Ezekiel 40

Lahu Bible Edited © Thailand Bible Society and Bible Society of Myanmar, 2010, 2020.

1Yeˍruˆsaˍlehnˍ hta‸ shu bawˆ yuˬ kʼai ve teˇ chi awˇ hkʼaw‸ teˇ hkʼaw‸, leh ngaˬ hui shu mvuhˇmiˬ lo chehˇ taˍ ve nyiˇ chi ngaˇ hkʼaw‸ teˇ hkʼaw‸, hkʼaw‸ suhˉ ha pa teˇ chi nyi htaˇ, Gʼuiˬsha ve kanˇ paˆ ngaˬ geh chehˇ taˍ ve hta‸ ngaˬ jawˬ leh, Yawˇ ngaˬ hta‸ shiˍ kʼai laˇ ve yoˬ.

2Awˬ ha hkʼaw lo, Gʼuiˬsha ngaˬ hta‸ Iˉsaˍreˍlaˆ mvuhˇmiˬ lo shiˍ kʼai laˇ leh, mvuh jaˇ ve hkʼaw teˇ shiˍ awˬ hkʼoˆ lo teh taˍ laˇ ve yoˬ. Ngaˬ mehˆ gʼuˇ suhˍ lo, venˇ hta‸ shuˍ ve yehˬ lonˉ teˇ hpaˍ cawˬ taˍ ve hta‸ ngaˬ gʼa mawˬ ve yoˬ.

3Yawˇ ngaˬ hta‸ Yawˇ awˬ paˇ neˇ lo kuˬ yuˬ laˇ leh, kuiˇ hkʼa shuˍ awˬ gʼeuˆ ba chehˇ ve chaw teˇ gʼaˇ hta‸ ngaˬ gʼa mawˬ ve yoˬ. Yawˇ lehˬ, tehˆ nyi tuˬ ve aˉ caˆ hkeh teˇ caˆ leh iˉ du taˬ teˇ maˬ yuˬ taˍ leh, yehˬmiˉhpe‸ paˇ lo huˉ chehˇ taˍ ve yoˬ.

4Yawˇ ngaˬ hta‸ kʼoˆ laˇ ve, Chaw yaˇ-oˬ, hkʼa deh‸ nyi taˍ-o‸. Ngaˬ nawˬ hta‸ maˍ laˇ tuˬ ve awˬ ceuˬ hkʼa peu-eˬ ve hta‸ hkʼa deh‸ nyi leh tawnˇ taˍ-o‸. Awˬ lawn kʼo, chi hkʼe te tuˬ nawˬ hta‸ choˬ kaˬ lo shiˍ veuˬ laˇ taˍ ve yoˬ. Nawˬ gʼa mawˬ ve awˬ ceuˬ hkʼa peu-eˬ, Iˉsaˍreˍlaˆ chaw hui hta‸ gʼa kʼaw‸ kʼoˆ maˍ piˇ tuˬ yoˬ, teh‸ ngaˬ hta‸ kʼoˆ laˇ ve yoˬ.

5Ngaˬ gʼa mawˬ ve oˇ ve lehˬ, bon yehˬ lonˉ hpeh‸ leh, oˇ ve hta‸ hkʼa caw zuhˇ lo gʼo‸ pa caw ko taˍ ve yoˬ. Chaw oˇ ve lehˬ, hkaw‸ shaw‸ cawˬ ve yawˇ ve tehˆ nyi tuˬ hta‸ yuˬ leh, gʼo‸ pa oˇ ve hta‸ tehˆ nyi ve yoˬ. Gʼo‸ pa oˇ ve hkaw‸ shaw‸ mvuh leh hkaw‸ shaw‸ kʼehˬ ve yoˬ.

6Oˇ hkʼe te peuˬ hkʼaw‸ nawˉ, yawˇ lehˬ mvuhˇ nyi tawˆ hpawˇ lo cawˬ ve taˍ meu‸ hpe‸ lo kʼai ve yoˬ. Yawˇ lehˬ go hkʼeh‸ teˇ hpaˍ hkʼoˆ taˆ-e leh, lo‸-e kuiˬ hta‸ tehˆ nyi ve yoˬ. Oˇ ve lehˬ, hkaw‸ shaw‸ kʼehˬ ve yoˬ.

