Ezekiel 47

Lahu Bible Edited © Thailand Bible Society and Bible Society of Myanmar, 2010, 2020.

← Chapter 46 Jump to: Chapter 48 →

1Chaw oˇ ve lehˬ, ngaˬ hta‸ bon yehˬ hkʼaw lo‸-e ve yehˬmiˉhpe‸ lo kʼaw‸ shiˍ kʼai laˇ ve yoˬ. Yehˬmiˉhpe‸ oˇ ve awˬ hawˉ lo iˉ kaˆ tawˆ la leh, bon yehˬ mvuhˇ nyi tawˆ hpawˇ lo ya‸-e ve yoˬ. Iˉ kaˆ oˇ ve lehˬ, bon yehˬ awˬ hawˉ paˉ hpawˇ lo te leh tuˉ tanˇ kuiˬ awˬ hawˉ paˉ hpawˇ lo hpaˍ ya‸-e ve yoˬ.

2Chaw oˇ ve ngaˬ hta‸ awˬ na hpawˇ ve taˍ meu‸ hpe‸ hta‸ te leh, bon yehˬ awˬ baˬ hpawˇ lo shiˍ kʼai laˇ leh, mvuhˇ nyi tawˆ hpawˇ lo htaw pawnˍ taˍ ve taˍ meu‸ hpe‸ lo gaˬ la ve yoˬ. Awˬ hawˉ hpawˇ ve taˍ meu‸ hpe‸ lo htawˇ, iˉ kaˆ gʼuiˬ tuˇ ehˉ teˇ maˬ tawˆ la chehˇ taˍ ve yoˬ.

3Chaw oˇ ve lehˬ, yawˇ ve iˉ duˬ taˬ hta‸ yuˬ leh, iˉ kaˆ gʼuiˬ tuˇ oˇ ve hkʼaˇ suh mvuhˇ nyi tawˆ hpawˇ lo nyiˇ ha hiˉ chi loˬ hkʼa gaˬ tehˆ kʼai leh, ngaˬ hta‸ iˉ kaˆ oˇ ve hkʼaw hkanˍ kʼai tuˬ kʼoˆ laˇ ve yoˬ. Iˉ kaˆ oˇ ve lehˬ, ngaˬ ve hkui tcuhˉ kʼu hkʼa gaˬ naˉ ve yoˬ. Nyiˇ ha nyiˇ chi awˇ loˬ hkʼa gaˬ kʼaw‸ caˉ tehˆ kʼai leh, ngaˬ ve hkui kʼawˍ lehˬ hkʼe ceh tiˉ kʼaw‸ naˉ ve yoˬ.

4Oˇ ve hkʼaw‸ nawˉ, yawˇ lehˬ iˉ kaˆ oˇ ve hkʼaˇ suh nyiˇ ha hiˉ chi loˬ hkʼa gaˬ kʼaw‸ caˉ tehˆ kʼai ve yoˬ. Iˉ kaˆ oˇ ve lehˬ, ngaˬ ve hkui tcuhˉ kʼu hkʼa gaˬ naˉ ve yoˬ. Nyiˇ ha nyiˇ chi awˇ loˬ hkʼa gaˬ kʼaw‸ caˉ tehˆ kʼai leh, iˉ kaˆ oˇ ve ngaˬ ve caw‸ cehˬ nyi hkʼa gaˬ naˉ la ve yoˬ.

5Yawˇ lehˬ nyiˇ ha hiˉ chi loˬ hkʼa gaˬ teˇ pawˆ kʼaw‸ caˉ tehˆ kʼai leh, iˉ kaˆ oˇ ve naˉ jaˇ peuˬve pa taw, ngaˬ ya‸ kʼaw juˇ kʼai maˇ gaˬ ve yoˬ. Lawehˇ kʼai ve maˇ heˆ kʼo, ya‸ kʼaw‸ juˇ kʼai maˇ gaˬ ve yoˬ.

6Oˇ htaˇ yawˇ lehˬ, Chaw yaˇ-oˬ, chi teˇ hpaˍ hta‸ hkʼa deh‸ tawnˇ taˍ-o‸, teh‸ ngaˬ hta‸ kʼoˆ laˇ ve yoˬ. Oˇ ve hkʼaw‸ nawˉ, yawˇ ngaˬ hta‸ iˉ kaˆ gʼuiˬ pfuhˍ lo kʼaw‸ shiˍ kʼai laˇ ve yoˬ.

7Ngaˬ oˇ kaˬ lo gaˬ ve teˇ yanˇ, gʼuiˬ pfuhˍ choˬ paˉ lo suhˆ cehˬ hkʼa biˇ cawˬ taˍ ve hta‸ gʼa mawˬ ve yoˬ.

