Ezekiel 41

Lahu Bible Edited © Thailand Bible Society and Bible Society of Myanmar, 2010, 2020.

← Chapter 40 Jump to: Chapter 42 →

1Oˇ ve hkʼaw‸ nawˉ, chaw oˇ ve ngaˬ hta‸ da‸ kehˬ ve bawehˇ hkʼaw shiˍ kʼai laˇ ve yoˬ. Yawˇ lehˬ bawehˇ oˇ ve hkʼaw lo‸-e ve ya‸ kʼaw hta‸ tehˆ nyi leh, mvuhˇ hpawˇ hkaw‸ shaw‸,

2kʼehˬ hpawˇ teˇ chi nyiˇ shaw‸ leh gʼo‸ pa lehˬ ngaˇ shaw‸ htu ve yoˬ. Yawˇ lehˬ bawehˇ oˇ ve hta‸ tehˆ nyi leh, zuhˬ hpawˇ awˇ chi ngaˇ shaw‸, kʼehˬ hpawˇ nyiˇ chi nyiˇ shaw‸ cawˬ ve yoˬ.

3Oˇ ve hkʼaw‸ nawˉ, yawˇ lehˬ awˬ kʼaw ji ve teˇ bawehˇ hkʼaw lo‸-e ve yoˬ. Yawˇ lehˬ, bawehˇ oˇ ve hkʼaw lo‸-e ve ya‸ kʼaw hta‸ tehˆ nyi leh, htu hpawˇ teˇ shaw‸, kʼehˬ hpawˇ hkaw‸ shaw‸ leh gʼo‸ pa lehˬ hiˉ shaw‸ cawˬ ve yoˬ.

4Yawˇ lehˬ bawehˇ oˇ ve hta‸ tehˆ nyi leh, nyiˇ chi nyiˇ shaw‸ hkʼa shuˍ cawˬ ve yoˬ. Oˇ ve hkʼaw‸ nawˉ, chi ve lehˬ, da‸ kehˬ jaˇ ve chehˇ kuiˬ hpeh‸ ve yoˬ, teh‸ ngaˬ hta‸ kʼoˆ laˇ ve yoˬ.

5Chaw oˇ ve lehˬ, bon yehˬ hkʼaw ve gʼo‸ pa hkʼaˬ ma htu ve hta‸ tehˆ nyi leh, oˇ ve lehˬ hkaw‸ shaw‸ cawˬ ve yoˬ. Bon yehˬ hta‸ hkʼa caw zuhˇ lo ko taˍ ve gʼo‸ pa chi ve hta‸ awˇ shaw‸ kʼehˬ ve awˬ bawehˇ ehˉ hkʼa biˇ te tcuhˉ naw‸ piˇ taˍ ve yoˬ.

6Awˬ bawehˇ ehˉ chi teˇ hpaˍ lehˬ shehˆ htai‸ cawˬ leh, teˇ htai‸ awˬ hkʼaw lo awˬ bawehˇ ehˉ shehˆ chi maˬ cawˬ ve yoˬ. Awˬ na leh leh teˇ htai‸ lo cawˬ ve bon yehˬ gʼo‸ pa lehˬ, awˬ hawˉ teˇ htai‸ ve gʼo‸ pa a‸ kehˉ te i la piˇ taˍ ve pa taw, awˬ bawehˇ oˇ ve hta‸ tawˆ kanˬ piˇ tuˬ ve yehˬ hkuiˉ daw maˇ loˍ. Gʼo‸ pa hkʼoˆ lo ceh teh taˍ hpeh‸ ve yoˬ.

7Hkʼe te leh, bon yehˬ ve gʼo‸ pa lehˬ, teˇ vuiˇ lo chehˇ nyi ve kʼo, awˬ hawˉ lo te leh awˬ hkʼoˇ meuˇ lo hkʼa gaˬ, hkʼa hui-ehˬ hpeh‸ chehˇ ve hta‸ shuˍ ve yoˬ. Awˬ bawehˇ teˇ hpaˍ ve awˬ baˬ hpawˇ, bon yehˬ awˬ hawˉ leh leh ve teˇ htai‸, awˬ kʼaw ji ve teˇ htai‸ leh awˬ na ve teˇ htai‸ lo taˆ-e ve go nyiˇ maˬ hta‸ bon yehˬ awˬ baˬ hpawˇ lo cawˬ ve gʼo‸ pa hta‸ te tcuhˉ naw‸ piˇ taˍ ve yoˬ.

