Ezekiel 36

Kamba (Mbivilia) 1956

← Chapter 35 Jump to: Chapter 37 →

1Naku, mwana wa mũndũ, athanĩa iĩma sya Isilaeli, nokyasya, Inyw’ĩ iĩma sya Isilaeli, ithukĩĩsyei ndeto ya Yeova.

2Ũũ nĩw’o Mwĩaĩi Yeova ũnũkwasya: Nĩkwĩthĩwa mũmaitha nũmũneenee, Aa! Na, Kũndũ kũtũlu kwa tene nĩ kwitũ, ng’ũndũ sitũ;

3kwondũ wa ũu athana, nokyasya, Ũũ nĩw’o Mwĩaĩi Yeova ũnũkwasya: Nĩkwĩthĩwa, o nĩkwĩthĩwa nĩmamũtw’ĩkĩthĩtye athei, na nĩmamũmeletye kĩla ngalĩko, nĩ kana mwĩthĩwe ng’ũndũ ya ala matialile ma i mbaĩ, na nĩmũwetawa ilomonĩ sya aneeni, na ũvoonĩ mũthũku wa andũ;

4kwondũ wa ũu, inyw’ĩ iĩma sya Isilaeli, ĩthukĩĩsyei ndeto ya Mwĩaĩi Yeova: Ũũ nĩw’o Mwĩaĩi Yeova ũnũũtavya iĩma na tũlĩma, mbũsĩ na myanda, kũndũ kũthei kwanangĩku na ndũa ila itiĩtwe, ila itw’ĩkĩte mũtavo na ntheko kwa ala matialile ma i mbaĩ ila ithyũlũlũkĩte;

5kwondũ wa ũu Mwĩaĩi Yeova easya atĩĩ: Vate ndĩi mwakinĩ wa kĩwĩu kyakwa nĩnĩneenete ĩũlũ wa ala matialile ma i mbaĩ, na Etomu yonthe, ala meyosee nthĩ yakwa yĩthĩwe ng’ũndũ yoo na ũtanu wa ngoo yoo yonthe, na kĩvũthya kya ngoo, mamĩkye yĩthĩwe mũtavo.

6Kwondũ wa ũu athana ũndũ wa nthĩ ya Isilaeli, noitavya iĩma na tũlĩma, mbũsĩ na myanda, Ũũ nĩw’o Mwĩaĩi Yeova ũnũkwasya: Sisyai, nĩnĩneenete kĩwĩunĩ kyakwa na ũthilĩkunĩ wakwa, nĩkwĩthĩwa nĩmũkuĩte nthoni sya i mbaĩ:

7kwondũ wa ũu Mwĩaĩi Yeova easya atĩĩ: Nĩnĩavĩte, ngyasya, Vate ndĩi mbaĩ ila imũthyũlũlũkĩte, ikakua nthonĩ syasyo.

8Ĩndĩ inyw’ĩ, iĩma sya Isilaeli, mũkathongoosya mbonge syenyu, na kũsyaa ũsyao wenyu kwondũ wa andũ makwa Isilaeli; nũndũ nĩmathengeee kũka.

9Nũndũ, sisya, nyie nĩ ngalĩ yenyu, na ngamwĩthyũũĩa, na mũkaĩmwa na kũvandwa;

10na ngaingĩvya andũ kwenyu, nyũmba yonthe ya Isilaeli, o yo yonthe; na ndũa ikatũwa, na kũndũ kwanangĩku kũkaakwa;

11na ngaingĩvya kwenyu mũndũ na nyamũ; na ikaingĩva na kũsyaa; na ngamũtũĩthya o ta tene, na ngamwĩka nesa kwĩ myambĩlĩyo yenyu: na mũkamanya ninyie Yeova.

12Ĩĩ, ngatambũũkĩlya andũ ĩũlũ wenyu, o andũ makwa Isilaeli; na makaũmesya, na ũkeethĩwa ũtiĩwa woo, na kuma yu ndũkamakw’ĩĩthĩsya syana ĩngĩ.

13Ũũ nĩw’o Mwĩaĩi Yeova ũnũkwasya: Nĩkwĩthĩwa nĩmeũmwĩa, We nthĩ wĩ mũyi wa andũ, na waĩ ũla wamĩkw’ĩĩthĩsye mbaĩ yaku;

14kwondũ wa ũu ndũkaya andũ ĩngĩ, o na ndũkamĩkw’ĩĩthĩsya mbaĩ yaku ĩngĩ, easya ũu Mwĩaĩi Yeova;

15o na ndikakũeka wĩw’e ĩngĩ nthoni sya i mbaĩ, o na ndũkakua kĩvũthya kya ngo sya andũ ĩngĩ, o na ndũkalulutĩkya mbaĩ yaku ĩngĩ, easya ũu Mwĩaĩi Yeova.

16Na ĩngĩ ndeto ya Yeova yambũkĩa, ĩkĩmbĩa,

17Mwana wa mũndũ, yĩla nyũmba ya Isilaeli yatwĩe nthĩ yoo ene, mamĩvukisye ũndũ wa mĩendele yoo na meko moo: mĩendele yoo mbee wakwa yailyĩ ũvuku wa mũndũ mũka ũla wealũlĩte.