7Oˇ ve awˬ nu paˉ hpawˇ lo ya‸ kʼaw teˇ maˬ cawˬ leh, ya‸ kʼaw oˇ ve choˬ paˉ oˇ paˇ hpawˇ lo shaw shehˍ hpaˇ hui ve bawehˇ teˇ paˉ shehˆ bawehˇ cawˬ ve yoˬ. Awˬ bawehˇ oˇ ve teˇ maˬ ve hkaw‸ shaw‸ hkʼa shuˍ hpeh‸ leh, awˬ bawehˇ teˇ maˬ leh teˇ maˬ awˬ kaˍ lo ko taˍ ve gʼo‸ pa lehˬ, ngaˇ shaw‸ cawˬ ve yoˬ. Shaw shehˍ hpaˇ hui ve bawehˇ teˇ hpaˍ awˬ nu paˉ lo, hkaw‸ shaw‸ zuhˬ ve ya‸ kʼaw teˇ maˬ cawˬ ve yoˬ. Ya‸ kʼaw‸ oˇ ve lehˬ, bon yehˬ lonˉ hta‸ mehˆ hpfuhˇ tawˍ da‸ chehˇ ve bawehˇ lonˉ lo kʼai ve ya‸ kʼaw hpeh‸ ve yoˬ.

8Yawˇ lehˬ bawehˇ lonˉ oˇ ve hta‸ tehˆ nyi leh, hiˉ shaw‸ cawˬ ve hta‸ gʼa mawˬ ve yoˬ.

9Bon yehˬ awˬ paˇ neˇ lo cawˬ ve yehˬmiˉhpe‸ teˇ ceˍ leh, gʼo‸ pa hta‸ daw‸ taˍ ve awˬ nu ve yehˬmiˉhpe‸ teˇ ceˍ lo hkʼa gaˬ nyiˇ shaw‸ cawˬ ve yoˬ.

10(Ya‸ kʼaw choˬ hpawˇ oˇ hpawˇ lo cawˬ ve shaw shehˍ hpaˇ hui ve bawehˇ teˇ hpaˍ lehˬ, hkʼa shuˍ hpeh‸ leh bawehˇ oˇ ve teˇmaˬ leh teˇ maˬ awˬ kaˍ lo cawˬ ve gʼo‸ pa teˇ hpaˍ htawˇ hkʼa shuˍ hpeh‸ ve yoˬ.)

11Oˇ ve hkʼaw‸ nawˉ, chaw oˇ ve lehˬ yehˬmiˉhpe‸ hkʼaw cawˬ ve ya‸ kʼaw oˇ ve hta‸ tehˆ nyi leh, nyiˇ chi shaw‸ kʼehˬ ve hta‸ gʼa mawˬ ve yoˬ. Yehˬmiˉhpe‸ teˇ maˬ leh teˇ maˬ awˬ kaˍ lo hiˉ shaw‸ cawˬve yoˬ.

12Shaw shehˍ hpaˇ hui ve bawehˇ oˇ ve teˇ hpaˍ gʼuˇ suhˍ lo, mvuh ve hpawˇ teˇ shaw‸ leh htu ve hpawˇ teˇ shaw‸ cawˬ ve gʼo‸ pa ko taˍ ve yoˬ.(Bawehˇ oˇ ve teˇ hpaˍ lehˬ, hkaw‸ shaw‸ hkʼa shuˍ hpeh‸ ve yoˬ.)

13Oˇ ve hkʼaw‸ nawˉ, yawˇ lehˬ bawehˇ oˇ ve choˬ hpawˇ teˇ ceˍ hta‸ te leh ya‸ kʼaw oˇ paˉ hpawˇ ve bawehˇ teˇ ceˍ lo hkʼa gaˬ ve hta‸ tehˆ nyi leh nyiˇ chi hiˉ shaw‸ cawˬ ve hta‸ gʼa mawˬ ve yoˬ.

14Bawehˇ oˇ ve awˬ leh meuˇ hpawˇ lo lehˬ, aˉ kʼa‸ lo tawˆ-e kuiˬ hta‸ caˉ da‸ taˍ ve yoˬ. Yawˇ bawehˇ oˇ ve hta‸ tehˆ nyi leh nyiˇ chi nyiˇ shaw‸ kʼehˬ ve hta‸ gʼa mawˬve yoˬ.

