Ezekiel 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Gʼuiˬsha kʼoˆ ve, Chaw yaˇ-oˬ, tcuhˆ jaˇ ve aˉ hte‸ teˇ maˬ yuˬ leh, nawˬ ve paˇ tcuhˆ leh uˉ hkeh mvuh hkʼa peu-eˬ ve hta‸ chiˇ baˬ-o‸. Oˇ hkʼe te peuˬ hkʼaw‸ nawˉ, yaˍ cuˍ hkʼaw keu tsuh leh shehˆ pun pehˬ taˍ-o‸.

2Venˇ hta‸ shu ca bawˆ la peuˬ hkʼaw‸ nawˉ, uˉ hkeh mvuh oˇ ve shehˆ pun teˇ pun ve hta‸ venˇ hkʼaw lo tuˉ baˬ-o‸. Teˇ pun ve hta‸ nawˬ venˇ hkʼaw te toˇ chehˇ htaˇ, aˉ hte‸ yuˬ leh tawˆ cheˆ-oˆ. Cawˬ taˍ sheˍ ve teˇ pun hta‸ mvuhˇ haw hkʼaw baˬ peu-o. Aˉhtaw hta‸ yuˬ leh, uˉ hkeh mvuh oˇ ve teˇ hpaˍ hta‸ ngaˬ gʼa‸ yuˬ tuˬ yoˬ.

3Uˉ hkeh mvuh a ciˉ yuˬ leh, nawˬ ve aˉ po‸ hkʼaw lo htiˆ keu taˍ-o.

4Oˇ ve hta‸ a ciˉ kʼaw‸ yuˬ tawˆ leh aˬ miˍ hkʼaw baˬ keu-o. Aˬ miˍ to‸ baˬ piˇ-oˆ. Oˇ kaˬ lo to‸chehˇ ve aˬ miˍ lehˬ, Iˉsaˍreˍlaˆ mvuhˇmiˬ hkʼaˬ ti chi ti lo to‸ kʼai tuˬ yoˬ, teh‸ ngaˬ hta‸ kʼoˆ laˇ ve yoˬ.

5Gʼuiˬsha kʼoˆ ve, Yeˍruˆsaˍlehnˍ venˇ hta‸ nyi sheˍ. Ngaˬ lehˬ, venˇ oˇ ve hta‸ miˬguiˬ chi ve awˬ kʼaw ji lo teh taˍ ve yoˬ.

6Ya‸ hkʼaˇ, Yeˍruˆsaˍlehnˍ venˇ lehˬ, ngaˬ ve tawˇ hta‸ kʼaw‸ hpfuhˆ leh awˬ nu ve mvuhˇmiˬ teˇ hpaˍ a‸ kehˉ haiˬ jaˇ ve yoˬ. Yeˍruˆsaˍlehnˍ venˇ lehˬ, ngaˬ ve tawˇ hta‸ chiˇ baˬ ve yoˬ.

7Yeˍruˆsaˍlehnˍ venˇ-oˬ, chi beu‸ ngaˬ kʼoˆ chehˇ ve tawˇ hta‸ na sheˍ. Nawˬ lehˬ ngaˬ ve tawˇ hta‸ maˇ na yuˬ ve pa taw, nawˬ awˬ paˇ awˬ kui lo cawˬ ve chaw ceuˬ teˇ hpaˍ a‸ kehˉ leuˉ leh sho‸ sha‸ tuˬ te tawˆ la chehˇ ve yoˬ. Nawˬ lehˬ awˬnu ve chaw ceuˬ teˇ hpaˍ ve awˬ liˇ teˇ hpaˍ hta‸ gʼa‸ te chehˇ ve yoˬ.

8Chi hta‸ pa taw, ngaˬ lehˬ nawˬ ve canˇ paˍ hpeh‸ ve yoˬ, teh‸ nawˬ hta‸ kʼoˆ laˇ chehˇ ve yoˬ. Chaw ceuˬ hkʼa peu-eˬ mawˬ hpeh‸ ve chehˇ kuiˬ lo ngaˬ nawˬ hta‸ suhˉ jehˬ laˇ tuˬ yoˬ.

9Ngaˬ canˇ ve kanˉ teˇ hpaˍ hta‸ nawˬ te ve pa taw, ngaˬ teˇ pawˆ ka‸ maˇ te jaw sheˍ ve ciˍ yanˍ tuˬ nawˬ awˬ hkʼoˆ lo gaˬ la piˇ tuˬ yoˬ. Chi hkʼe ve ciˍ yanˍ tuˬ awˬ hkʼaw‸ nawˉ teˇ pawˆ ka‸ kʼaw‸ cawˬ la tuˬ ve maˇ heˆ.

