Ezekiel 42

Lahu Bible Edited © Thailand Bible Society and Bible Society of Myanmar, 2010, 2020.

← Chapter 41 Jump to: Chapter 43 →

1Oˇ ve hkʼaw‸ nawˉ, chaw oˇ ve ngaˬ hta‸ awˬ baˬ hpawˇ ve koˇ caˉ lo shiˍ kʼai laˇ leh, bon yehˬ awˬ na hpawˇ lo cawˬ ve yehˬ lo shiˍ kʼai laˇ ve yoˬ. Yehˬ oˇ ve lehˬ, bon yehˬ mvuhˇ nyi kʼehˬ hpawˇ lo cawˬ ve yehˬ hta‸ tcuhˇ tcuhˬ maˇ vuiˇ da‸.

2Yehˬ oˇ ve lehˬ, zuhˬ hpawˇ teˇ ha teˇ chi nyiˇ shaw‸ cawˬ leh, kʼehˬ hpawˇ 56 shaw‸ cawˬ ve yoˬ.

3Yehˬ oˇ ve teˇ hpawˇ lehˬ, bon yehˬ paˇ lo cawˬ ve nyiˇ chi nyiˇ shaw‸ kʼehˬ ve chehˇ kuiˬ hta‸ daw‸ taˍ leh, awˬ nu ve teˇ hpawˇ lehˬ, awˬ baˬ hpawˇ ve koˇ caˉ hta‸ daw‸ taˍ ve yoˬ. Yehˬ oˇ ve hta‸ shehˆ htai‸ te taˍ ve yoˬ. Awˬ na ve teˇ htai‸ lehˬ, awˬ hawˉ ve teˇ htai‸ a‸ kehˉ te i piˇ taˍ ve yoˬ.

4Yehˬ oˇ ve awˬ na hpawˇ lo, kʼehˬ hpawˇ teˇ chi shaw‸ cawˬ leh zuhˬ hpawˇ teˇ ha teˇ chi nyiˇ shaw‸ cawˬ ve ya‸ kʼaw teˇ caˆ cawˬ ve yoˬ. Oˇ kaˬ lo yehˬmiˉhpe‸ teˇ hpaˍ cawˬ ve yoˬ.

5Yehˬ oˇ ve awˬ na teˇ bawehˇ lehˬ, awˬ hawˉ ve bawehˇ aˬ kehˉ shaˬ te shaˬ te i kʼai taˍ ve yoˬ. Awˬ lawn kʼo, oˇ ve teˇ hpaˍ hta‸ awˬ hkʼaw‸ nawˉ paˉ lo te jiˆ kʼo‸-e piˇ taˍ ve pa taw yoˬ.

6Chi ve shehˆ htai‸ awˬ hkʼoˆ lo cawˬ ve bawehˇ teˇ hpaˍ lehˬ, awˬ nu ve yehˬ teˇ hpaˍ hkʼa shuˍ, yehˬ hkuiˉ daw hkʼoˆ lo teh taˍ ve maˇ heˆ.

7Awˬ hawˉ teˇ htai‸ lo yehˬ oˇ ve awˬ na hpawˇ ve gʼo‸ pa lehˬ, ngaˇ chi hkaw‸ shaw‸ cawˬ leh, awˬ nu ve ngaˇ chi hkaw‸ shaw‸ awˬ hkʼoˆ lo bawehˇ teˇ hpaˍ cawˬ ve yoˬ.

8Awˬ na ve teˇ htai‸ lo bawehˇ teˇ hpaˍ cawˬ ve yoˬ.

9Bon yehˬ mvuhˇ nyi tawˆ hpawˇ lo cawˬ ve bawehˇ oˇ ve nyiˇ maˬ awˬ hawˉ lo, awˬ baˬ hpawˇ ve koˇ caˉ lo tawˆ-e tuˬ ve yehˬmiˉhpe‸ teˇ maˬ cawˬ ve yoˬ.

10Bon yehˬ awˬ hawˉ hpawˇ, mvuhˇ nyi kʼehˬ hpawˇ lo cawˬ ve yehˬ hta‸ tcuhˇ tcuhˬ maˇ vuiˇ da‸ kuiˬ lo, yehˬ teˇ maˬ kʼaw‸ te taˍ ve yoˬ.

11Bawehˇ teˇ hpaˍ awˬ gʼuˇ suhˍ lo, awˬ na hpawˇ lo hkʼa shuˍ ve ya‸ kʼaw teˇ maˬ cawˬ ve yoˬ. Zuhˬ ve kʼehˬ ve, leh yehˬmiˉhpe‸ teˇ hpaˍ htawˇ hkʼa shuˍ hpeh‸ ve yoˬ.

