Ezekiel 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1G’uiˬsha k’oˆ ve, Chaw yaˇ-oˬ, li‸ k’oˆ chi ve hta‸ caˇ-oˆ. Oˇ hk’e te peuˬ hk’aw‸ nawˉ, Iˉsaˍreˍlaˆ chaw geh k’ai leh yawˇ hui hta‸ tawˇ ca yaw piˇ-oˆ, teh‸ ngaˬ hta‸ k’oˆ laˇ ve yoˬ.

2Hk’e te leh, ngaˬ maw‸ k’aw ngaˉ leh yawˇ lehˬ li‸ k’oˆ oˇ ve ngaˬ hta‸ caˍ laˇ ve yoˬ.

3Yawˇ k’oˆ ve, Chaw yaˇ-oˬ, ngaˬ nawˬ hta‸ piˇ laˇ chehˇ ve li‸ chi hta‸ caˇ leh nawˬ ve g’oˇ peˬ hk’aw biˇ la piˇ-oˆ, teh‸ k’oˆ ve yoˬ. Hk’e te leh, ngaˬ li‸ oˇ ve hta‸ caˇ leh pehˇ g’uiˬ hk’a shuˍ mehˬ jaˇ ve yoˬ.

4Oˇ ve hk’aw‸ nawˉ G’uiˬsha k’oˆ ve, Chaw yaˇ-oˬ, Iˉsaˍreˍlaˆ chaw hui geh k’ai leh, ngaˬ nawˬ hta‸ k’oˆ tcuh ve tawˇ hk’a peu-eˬ yawˇ hui hta‸ ca k’oˆ piˇ-oˆ.

5Ngaˬ nawˬ hta‸ tawˇ maˇ pawnˍ da‸ ve awˬ nu ve chaw ceuˬ geh k’ai peu laˇ chehˇ ve maˇ heˆ. Iˉsaˍreˍlaˆ chaw hui geh k’ai peu laˇ chehˇ ve yoˬ.

6Tawˇ maˇ pawnˍ da‸ ve awˬ nu ve chaw ceuˬ geh ngaˬ nawˬ hta‸ k’ai peu laˇ chehˇ ve hk’e k’o, yawˇ hui nawˬ ve tawˇ hta‸ na yuˬ tuˬ yoˬ.

7Ya‸ hk’aˇ Iˉsaˍreˍlaˆ chaw teˇ g’aˇ ka‸ nawˬ ve tawˇ hta‸ na yuˬ tuˬ ve maˇ heˆ. Yawˇ hui lehˬ, ngaˬ ve tawˇ hta‸ ka‸ maˇ na yuˬ. Yawˇ hui hk’a peu-eˬ nyi ma heh jaˇ leh, na yuˬ puiˉ ve nyi ma maˇ cawˬ.

8Chi beu‸ nawˬ hta‸ htawˇ, yawˇ hui hk’a shuˍ nyi ma heh la piˇ tuˬ yoˬ.

9Ngaˬ nawˬ hta‸ haˉ hpawˇ hk’e yeˬ leh shehnˉ shiˍ hk’a shuˍ heh la piˇ tuˬ yoˬ. Chaw hpfuhˆ oˇ ve teˇ hpaˍ hta‸ taˇ kawˆ, teh‸ ngaˬ hta‸ k’oˆ laˇ ve yoˬ.

10G’uiˬsha k’aw‸ k’oˆ ve, Chaw yaˇ-oˬ, ngaˬ nawˬ hta‸ k’oˆ laˇ chehˇ ve tawˇ hta‸ hk’a deh‸ na leh tawnˇ taˍ-o‸.

11Peuˬ leh shu mvuhˇmiˬ hk’aw awˬ ceˬ te chehˇ ve nawˬ ve chaw teˇ hpaˍ geh k’ai leh, Ngaˬ kanˇ paˆ uiˍ ve G’uiˬsha k’oˆ chehˇ ve tawˇ yawˇ hui hta‸ ca k’oˆ piˇ-oˆ. Yawˇ hui na maˇ na ve ka‸ yaˬ piˇ, teh‸ ngaˬ hta‸ k’oˆ laˇ ve yoˬ.