15Ko taˍ ve gʼo‸ pa choˬ hpawˇ teˇ ceˍ lo te leh, oˇ hpawˇ lo cawˬ ve bawehˇ awˬ ceˍ hkʼa gaˬ, awˬ kaˍ lo cawˬ ve ya‸ kʼaw lehˬ ngaˇ chi hkaw‸ shaw‸ cawˬ ve yoˬ.

16Bawehˇ oˇ ve teˇ hpaˍ awˬ baˬ hpawˇ lo ko taˍ ve gʼo‸ pa leh, awˬ hkʼaw hpawˇ lo ko taˍ ve gʼo‸ pa teˇ hpaˍ awˬ hkʼaw lo, yehˬmiˉhpe‸ ehˉ teˇ hpaˍ cawˬ ve yoˬ. Ya‸ kʼaw paˇ lo cawˬ ve gʼo‸ pa teˇ hpaˍ awˬ hkʼoˆ lo, tcuhˉ pui cehˬ awˬ han teˇ hpaˍ htawˆ keu taˍ ve yoˬ.

17Chaw oˇ ve lehˬ, ngaˬ hta‸ awˬ baˬ hpawˇ ve koˇ caˉ lo shiˍkʼai laˇ ve yoˬ. Oˇ kaˬ lo awˬ baˬ hpawˇ ve gʼo‸ pa hta‸ te tcuhˉ naw‸ piˇ taˍ ve bawehˇ ehˉ shehˆ chi maˬ cawˬ ve yoˬ. Oˇ ve teˇ hpaˍ awˬ gʼuˇ suhˍ lo haˉ pui hkʼawˇ taˍ ve chehˇ kuiˬ teˇ kaˬ cawˬ ve yoˬ.

18Haˉ pui hkʼawˇ taˍ ve oˇ ve lehˬ, koˇ caˉ hkʼa caw zuhˇ lo cawˬ taˍ ve yoˬ. Awˬ baˬ hpawˇ ve koˇ caˉ chi ve lehˬ, awˬ hkʼaw hpawˇ ve koˇ caˉ a‸ kehˉ a ciˉ nehˬ ve yoˬ.

19A ciˉ mvuh kuiˬ teˇ kaˬ lo, awˬ hkʼaw hpawˇ ve koˇ caˉ hkʼaw lo‸-e tuˬ ve yehˬmiˉhpe‸ teˇ maˬ cawˬ ve yoˬ. Chaw oˇ ve lehˬ, yehˬmiˉhpe‸ oˇ ve nyiˇ maˬ awˬ kaˍ lo cawˬ ve chehˇ kuiˬ hta‸ tehˆ nyi leh, teˇ ha teˇ chi nyiˇ shaw‸ cawˬ ve hta‸ gʼa mawˬ ve yoˬ.

20Oˇ ve hkʼaw‸ nawˉ, chaw oˇ ve lehˬ awˬ baˬ hpawˇ ve koˇ caˉ lo tawˆ-e ve awˬ na hpawˇ lo cawˬ ve taˍ meu‸ hpe‸ hta‸ tehˆ nyi ve yoˬ.

21Ya‸ kʼaw choˬ paˉ oˇ paˉ hpawˇ lo cawˬ ve bawehˇ shehˆ maˬ, bawehˇ oˇ ve teˇ hpaˍ awˬ kaˍ lo cawˬ ve gʼo‸ pa, leh bawehˇ lonˉ oˇ ve leh mvuhˇ nyi tawˆ hpawˇ taˍ meu‸ hpe‸ lo cawˬ ve bawehˇ teˇ hpaˍ hkʼa shuˍ hpeh‸ ve yoˬ. Taˍ meu‸ hpe‸ oˇ ve zuhˬ hpawˇ ngaˇ chi hkaw‸ shaw‸ cawˬ leh, kʼehˬ hpawˇ nyiˇ chi hiˉ shaw‸ cawˬ ve yoˬ.

