Ezekiel 16 — Lahu Bible Edited © Thailand Bible Society and Bible Society of Myanmar, 2010, 2020.

1Gʼuiˬsha ngaˬ hta‸ chi hkʼe kʼaw‸ kʼoˆ laˇ ve yoˬ.

2Chaw yaˇ-oˬ, Yeˍruˆsaˍlehnˍ lehˬ hkʼaˬ ma cha‸ chiˆ ve kanˉ hta‸ te taˍ peuˬ ve yawˇ hta‸ kʼaw‸ beˆ maˍ piˇ-oˆ.

3Gʼuiˬsha yawˇ hta‸ kʼoˆ piˇ chehˇ ve tawˇ chi teˇ hpaˍ Yeˍruˆsaˍlehnˍ hta‸ hto piˇ-oˆ. Nawˬ lehˬ Hkaˍnanˍ mvuhˇmiˬ hkʼaw paw la taˍ ve yoˬ. Nawˬ ve awˬ pa lehˬ Aˍmawˇriˆ chaw hpeh‸ leh, nawˬ ve awˬ e lehˬ Hiˇtiˆ chaw hpeh‸ ve yoˬ.

4Nawˬ paw la htaˇ chaw teˇ gʼaˇ ka‸ nawˬ ve gʼuˇ tu caˆ hta‸ maˇ tawˆ. Iˉ kaˆ ka‸ maˇ hehˉ piˇ. Aˉ leh‸ yuˬ leh maˇ htu-iˍ tsuhˇ piˇ. Pehˉ keu hkʼaw ka‸ maˇ yuˬ htiˆ piˇ.

5Chaw teˇ gʼaˇ ka‸ nawˬ hta‸ ha kʼaˉ leh oˇ hkʼe maˇ te piˇ. Nawˬ paw la htaˇ chaw teˇ gʼaˇ ka‸ nawˬ hta‸ maˇ ha‸. Nawˬ hta‸ hkʼe leˇ baˬ taˍ ve yoˬ.

6Oˇ htaˇ ngaˬ hpanˍ laˬ leh, nawˬ lehˬ awˬ suhˍ hkʼaw hpeˆ dawˇ chehˇ taˍ laˇ ve hta‸ gʼa mawˬ ve yoˬ. Nawˬ lehˬ awˬ suhˍ hkʼa biˇ ngawˉ taˍ ve yoˬ. Ya‸ hkʼaˇ, ngaˬ nawˬ hta‸ maˇ suh-e tcuh.

7Ngaˬnawˬhta‸ suhˆ cehˬ ehˉ hkʼe uiˍ la tcuh ve yoˬ. Nawˬ uiˍ la leh yaˇ miˇ haˉ hpeh‸ la ve yoˬ. Nawˬ ve cuˉ teˇ hpaˍ htawˇ uiˍ la leh, uˉ hkeh mvuh ka‸ zuhˬ la ve yoˬ. Ya‸ hkʼaˇ, nawˬ lehˬ awˬ kʼu nyi hpeh‸ chehˇ taˍ sheˍ ve yoˬ.

8Ngaˬ oˇ kaˬ lo teˇ pawˆ kʼaw‸ hpanˍ kʼai chehˇ ve teˇ yanˇ, nawˬ lehˬ yehˬ kʼa ca yanˇ gaˬ peuˬ ve hta‸ ngaˬ gʼa mawˬ ve yoˬ. Hkʼe te leh, ngaˬ ve aˉ po‸ lonˉ nawˬ hta‸ feuˉ piˇ leh, nawˬ hta‸ ha‸ tuˬ ngaˬ ka ti‸ te piˇ ve yoˬ. Nawˬ ngaˬ hta‸ heuˆ tuˬ ka ti‸ te leh, nawˬ lehˬ ngaˬ miˇ ma hpeh‸ la ve yoˬ, teh‸ Gʼuiˬsha kʼoˆ ve yoˬ.

9Oˇ ve hkʼaw‸ nawˉ, ngaˬ iˉ kaˆ yuˬ leh nawˬ ve awˬ suhˍ hta‸ tsuhˇ baˬ ve yoˬ. Shaˍlonˍ chu hta‸ yuˬ leh nawˬ hta‸ shehˆ piˇ ve yoˬ.

