1 Samuel 16

Luganda (BIBU1) (BIBULIYA ENTUKUVU)

← Chapter 15 Jump to: Chapter 17 →

1Omukama n'agamba Samweli nti: “Onootuusa wa okukaabira Sawulo, ate nga nze mmubodde ku bwakabaka bwa Yisirayeli? Jjuza ejjembe lyo omuzigo, ogende, nkusindise ewa Yesse ow'e Beteleemu; omu ku batabani be mmwerondedde abeere kabaka.”

2Naye Samweli n'agamba nti: “Nnaagenda ntya? Sawulo ajja kuwulira anzite.” Omukama n'agamba nti: “Kwata ennyana y'ente ogende nayo; ojja kugamba nti: ‘Nzize kutambirira Mukama.’

3Ojja kuyita Yesse awali ekitambiro; nze nzija kukulaga ky'onookola. Ojja kunsiigira omuzigo yenna gwe nnaaba nkulaze.”

4Samweli n'akola ng'Omukama bwe yamugamba; yagenda e Beteleemu. Abakadde mu kibuga ne beekanga; bwe baamusisinkana ne bamubuuza nti: “Ozze lwa mirembe?”

5N'agamba nti: “Lwa mirembe; nzize kutambirira Mukama. Mwetukuze, mujje nange tutambire.” N'atukuza Yesse ne batabani be, n'abayita ku kitambiro.

6Bwe bajja, n'alaba Eliyabu, n'alowooza nti: “Tewali kubuusabuusa, omusiige w'Omukama ali mu maaso g'Omukama.”

7Naye Omukama n'agamba Samweli nti: “Totunuulira ndabika ye, wadde obuwanvu bwe, kubanga si gwe nnonze, kubanga siraba ng'omuntu bw'alaba. Omuntu alaba ebyo eby'okungulu, naye Omukama atunuulira mutima.”

8Yesse n'ayita Abinadabu, n'amuyisa mu maaso ga Samweli. Samweli n'agamba nti: “N'ono Omukama tamulonze.”

9Yesse n'ayisaawo Samma. Samweli n'agamba nti: “N'ono Omukama tamulonze.”

10Yesse n'ayisaawo batabani be omusanvu mu maaso ga Samweli, Samweli n'agamba Yesse nti: “Omukama talonze mu bano.”

11Samweli n'abuuza Yesse nti: “Bano be batabani bo bokka?” N'ayanukula nti: “Wakyasigaddeyo omuggalanda; alunda ndiga.” Samweli n'agamba Yesse nti: “Mutumye; tetujja kutuula ku lujjuliro ng'oyo tannatuuka wano.”

12N'amutumya, n'amuleeta. Yali mumyufu, wa maaso malungi, ng'asanyusa okulaba. Omukama n'agamba nti: “Situka, omusiige; ye oyo.”

13Samweli n'addira ejjembe ly'omuzigo n'amusiiga mu maaso ga baganda be. Okuva ku olwo omwoyo gw'Omukama ne gujja ku Dawudi. Samweli n'asituka n'agenda mu Rama.

14Omwoyo gw'Omukama ne guva ku Sawulo, omwoyo omubi okuva ew'Omukama ne gumubonyaabonya.

15Abaweereza ba Sawulo ne bamugamba nti: “Wuuno omwoyo omubi ogwa Katonda gukubonyaabonya.

16Mukama waffe alagire, abaweereza bo abali mu maaso go banoonye omuntu amanyi okusuna ennanga. Omwoyo omubi ogwa Katonda bwe gunaakubangako, ng'asuna, olwo ng'obeera bulungiko.”

17Sawulo n'agamba abaweereza be nti: “Munnoonyeze amanyi okusuna obulungi ennanga, mumundeetere.”

18Omu ku baweereza n'agamba nti: “Nalaba mutabani wa Yesse Omubeteleemu; amanyi okusuna ennanga. Ate muzira, musajja mutabaazi, ayogeza magezi, musajja afaanana bulungi, n'Omukama ali naye.”

19Sawulo n'atuma ababaka ewa Yesse, n'agamba nti: “Nsindikira Dawudi, mutabani wo alunda endiga.”

20Yesse n'addira endogoyi eyeetisse emigaati n'endyanga y'evviini, n'akabuzi, n'abikwasa mutabani we Dawudi ng'abiweerezza Sawulo.

21Dawudi n'ajja eri Sawulo, n'ayimirira mu maaso ge; Sawulo n'ayagala nnyo Dawudi, n'afuuka mwetissi wa byakulwanyisa bye.

22Sawulo n'atumira Yesse n'agamba nti: “Dawudi k'ampeerezenga, kubanga mmusiimye.”

23Buli mwoyo gwa Katonda lwe gwabanga ku Sawulo, Dawudi ng'akwata ennanga ng'asuna, olwo Sawulo ng'akkakkana, omwoyo omubi nga gumuvaako.

← Chapter 15 Jump to: Chapter 17 →