12Oˇ ve hk’aw‸ nawˉ, G’uiˬsha ve Awˬ ha hpu ngaˬ hta‸ chiˇ tu laˇ leh, ngaˬ awˬ hk’aw‸ nawˉ hpawˇ lo, Mvuhˇ naw ma hk’oˆ chehˇ ve G’uiˬsha ve awˬ me‸ awˬ hponˇ hta‸ chiˇ mvuh-o, teh‸ mvuhˇ tawˍ hkawˇ hk’e bvuhˬ tawˆ la ve hta‸ ngaˬ g’a kaˇ ve yoˬ.

13To nuˇ to shaˆ teˇ hpaˍ ve toˍ la‸ kʼuˉ awˬ hkawˇ bvuhˬ chehˇ ve hta‸ maˇ k’oˆ, miˬ hiˆ ve hk’a shuˍ bvuhˬ hehnˇ jaˇ ve gaˉ yaw teˇ hpaˍ bvuhˬ chehˇ ve hta‸ maˇ k’oˆ, ngaˬ g’a kaˇ ve yoˬ.

14G’uiˬsha ve kanˇ paˆ ngaˬ awˬ hk’oˆ lo ya‸ la leh, G’uiˬsha ve Awˬ ha hpu ngaˬ hta‸ shiˍ k’ai laˇ chehˇ ve teˇ yanˇ, ngaˬ lehˬ nyi ma zuhˆ jaˇ ve yoˬ.

15Hk’e te leh, ngaˬ lehˬ ngaˬ ve chaw teˇ hpa shu ceˬ te chehˇ taˍ kuiˬ, Hkeˍbaˆ iˉ kaˆ lawˬ paˇ lo cawˬ ve Teˍlaˍbiˆ venˇ lo k’ai leh, oˇ kaˬ lo suhˍ nyi hk’a gaˬ ngaˬ g’a kaˇ g’a mawˬ ve awˬ ceuˬ teˇ hpaˍ hta‸ ka kehn leh dawˇ maˇ tawˆ hpeh‸ chehˇ ve yoˬ.

16Suhˍ nyi ponˍ peuˬ hk’aw‸ nawˉ, G’uiˬsha ngaˬ hta‸ tawˇ teˇ pawˆ k’aw‸ yaw laˇ leh k’oˆ ve,

17Chaw yaˇ-oˬ, ngaˬ nawˬ hta‸ Iˉsaˍreˍlaˆ chaw hui hta‸ nyi shehˍ hpaˇ te tcuh laˇ chehˇ ve yoˬ. Ngaˬ shaˍ ti‸ piˇ laˇ chehˇ ve tawˇ teˇ hpaˍ, nawˬ yawˇ hui hta‸ teˇ caˉ g’a k’aw‸ k’oˆ maˍ piˇ ve yoˬ.

18Haiˬ ve chaw teˇ g’aˇ g’a suh tuˬ yoˬ, teh‸ ngaˬ k’oˆ taˍ peuˬ hk’aw‸ nawˉ, chaw oˇ ve lehˬ yawˇ ve ya‸ kuiˬ hta‸ k’aw‸ gu tuˬ, nawˬ yawˇ hta‸ shaˍ ti‸ maˇ piˇ ve k’o, yawˇ g’a suh-e tuˬ yoˬ. Yawˇ suh-e ve venˇbaˆ nawˬ awˬ hk’oˆ lo gaˬ la tuˬ yoˬ.

19Nawˬ yawˇ hta‸ shaˍ ti‸ piˇ ve ka‸ yawˇ ve ya‸ kuiˬ hta‸ maˇ k’aw‸ gu ve k’o, yawˇ g’a suh tuˬ yoˬ. Ya‸ hk’aˇ, yawˇ suh-e ve venˇbaˆ nawˬ awˬ hk’oˆ gaˬ la tuˬ ve maˇ heˆ.

