1 Samuel 1

Luganda (BIBU1) (BIBULIYA ENTUKUVU)

Jump to: Chapter 2 →

1Waaliwo omusajja omu ow'e Ramatayimu-Zofimu, mu nsozi za Efurayimu, erinnya lye nga ye Elukana, mutabani wa Yerokamu, mutabani wa Eliwu, mutabani wa Toku, mutabani wa Zufi, Omwefurayimu.

2Yalina abakazi babiri; omu nga ye Anna, owookubiri nga ye Peninna. Peninna yalina abaana, ye Anna nga talina.

3Omusajja ono, buli mwaka yavanga mu kibuga kye n'ayambuka, asinze n'okutambirira Omukama w'Amagye mu Silo. Eyo waaliyo bakabona b'Omukama babiri, Kofuni ne Finekasi, bombi nga batabani ba Eli.

4Olunaku bwe lwatuukanga Elukana okutambira, ng'awa Peninna mukazi we n'abaana be bonna abalenzi n'abawala emigabo gyabwe.

5Anna yamuwanga omugabo gwa mirundi ebiri kubanga yali muganzi; kyokka Omukama yali tamuwadde kuzaala.

6Naye muggya we yamusosonkerezanga amukalaze kubanga Omukama yali tamuwadde kuzaala.

7Kino nga kibaawo buli mwaka; Anna buli lwe yatuukanga okwambuka mu Nnyumba y'Omukama, ng'amunyiiza bw'atyo; Anna n'akaabanga n'emmere n'emulema okulya.

8Bba Elukana n'amugamba nti: “Anna, okaabira ki? Lwaki tolya mmere? Lwaki omutima gwo gukwennyise? Nze sikusingira baana ekkumi ab'obulenzi?”

9Olumu bwe baamala okulya n'okunywa mu Silo, Anna n'asituka. Eli kabona yali atudde ku ntebe awo ku miryango gy'Ekiggwa ky'Omukama.

10Anna yali anyolwa mu mutima, n'asaba ew'Omukama ng'akaaba nnyo.

11Ne yeeyama ew'Omukama ng'agamba nti: “Ayi Mukama w'Amagye, bw'oliba olabye n'otunuulira okubonaabona kw'omuzaana wo, n'ojjukira omuzaana wo, n'otomwerabira, n'omala omuwa omwana ow'obulenzi, ŋŋenda kumuwa Omukama ennaku zonna ez'obulamu bwe; akamwano tekaliyita mu mutwe gwe.”

12Bwe yali yeegayirira Omukama, Eli nga yekkaanya akamwa ke.

13Anna yali ayogera mu mutima gwe, emimwa gye gyokka nga gye gyenyeenya, naye ng'eddoboozi lye teriwulikika. Eli n'alowooza nti atamidde.

14Eli kwe kumugamba nti: “Oneetamiiza kutuusa wa? Gira evviini ekuliko ekwamukeko.”

15Anna n'ayanukula n'agamba nti: “Si ky'ekyo, ssebo, wabula mukazi wattu nkabiriddwa mu mwoyo. Sinywedde vviini oba ekitamiiza ekirala kyonna, wabula omutima gwange gwe mbikkulidde Omukama.

16Omuzaana wo tomuyita mukazi mutamiivu; obwedda neegayirira wano n'okutuusa kati olw'obulumi bwange n'ennaku ebingi.”

17Awo Eli n'amugamba nti: “Genda mu ddembe, ne Katonda wa Yisirayeli akuwe ky'omusabye.”

18Ye n'amugamba nti: “Singa nno omuzaana wo asanze ekisa mu maaso go!” Omukazi n'agenda amakubo ge; n'alya ku mmere, era amaaso ge tegaddayo kulaga nnaku.

19Bwe baazuukuka ku makya, ne basinza mu maaso g'Omukama, oluvannyuma ne baddayo ewaabwe mu Rama. Elukana ne yeebaka ne mukazi we Anna; Omukama n'amujjukira.

20Ennaku bwe zeetooloola Anna n'aba olubuto, n'azaala omwana wa bulenzi, n'amutuuma Samweli, ng'agamba nti: “Kubanga namusaba Omukama.”

21Elukana bwe yayambuka n'ennyumba ye yonna atambirire Omukama ekitambiro ekya buli mwaka, n'okutuukiriza obweyamo,

22Anna teyayambuka; naye n'agamba bba nti: “Omwana bw'aliva ku mabeere, ndimutwala ne mmwanjula mu maaso g'Omukama, asigalire ddala eyo ebbanga lyonna.”

23Bba Elukana n'amugamba nti: “Kola nga bw'osiimye; sigala okutuusa omwana lw'onoomuggya ku mabeere; nsaba kimu kyokka, Omukama atuukirize ekigambo kye.” Omukazi n'asigala awaka, n'ayonsa omwana we okutuusa lwe yamuggya ku mabeere.

24Omwana olwava ku mabeere, Anna n'ayambuka naye e Silo; yatwala ente ennume ya myaka esatu n'efa ssatu ez'obuwunga, n'endyanga y'evviini; n'amuleeta mu Nnyumba y'Omukama mu Silo. Omwana yali akyali muto.

25Bwe baamala okutta ente ennume, omwana ne bamuleeta ewa Eli.

26Anna n'agamba Eli nti: “Ssebo, mazima ggwe ng'oli mulamu, nze mukazi oli eyayimirira mu maaso go wano nga nsaba ew'Omukama.

27Nali nsaba mwana ono; Omukama yampa kye namusaba.

28Nange kyenvudde mmuwa Omukama; ennaku zonna ez'obulamu bwe aweereddwa ew'Omukama.” Ne basinziza Omukama mu kifo ekyo.

Jump to: Chapter 2 →