ĩthĩwe nthembo ya naĩ; na makathesya kĩthembeo, o ũndũ makĩtheisye na kala kasalũ.

23Na wamina ũkĩthesya, ũkathemba kasalũ kate kĩema, na ndũũme ya ndĩthya ĩte kĩema.

24Na ũkaithengeesya mbee wa Yeova, na athembi makasyĩkĩa mũnyũ, na makaithembea Yeova syĩthĩwe nthembo ya kũvĩvw’a.

25Mĩthenya mũonza o kĩla mũthenya ũkaseũvasya mbũi yĩthĩwe nthembo ya naĩ: o na makaseũvya kasalũ, na ndũũme ya ndĩthya, ite kĩema.

26Mĩthenya mũonza makathembaa nthembo ya wĩw’anĩthyo kwondũ wa kĩthembeo na kũkĩthesya; makakĩvathanasya kĩthĩwe kĩtheu ta ũu.

27Na yĩla meanĩsya mĩthenya, kũkeethĩwa atĩ mũthenya wa nyanya, na kũendeea mbee, athembi makaseũvya nthembo syenyu sya kũvĩvw’a kĩthembeonĩ, na nthembo syenyu sya mũuo; na ngamwĩtĩkĩla inyw’ĩ, easya ũu Mwĩaĩi Yeova.

← Chapter 42 Jump to: Chapter 44 →