20Chaw da‸ teˇ g’aˇ haiˬ ve kanˉ hta‸ te ve pa taw, ngaˬ yawˇ hta‸ tu‸ hkanˍ jaˇ piˇ lawˬ ve hta‸ nawˬ k’ai leh shaˍ ti‸ maˇ piˇ ve k’o, yawˇ g’a suh tuˬ yoˬ. Yawˇ te taˍ peuˬ ve da‸ ve kanˉ teˇ hpaˍ hta‸ ngaˬ dawˇ nawˇ tuˬ ve maˇ heˆ. Yawˇ g’a suh-e ve venˇbaˆ nawˬ awˬ hk’oˆ gaˬ la tuˬ yoˬ.

21Chaw da‸ oˇ ve teˇ g’aˇ venˇbaˆ hta‸ maˇ g’a k’aw‸ te tuˬ, nawˬ yawˇ hta‸ shaˍ ti‸ piˇ leh yawˇ na yuˬ leh venˇbaˆ maˇ k’aw‸ te ve k’o, yawˇ g’a te‸ chehˇ tuˬ yoˬ. Nawˬ ve a sha‸ hta‸ htawˇ ponˬ laˇ tuˬ yoˬ, teh‸ ngaˬ hta‸ k’oˆ laˇ ve yoˬ.

22G’uiˬsha ngaˬ geh chehˇ taˍ ve hta‸ ngaˬ jawˬ leh yawˇ ngaˬ hta‸, Tu leh lawˬ hk’o‸ lo k’ai loˬ. Oˇ kaˬ ngaˬ nawˬ hta‸ tawˇ yaw laˇ tuˬ yoˬ, teh‸ k’oˆ laˇ ve yoˬ.

23Hk’e te leh, ngaˬ lawˬ hk’o‸ lo k’ai ve yoˬ. Hkeˍbaˆ iˉ kaˆ lawˬ paˇ lo ngaˬ g’a mawˬ peuˬ ve hk’e, oˇ kaˬ lo htawˇ G’uiˬsha ve awˬ me‸ awˬ hponˇ hta‸ g’a k’aw‸ mawˬ ve yoˬ. Ngaˬ lehˬ miˬ chaˇ hk’oˆ lo boˆ taˍ ve yoˬ.

24Ya‸ hk’aˇ, G’uiˬsha ve Awˬ ha hpu ngaˬ hk’aw lo‸ la leh, ngaˬ hta‸ cawˍ tu laˇ ve yoˬ. Oˇ htaˇ, G’uiˬsha ngaˬ hta‸ chi hk’e k’oˆ laˇ ve yoˬ. Aˉ hk’aw lo k’o‸-e leh yehˬ miˉ hk’a deh‸ hoˆ chehˇ taˍ-o‸.

25Chaw yaˇ-oˬ, nawˬ lehˬ aˉ hkeh hpeh tiˍ ve hta‸ g’a hkanˍ leh, awˬ baˬ hpawˇ tawˆ-e gaˬ tuˬ ve maˇ heˆ.

26Chaw hpfuhˆ oˇ ve teˇ hpaˍ hta‸ nawˬ shaˍ ti‸ piˇ maˇ g’a tuˬ, nawˬ ve ha tehˍ hta‸ ngaˬ k’aˍ piˇ lawˬ tuˬ yoˬ.

27Oˇ ve hk’aw‸ nawˉ, ngaˬ nawˬ hta‸ tawˇ teˇ pawˆ k’aw‸ yaw laˇ leh, nawˬ ve ha tehˍ hta‸ k’aw‸ nuˇ la piˇ peuˬ hk’aw nawˉ, ngaˬ k’oˆ chehˇ ve tawˇ chi teˇ hpaˍ nawˬ chaw oˇ ve teˇ hpaˍ hta‸ g’a ca k’oˆ maˍ piˇ tuˬ yoˬ. Teˇ hpaˍ hpaˍ na yuˬ tuˬ yoˬ. Ya‸ hk’aˇ, teˇ hpaˍ hpaˍ na yuˬ tuˬ ve maˇ heˆ. Awˬ lawn k’o, yawˇ hui lehˬ chaw hpfuhˆ teˇ hpaˍ hpeh‸ ve yoˬ, teh‸ ngaˬ hta‸ k’oˆ laˇ ve yoˬ.

← Chapter 2 Jump to: Chapter 4 →