22Bawehˇ lonˉ, yehˬ miˉ ehˉ leh tcuhˉ pui cehˬ awˬ han htawˆ keu taˍ ve teˇ hpaˍ lehˬ, mvuhˇ nyi tawˆ hpawˇ taˍ meu‸ hpe‸ lo cawˬ ve hkʼa shuˍ hpeh‸ ve yoˬ. Taˍ meu‸ hpe‸ lo taˆ-e tuˬ ve go hkʼeh‸ suhˍ maˬ cawˬ leh, bawehˇ lonˉ leh awˬ na hpawˇ ve koˇ caˉ paˇ lo cawˬ ve yoˬ.

23Mvuhˇ nyi tawˆ hpawˇ ve taˍ meu‸ hpe‸ hkʼa shuˍ awˬ na hpawˇ lo cawˬ ve koˇ caˉ chi ve hta‸ te leh, awˬ hkʼaw hpawˇ ve koˇ caˉ lo kʼai tuˬ ve ya‸ kʼaw teˇ maˬ cawˬ ve yoˬ. Chaw oˇ ve lehˬ, yehˬmiˉhpe‸ oˇ ve nyiˇ maˬ awˬ kaˍ lo cawˬ ve chehˇ kuiˬ hta‸ tehˆ nyi leh, teˇ ha teˇ chi nyiˇ shaw‸ cawˬ ve hta‸ gʼa mawˬ ve yoˬ.

24Oˇ ve hkʼaw‸ nawˉ, chaw oˇ ve ngaˬ hta‸ awˬ hawˉ hpawˇ lo kʼaw‸ shiˍ kʼai laˇ leh, oˇ kaˬ lo awˬ nu ve taˍ meu‸ hpe‸ teˇ maˬ hta‸ gʼa kʼaw‸mawˬ ve yoˬ. Yawˇ lehˬ taˍ meu‸ hpe‸ oˇ ve hta‸ tehˆ nyi leh, oˇ ve htawˇ awˬ nu ve taˍ meu‸ hpe‸ teˇ hpaˍ hkʼa shuˍ hpeh‸ ve yoˬ.

25Awˬ nu ve teˇ hpaˍ hkʼa shuˍ, yehˬmiˉhpe‸ chi hkʼaw ve bawehˇ teˇ hpaˍ htawˇ, yehˬ miˉ ehˉ teˇ hpaˍ cawˬ taˍ ve yoˬ. Taˍ meu‸ hpe‸ oˇ ve lehˬ zuhˬ hpawˇ ngaˇ chi hkaw‸ shaw‸ cawˬ leh kʼehˬ hpawˇ nyiˇ chi hiˉ shaw‸ cawˬ ve yoˬ.

26Oˇ kaˬ lo go hkʼeh‸ suhˍ maˬ cawˬ leh, bawehˇ lonˉ lehˬ awˬ baˬ hpawˇ ve koˇ caˉ paˇ lo cawˬ ve yoˬ. Ya‸ kʼaw paˇ lo cawˬ ve gʼo‸ pa teˇ hpaˍ awˬ hkʼoˆ lo, tcuhˉ pui cehˬ awˬ han teˇ hpaˍ htawˆ keu taˍ ve yoˬ.

27Oˇ kaˬ lo htawˇ, awˬ hkʼaw hpawˇ ve koˇ caˉ lo kʼai tuˬ ve ya‸ kʼaw teˇ maˬ cawˬ ve yoˬ. Chaw oˇ ve lehˬ, ya‸ kʼaw chi ve lo hkʼa gaˬ tehˆ nyi leh, teˇ ha teˇ chi nyiˇ shaw‸ cawˬ ve yoˬ.

28Chaw oˇ ve lehˬ, awˬ hawˉ hpawˇ ve taˍ meu‸ hpe‸ lo te leh, ngaˬ hta‸ awˬ hkʼaw hpawˇ ve koˇ caˉ lo shiˍ kʼai laˇ ve yoˬ. Yawˇ ya‸ kʼaw oˇ ve hta‸ tehˆ nyi leh, awˬ baˬ hpawˇ ve gʼo‸ pa lo cawˬ ve ya‸ kʼaw teˇ hpaˍ hkʼa shuˍ hpeh‸ ve yoˬ.

