bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Luganda
/
Luganda (BIBU1) (BIBULIYA ENTUKUVU)
/
1 Samuel 17
1 Samuel 17
Luganda (BIBU1) (BIBULIYA ENTUKUVU)
← Chapter 16
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 18 →
1
Abafilisitiini ne bakunga amagye gaabwe balwane, ne bakuŋŋaanira e Soko mu Yuda. Ne basiisira e Efesi-Dammimu wakati wa Soko ne Azeka.
2
Ye Sawulo n'abasajja Abayisirayeli ne bakuŋŋaana, ne basiisira mu Kiwonvu Ela; ne bataza eggye okusisinkana Abafilisitiini.
3
Abafilisitiini baali bagumbye ku lusozi ku ludda olumu olw'ekiwonvu n'Abayisirayeli ku lusozi emitala waakyo, kyo ekiwonvu nga kibali wakati.
4
Mu nsiisira z'Abafilisitiini n'efubutukayo omusajja omutabaazi, erinnya lye Goliyati Omugitti; obuwanvu nga wa mikono mukaaga n'oluta.
5
Enkufiira ye ku mutwe nga ya kikomo; ng'ayambadde ekizibawo eky'amagalagamba eky'ekikomo, nga kizitowa sekeli ez'ekikomo enkumi ttaano;
6
ebisabika amagulu ge nabyo nga bya kikomo, ne ku mugongo ng'ayambalidde akajogolo ka kikomo.
7
Olunyago lw'effumu lye nga lunene okwenkana omuggo kwe balukira engoye; entwe y'effumu lye, ng'ezitowa sekeli lukaaga; amwetikkira engabo ye nga y'amukulemberamu.
8
Yayimirira n'aleekana eri amagye ga Yisirayeli, n'abagamba nti: “Lwaki mujja ne mutala okulwana? Nze siri Mufilisitiini, nammwe temuli baweereza ba Sawulo? Mwerondemu omusajja omu, aserengete, ajje we ndi.
9
Bw'anampangula n'anzita, tunaafuuka baweereza bammwe; bwe nnaamuwangula ne mmutta, mujja kufuuka baweereza baffe mutuweereze.”
10
Omufilisitiini yagambanga nti: “Olwa leero nze amagye ga Yisirayeli ngasoomozezza: mumpeeyo omusajja, ajje twambalagane bwababiri.”
11
Sawulo n'Abayisirayeli bonna bwe baawuliranga Omufilisitiini bye yayogeranga, ne batekemuka, ne batya nnyo.
12
Dawudi yali mutabani wa musajja ayitibwa Yesse Omwefurati ekya Beteleemu mu Yuda. Yalina abaana munaana. Mu budde bwa Sawulo, yali musajja mukadde ng'ayise mu myaka.
13
Batabani be basatu baali bagoberedde Sawulo mu lutalo. Amannya g'abatabani be abasatu abaali bagenze mu lutalo nga ge Eliyabu omuggulanda, Abinadabu amuddako, ne Samma owookusatu.
14
Dawudi ye yali asembayo. Abasatu abakulu baagoberera Sawulo;
15
ye Dawudi yagendanga ewa Sawulo n'adda; yaddanga alunde eggana lya kitaawe e Beteleemu.
16
Omufilisitiini yeesowolangayo enkya n'eggulo ne yeesimba awo; n'akola bw'atyo okumala ennaku amakumi ana.
17
Olumu Yesse yagamba Dawudi mutabani we nti: “Baganda bo batwalireyo efa y'eŋŋano ensiike n'emigaati gino kkumi; gitwale bunnambiro mu lusiisira eri baganda bo.
18
Ate ebitole bino ebya bbongo bitwalire omugabe w'ekibinja kyabwe eky'olukumi. Genda olabe ku baganda bo nga bwe bali, bakuwe n'obukakafu obuleete.
19
Baali ne Sawulo n'abasajja ba Yisirayeli bonna nga balwana n'Abafilisitiini mu Kiwonvu Ela.”
20
Dawudi n'asituka ku makya, eggana n'alirekera omusumba, n'atikka emigugu gye, n'agenda nga Yesse bwe yali amulagidde. Yatuuka ku lusiisira ng'eggye lyetegekera okulwana, nga bakuba enduulu z'olutalo.