10Ngaˬ nawˬ hta‸ awˬ sheuˉ laiˉ ceuˬ cawˬ ve aˉ po‸ feuˉ piˇ leh, da‸ jaˇ ve shaˍ guiˬ hkuiˉ nuˆ tcuhˉ piˇ ve yoˬ. Da‸ jaˇ ve uˉ nyiˉ ngaˬ nawˬ hta‸ nyiˉ piˇ leh, pfuhˇ hpa yuˬ hawˆ piˇ ve yoˬ.

11Ngaˬ nawˬ hta‸ shehnˉ la‸ kawˬ leh kʼawˍ peˍ pfuhˇ caˆ teˇ hpaˍ pfuhˍ piˇ ve yoˬ.

12Ngaˬ nawˬ hta‸ la‸ peˍ, naˍ vawˇ, leh da‸ jaˇ ve shi uˉ tcuhˍ ka‸ piˇ taˍ ve yoˬ.

13Nawˬ lehˬ hpu hkʼeun shi hkʼeun oˇ ve teˇ hpaˍ hta‸ tcuhˉ taˍ leh, awˬ sheuˉ laiˉ ceuˬ cawˬ ve pfuhˇ hpa teˇ hpaˍ veu‸ deh taˍ ve yoˬ. Nawˬ lehˬ da‸ jaˇ ve junˍ meu-e yuˬ te taˍ ve hkaoˍmonˇ, pehˇ gʼuiˬ leh shaˍ lonˍ chu teˇ hpaˍ hta‸ caˇ chehˇ ve yoˬ. Nawˬ ve awˬ hkiˇ awˬ naˬ da‸ jaˇ leh, nawˬ lehˬ jawˇmawˇ ma hpeh‸ la ve yoˬ.

14Nawˬ lehˬ awˬ hkiˇ awˬ naˬ da‸ jaˇ ve pa taw, nawˬ ve awˬ meh hkʼaˬ ti chi ti bvuhˬ kʼai ve yoˬ. Nawˬ hta‸ awˬ hkiˇ awˬ naˬ da‸ la tuˬ te laˇ shehˍ hpaˇ lehˬ ngaˬ hpeh‸ ve yoˬ, teh‸ Gʼuiˬsha kʼoˆ ve yoˬ.

15Ya‸ hkʼaˇ, nawˬ lehˬ awˬ hkiˇ awˬ naˬ da‸ ve hta‸ nyi ma uiˍ leh, nawˬ geh hkʼa laˬve chaw hui geh ca zuh‸ ve yoˬ.

16Nawˬ lehˬ nawˬ ve veu‸ kʼaˇ teˇ hpaˍ hta‸ yuˬ leh, nawˬ ve oˉ kʼoˍ pui kuiˬ teˇ hpaˍ lo nyi sha tuˬ awˬ hkiˇ gu shawˍ taˍ ve yoˬ. Meh maˬ lanˉ hkʼa shuˍ, nawˬ ve awˬ to chaw hkʼa peu-eˬ ve hta‸ chiˇ a‸ piˇ ve yoˬ.

17Nawˬ lehˬ ngaˬ piˇ taˍ ve hpu shi teˇ hpaˍ hta‸ yuˬ leh, hawˉ hkʼaˆ paˍ awˬ ho‸ awˬ han cawˬ ve shaˉ ho‸ teˇ hpaˍ te peuˬ hkʼaw‸ nawˉ, oˇ ve teˇ hpaˍ hta‸ haˉ chawˇ te chehˇ ve yoˬ.

18Nawˬ lehˬ ngaˬ piˇ taˍ ve awˬ sheuˉ laiˉ ceuˬ cawˬ ve veu‸ kʼaˇ hta‸ yuˬ leh, shaˉ ho‸ oˇ ve teˇ hpaˍ hta‸ feuˉ piˇ ve yoˬ. Nawˬ lehˬ ngaˬ piˇ taˍ ve shaˍ lonˍ chu leh sha hawnˉ teˇ hpaˍ hta‸ yuˬ leh shaˉ ho‸ oˇ ve teˇ hpaˍ hta‸ tanˇpiˇ ve yoˬ.