10Yeˍruˆsaˍlehnˍ venˇ hkʼaw chehˇ ve awˬ pa awˬ e teˇ hpaˍ lehˬ, a shu yawˇ ve yaˇ hta‸ tiˇ caˇ leh, yaˇ teˇ hpaˍ htawˇ a shu yawˇ ve awˬ pa awˬ e hta‸ tiˇ caˇ tuˬ yoˬ. Te‸ chehˇ sheˍ ve chaw hui hta‸ ngaˬ ciˍ yanˍ piˇ leh, hkʼaˬ hpawˇ chi hpawˇ lo hpaˆ da‸ guiˇ da‸ kʼai piˇ lawˬ tuˬ yoˬ.

11Chi hta‸ pa taw, ngaˬ lehˬ te‸ chehˇ ve Gʼuiˬsha hpeh‸ ve hkʼe, cha‸ chiˆ ve kanˉ hta‸ nawˬ te leh ngaˬve bon yehˬ hta‸ cha‸ chiˆ kʼai piˇ lawˬ ve pa taw, ngaˬ nawˬ hta‸ maˇ ha kʼaˉ leh htu baˬ laˇ tuˬ yoˬ.

12Nawˬ ve chaw shehˆ pun teˇ pun lehˬ venˇ hkʼaw lo naˬ gawˬ ve leh meu‸ ve kaˆ ve pa taw gʼa suh-e tuˬ yoˬ. Awˬ nu ve teˇ pun lehˬ, venˇ baˬ lo shu chaw pehˍ ve hta‸ gʼa hkanˍ leh, cawˬ taˍ sheˍ ve teˇ pun hta‸ mvuhˇ haw hkʼaw lo ngaˬ gʼa‸ peu leh, yawˇ hui hkʼaˇ suh aˉhtaw hta‸ ngaˬ gʼa‸ yuˬ tcuh tuˬ yoˬ.

13Ngaˬ nyi hkʼaˇ suh htaˇ hkʼa gaˬ nawˬ lehˬ ngaˬ nyi ma zuhˆ ve teˇ ceuˬ hta‸ gʼa hkanˍ tuˬ yoˬ. Awˬ ceuˬ oˇ ve teˇ hpaˍ hpeh‸ la ve teˇ yanˇ, ngaˬ nawˬ hui hta‸ kʼoˆ laˇ taˍ peuˬ ve hta‸ nawˬ hui shiˍ la tuˬ yoˬ. Awˬ lawn kʼo, nawˬ hui ka ti‸ maˇ yeˬ ve pa taw, ngaˬ nyi ma zuhˆ jaˇ peuˬ ve yoˬ.

14Nawˬ hui ve mvuhˇmiˬ hta‸ hkʼa hpanˍ toˇ ve chaw hkʼa peu-eˬ, nawˬ hui hta‸ maˇ shawˍ maˇ caˆ kʼoˆ leh, nawˬ hui hta‸ vuiˇ kuiˬ lo jaw kʼai tuˬ yoˬ.

15Ngaˬ nawˬ hta‸ nyi ma zuhˆ leh ciˍ yanˍ laˇ ve teˇ yanˇ, nawˬ hui awˬ paˇ awˬ kui lo chehˇ ve chaw hkʼa peu-eˬ kawˆ jaˇ tuˬ yoˬ. Yawˇ hui anˇ leh, nawˬ hui hta‸ hkʼa mvuhˇ hkʼa na kʼoˆ tuˬ yoˬ.

16Nawˬ hui ve caˇ tuˬ dawˬ tuˬhta‸ ngaˬ i kʼai yawnˇ kʼai piˇ leh, nawˬ hui gʼa meu‸ gʼa kaˆ tuˬ yoˬ. Hkaˆ ce juˆ laˇ ve hkʼe, nawˬ hui awˍ meu‸ ve hta‸ gʼa hkanˍ tuˬ yoˬ.

17Meu‸ ve kaˆ ve leh haiˬ ve to nuˇ to shaˆ hta‸ nawˬ hui geh peu laˇ leh, nawˬ hui ve yaˇ teˇ hpaˍ hta‸ tiˇ pehˍ tcuh tuˬ yoˬ. Naˬve gawˬ ve leh sho‸ sha‸ ve awˬ ceuˬ hta‸ nawˬ hui geh peu laˇ leh, nawˬ hui hta‸ tiˇ pehˍ tcuh tuˬ yoˬ, teh‸ Gʼuiˬsha kʼoˆ ve yoˬ.

← Chapter 4 Jump to: Chapter 6 →