21
Abayisirayeli n'Abafilisitiini buli omu n'ataza eggye, amagye nga gatunuuliraganye.
22
Dawudi n'aleka awo bye yali aleese ng'abikwasizza omukuumi w'emigugu, n'addukanako mu ddwaniro n'abuuza ku baganda be.
23
Aba akyayogera nabo, omusajja omutabaazi Omufilisitiini, gwe bayita Goliyati Omugitti n'avaayo mu nnyiriri ze, n'ayogera ebyo bye yayogeranga. Dawudi n'amuwulira.
24
Abayisirayeli bonna bwe baalaba omusajja, ne babadduka nga batidde nnyo.
25
Abayisirayeli ne bagamba nti: “Olabye omusajja oyo avaayo? Ajja kusoomoza Yisirayeli. Omuntu alimutta kabaka agenda kumugaggawaza n'obutitimbe bw'ebintu; alimuwa ne muwala we abeere mukazi we, n'ennyumba ya kitaawe aligisonyiwa omusolo mu Yisirayeli.”
26
Dawudi, abasajja abaali bayimiridde naye n'ababuuza nti: “Omusajja alitta Omufilisitiini ono n'aggyawo okuswala mu Yisirayeli aliweebwa ki? Ani ono Omufilisitiini atali mutayirire asoomooza eggye lya Katonda omulamu?”
27
Abantu ne bamuddiramu bye baayogeranga, ne bamugamba nti: “Bino na bino bye biriweebwa omusajja aliba amusse.”
28
Eliyabu muganda wa Dawudi omukulu bwe yawulira ng'ayogera n'abasajja, obusungu bwe ne bweserera Dawudi, n'amugamba nti: “Lwaki wazze? Endiga entono ezo ozirekedde ani mu ddungu? Mmanyi olwetumbu lwo, n'obwonoonefu bw'omutima gwo; wazze kutunuulira lutalo.”
29
Dawudi n'agamba nti: “Nkoze ki? Nze siiyogereko?”
30
Dawudi n'akyuka, n'amuvaako, n'atunuulira omulala, n'amubuuza ekibuuzo kye kimu; abantu ne bamwanukula nga mu kusooka.
31
Ebigambo Dawudi bye yayogera ne bituuka ewa Sawulo, n'abiwulira, n'atumya Dawudi.
32
Dawudi n'agamba Sawulo nti: “Wabulewo aggwaamu omutima olw'Omufilisitiini oyo. Nze omuweereza wo nzija kugenda nnwane n'Omufilisitiini oyo.”
33
Sawulo n'agamba Dawudi nti: “Tosobola kwambalagana na Mufilisitiini oyo, oli mwana bwana; naye oyo omusajja abadde alwana okuva mu buvubuka bwe.”
34
Dawudi n'agamba Sawulo nti: “Omuweereza wo bwe yabanga alunda eggana lya kitaawe, empologoma emala ejja, oba eddubu, okutwala endiga okuva mu ggana,
35
nga ngiwondera, nga ngikuba, nga ngisuuza endiga okuva mu kamwa kaayo; bwe yasitukanga okunnumba, nga ngikwata egginirizi, nga ngikuba, nga ngitta.
36
Omuweereza wo yatta empologoma n'eddubu; n'Omufilisitiini ono atali mutayirire, ajja kuyisibwa ng'emu ku zo, kubanga asoomoozezza eggye lya Katonda omulamu.”
37
Dawudi era n'agamba nti: “Omukama eyamponya mu mikono gy'empologoma ne mu mikono gy'eddubu, yennyini y'anamponya ne mu mikono gy'Omufilisitiini.” Sawulo n'agamba Dawudi nti: “Genda; Omukama abeere naawe.”
38
Sawulo n'ayambaza Dawudi ekkanzu ye; n'amussa enkuufiira ey'ekikomo ku mutwe; n'amwambaza n'ekizibawo eky'olutalo.
39
Dawudi n'asiba ekitala ku kkanzu ye, n'asooka okugezaamu okutambula; kubanga yali tamanyidde. N'agamba Sawulo nti: “Sisobola kutambula nga ndi mu bino, kubanga simanyidde.” Naabiggyamu.
40
Dawudi n'akwata omuggo gwe mu mukono, n'alonda obuyinja butaano mu kiwonvu obwewunda obulungi, n'abussa mu kasawo akaabeeranga mu nsawo ye gye yalundanga nayo, n'akwata envuumuulo ye mu ngalo, n'asemberera Omufilisitiini.