19Ngaˬ nawˬ hta‸ da‸ jaˇ ve hkaoˍmonˇ, pehˇ gʼuiˬ leh shaˍlonˍ chu piˇ taˍ ve yoˬ. Ya‸ hkʼaˇ, nawˬ lehˬ caˇ tuˬ oˇ ve teˇ hpaˍ hta‸ yuˬ leh, shaˉ ho‸ oˇ ve teˇ hpaˍ nawˬ hta‸ nyi ma cawˇ tuˬ yawˇ hui hta‸ tanˇ piˇ ve yoˬ.

20Oˇ ve hkʼaw‸ nawˉ, nawˬ lehˬ ngaˬ awˬ pon paw la piˇ taˍ ve yaˇ paˍ yaˇ miˇ teˇ hpaˍ hta‸ yuˬ leh, shaˉ ho‸ oˇ ve teˇ hpaˍ hta‸ tuˉ tanˇ piˇ ve yoˬ.

21Ngaˬ yaˇ teˇ hpaˍ hta‸ yuˬ leh shaˉ ho‸ oˇ ve teˇ hpaˍ hta‸ maˇ tuˉ tanˇ piˇ ve htawˇ, nawˬ ngaˬ hta‸ ka ti‸ maˇ yeˬ leh te taˍ peuˬ ve kanˉ oˇ ve teˇ hpaˍ lehˬ, cha‸ chiˆ jaˇ peuˬ ve maˇ heˆ laˇ.

22Meh maˬ lanˉ hkʼe nawˬ a sha‸ te‸ chehˇ ve awˬ yanˇ hkʼaw, nawˬ yaˇ ehˉ hpeh‸ chehˇ htaˇ awˬ kʼu nyi hpeh‸ leh, awˬ suhˍ hkʼaw lo hpeˆ dawˇ chehˇ ve hta‸ nawˬ maˇ kʼaw‸ dawˇ nyi law, teh‸ Gʼuiˬsha kʼoˆ ve yoˬ.

23Gʼuiˬsha kʼo ve, Nawˬ lehˬ gʼa luˬ gʼa sheˆ tuˬ yoˬ. Nawˬ lehˬ cha‸ chiˆ ve kanˉ oˇ ve teˇ hpaˍ hta‸ te taˍ peuˬ.

24Ya‸ kʼaw teˇ caˆ le le awˬ paˇ lo, nawˬ lehˬ shaˉ ho‸ hta‸ oˉ kʼoˍ pui kuiˬ laiˉ ka‸ te taˍ leh meh maˬ lanˉ hkʼe te chehˇ ve yoˬ.

25Awˬ hkiˇ awˬ naˬ da‸ ve nawˬ ve awˬ to hta‸ je‸ nehˆ ngawˉ tcuh ve yoˬ. Nawˬ geh hkʼa laˬ ve chaw hta‸ nawˬ ve awˬ to chiˇ a‸ piˇ leh, teˇ nyi le le meh maˬ lanˉ hkʼe te chehˇ ve yoˬ.

26Nawˬ lehˬ peh‸ puiˉ jaˇ ve Eˇjiˇtu‸ chaw teˇ hpaˍ hta‸ nawˬ geh kuˬ zuh‸ leh yawˇ hui hta‸ haˉ chawˇ haˉ paˆ te ve hkʼaw, ngaˬ hta‸ nyi ma zuhˆ tuˬ te laˇ chehˇ ve yoˬ.

27Chi beu‸ nawˬ hta‸ ciˍ yanˍ leh nawˬ hta‸ piˇ taˍ peuˬ ve awˬ bon teˇ hpaˍ hta‸ kʼaw‸ yuˬ hkʼaw‸ tuˬ, ngaˬ ve la‸ sheh hta‸ che taˍ peuˬ. Ngaˬ naw hta‸ Hpiˇliˇtiˆ chaw hui ve la‸ sheh hkʼaw chiˇ a‸ piˇ taˍ peuˬ. Yawˇ hui lehˬ nawˬ hta‸ canˇ leh, nawˬ ve cha‸ chiˆ ve kanˉ teˇ hpaˍ hta‸ cha‸ naˬ jaˇ ve yoˬ.

