Ezekiel 44

Kamba (Mbivilia) 1956

← Chapter 43 Jump to: Chapter 45 →

1Na ĩndĩ nĩwandũngĩle nzĩanĩ ya mbingĩlo ya nza ya vala vandũ vatheu, ĩla yelekele ngalĩ ya wumĩlonĩ wa syũa; na yaĩ mbinge.

2Na Yeova ambĩa, Mbingĩlo ĩno ĩkavingwa; na ndĩkavingũwa, na mũndũ o na wĩva ndakamĩvotela; nũndũ Yeova, Ngai wa Isilaeli, nũmĩvotele; kwondũ wa ũu ĩkavingwa.

3Ũndũ wa mũnene wĩ mbee ũsumbĩnĩ, akekala nthĩnĩ wayo ta mũnene wĩ mbee ũsumbĩnĩ aĩe lĩu mee wa Yeova; akavota na nzĩa ya valasya wa mbingĩlo, na akaumaalĩla nzĩa o ĩsu.

4Na ĩndĩ andete na nzĩa ya mbingĩlo yĩ ngalĩ ya ĩũlũ mbee wa nyũmba; na noona, na, sisya, ũtheu mũtisu wa Yeova wausũa nyũmba ya Yeova: na navalũka na ũthyũ wakwa.

5Na Yeova ambĩa, Mwana wa mũndũ, sũvĩa nesa, wone na metho maku, na kwĩw’a na matũ maku w’onthe ũla ngũkwĩa ũndũ wa motw’ĩo onthe ma nyũmba ya Yeova, na mĩao yonthe yayo; na sũvĩa nesa ũlikĩlo wa nyũmba, na kĩla wumaalĩlo wa vala vandũ vatheu.

6Na ũkamatavya ala ang’endu, o nyũmba ya Isilaeli, Ũũ nĩw’o Mwĩaĩi Yeova ũnũkwasya: Inyw’ĩ nyũmba ya Isilaeli, ĩanĩwai nũu mothatyonĩ menyu onthe,

7nũndũ nĩmwaetie andũ ma nthĩ ingĩ, mate aĩke ngoonĩ, na mate aĩke mwĩĩnĩ, malike vala vandũ vakwa vatheu, mavavukye, o nyũmba yakwa, yĩla mũthembaa kĩmũtũ kyakwa, mathunya na nthakame, nao nĩmanangĩte ũtianĩo wakwa, mongeleele mothatyo menyu onthe.

8Na inyw’ĩ mũtyaasũvĩa wĩaĩo wa syĩndũ syakwa ntheu; ĩndĩ nĩmwiĩte asũvĩi ma wĩaĩo wakwa ma vala vandũ vakwa vatheu kwondũ wenyu ene.

9Ũũ nĩw’o Mwĩaĩi Yeova ũnũkwasya, Vai mũndũ wa nthĩ ĩngĩ o na wĩva, ũte mwaĩke ngoonĩ na ũte mwaĩke mwĩĩnĩ, ũkalika vala vandũ vakwa vatheu, wa andũ ma nthĩ ingĩ o na meva ala me katĩ wa ana ma Isilaeli.

10Ĩndĩ Alivai ala maendie kũasa nakwa, ala mandiie makĩatĩĩa mĩvw’anano yoo, o yĩla Isilaeli maaĩte, makakua ũthũku woo.

11Ĩndĩ makeethĩwa athũkũmi vala vandũ vakwa vatheu, me asyaĩĩsya mbingĩlonĩ sya nyũmba, na makĩthũkũma nyũmbanĩ: makooaa nthembo ya kũvĩvw’a na nthembo ya kũtonywa kwondũ wa andũ, na makaũngama mbee woo mamathũkũme.

12Nĩkwĩthĩwa nĩmamathũkũmĩe vu mbee wa mĩvw’anano yoo, na matw’ĩka ũlulutĩkyo wa ũthũku kwa nyũmba ya Isilaeli; kwondũ wa ũu nĩnĩmokĩlĩlye kw’oko kwakwa, easya ũu Mwĩaĩi Yeova, na makakua ũthũku woo.

13Na matikanthengeea, manthũkũme wĩanĩ wa ũthembi, kana kũthengeea kĩndũ o na kĩva kya syĩndũ syakwa ntheu, syĩndũ ila ntheu mbee; ĩndĩ makakua nthoni syoo, na mothatyo moo ala mekaa.

