1 Samuel 22

Luganda (Luganda Bible 2003) (LB03)

← Chapter 21 Jump to: Chapter 23 →

1Dawudi n'ava mu kibuga ky'e Gaati, n'addukira mu mpuku, eri okumpi n'akabuga Adullamu. Baganda be n'ab'omu nnyumba ya kitaawe bonna bwe baawulira nti Dawudi ali eyo, ne bagenda gy'ali.

2Abantu abaali banyigirizibwa, n'abaali babanjibwa era n'abataali bamativu, ne bagenda ne beegatta ku Dawudi, n'afuuka omukulembeze waabwe. Bonna abaamwegattako ne bawera abasajja ng'ebikumi bina.

3Dawudi n'avaayo, n'agenda e Mizupa eky'omu Mowaabu, n'agamba kabaka w'e Mowaabu nti: “Kkiriza kitange ne mmange bajje babeere naawe, okutuusa nga mmaze okumanya Katonda ky'agenda okunkolera.”

4Awo Dawudi n'aleeta bakadde be ewa kabaka w'e Mowaabu, ne babeera naye ebbanga lyonna Dawudi lye yamala nga yeekwese mu mpuku.

5Awo omulanzi Gaadi n'agamba Dawudi nti: “Tobeera mu mpuku, vvaamu ogende e Buyudaaya.” Awo Dawudi n'avaayo, n'agenda mu kibira ky'e Hereti.

6Awo Sawulo bwe yali e Gibeya, ng'atudde wansi w'omuti omunyulira ku kasozi, ng'akutte effumu mu ngalo, nga ne basajja be bamwetoolodde, n'awulira nga Dawudi n'abasajja be yali nabo, bazuuliddwa gye bali.

7Sawulo n'agamba abaweereza be abaali bayimiridde okumwetooloola nti: “Muwulire mmwe Ababenyamiini! Mulowooza nti mutabani wa Yesse aliwa buli omu ku mmwe ebibanja n'ennimiro z'emizabbibu, mwenna n'abafuula bakulu mu magye ge, okukulira ebibinja eby'olukumi lukumi, n'eby'ekikumi kikumi?

8Kyemuvudde mundyamu olukwe? Tewali n'omu ku mmwe yambuulirako, nti mutabani wange, akoze endagaano ne mutabani wa Yesse! Tewali n'omu ku mmwe annumirwa, wadde antegeeza nga mutabani wange, ye apikiriza omuweereza wange okunteega, nga bw'akoze leero!”

9Awo Dowegi Omwedomu, eyali ayimiridde awo n'abaweereza ba Sawulo, n'addamu nti: “Nalaba mutabani wa Yesse ng'ajja e Nobu eri Ahimeleki mutabani wa Ahituubu.

10Ahimeleki n'amwebuuliza ku Mukama, era n'amuwa ebyokulya, n'amuwa n'ekitala ekyali ekya Goliyaati Omufilistiya.”

11Awo kabaka n'atumya Ahimeleki kabona mutabani wa Ahituubu, n'ab'ennyumba ya kitaawe bonna, abaali bakabona e Nobu, bonna ne bajja eri kabaka.

12Sawulo n'agamba nti: “Wulira ggwe mutabani wa Ahituubu!” N'amuddamu nti: “Nzuuno, mukama wange.”

13Sawulo n'amubuuza nti: “Lwaki ggwe ne mutabani wa Yesse mwandyamu olukwe? Wamuwa emmere n'ekitala, n'omwebuuliza ku Katonda, ankyukire okunteega, nga bw'akoze leero.”

14Ahimeleki n'addamu kabaka nti: “Mu baweereza bo bonna, ani mwesigwa nga Dawudi? Mukoddomi wo, muduumizi w'ekibinja ky'abakuumi bo, era oweekitiibwa mu lubiri lwo.

15Guno gwe mulundi gwange ogusoose okumwebuuliza ku Katonda? Nedda, si bwe kiri. Naye eky'okukulyamu olukwe ayi kabaka, oleme kukirowooleza nze omuweereza wo, oba omulala yenna ow'omu nnyumba ya kitange, kubanga nze omuweereza wo, sirina kye nkimanyiiko n'akatono.”

16Awo kabaka n'agamba nti: “Ahimeleki, ggwe n'ab'ennyumba ya kitaawo bonna, muteekwa okufa.”

17Awo kabaka n'alagira abakuumi abaali bayimiridde w'ali nti: “Mukyuke mutte bakabona ba Mukama, kubanga nabo beegasse ne Dawudi, era kubanga baamanya ng'adduse ne batambuulira!” Naye abakuumi ba kabaka ne bagaana okugolola emikono gyabwe okutta bakabona ba Mukama.

18Awo kabaka n'agamba Dowegi nti: “Ggwe kyuka otte bakabona.” Dowegi Omwedomu n'akyuka n'atta bakabona. Ku lunaku olwo n'atta bakabona kinaana mu bataano, abambala efodi ey'olugoye.

19Sawulo era n'azinda Nobu, ekibuga kya bakabona. N'atta abasajja n'abakazi, n'abaana abakuzeemu n'abayonka, era n'ente, n'endogoyi, n'endiga.

20Naye Abiyataari, omu ku batabani ba Ahimeleki, era muzzukulu wa Ahituubu n'adduka, n'agenda yeegatta ku Dawudi.

21Abiyataari oyo n'abuulira Dawudi nti Sawulo asse bakabona ba Mukama.

22Dawudi n'agamba Abiyataari nti: “Bwe nalaba Dowegi Omwedomu mu kibuga Nobu, ne mmanya nti ateekwa okubuulira Sawulo. Kale nze naleetera abantu b'ennyumba ya kitaawo okufa.

23Sigala nange, totya, kubanga oyo ayagala okunzita, naawe ye ayagala okukutta. Bw'onooba nange ojja kukuumibwa.”

← Chapter 21 Jump to: Chapter 23 →