28Nawˬ lehˬ awˬ nu ve chaw teˇ hpaˍ hta‸ nyi hkʼaˇ maˇ suh ve pa taw, Aˍsuˇriˆ chaw hui hkʼaˇ suh gʼa‸ yuˬ kʼai chehˇ ve yoˬ. Nawˬ lehˬ yawˇ hui ve meh maˬ lanˉ hpeh‸ ve yoˬ. Ya‸ hkʼaˇ, yawˇ hui ka‸ nawˬ nyi hkʼaˇ suh tuˬ te laˇ maˇ gʼa.

29Nawˬ lehˬ Baˍbuˍlonˍ chaw hui ve meh maˬ lanˉ htawˇ hpeh‸ ve yoˬ. Yawˇ hui lehˬ tanˇ kaˬ paˍ hpeh‸ leh, yawˇ hui htawˇnawˬ nyi hkʼaˇ suh tuˬ te laˇ maˇ gʼa, teh‸ Gʼuiˬsha kʼoˆ ve yoˬ.

30Gʼuiˬsha chi hkʼe kʼoˆ ve yoˬ. Nawˬ lehˬ ya‸ taw hkawˇ maˇ shiˍ ve meh maˬ lanˉ hkʼe hpeh‸ leh, cha‸ chiˆ ve kanˉ chi hkʼa peu-eˬ hta‸ te taˍ peuˬ.

31Ya‸ kʼaw teˇ caˆ le le awˬ paˇ lo nawˬ lehˬ shaˉ ho‸ hta‸ oˉ kʼoˍ pui kuiˬ laiˉ kaˬ te taˍ leh, meh maˬ lanˉ teˇ hpaˍ hkʼe awˬ baˬ hpawˇ tawˆ-e leh hpu maˇ ca.

32Nawˬ lehˬ a shu yawˇ ve awˬ hpawˇ hta‸ baˬ taˉ leh, awˬ nu ve hawˉ hkʼaˆ paˍ hta‸ haˉ chawˇ ca te ve yaˇ miˇ hkʼe hpeh‸ ve yoˬ.

33Meh maˬ lanˉ lehˬ shu geh awˬ hpfuhˇ yuˬ ve yoˬ. Ya‸ hkʼaˇ, nawˬ lehˬ nawˬ geh hkʼa laˬve chaw hta‸ la‸ shawnˍ piˇ leh, hkʼaˬ hpawˇ chi hpawˇ lo chehˇ ve hawˉ hkʼaˆ paˍ teˇ hpaˍ hta‸ hpu piˇ leh nawˬ geh ca zuh‸ la tcuh ve yoˬ.

34Nawˬ lehˬ anˇ law‸ law‸ ve meh maˬ lanˉ hpeh‸ ve yoˬ. Nawˬ lehˬ awˬ hpfuhˇ maˇ gʼa. Nawˬ yawˇ hui hta‸ awˬ hpfuhˇ kʼaw‸ piˇ ve yoˬ. Nawˬ lehˬ awˬ nu ve meh maˬ lanˉ teˇ hpaˍ hkʼe maˇ heˆ, teh‸ Gʼuiˬsha kʼoˆ ve yoˬ.

35Meh maˬ lanˉ hpeh‸ ve Yeˍruˆsaˍlehnˍ venˇ-oˬ, Gʼuiˬsha kʼoˆchehˇ ve tawˇ hta‸ na sheˍ.

36Gʼuiˬsha chi hkʼe kʼoˆ ve yoˬ. Nawˬ lehˬ veu‸ kʼaˇ kʼehˆ baˬ leh, meh maˬ lanˉ hkʼa shuˍ nawˬ ve awˬ to hawˉ hkʼaˆ paˍ teˇ hpaˍ leh, cha‸ chiˆ ve shaˉ ho‸ teˇ hpaˍ hta‸ chiˇ a‸ piˇ ve yoˬ. Nawˬ ve yaˇ teˇ hpaˍ hta‸ htawˇ tiˇ pehˍ leh, shaˉ ho‸ teˇ hpaˍ hta‸ tuˉ tanˇ piˇ ve yoˬ.

37Nawˬ oˇ hkʼe te ve pa taw, nawˬ ha‸ ve leh nawˬ canˇ ve hawˉ hkʼaˆpaˍ hkʼa peu-eˬ ve hta‸ ngaˬ teˇ geh kuˬ hpoˆ tuˬ yoˬ. Ngaˬ yawˇ hui hta‸ nawˬ paˇ lo hpoˆ laˬ piˇ leh, yawˇ hui mehˆ gʼuˇ suhˍ lo ngaˬ nawˬ ve veu‸ kʼaˇ hta‸ kʼehˆ baˬ maˍ piˇ tuˬ yoˬ.