8Awˬ bawehˇ chi teˇ hpaˍ awˬ baˬ hpawˇ lo cawˬ ve gʼo‸ pa teˇ hpaˍ lehˬ, nyiˇ shaw‸ htu ve yoˬ. Bon yehˬ awˬ na paˉ hpawˇ lo cawˬ ve awˬ bawehˇ teˇ hpaˍ hkʼaw lo‸-e tuˬ yehˬ miˉ teˇ maˬ cawˬ leh, awˬ hawˉ hpawˇ lo cawˬ ve bawehˇ teˇ hpaˍ hkʼaw lo‸-e tuˬ ve yehˬ miˉ teˇ maˬ cawˬ ve yoˬ. Bon yehˬ hta‸ hkʼa caw zuhˇ lo ngaˇ shaw‸ kʼehˬ ve je‸ duˇ kawˍ taˍ ve teˇ maˬ cawˬ ve hta‸ gʼa mawˬ ve yoˬ. Oˇ ve lehˬ, miˬ chaˆ hkʼoˆ hkaw‸ shaw‸ mvuh kuiˬ lo cawˬ leh, bawehˇ kawˍ taˍ ve haˉ pui shiˍ hkʼe mvuh cawˬ ve yoˬ. Je‸ duˇ kawˍ taˍ ve oˇ ve leh paw hkuˇ hui ve yehˬ teˇ hpaˍ awˬ kaˍ lo, nyiˇ chi nyiˇ shaw‸ kʼehˬ ve chehˇ kuiˬ teˇ kaˬ cawˬ ve yoˬ.

12Bon yehˬ lonˉ mvuhˇ nyi kʼehˬ hpawˇ lo cawˬ ve miˬguiˬ oˇ paˉ hpawˇ lo, zuhˬ hpawˇ teˇ ha shaw‸ leh, kʼehˬ hpawˇ suhˍ chi suhˍ shaw‸ cawˬ ve yehˬ teˇ maˬ cawˬ ve yoˬ. Gʼo‸ pa teˇ hpaˍ lehˬ, hkaw‸ shaw‸ htu ve yoˬ.

13Chaw oˇ ve lehˬ, bon yehˬ awˬ baˬ hpawˇ hta‸ tehˆ nyi leh, zuhˬ hpawˇ 112 shaw‸ cawˬ ve yoˬ. Bon yehˬ awˬ hkʼaw‸ nawˉ hpawˇ hta‸ te leh, mvuhˇ nyi kʼehˬ hpawˇ lo cawˬ ve yehˬ oˇ ve awˬ ceˍ meuˇ lo hkʼa gaˬ teˇ ha teˇ chi nyiˇ shaw‸ cawˬ ve yoˬ.

14Bon yehˬ gʼuˇ suhˍ paˉ hpawˇ leh, oˇ kaˬ lo cawˬ ve miˬguiˬ htawˇ teˇ ha teˇ chi nyiˇ shaw‸ cawˬ ve yoˬ.

15Yawˇ lehˬ yehˬ oˇ ve hta‸ kʼaw‸ tehˆ nyi leh, oˇ ve ka‸ teˇ ha teˇ chi nyiˇ shaw‸ cawˬ ve yoˬ.

16Bon yehˬ hkʼaw lo‸-e ve bawehˇ, da‸ kehˬ ve bawehˇ, leh da‸ kehˬ jaˇ ve bawehˇ chi teˇ hpaˍ lehˬ, suhˆ baˉ hkʼawˇ taˍ ve hta‸ te leh yehˬ miˉ ehˉ teˇ hpaˍ lo hkʼa gaˬ suhˆ baˉ yuˬ dawˆ nehˉ taˍ ve yoˬ. Yehˬ miˉ ehˉ chi teˇ hpaˍ hta‸ beh taˍ hpeh‸ ve yoˬ.

17Bon yehˬ awˬ hkʼaw hpawˇ ve gʼo‸ pa lehˬ, yehˬ miˉ hkʼa shuˍ mvuh leh, tcuhˉ pui cehˬ leh toˍ la‸ kʼuˉ cawˬ ve to nuˇ to shaˆ awˬ han htawˆ keu taˍ ve yoˬ.