8Yawˇ ngaˬ hta‸ chi hkʼe kʼoˆ laˇ ve yoˬ. Iˉ kaˆ chi teˇ hpaˍ mvuhˇ nyi tawˆ hpawˇ lo ya‸-e leh Yawˇdanˍ miˬ tawˬ kuiˬ hta‸ hpanˍ kʼai peuˬ hkʼawˆ nawˉ, Suh ve laˇ tsuhˇ gʼuiˬ hkʼaw lo‸-e ve yoˬ. Iˉ kaˆ chi Suh ve laˇ tsuhˇ gʼuiˬ lo gaˬ ve teˇ yanˇ, oˇ kaˬ lo cawˬ ve hkʼaˇ jaˇ ve iˉ kaˆ hta‸ mehˬ ve iˉ kaˆ kʼaw‸ hpeh‸ la piˇ ve yoˬ.

9Iˉ kaˆ chi hkʼa gaˬ ve chehˇ kuiˬ teˇ hpaˍ lo, laiˉ ceuˬ ve to nuˇ to shaˆ leh ngaˇ teˇ hpaˍ chehˇ taˍ tuˬyoˬ. Iˉ kaˆ lawˬ chi lehˬ, Suh ve laˇ tsuhˇ gʼuiˬ hta‸ kʼaw‸ mehˬ la piˇ leh, yawˇ hkʼa gaˬ ve chehˇ kuiˬ teˇ hpaˍ hta‸ a sha‸ te‸ la piˇ ve yoˬ.

10Enˍgaˍdiˆ lo tawˆ ve iˉ kaˆ gʼuiˬ tuˇ hta‸ te leh, Eˇneˍgaˍlenˍ lo tawˆ ve iˉ kaˆ gʼuiˬ tuˇ teˇ hpaˍ lo hkʼa gaˬ, laˇ tsuhˇ gʼuiˬ pfuhˍ lo ngaˇ ca paˍ teˇ hpaˍ chehˇ taˍ leh, a shu yawˇ ve geu‸ hta‸ hpe huˉ taˍ tuˬ yoˬ. Awˬ kʼaw ji ve laˇ tsuhˇ gʼuiˬ hkʼaw ngaˇ laiˉ ceuˬ chehˇ ve hkʼe, oˇ kaˬ lo htawˇ ngaˇ laiˉ ceuˬ ve chehˇ tuˬ yoˬ.

11Ya‸ hkʼaˇ, gʼuiˬ pfuhˍ lo cawˬ ve iˉ kaˆ gʼuiˬ po teˇ hpaˍ hta‸ da‸ la mehˬ la piˇ tuˬ ve maˇ heˆ. Gʼuiˬ po oˇ ve teˇ hpaˍ lehˬ, aˉ leh‸ gʼuiˬ po ceh hpeh‸ chehˇ taˍ tuˬ yoˬ.

12Iˉ kaˆ lawˬ kʼaˉ choˬ paˉ hpawˇ lo suhˆ cehˬ laiˉ ceuˬ ve yeˬ la leh, caˇ tuˬ cawˬ la tuˬ yoˬ. Awˬ hpa‸ teˇ hpaˍ teˇ pawˆ ka‸ maˇ nawˍ kʼai leh, awˬ shiˍ naw‸ ve teˇ pawˆ ka‸ jehˇ taˍ tuˬ ve maˇ heˆ. Iˉ kaˆ oˇ ve bon yehˬ hkʼaw tawˆ la taˍ ve pa taw, teˇ ha pa le le awˬ shiˍ hkʼa biˇ naw‸ chehˇ tuˬ yoˬ. Suhˆ shiˍ hawˆ shiˍ oˇ ve teˇ hpaˍ lehˬ, chaw naˬ hta‸ gu na-e tuˬ aw pon yehˇ tuˬ yoˬ, teh‸ ngaˬ hta‸ kʼoˆ laˇ ve yoˬ.

13Gʼuiˬsha kʼoˆ ve, Chi ve lehˬ Iˉsaˍreˍlaˆ chaw teˇ chi nyiˇ ceuˬ gʼa pehˬ da‸ tuˬ ve yawˇ hui ve miˬ tcuhˉ teˇ hpaˍ hpeh‸ ve yoˬ. Yoˇseh‸ awˬ ceuˬ awˬ hkʼaˇ teˇ hpaˍ lehˬ, mvuhˇmiˬ nyiˇ peˆ gʼa tuˬ yoˬ.

14Mvuhˇmiˬ chi ve nawˬ puˍ nawˬ pi hui hta‸ piˇ tuˬ ngaˬ ka ti‸ te piˇ taˍ peuˬ ve yoˬ. Chi beu‸ mvuhˇmiˬ chi hta‸ nawˬ hui pehˬ yuˬ-o‸.