38Nawˬ haˉ chawˇ te leh chaw hta‸ tiˇ pehˍ ve pa taw, ngaˬ nawˬ hta‸ suhˉ jehˬ leh nyi ma zuhˆ jaˇ ve hkʼaw nawˬ hta‸ tiˇ pehˍ laˇ tuˬ yoˬ.

39Ngaˬ nawˬ hta‸ yawˇ hui ve la‸ sheh hkʼaw chiˇ a‸ piˇ leh, nawˬ haˉ chawˇ te kuiˬ leh shaˉ ho‸ hta‸ oˉ kʼoˍ pui kuiˬ teˇ hpaˍ hta‸ yawˇ hui te luˬ piˇ tuˬ yoˬ. Yawˇ hui lehˬ nawˬ ve veu‸ kʼaˇ leh shehnˉ shiˍ teˇ hpaˍ hta‸ yuˬ kʼai leh, nawˬ hta‸ awˬ kʼu nyi baˬ taˉ laˇ tuˬ yoˬ.

40Yawˇ hui chaw teˇ moˍ shawˍ leh nawˬ hta‸ haˉ pui baˬ pehˍ laˇ peuˬ hkʼaw‸ nawˉ, aˉhtaw yuˬ leh peuˆ nehˆ laˇ tuˬ yoˬ.

41Yawˇ hui lehˬ nawˬ ve yehˬ teˇ hpaˍ hta‸ aˬ miˍ tuˉ baˬ leh, nawˬ ciˍ yanˍ ve gʼa hkanˍ chehˇ ve hta‸, yaˇ miˇ moˍ lonˉ hta‸ hpoˆ nyi taˍ tcuh tuˬ yoˬ. Ngaˬ nawˬ hta‸ meh maˬ lanˉ maˇ kʼaw‸ te tcuh leh, nawˬ geh laˬve hawˉ hkʼaˆ paˍ hta‸ la‸ shawnˍ kʼaw‸ piˇ tcuh tuˬ ve maˇ heˆ.

42Oˇ htaˇ ngaˬ nyi ma zuhˆ ve mehˉ kʼai leh, gawˬ lehˍ kʼaw‸ cawˬ la tuˬ yoˬ. Ngaˬ nyi ma kʼaw‸ zuhˆ tuˬ ve maˇ heˆ.

43Nawˬ a sha‸ i chehˇ sheˍ htaˇ, ngaˬ nawˬ hta‸ hkʼaˬ hkʼe te piˇ taˍ ve teˇ hpaˍ hta‸ nawˬ leunˇ kʼai peuˬ. Nawˬ lehˬ cha‸ chiˆ ve kanˉ hta‸ te leh, ngaˬ hta‸ nyi ma zuhˆ tuˬ te laˇ ve yoˬ. Chi hta‸ pa taw, ngaˬ nawˬ hta‸ oˇ hkʼe hkanˍ tcuh laˇ ve yoˬ. Aˬ hto‸ ma pa taw, nawˬ lehˬ cha‸ chiˆ ve kanˉ oˇ ve teˇ hpaˍ awˬ hkʼoˆ, haˉ chawˇ haˉ paˆ hta‸ htawˇ kʼaw‸ te htehˍ chehˇ sheˍ ve le, teh‸ Gʼuiˬsha kʼoˆ ve yoˬ.

44Gʼuiˬsha kʼoˆ ve, Yeˍruˆsaˍlehnˍ-oˬ, chaw yaˇ teˇ hpaˍ nawˬ hta‸ nyi taˍ leh, Awˬ e hkʼa shuˍ, awˬ yaˇ miˇ hkʼa shuˍ teh‸ kʼoˆ tuˬ yoˬ.