14Ĩndĩ ngamatw’ĩkĩthya asũvĩi ma wĩaĩo wa nyũmba, kwondũ wa ũthũkũmi w’onthe wayo, na kwondũ wa w’onthe ũla ũkekwa nthĩnĩ wayo.

15Ĩndĩ athembi Alivai, ana ma Nzatoki, ala masũvĩaa wĩaĩo wa vala vandũ vakwa vatheu yĩla ana ma Isilaeli mandiĩte, makanthengeea manthũkũme; na makaũngama mbee wakwa manthembee mathunya na nthakame, easya ũu Mwĩaĩi Yeova:

16makalika vala vandũ vakwa vatheu, na makathengeea mesa yakwa, manthũkũme, na makasũvĩa wĩaĩo wakwa.

17Na kũkeethĩwa, yĩla melika mbingĩlonĩ sya nza ya nthĩnĩ, makeethĩawa mekĩĩte ngũa sya katane; na maikekĩe ngũa ya w’ĩa wa ĩlondu, yĩla methũkũmaa mbingĩlonĩ sya nza yĩ nthĩnĩ, o na nthĩnĩ.

18Makeethĩwa na tũkovila twa katane mĩtwenĩ yoo, na makeethĩwa na masulualĩ ma katane inyunyunĩ syoo; na matĩkevotoa kĩndũ o na kĩva kĩkĩa yuutĩa.

19Na yĩla meumaala nza yĩ ũtee, o nza yĩ ũtee vala ve andũ, makaumya ngũa syoo ila mathũkũmaa nasyo, na kũsia tũsũmbanĩ tũtheu; na makeekĩa ngũa ingĩ, nĩ kana matikavathan’ye andũ methĩwe atheu kwondũ wa ngũa isu syoo.

20O na matikenze mĩtwe yoo, kana kũeka nzw’ĩĩ syoo syĩane mũno; no kũtilangaa nzwiĩĩ sya mĩtwe yoo.

21O na mũthembi o na wĩva ndakanyw’e mbinyu, yĩla melikaa nza ya nthĩnĩ.

22O na matikatwae ndiwa syĩthĩwe iveti syoo, kana ũla ũeketwe; ĩndĩ makatwaa eitu atheu ma ũsyao wa nyũmba ya Isilaeli, kana ndĩwa ĩnaĩ mũka wa mũthembi.

23Na makamanyĩsya andũ makwa kĩvathũkan’yo katĩ wa kĩla kĩtheu na kĩla kĩte kĩtheu, na kũtuma mavathũkan’ya katĩ wa kĩla kĩvuku na kĩla kĩtheu.

24Na ngananĩonĩ makaũngama kũsila; makatusaa kwĩanana na motw’ĩo makwa: na makakwata mĩao yakwa na myamũlo yakwa mbokanĩ syakwa syonthe itw’ĩtwe; na makavathan’ya masavato makwa methĩwe matheu.

25Na matikalika vala ve mũndũ mũkw’ũ mevukye; ĩndĩ kwondũ wa ĩthe, kana nyinyia, kana mwana, kana mwĩĩtu, kana mwana‐a‐inyia, kana mwĩĩtu‐a‐inyia ũla ũtaĩ na mũũme, nĩmatonya kwĩvukya.

26Na amina kũthew’a, makamũtalĩla mĩthenya mũonza.

27Na mũthenya ũla wĩlika vala vandũ vatheu, nza ya nthĩnĩ, athũkũmĩe vala vandũ vatheu, akathemba nthembo yake ya naĩ, easya ũu Mwĩaĩi Yeova.

28Na makeethĩwa na ũtiĩwa: ninyie ũtiĩwa woo; na mũtikamanenga ng’ũndũ o na yĩva nthĩnĩ wa Isilaeli; ninyie ng’ũndũ yoo.

29Makaĩsaa nthembo ya mũtu, na nthembo ya naĩ, na nthembo ya mavĩtyo; na kĩla kĩndũ kĩvathe nthĩnĩ wa Isilaeli kĩkethĩwa kyoo.

30Na kĩla kya mbee kya mosyao onthe ma mbee ma kĩla kĩndũ, na kĩla nthembo ya kĩla kĩndũ, nthembonĩ syenyu syonthe, ikethĩwa sya mũthembi: o na mũkanenga athembi kĩla kya mbee kya mũtu wenyu, ũtume ũathimo wĩkala nyũmbanĩ yaku.

31Athembi matikaya kĩndũ kya kũkw’a, kana kĩlĩku, ethĩwa nĩ nyũnyi kana nyamũ.

← Chapter 43 Jump to: Chapter 45 →