Ezekiel 31

Lahu Bible Edited © Thailand Bible Society and Bible Society of Myanmar, 2010, 2020.

← Chapter 30 Jump to: Chapter 32 →

1Ngaˬ hui shu mvuhˇmiˬ hkʼaw chehˇ taˍ ve teˇ chi teˇ hkʼaw‸, ha pa shehˆ maˬ, awˉ lawˉ teˇ nyi htaˇ, Gʼuiˬsha ngaˬ hta‸ chi hkʼe kʼoˆ laˇ ve yoˬ.

2Chaw yaˇ-oˬ, Eˇjiˇtu‸ jawˇmawˇ leh yawˇ ve chaw teˇ hpaˍ hta‸ chi hkʼe kʼoˆ piˇ-oˆ. Nawˬ hui lehˬ hkʼaˬ ma awˬ me‸ awˬ hponˇ cawˬ ve le. Nawˬ hui hta‸ ngaˬ aˬ hto‸ ma gʼa yuˬ tehˆ maˍ tuˬ le.

3Nawˬ hui lehˬ, nyi sha ve awˬ kʼaˉ hkʼa biˇ cawˬ leh, moˬ hta‸ daw‸ taˍ ve Leˍbaˍnonˍ hkʼaw hkʼoˆ lo cawˬ ve htawˇ cehˬ lonˉ hkʼe hpeh‸ ve yoˬ.

4Htawˇ cehˬ oˇ ve awˬ hawˉ lo, yawˇ hta‸ uiˍ la yeˬ la piˇ tuˬ ve iˉ kaˆ hkʼa biˇ cawˬ leh, oˇ kaˬ lo cawˬ ve suhˆ cehˬ hkʼa peu-eˬ ve hta‸ iˉ kaˆ piˇ chehˇ ve yoˬ.

5Yawˇ lehˬ iˉ kaˆ hkʼa deh‸ gʼa chehˇ ve pa taw, awˬ nu ve suhˆ cehˬ teˇ hpaˍ a‸ kehˉ mvuh jaˇ leh, awˬ kʼaˉ teˇ hpaˍ htawˇ maˇ jaˇ zuhˬ jaˇ ve yoˬ.

6Ngaˆ laiˉ ceuˬ yawˇ ve awˬ kʼaˉ teˇ hpaˍ hkʼoˆ lo awˬ hpui te chehˇ leh, awˬ cehˬ hkuiˉ puiˍ lo haiˬ ve to nuˇ to shaˆ teˇ hpaˍ awˬ yehˇ cheˇ chehˇ ve yoˬ. Chaw ceuˬ teˇ hpaˍ htawˇ, yawˇ ve aˉ gʼuiˬ ha hawˉ lo jehˇ chehˇ ve yoˬ.

7Suhˆ cehˬ oˇ ve hkʼaˬ ma nyi sha jaˇ ve le. Mvuh jaˇ leh awˬ kʼaˉ teˇ hpaˍ htawˇ zuhˬ jaˇ ve yoˬ. Yawˇ ve awˬ geu teˇ hpaˍ miˬguiˬ hkʼaw naˉ chaweh lo‸-e leh, iˉ kaˆ hta‸ daw‸ taˍ ve yoˬ.

8Gʼuiˬsha ve hko hkʼaw cawˬ ve htawˇ cehˬ teˇ cehˬ ka‸ yawˇ hta‸ tehˆ da‸ maˇ gʼa. Awˬ nu ve suhˆ cehˬ hkʼaˬ ve teˇ cehˬ maˇ kʼoˆ, oˇ ve hkʼa shuˍ awˬ kʼaˉ da‸ leh nyi sha ve teˇ cehˬ ka‸ maˇ cawˬ. Gʼuiˬsha ve hko hkʼaw cawˬ ve suhˆ cehˬ teˇ cehˬ ka‸ oˇ hkʼe taw nyi sha ve teˇ cehˬ ka‸ maˇ cawˬ.

9Ngaˬ lehˬ suhˆ cehˬ oˇ ve hta‸ awˬ kʼaˉ maˇ maˇ cawˬ la piˇ leh, nyi sha tuˬ te piˇ taˍ ve yoˬ. Gʼuiˬsha ve Eˍdenˍ hko hkʼaw cawˬ ve suhˆ cehˬ hkʼa peu-eˬ, htawˇ cehˬ lonˉ oˇ ve hta‸ hkawehˉ jaˇ ve yoˬ.

10Moˬ hta‸ daw‸ taˍ ve suhˆ cehˬ lonˉ oˇ ve hkʼaˬ hkʼe hpeh‸ la tuˬ ve awˬ lawn ngaˬ nawˬ hta‸ hto laˇ shaˍ. Yawˇ mvuh la ve hkʼe nyi ma htawˇ uiˍ la ve yoˬ.

11Chi hta‸ pa taw, ngaˬ yawˇ hta‸ chiˇ baˬ leh shu mvuhˇmiˬ chaw teˇ gʼaˇ yawˇ hta‸ uˉ peunˍ tcuh tuˬ yoˬ. Yawˇ haiˬ ve hta‸ keunˍ da‸ ve hkʼe, chaw oˇ ve yawˇ hta‸ kʼaw‸ piˇ tuˬ yoˬ.