15Awˬ na hpawˇ ve mi tcuhˉ lehˬ, mvuhˇ nyi tawˆ hpawˇ, Awˬ kʼaw ji ve laˇ tsuhˇ gʼuiˬ hta‸ te leh, Heˍtaˍlonˍ venˇ, Haˍmaˆ kʼaˬ le‸, Zeˍdiˆ venˇ,

16Beˍrawˇta‸ venˇ, Siˆbaˍrenˍ venˇ, (venˇ chi nyiˇ maˬ lehˬ, Daˍmaˍsehˆ leh Haˍ maˆ venˇ awˬ kaˍ lo cawˬ ve yoˬ) leh Tiˉkonˍ venˇ lo hkʼa gaˬ hpeh‸ ve yoˬ. (venˇ chi lehˬ, Hawˇranˍ miˬ tcuhˉ paˇ lo cawˬ ve yoˬ)

17Hkʼe te leh, awˬ na hpawˇ ve miˬ tcuhˉ lehˬ, Awˬ kʼaw ji ve laˇ tsuhˇ gʼuiˬ mvuhˇ nyi tawˆ hpawˇ lo te leh, Eˇnonˍ venˇ lo hkʼa gaˬ hpeh‸ leh, awˬ na hpawˇ lo cawˬ ve Haˍmaˆ leh Daˍmaˍsehˆ miˬ tcuhˉ lo hkʼa gaˬ hpeh‸ ve yoˬ.

18Mvuhˇ nyi tawˆ hpawˇ ve miˬ tcuhˉ lehˬ, Daˍmaˍsehˆ leh Hawˇranˍ venˇ awˬ kaˍ lo te leh, Yawˇdanˍ iˉ kaˆ lawˬ hkʼaˇ suh ya‸-e ve yoˬ. Iˉ kaˆ lawˬ chi ve mvuhˇ nyi kʼehˬ hpawˇ lehˬ, Iˉsaˍreˍlaˆ miˬ tcuhˉ hpeh‸ leh mvuhˇ nyi tawˆ hpawˇ lehˬ, Giˉlaˆ miˬ tcuhˉ hpeh‸ ve yoˬ. Mvuhˇ nyi tawˆ hpawˇ ve miˬ tcuhˉ chi lehˬ, Suh ve laˇ tsuhˇ gʼuiˬ hkʼoˆ lo cawˬ ve Taˍmaˍ venˇ lo hkʼa gaˬ hpeh‸ve yoˬ.

19Awˬ hawˉ hpawˇ ve miˬ tcuhˉ lehˬ, Taˍmaˍ venˇ hta‸ te leh, Kaˍdeˍshaˆ iˉ kaˆ gʼuiˬ tuˇ lo hkʼa gaˬ, oˇ kaˬ kʼaw‸ te leh Eˇjiˇtu‸ miˬ tcuhˉ hkʼaˇ suh kʼaw‸ te veu leh, Awˬ kʼaw ji ve laˇ tsuhˇ gʼuiˬ lo hkʼa gaˬ hpeh‸ ve yoˬ.

20Mvuhˇ nyi kʼehˬ hpawˇ ve miˬ tcuhˉ lehˬ, Awˬ kʼaw ji ve laˇ tsuhˇ gʼuiˬ hpeh‸ leh, awˬ na hpawˇ lo Haˍmaˆ kʼaˬ le‸ lo hkʼa gaˬ hpeh‸ ve yoˬ.

21Mvuhˇmiˬchi ve nawˬ hui ve awˬ ceuˬ awˬ hkʼaˇ teˇ hpaˍ hta‸ pehˬ piˇ-oˆ.

22Mvuhˇmiˬ chi lehˬ, nawˬ hui ve mvuhˇmiˬ hpeh‸ ve yoˬ. Nawˬ hui mvuhˇmiˬ pehˬ da‸ ve teˇ yanˇ, nawˬ hui geh chehˇ taˍ ve shu mvuhˇmiˬ chaw leh, choˬ kaˬ lo paw la ve chaw teˇ hpaˍ hta‸ htawˇ, mvuhˇmiˬ gʼa pehˬ piˇ ve yoˬ. Yawˇ hui hta‸ htawˇ Iˉsaˍreˍlaˆ chaw hui hkʼe gʼa shawˍ leh, Iˉsaˍreˍlaˆ chaw hui geh teˇ geh mvuhˇmiˬ gʼa tuˬ mehˇ gʼa hkaˆ tcuh ve yoˬ.

23Shu mvuhˇmiˬ chaw htawˇ, yawˇ chehˇ taˍ ve Iˉsaˍreˍlaˆ chaw hui ve mvuhˇmiˬ hkʼaw miˬguiˬ gʼa tuˬ yoˬ. Ngaˬ Gʼuiˬsha chi hkʼe kʼoˆ taˍ peuˬ, teh‸ kʼoˆ ve yoˬ.

← Chapter 46 Jump to: Chapter 48 →