12Yehˬ oˇ ve awˬ hawˉ paˉ hpawˇ lo cawˬ ve bawehˇ awˬ hawˉ lo, yehˬ miˉ teˇ maˬ cawˬ ve yoˬ. Oˇ ve lehˬ, gʼo‸ pa tanˬ cawˬ kuiˬ mvuhˇ nyi tawˆ hpawˇ teˇ ceˍ lo hpeh‸ ve yoˬ.

13Chaw oˇ ve ngaˬ hta‸ chi hkʼe kʼoˆ laˇ ve yoˬ. Yehˬ chi ve nyiˇ maˬ maˬ da‸ kehˬ ve yoˬ. Yehˬ chi teˇ hpaˍ hkʼaw lo, Gʼuiˬsha mehˆ gʼuˇ suhˍ lo‸-e ve paw hkuˇ teˇ hpaˍ, da‸ kehˬ jaˇ ve caˇ tuˬ hta‸ caˇ ve yoˬ. Bawehˇ chi teˇ hpaˍ da‸ kehˬ jaˇ ve pa taw, paw hkuˇ teˇ hpaˍ lehˬ, da‸ kehˬ jaˇ ve tanˇ tuˬ chi teˇ hpaˍ oˇ kaˬ lo teh taˍ ve yoˬ. Awˬ shiˍ awˬ nu tanˇ tuˬ, venˇbaˆ hpehˇ ve tanˇ tuˬ, leh kʼaw‸ hkʼaw‸ piˇ ve tanˇ tuˬ chi teˇ hpaˍ oˇ kaˬ lo gʼa teh taˍ ve yoˬ.

14Paw hkuˇ teˇ hpaˍ bon yehˬ hkʼaw gaˬ taˍ peuˬ leh, awˬ baˬ hpawˇ ve koˇ caˉ lo kʼai gaˇ ve teˇ yanˇ, yawˇ hui Gʼuiˬsha ve kanˉ te chehˇ htaˇ veu‸ deh taˍ ve da‸ kehˬ ve veu‸ kʼaˇ hta‸ bawehˇ oˇ ve teˇ hpaˍ hkʼaw gʼa kʼehˆ teh taˉ ve yoˬ. Yawˇ hui lehˬ, chaw moˍ lonˉ hpawnˬ da‸ kuiˬ lo maˇ tawˆ kʼai sheˍ gʼuˇ suhˍ, awˬ nu ve veu‸ kʼaˇ hta‸ gʼa veu‸ kʼai ve yoˬ, teh‸ ngaˬ hta‸ kʼoˆ laˇ ve yoˬ.

15Chaw oˇ ve lehˬ, bon yehˬ hta‸ tehˆ nyi peuˬ ve teˇ yanˇ, yawˇ ngaˬ hta‸ mvuhˇ nyi tawˆ hpawˇ ve taˍ meu‸ hpe‸ hkʼaw shiˍ tawˆ-e laˇ leh, awˬ baˬ hpawˇ ve chehˇ kuiˬ hta‸ kʼaw‸ tehˆ nyi ve yoˬ.

16Yawˇ lehˬ, tehˆ nyi tuˬ ve suhˆ taˍ hta‸ yuˬ leh, mvuhˇ nyi tawˆ hpawˇ lo cawˬ ve chehˇ kuiˬ hta‸ tehˆ nyi ve yoˬ. Oˇ ve lehˬ, ngaˇ ha hkaw‸ chi shaw‸ cawˬ ve yoˬ.

17Oˇ ve hkʼaw‸ nawˉ, yawˇ lehˬ aw na hpawˇ, awˬ hawˉ hpawˇ, leh mvuhˇ nyi kʼehˬ hpawˇ lo cawˬ ve chehˇ kuiˬ teˇ hpaˍ hta‸ kʼaw‸ tehˆ nyi ve yoˬ. Hkʼa peu-eˬ ka‸ hkʼa shuˍ hpeh‸ leh, shaw‸ cawˬ ve yoˬ.

20Teˇ hpawˇ le le lo, ngaˇ ha hkaw‸ chi shaw‸ zuh‸ ve gʼo‸ pa ko taˍ ve yoˬ. Gʼo‸ pa oˇ ve lehˬ, da‸kehˬ ve leh maˇ da‸ kehˬ ve awˬ ceuˬ hta‸ tawˍ cheˆ piˇ taˍ ve yoˬ.

← Chapter 41 Jump to: Chapter 43 →