12Haiˬ jaˇ ve awˬ nu ve mvuhˇmiˬ yaˇ teˇ hpaˍ, suhˆ cehˬ oˇ ve hta‸ htu baˬ piˇ tuˬ yoˬ. Yawˇ ve awˬ kʼaˉ leh awˬ cehˬ hteh kʼai leh, mvuhˇmiˬ hkʼaw cawˬ ve hkʼaw pui leh lawˬ hkʼo‸ teˇ maˬ le le hkʼaw ce kʼai tuˬ yoˬ. Suhˆ cehˬ oˇ ve awˬ hawˉ lo mui chehˇ ve chaw ceuˬ hkʼa peu-eˬ tu hpaw-e tuˬ yoˬ.

13Ngaˆ teˇ hpaˍ lehˬ paiˍ taˍ ve suhˆ cehˬ oˇ ve awˬ hkʼoˆ lo ca mui la leh, haiˬ ve to nuˇ to shaˆ teˇ hpaˍ lehˬ awˬ kaˉ teˇ hpaˍ awˬ hkʼoˆ lo te toˇ tuˬ yoˬ.

14Ya‸ nyi hkʼaw‸ nawˉ kʼo, iˉ kaˆ hkʼa deh‸ gʼa chehˇ ve suhˆ cehˬ hkʼaˬ ve teˇ ceuˬ maˇ kʼoˆ, suhˆ cehˬ lonˉ oˇ ve hkʼa shuˍ moˬ hta‸ daw‸ htaˇ hkʼa gaˬ uiˍ la mvuh la gʼa tuˬ ve maˇ heˆ. Oˇ ve hkʼa peu-eˬ chaw yaˇ hkʼa shuˍ gʼa suh-e leh, suh mvuhˇmiˬ lo gaˬ taˍ peuˬ ve chaw hui geh gʼa ca chehˇ tuˬ yoˬ, teh‸ kʼoˆ ve yoˬ.

15Gʼuiˬsha chi hkʼe kʼoˆ ve yoˬ. Suhˆ cehˬ oˇ ve suh mvuhˇmiˬ lo kʼai ve teˇ nyi htaˇ, dawˇ haˍ ve awˬ heˆ hpeh‸ tuˬ ngaˬ lehˬ miˬguiˬ awˬ hawˉ lo cawˬ ve iˉ kaˆ teˇ hpaˍ yawˇ hta‸ hoˆ beh la piˇ lawˬ tuˬ yoˬ. Ngaˬ lehˬ iˉ kaˆ lawˬ teˇ hpaˍ hta‸ yuˬ tiˍ taˍ leh, iˉ kaˆ gʼuiˬ tuˇ maˇ maˇ kʼaw‸ tawˆ la piˇ tuˬ ve maˇ heˆ. Awˬ lawn kʼo, suhˆ cehˬ oˇ ve suh kʼai peuˬ ve pa taw, ngaˬ lehˬ Leˍbaˍnonˍ hkʼaw hta‸ naˆ ho‸ lehˍ hpeh‸ la piˇ leh, heh puiˉ hkʼaw lo cawˬ ve suhˆ cehˬ hkʼa peu-eˬ ve hta‸ nawˍ kʼai piˇ lawˬ tuˬ yoˬ.

16Suhˆ cehˬ oˇ ve hta‸ ngaˬ suh mvuhˇmiˬ lo peu kʼai ve teˇ yanˇ, yawˇ paiˍ ve awˬ hkawˇ lehˬ miˬguiˬ chaw ceuˬ teˇ hpaˍ hta‸ kawˆ cheˇ piˇ lawˬ tuˬ yoˬ. Yawˇ paiˍ ve pa taw, Eˍdenˍ hkʼaw cawˬ ve da‸ jaˇ ve suhˆ cehˬ hkʼa peu-eˬ leh, suh mvuhˇmiˬ lo ca chehˇ kʼai taˍ peuˬ ve iˉ kaˆ hkʼa deh‸ gʼa chehˇ ve Leˍbaˍnonˍ hkʼaw hkʼoˆ lo cawˬ ve suhˆ cehˬ hkʼa peu-eˬ nyi hkʼaˇ suh jaˇ tuˬ yoˬ.

17Yawˇ hui lehˬ suhˆ cehˬ oˇ ve geh teˇ geh suh mvuhˇmiˬ lo kʼai leh, paiˍ taˍ peuˬ ve awˬ nu ve suhˆ cehˬ teˇ hpaˍ geh ca chehˇ tuˬ yoˬ. Suhˆ cehˬ oˇ ve awˬ hawˉ lo chehˇ taˍ ve chaw hkʼa peu-eˬ awˬ nu ve mvuhˇmiˬ teˇ hpaˍ lo hpaˆ da‸ kʼai tuˬ yoˬ.

18Suhˆ cehˬ lonˉ oˇ ve lehˬ, Eˇjiˇtu‸ jawˇmawˇ leh yawˇ ve chaw teˇ hpaˍ hpeh‸ ve yoˬ. Eˍdenˍ hkʼaw cawˬ ve suhˆ cehˬ teˇ ceuˬ ka‸ yawˇ hkʼe taw maˇ uiˍ maˇ mvuh. Ya‸ hkʼaˇ, chi beu‸ yawˇ lehˬ Eˍdenˍ hkʼaw cawˬ ve suhˆ cehˬ teˇ hpaˍ hkʼa shuˍ suh mvuhˇmiˬ lo ya‸-e leh, Gʼuiˬsha hta‸ maˇ shiˍ ve chaw leh ma‸ bawˆ kuiˬlo suh-e ve chaw hui geh gʼa ca chehˇ tuˬ yoˬ. Ngaˬ Gʼuiˬsha tawˇ yaw taˍ peuˬ, teh‸ kʼoˆ ve yoˬ.

← Chapter 30 Jump to: Chapter 32 →