29Shaw shehˍ hpaˇ hui ve bawehˇ teˇ hpaˍ, bawehˇ lonˉ, leh awˬ hkʼaw hpawˇ ve gʼo‸ pa teˇ hpaˍ lehˬ, awˬ nu ve taˍ meu‸ hpe‸ hkʼaw cawˬ ve bawehˇ teˇ hpaˍ hkʼa shuˍ hpeh‸ ve yoˬ.

30Taˍ meu‸ hpe‸ chi hkʼaw cawˬ ve bawehˇ teˇ hpaˍ hkʼaw lo htawˇ, yehˬ miˉ ehˉ teˇ hpaˍ cawˬ ve yoˬ. Taˍ meu‸ hpe‸ chi ve zuhˬ hpawˇ ngaˇ chi hkaw‸ shaw‸ cawˬ leh, kʼehˬ hpawˇ nyiˇ chi hiˉ shaw‸ cawˬ ve yoˬ.

31Bawehˇ lonˉ oˇ ve lehˬ, awˬ naˬ hpawˇ ve koˇ caˉ paˇ lo cawˬ leh, ya‸ kʼaw choˬ paˉoˇ paˉ hpawˇ ve gʼo‸ pa teˇ hpaˍ awˬ hkoˆ lo, tcuhˉ pui cehˬ awˬ han htawˆ keu taˍ ve yoˬ. Taˍ meu‸ hpe‸ chi ve hkʼaw go hkʼeh‸ 8 hkʼeh‸ cawˬ ve yoˬ.

32Chaw oˇ ve lehˬ, mvuhˇ nyi tawˆ hpawˇ ve taˍ meu‸ hpe‸ lo te leh, ngaˬ hta‸ awˬ hkʼaw hpawˇ ve koˇ caˉ lo shiˍ kʼai laˇ ve yoˬ. Yawˇ ya‸ kʼaw oˇ ve hta‸ tehˆ nyi leh, awˬ nu ve teˇ hpaˍ hkʼa shuˍ hpeh‸ ve yoˬ.

33Oˇ kaˬ lo cawˬ ve shaw shehˍ hpaˇ hui ve bawehˇ teˇ hpaˍ, bawehˇ lonˉ, leh awˬ hkʼaw hpawˇ ve gʼo‸ pa teˇ hpaˍ lehˬ, awˬ nu ve taˍ meu‸ hpe‸ teˇ hpaˍ hkʼaw cawˬ ve bawehˇ teˇ hpaˍ hkʼa shuˍ hpeh‸ ve yoˬ. Teˇ hpawˇ le le lo yehˬmiˉ ehˉ teˇ hpaˍ cawˬ leh, bawehˇ lonˉ oˇ ve hkʼaw lo htawˇ cawˬ ve yoˬ. Taˍ meu‸ hpe‸ oˇ ve zuhˬ hpawˇ ngaˇ chi hkaw‸ shaw‸ cawˬ leh kʼehˬ hpawˇ nyiˇ chi hiˉ shaw‸ cawˬ ve yoˬ.

34Bawehˇ lonˉ oˇ ve lehˬ awˬ baˬ hpawˇ ve koˇ caˉ paˇ lo cawˬ leh, ya‸ kʼaw choˬ paˉ oˇ paˉ hpawˇ ve gʼo‸ pa teˇ hpaˍ awˬ hkʼoˆ lo, tcuhˉ pui cehˬ awˬ han htawˆ keu taˍ ve yoˬ. Taˍ meu‸ hpe‸ chi ve hkʼaw go hkʼeh‸ 8 hkʼeh‸ cawˬ ve yoˬ.

35Oˇ ve hkʼaw‸ nawˉ, chaw oˇ ve ngaˬ hta‸ awˬ na hpawˇ ve taˍ meu‸ hpe‸ lo shiˍ kʼai laˇ ve yoˬ. Yawˇ ya‸ kʼaw oˇ ve hta‸ tehˆ nyi leh, awˬ nu ve teˇ hpaˍ hkʼa shuˍ hpeh‸ ve yoˬ.