45Nawˬ lehˬ nawˬ e ve yaˇ miˇ awˬ tehˬ awˬ na hpeh‸ ve yoˬ. Yawˇ lehˬ yawˇ ve awˬ hpawˇ leh yawˇ ve yaˇ teˇ hpaˍ hta‸ canˇ jaˇ ve yoˬ. Yawˇ lehˬ a shu yawˇ ve aw hpawˇ leh yaˇ teˇ hpaˍ hta‸ canˇ ve nawˬ viˉ ma hui hkʼe hpeh‸ ve yoˬ. Nawˬ leh nawˬ viˉ ma hui lehˬ nawˬ pa Aˍmawˇriˆ chaw hui ve yaˇ te hpaˍ hpeh‸ ve yoˬ.

46Nawˬ viˉ ma lonˉ lehˬ Saˍmaˍriˆ hpeh‸ leh, yawˇ ve yaˇ teˇ hpaˍ geh teˇ geh awˬ na hpawˇ lo chehˇ taˍ ve yoˬ. Nawˬ nyi ma lehˬ Sawˉdonˍ hpeh‸ leh, yawˇ ve yaˇ teˇ hpaˍ geh teˇ geh awˬ hawˉ hpawˇ lo chehˇ taˍ ve yoˬ.

47Nawˬ ka‸ yawˇ hui ve hkui ha hkʼaˇ suh gʼa‸ leh cha‸ chiˆ ve kanˉ teˇ hpaˍ hta‸ te tuˬ ve laˇ. Awˬ yanˇ teˇ hkui tiˉ awˬ hkʼaw lo, nawˬ lehˬ yawˇ hui a‸ kehˉ cha‸ chiˆ ve kanˉ hta‸ te tawˆ la tuˬ yoˬ.

48Ngaˬ lehˬ te‸ chehˇve Gʼuiˬsha hpeh‸ ve hkʼe, nawˬ nyi ma Sawˉdonˍ lehˬ nawˬ te chehˇ ve cha‸ chiˆ ve kanˉ teˇ hpaˍ hta‸ maˇ te.

49Yawˇ leh yawˇ ve yaˇ miˇ teˇ hpaˍ lehˬ caˇ tuˬ dawˬ tuˬ hkʼa biˇ cawˬ leh, gawˬ lehˍ gʼa chehˇ ve pa taw nyi ma uiˍ chehˇ ve yoˬ. Ya‸ hkʼaˇ, yawˇ hui lehˬ haˍ yaˇ gʼawˇ yaˇ teˇ hpaˍ hta‸ maˇ ga piˇ.

50Yawˇ hui nyi ma uiˍ nyi ma heh leh ngaˬ canˇ ve kanˉ teˇ hpaˍ hta‸ te chehˇ ve yoˬ. Chi hta‸ pa taw, nawˬ shiˍ taˍ peuˬ ve hkʼe ngaˬ yawˇ hui hta‸ te luˬ te sheˆ piˇ ve yoˬ.

51Saˍmaˍriˆ lehˬ nawˬ te chehˇ ve cha chiˆ ve kanˉ teˇ hkoˇ hkʼe ceh ka‸ maˇ gaˬ sheˍ. Nawˬ lehˬ yawˇ a‸ kehˉ cha‸ chiˆ jaˇ ve kanˉ hta‸ te taˍ peuˬ ve yoˬ. Nawˬ te chehˇ ve kanˉ leh yawˇ te chehˇ ve kanˉ hta‸ tehˆ da‸ nyi htaˇ, nawˬ viˉ ma lehˬ te‸ chiˉ venˇbaˆ maˇ cawˬ sheˍ ve hkʼe hpeh‸ ve yoˬ.

52Chi beu‸ nawˬ lehˬ awˬ me‸ awˬ hponˇ luˬ kʼai tuˬ yoˬ. Nawˬ ve venˇbaˆ lehˬ nawˬ viˉ ma ve venˇbaˆ a‸ kehˉ uiˍ jaˇ leh, yawˇ lehˬ te‸ chiˉ venˇbaˆ maˇ cawˬ ve hkʼe hpeh‸ ve yoˬ. Chi beu‸ nawˬ ya‸ taw chehˇ-oˆ. Awˬ lawn kʼo, nawˬ lehˬ nawˬ viˉ ma hta‸ venˇbaˆ maˇ cawˬ ve hkʼe hpeh‸ la piˇ taˍ peuˬ, teh‸ Gʼuiˬsha kʼoˆ ve yoˬ.