18Kwondũ wa ũu nĩnamonoesye ũthilĩku wakwa nũndũ wa nthakame ĩla metĩkisye nthĩ, na nũndũ nĩmamĩthũkisye na mĩvw’anano yoo;

19na nĩnamanyaĩĩkisye katĩ wa i mbaĩ, na manyaĩĩkw’a katĩ wa i nthĩ: nĩnamasilĩle kwĩanana na mĩendele yoo na kwĩanana na meko moo.

20Na yĩla mavikĩe i mbaĩ, kũla maendie, mavukya syĩtwa yakwa ĩtheu; kũvika andũ maneena ũndũ woo, Aa nĩ andũ ma Yeova, na nĩmaumĩte nthĩ yake.

21Ĩndĩ nayĩw’ĩa tei syĩtwa yakwa ĩtheu, yĩla nyũmba ya Isilaeli yavukisye katĩ wa i mbaĩ, kũla maendie.

22Kwondũ wa ũu tavya nyũmba ya Isilaeli, Ũũ nĩw’o Mwĩaĩi Yeova ũnũkwasya: Ndikwĩka ũu kwondũ wenyu, ĩnyw’ĩ nyũmba ya Isilaeli, ĩndĩ kwondũ wa syĩtwa yakwa ĩtheu, yĩla mũvukĩsye katĩ wa i mbaĩ, kũla mwaendie.

23Na ngavathan’ya syĩtwa yakwa ĩnene, yĩla yavukĩwe katĩ wa i mbaĩ, yĩla ĩnyw’ĩ mwavukĩsye katĩ wasyo; na mbaĩ ikamanya ninyie Yeova, easya ũu Mwĩaĩi Yeova, yĩla ngeyonan’ya kwenyu mbee wa metho moo atĩ nĩ mũtheu.

24Nũndũ ngamumya katĩ wa i mbaĩ, na kũmũmban’ya kuma nthĩ syonthe, na ngamũete nthĩ yenyu ene.

25Na ngamũminzangĩsya manzĩ matheu, na mũkeethĩwa mwĩ atheu: ngamũthesya ũvuku wenyu w’onthe, mĩvw’anano yenyu yonthe.

26O na ngamũnenga ngoo nzaũ, na ngeekĩa veva mweũ nthĩnĩ wenyu; na ngaumya ngoo ya ĩvia mĩĩnĩ yenyu, na ngamũnenga ngoo ya nyama.

27Na ngeekĩa Veva wakwa nthĩnĩ wenyu, na ngamũkinyĩthasya myamũlonĩ yakwa, na mũkakwataa motw’ĩo makwa, na kũmeka.

28Na mũkekalaa nthĩ ĩla nanengie aaĩthe menyu; na mũkeethĩwa andũ makwa, na ngeethĩwa Ngai wenyu.

29Na ngamũtangĩĩa kuma ũvukunĩ wenyu w’onthe: na ngeeta lĩu wa mbaa ngetha, na ngawingĩvya, na ndikamwĩĩa yũa.

30Na ngaingĩvya ũsyao wa mũtĩ, na wingĩvo wa mũũnda, nĩ kana mũtikaavũthw’e ĩngĩ ũndũ wa yũa katĩ wa i mbaĩ.

31Nĩvo ĩndĩ mũkalilikana mĩendele yenyu mĩthũku, na meko menyu ala mataĩ maseo; na mũkeemena methonĩ menyu ene mũndũ wa mothũku menyu na nũndũ wa mothatyo menyu.

32Nĩkũmanyĩke kwenyu ti kwondũ wenyu nĩkaa ũu, easya ũu Mwĩaĩi Yeova: sonokai na thokoanai nũndũ wa mĩendele yenyu, inyw’ĩ nyũmba ya Isilaeli.

33Ũũ nĩw’o Mwĩaĩi Yeova ũnũkwasya: Mũthenya ũla nĩmũthesya mothũku menyu onthe, ngatuma ndũa itũwa na kũla kwanangĩku kũkaakwa.

34Na nthĩ ĩla yaĩ nthei ĩkaĩmwa, ĩla yaĩ nthei ĩkyoneka nĩ onthe ala mamĩvĩtĩlaa.

35Na makasya, Nthĩ ĩno ĩla yaĩ nthei nĩtw’ĩkĩte ta mũũnda wa Eteni; na ndũa ila syaĩ maanzo na nthei na nomboange nĩ mbiie na nitũĩtwe.

36Nĩvo ĩndĩ mbaĩ ila itiĩtwe imũthyũlũlũkĩte ikamanya kana nyie, Yeova, nĩndũngĩĩĩte kũndũ kũomboku, na nĩnĩvandĩte kũla kwaĩ kũthei: nyie, Yeova, nĩnĩneenete ũu, na ngawĩka.

37Ũũ nĩw’o Mwĩaĩi Yeova ũnũkwasya: O na ĩngĩ, ngakũlw’a ũndũ ũsu nĩ nyũmba ya Isilaeli, nĩwĩke kwondũ woo: ngamaingĩvya andũ methĩwe ta ndĩthya ya mbũi na malondu.

38Ta ndĩthya kwondũ wa nthembo, ta ndĩthya ya Yelusaleme kwondũ wa mboka syayo ila itw’ĩtwe, o ta ũu ndũa ila syaĩ maanzo ikausũw’a ndĩthya sya andũ; na makamanya ninyie Yeova.

← Chapter 35 Jump to: Chapter 37 →