36Oˇ kaˬ lo htawˇ, awˬ nu ve taˍ meu‸ hpe‸ teˇ hpaˍ hkʼa shuˍ, shaw shehˍ hpaˇ hui ve bawehˇ teˇ hpaˍ, awˬ hkiˇ shawˍ taˍve awˬ hkʼaw hpawˇ ve gʼo‸ pa teˇ hpaˍ, bawehˇ lonˉ, leh teˇ hpawˇ le le lo yehˬ miˉ ehˉ teˇ hpaˍ cawˬ ve yoˬ. Taˍ meu‸ hpe‸ oˇ ve lehˬ zuhˬ hpawˇ ngaˇ chi hkaw‸ shaw‸, leh kʼehˬ hpawˇ nyiˇ chi hiˉ shaw‸ cawˬ ve yoˬ.

37Bawehˇ lonˉ oˇ ve lehˬ, awˬ baˬ hpawˇ ve koˇ caˉ paˇ lo cawˬ leh, ya‸ kʼaw choˬ paˉ oˇ paˇ hpawˇ ve gʼo‸ pa teˇ hpaˍ awˬ hkʼoˆ lo tcuhˉ pui cehˬ awˬ han htawˆ keu taˍ ve yoˬ. Taˍ meu‸ hpe‸ chi ve hkʼaw go hkʼeh‸ hiˉ hkʼeh‸ cawˬ ve yoˬ.

38Awˬ na hpawˇ ve koˇ caˉ lo, awˬ bawehˇ teˇ maˬ kʼaw‸ te caˉ taˍ leh, yehˬmiˉhpe‸ lehˬ bawehˇ lonˉ hpawˇ lo htaw pawnˍ taˍ ve yoˬ. Oˇ kaˬ lo yawˇ hui tuˉ tanˇ piˇ tuˬ ve to nuˇ to shaˆ teˇ hpaˍ ve awˬ shaˍ hta‸ tsuhˇ baˬ ve yoˬ.

39Bawehˇ lonˉ oˇ ve hkʼaw hpui lawˇ awˇ maˬ cawˬ leh, teˇ hpawˇ nyiˇ maˬ teh taˍ ve yoˬ. Hpui lawˇ chi teˇ hpaˍ awˬ hkʼoˆ lo, yawˇ hui lehˬ tuˉ tanˇ piˇ tuˬ, venˇbaˆ hpehˇ ve tuˉ tanˇ tuˬ, leh kʼaw‸ hkʼaw‸ piˇ ve tuˉ tanˇ tuˬ chi teˇ hpaˍ awˬ pon yuˬ laˬ ve to nuˇ to shaˆ teˇ hpaˍ ve awˬ shaˍ teh taˍ ve yoˬ.

40Bawehˇ chi ve awˬ baˬ hpawˇ lo, oˇ ve hta‸ shuˍ ve hpui lawˇ awˇ maˬ cawˬ leh, awˬ na hpawˇ ve taˍ meu‸ hpe‸ choˬ paˉ coˇ paˉ teˇ hpawˇ nyiˇ maˬ teh taˍ ve yoˬ.

41Tuˉ tanˇ piˇ tuˬ yuˬ laˬ ve shaˍ teˇ hpaˍ teh taˍ tuˬ, oˇ kaˬ lo hpui lawˇ hiˉ maˬ cawˬ ve yoˬ. Bawehˇ hkʼaw awˇ maˬ leh, bawehˇ awˬ baˬ hpawˇ koˇ caˉ lo awˇ maˬ cawˬ ve yoˬ.

42To nuˇ to shaˆ teˇ hpaˍ hta‸ tuˉ tanˇ piˇ tuˬ gu ve awˬ bawehˇ oˇ ve hkʼaw teh taˍ ve hpui lawˇ awˇ maˬ lehˬ, hkʼa deh‸ htawˆ taˍ ve haˉ pui shiˍ yuˬ te taˍ ve yoˬ. Hpui lawˇ oˇ ve teˇmaˬ le le mvuh hpawˇ teˇ shaw‸ teˇ htu, kʼehˬ hpawˇ nyiˇ shaw‸ cawˬ ve yoˬ. To nuˇ to shaˆ teˇ hpaˍ hta‸ tiˇ pehˍ htaˇ yehˇ ve awˬ hkʼeun hkʼa peu-eˬ ve hta‸ hpui lawˇ oˇ ve teˇ hpaˍ awˬ hkʼoˆ lo teh taˍ ve yoˬ.