53Gʼuiˬsha Yeˍruˆsaˍlehnˍ hta‸ chi hkʼe kʼoˆ piˇ ve yoˬ. Ngaˬ lehˬ Sawˉdonˍ leh Saˍmaˍriˆ hta‸ kʼaw‸ uiˍ la da‸ la piˇ tuˬ yoˬ. Nawˬ hta‸ htawˇ kʼaw‸ uiˍ la da‸ la piˇ tuˬ yoˬ.

54Nawˬ yawˇ hui hta‸ dawˇ sha la tuˬ te piˇ chehˇ ve htawˇ, nawˬ awˬ to hta‸ nawˬ kʼaw‸ ya‸ taw tuˬ yoˬ.

55Yawˇ hui kʼaw‸ uiˍ la da‸ la tuˬ yoˬ. Nawˬ hta‸ htawˇ kʼaw‸ gu te laˇ tuˬ yoˬ.

56Nawˬ te taˍ ve venˇbaˆ hkʼa tawˍ lehˆ maˇ tawˆ la sheˍ gʼuˇ suhˍ, nawˬ lehˬ nyi ma uiˍ ve awˬ hkʼaw lo Sawˉdonˍ hta‸ hkʼa mvuhˇ hkʼa na kʼoˆ ve maˇ heˆ laˇ.

57Chi beu‸ nawˬ lehˬ Sawˉdonˍ hkʼe hpeh‸ la peuˬ. Eˇdonˍ chaw, Hpiˇliˇtiˆ chaw leh nawˬ hta‸ canˇ ve awˬ nu ve chaw teˇ hpaˍ hkʼa mvuhˇ hkʼa na kʼoˆguiˇ tuˬ hpeh‸ la peuˬ.

58Nawˬ te taˍ peuˬ ve cha‸ chiˆ ve kanˉ teˇ hpaˍ awˬ pon nawˬ gʼa hkanˍ tuˬ yoˬ, teh‸ Gʼuiˬsha kʼoˆ ve yoˬ.

59Gʼuiˬsha kʼoˆ ve, Nawˬ lehˬ ngaˬ ve ka ti‸ tawˇ hkawˇ teˇ hpaˍ hta‸ baˬ taˉ ve pa taw, nawˬ hta‸ keunˍ da‸ ve hkʼe ngaˬ kʼaw‸ te hkʼaw‸ laˇ tuˬ yoˬ.

60Ya‸ hkʼaˇ, nawˬ a sha‸ i chehˇ sheˍ htaˇ ka‸, nawˬ hta‸ te piˇ taˍ ve ngaˬ ve ka ti‸ hta‸ ngaˬ taˍ uiˍ leh, co co yeˬ ve ka ti‸ ngaˬ nawˬ hta‸ kʼaw‸ te laˇ tuˬ yoˬ.

61Nawˬ te taˍ peuˬ ve kanˉ hta‸ nawˬ kʼaw‸ dawˇ nawˇ leh, nawˬ viˉ ma nawˬ nyi ma kʼaw‸ gaˬ la htaˇ gʼa ya‸ taw jaˇ tuˬ yoˬ. Ngaˬnawˬ hta‸ ka ti‸ maˇ te piˇ taˍ ve htawˇ, yawˇ hui hta‸ nawˬ ve yaˇ miˇ hkʼe hpeh‸ la piˇ tuˬ yoˬ.

62Ngaˬ nawˬ hta‸ ka ti‸ awˬ suhˉ kʼaw‸ te laˇ tuˬ yoˬ. Oˇ htaˇ, ngaˬ Gʼuiˬsha hpeh‸ ve hta‸ nawˬ shiˍ la tuˬ yoˬ.

63Nawˬ te ya‸ taˍ ve venˇbaˆ hkʼa peu-eˬ ve hta‸ ngaˬ hpehˇ baˬ laˇ tuˬ yoˬ. Ya‸ hkʼaˇ, nawˬ lehˬ venˇbaˆ oˇ ve teˇ hpaˍ hta‸ kʼaw‸ dawˇ nawˇ chehˇ leh, maw‸ kʼaw ngaˉ maˇ gʼa htaˇ hkʼa gaˬ ya‸ taw jaˇ tuˬ yoˬ, teh‸ Gʼuiˬsha kʼoˆ ve yoˬ.