18Gʼo‸ pa oˇ ve teˇ hpaˍ hkʼa peu-eˬ awˬ hkʼoˆ lo, tcuhˉ pui cehˬ teˇ cehˬ peuˬ kʼo, to nuˇ to shaˆ ve awˬ han chi hkʼe te htawˆ keuˬ kʼai taˍ ve yoˬ. To nuˇ to shaˆ oˇ ve teˇ hkeh le le mehˆ hpfuhˇ nyiˇ maˬ cawˬ ve yoˬ.

19Mehˆ hpfuhˇ teˇ maˬ lehˬ, tcuhˉ pui cehˬ hpawˇ lo hpfuhˆ peu taˍ ve chaw yaˇ ve mehˆ hpfuhˇ hpeh‸ leh, awˬ nu ve mehˆ hpfuhˇ teˇ maˬ lehˬ, awˬ nu ve teˇ hpawˇ lo hpfuhˆ peu taˍ ve laˇ caˬ shiˉ ve mehˆ hpfuhˇ hpeh‸ ve yoˬ.

20Suhˆ baˉ hkʼawˇ taˍ ve hta‸ te leh, yehˬ miˉ awˬ hkʼoˆ lo hkʼa gaˬ ve gʼo‸ pa awˬ hkʼoˆ lo chi hkʼe ve awˬ han hkʼa biˇ htawˆ keu taˍ ve yoˬ.

21Da‸ kehˬ ve bawehˇ hkʼaw cawˬ ve yehˬ hkuiˉ daw teˇ hpaˍ lehˬ, awˇ ceˍ hkʼa hui cawˬ ve yoˬ. Da‸ kehˬ jaˇ ve bawehˇ hkʼaw lo‸-e ve yehˬmiˉhpe‸ gʼuˇ suhˍ lo, suhˆ yuˬ te taˍ ve tuˉ tanˇ kuiˬ hta‸ shuˍ ve teˇ maˬ cawˬ ve yoˬ.

22Oˇ ve lehˬ, mvuh hpawˇ shehˆ shaw‸ cawˬ leh, kʼehˬ hpawˇ nyiˇ shaw‸ cawˬ ve yoˬ. Awˬ ceˍ kʼaw-eh‸ ve yehˬ hkuiˉ daw teˇ hpaˍ, awˬ hawˉ lo teh taˍ ve awˬ ceuˬ leh awˇ hpawˇ hpawˇ hkʼa peu-eˬ ve hta‸ suhˆ ceh tiˉ yuˬ te taˍ ve yoˬ. Oˇ htaˇ chaw oˇ ve lehˬ, Chi ve Gʼuiˬsha mehˆ gʼuˇ suhˍ lo teh taˍ ve hpui lawˇ hpeh‸ ve yoˬ, teh‸ ngaˬ hta‸ kʼoˆ laˇ ve yoˬ.

23Da‸ kehˬ ve bawehˇ leh, da‸ kehˬ jaˇ ve bawehˇ hkʼaw lo‸-e tuˬ ve yehˬmiˉhpe‸ teˇ bawehˇ teˇ maˬ cawˬ ve yoˬ.

24Yehˬmiˉhpe‸ oˇ ve hta‸ yehˬ miˉ baˉ nyiˇ maˬ te hoˆ taˍ ve yoˬ.

25Da‸ kehˬve bawehˇ hkʼaw lo‸-e ve yehˬ miˉ hkʼoˆ lo htawˇ, gʼo‸ pa teˇ hpaˍ hkʼoˆ lo ve hkʼa shuˍ, tcuhˉ pui cehˬ leh toˍ la‸ kʼuˉ cawˬ ve to nuˇ to shaˆ teˇ hpaˍ ve awˬ han htawˆ keu taˍ ve yoˬ. Bon yehˬ hkʼaw lo‸-e ve bawehˇ yehˬ miˉ awˬ baˬ hpawˇ lo suhˆ baˉ yuˬ nehˉ taˍ ve yoˬ.

26Bawehˇ oˇ ve teˇ hpawˇ le le lo, yehˬ miˉ ehˉ teˇ hpaˍ cawˬ leh, gʼo‸ pa hkʼoˆ lo tcuhˉ pui cehˬ awˬ han htawˆ keu taˍ ve yoˬ.

← Chapter 40 Jump to: Chapter 42 →