43Hpui lawˇ oˇ ve teˇ hpaˍ awˬ meuˇ hkʼa caw zuhˇ lo, la‸ taw kʼaw teˇ paˉ fe cawˬ ve awˬ hkʼaˇ te taˍ ve yoˬ. Tuˉ tanˇ piˇ tuˬ ve shaˍ hkʼa peu-eˬ hpui lawˇ oˇ ve teˇ hpaˍ awˬ hkʼoˆ lo teh taˍ ve yoˬ.

44Oˇ ve hkʼaw‸ nawˉ, yawˇ ngaˬ hta‸ awˬ hkʼaw hpawˇ ve koˇ caˉ lo shiˍ kʼai laˇ ve yoˬ. Oˇ kaˬ lo bawehˇ nyiˇ maˬ cawˬ ve yoˬ. Bawehˇ teˇ maˬ ve yehˬ miˉ lehˬ, awˬ na hpawˇ ve taˍ meu‸ hpe‸ paˇ lo cawˬ leh, awˬ hawˉ hpawˇ lo htaw pawnˍ taˍ ve yoˬ. Awˬ nu ve teˇ bawehˇ ve yehˬ miˉ lehˬ, awˬ na hpawˇ lo htaw pawnˍ taˍ ve yoˬ.

45Awˬ hawˉ hpawˇ lo yehˬ miˉ htaw pawnˍ taˍ ve bawehˇ oˇ ve lehˬ, bon yehˬ hkʼaw kanˉ te chehˇ ve paw hkuˇ teˇ hpaˍ awˬ pon hpeh‸ leh,

46awˬ na hpawˇ lo yehˬ miˉ htaw pawnˍ taˍ ve bawehˇ oˇ ve lehˬ tuˉ tanˇ kuiˬ lo kanˉ te chehˇ ve paw hkuˇ teˇ hpaˍ awˬ pon hpeh‸ ve yoˬ, teh‸ chaw oˇ ve ngaˬ hta‸ kʼoˆ laˇ ve yoˬ. Paw hkuˇ oˇ ve hkʼa peu-eˬ lehˬ, Zaˍdoˆ ve awˬ ceuˬ awˬ hkʼaˇ teˇ hpaˍ hpeh‸ ve yoˬ. Yawˇ hui lehˬ, Leˍviˆ awˬ ceuˬ awˬ hkʼaˇ awˬ hkʼaw lo, Gʼuiˬsha mehˆ gʼuˇ suhˍ lo‸-e leh kanˉ te tuˬ a hkaw-anˬ gʼa taˍ ve chaw teˇ hpaˍ hpeh‸ ve yoˬ.

47Chaw oˇ ve lehˬ, awˬ hkʼaw hpawˇ ve koˇ caˉ hta‸ tehˆ nyi leh, teˇ ha teˇ chi nyiˇ shaw‸ hkʼa shuˍ hpeh‸ ve yoˬ. Bon yehˬ lonˉ lehˬ mvuhˇ nyi kʼehˬ hpawˇ lo cawˬ leh, oˇ ve awˬ gʼuˇ suhˍ lo tuˉ tanˇ kuiˬ cawˬ ve yoˬ.

48Oˇ ve hkʼaw‸ nawˉ, yawˇ ngaˬ hta‸ bon yehˬ hkʼaw lo‸-e ve bawehˇ hkʼaw shiˍ kʼai laˇ ve yoˬ. Yawˇ lehˬ, bon yehˬ hkʼaw lo‸-e kuiˬ hta‸ tehˆ nyi leh, mvuh hpawˇ hkaw‸ shaw‸, kʼehˬ hpawˇ teˇ chi hkaw‸ shaw‸, leh gʼo‸ pa lehˬ shehˆ shaw‸ htu ve yoˬ.

49Bawehˇ hkʼaw lo‸-e kuiˬ oˇ ve hta‸ go tcuhˉ taˍ leh, go oˇ ve kʼehˬ hpawˇ nyiˇ chi nyiˇ shaw‸ cawˬ leh, mvuh hpawˇ teˇ chi shehˆ shaw‸ cawˬ ve yoˬ. Lo‸-e kuiˬ choˬ paˉ oˇ paˉ hpawˇ lo yehˬ hkuiˉ daw lonˉ teˇ paˉ teˇ maˬ cawˬ ve yoˬ.

← Chapter 39 Jump to: Chapter 41 →