41
N'Omufilisitiini yali ajja asemberera Dawudi, amukwatira engabo ye ng'amukulembeddemu.
42
Omufilisitiini n'atunuulira Dawudi okuva ku mutwe okutuuka ku bigere, n'amugaya, kubanga yali mulenzi bulenzi, nga mumyufu, mulungi okulaba.
43
Omufilisitiini n'agamba Dawudi nti: “Ndi mbwa olyoke ojje gye ndi n'emiggo obuggo?” Omufilisitiini n'avumirira Dawudi mu balubaale be,
44
n'agamba Dawudi nti: “Jjangu wano, ennyama yo ngigabule ebinyonyi eby'omu bbanga n'ebisolo eby'ettale.”
45
Dawudi n'agamba Omufilisitiini nti: “Ggwe ojja gye ndi n'ekitala, n'effumu, n'akajogolo; naye nze nzija gy'oli mu linnya ly'Omukama w'Amagye, Katonda w'Amagye ga Yisirayeli gw'onyoomoola.
46
Olwa leero Katonda ajja kukumpa mu mikono gyange; nzija kukutta nkutemeko omutwe; olwa leero emirambo gy'eggye ly'Abafilisitiini nzija kugigabula ebinyonyi eby'omu bbanga n'ebisolo by'ensi; ensi yonna eryoke etegeere nti Katonda ali mu Yisirayeli.
47
N'abantu bonna abali wano bamanye nti Omukama talokola na kitala na ffumu, kubanga olutalo lulwe; ajja kubatuwa mu mikono gyaffe.”
48
Omufilisitiini bwe yasimbula okulumba Dawudi, Dawudi n'adduka mangu okugenda mu ddwaniro okusisinkana n'Omufilisitiini.
49
Yakwata mu nsawo, n'aggyamu ejjinja n'alikasuka n'envuumuulo, n'akuba Omufilisitiini mu kyenyi, ejjinja ne liyingira mu kyenyi, n'agwa ku ttaka nga yeevuunise ku maaso ge.
50
Dawudi n'awangula Omufilisitiini nga yeeyamba envuumuulo n'ejjinja; yakuba Omufilisitiini n'amutta. Dawudi teyalina kitala mu mikono gye.
51
Yaddukanako mangu n'ayimirira ku Mufilisitiini, n'asowola ekitala kye, n'akiggya mu kiraato kyakyo, n'amutta, n'amutemako omutwe. Abafilisitiini bwe baalaba omuzira waabwe ng'afudde, ne badduka.
52
Abasajja ba Yisirayeli ne Yuda ne basitukiramu, ne bakuba enduulu, ne bawondera Abafilisitiini okubatuusiza ddala ku wankaaki wa Gati ne ku mulyango gwa Ekuroni. Abattibwa mu Bafilisitiini ne bagenda nga bagwa mu kkubo okuva e Saarayimu okutuuka e Gati n'e Ekuroni.
53
Abayisirayeli bwe baakomawo okuva mu kuwondera Abafilisitiini ne banyagulula olusiisira lwabwe.
54
Dawudi n'addira omutwe gw'Omufilisitiini n'aguleeta mu Yeruzaalemu, ebyokulwanyisa bye n'abitwala mu weema ye.
55
Luli Sawulo lwe yalaba Dawudi ng'afuluma okulumba Omufilisitiini, yagamba Abuneri omukulu w'amagye nti: “Abuneri, omuvubuka oyo mutabani w'ani?” Abuneri n'amugamba nti: “Ssebo Kabaka, mazima ggwe ng'oli mulamu, simanyi.”
56
Kabaka n'agamba nti: “Buuliriza, ozuule omulenzi oyo mutabani w'ani?”
57
Dawudi olw'akomawo ng'amaze okutta Omufilisitiini, Abuneri, n'amuleeta ewa Sawulo; yali akyakutte n'omutwe gw'Omufilisitiini mu ngalo.
58
Sawulo n'amugamba nti: “Muvubuka, oli mutabani w'ani?” Dawudi n'addamu nti: “Ndi mutabani wa muweereza wo Yesse ow'e Beteleemu.”
← Chapter 16
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 18 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31